Unsay Nagtukmod Kanimo sa Pag-alagad sa Diyos?
“Higugmaon mo gayod si Jehova nga imong Diyos sa tibuok mong kasingkasing ug sa tibuok mong kalag ug sa tibuok mong kaisipan ug sa tibuok mong kusog.”—MARCOS 12:30.
1, 2. Unsang makapalipayng mga butang ang ginahimo maylabot sa buluhatong pagsangyaw?
ANG tinuod nga bili sa usa ka awto dili matino sa dagway lamang niini. Ang pintal mahimo nga magpatahom sa hitsura niini sa gawas, ug mahimong madani ang pumapalit sa eleganteng desinyo niini; apan ang mas importante mao ang mga butang nga dili dayon makita—ang makina nga magpadagan sa sakyanan, apil sa tanan pang ubang mga himan nga nagkontrol niini.
2 Ingon usab niini ang Kristohanong pag-alagad sa Diyos. Ang mga Saksi ni Jehova dagaya sa diyosnong mga buhat. Kada tuig, kapin sa usa ka bilyong oras ang ginagugol sa pagsangyaw sa maayong balita sa Gingharian sa Diyos. Dugang pa, minilyong mga pagtuon sa Bibliya ang ginadumala, ug kadtong ginabawtismohan mokabat ug gatosan ka linibo. Kon ikaw usa ka magwawali sa maayong balita, ikaw may bahin—bisag daw gamay—niining makaiikag nga mga kaihapan. Ug makasalig ka nga ang “Diyos dili usang dili-matarong nga kalimtan ang inyong buhat ug ang gugma nga inyong gipakita alang sa iyang ngalan.”—Hebreohanon 6:10.
3. Unsa gawas sa mga buhat ang hinungdanon kaayo sa mga Kristohanon, ug ngano?
3 Ugaling, ang tinuod nga bili sa atong pag-alagad—sa tingob o sa tinagsatagsa—dili pagasukdon sumala sa mga numero lamang. Ingon sa gisulti ngadto kang Samuel, “ang tawo nagatan-aw lamang sa panagway sa gawas; apan alang kang Jehova, siya nagatan-aw sa kasingkasing.” (1 Samuel 16:7) Oo, kon unsa kita sa sulod mao ang bililhon sa Diyos. Tinuod, ang mga buhat hinungdanon. Ang mga buhat sa diyosnong debosyon nagadayandayan sa pagtulon-an ni Jehova ug nagadani sa lagmit mahimong mga disipulo. (Mateo 5:14-16; Tito 2:10; 2 Pedro 3:11) Bisan pa, ang atong mga buhat dili magbutyag sa bug-os nga sugilanon. Ang nabanhawng Jesus may katarongan sa pagkabalaka sa kongregasyon sa Efeso—bisan pa sa ilang rekord sa maayong mga binuhatan. “Nahibalo ako sa inyong mga buhat,” iyang gisultihan sila. “Bisan pa, akong ginahuptan kini batok kaninyo, nga inyong gibiyaan ang gugma nga inyong gibatonan sa sinugdan.”—Pinadayag 2:1-4.
4. (a) Sa unsang paagi ang atong pag-alagad sa Diyos mahimong sama sa usa ka rituwal nga obligasyon? (b) Nganong adunay panginahanglan sa pagsusi sa kaugalingon?
4 Adunay usa ka kapeligrohan. Iniglabay sa usa ka yugto sa panahon, ang atong pag-alagad sa Diyos mahimong sama sa usa ka rituwal nga obligasyon. Gisaysay sa usa ka Kristohanong babaye ang iyang kahimtang niining paagiha: “Mogula ako sa pagsangyaw, motambong sa mga miting, magtuon, moampo—apan gihimo nako kining tanan sa awtomatiko, nga wala gayoy gibating bisan unsa.” Sa pagkamatuod, ang mga alagad sa Diyos angay hatagan ug komendasyon kon sila nagapaningkamot bisan pag mibati nga “nangatumba” o “gipaubos.” (2 Corinto 4:9; 7:6) Bisan pa niana, sa dihang ang atong Kristohanong rutina makapuol na, kinahanglang susihon natog maayo ang sulod sa makina, sa mahulagwayong pagkasulti. Bisan ang labing maayong mga awto kinahanglang mentinahon matag karon ug unya; sa susama, ang tanang mga Kristohanon kinahanglang maghimog regular nga pagsusi sa kaugalingon. (2 Corinto 13:5) Ang uban makakita sa atong mga buhat, apan sila dili makasabot kon unsay nagtukmod sa atong mga lihok. Busa, angay tagdon sa matag usa kanato ang pangutana: ‘Unsay nagtukmod kanako sa pag-alagad sa Diyos?’
Mga Babag sa Hustong Panukmod
5. Unsang sugo ang giingon ni Jesus nga una sa tanan?
5 Sa dihang gipangutana kon hain sa mga kasugoan nga gihatag sa Israel ang una sa tanan, si Jesus mikutlo ug usa ka sugo nga naghatag ug pagtagad, dili sa panagway sa gawas, kondili sa motibo sa sulod: “Higugmaon mo gayod si Jehova nga imong Diyos sa tibuok mong kasingkasing ug sa tibuok mong kalag ug sa tibuok mong kaisipan ug sa tibuok mong kusog.” (Marcos 12:28-30) Busa gipakita ni Jesus kon unsa gayod ang nagapalihok nga puwersa sa likod sa atong pag-alagad sa Diyos—ang gugma.
6, 7. (a) Sa unsang paagi maliputong giatake ni Satanas ang pamilya, ug ngano? (2 Corinto 2:11) (b) Sa unsang paagi ang pagmatuto makaapektar sa tinamdan sa usa sa diyosnong awtoridad?
6 Si Satanas nagtinguha nga mababagan ang atong katakos sa pag-ugmad sa hinungdanong hiyas nga gugma. Aron mahimo kini, usa ka paagi nga iyang nagamit mao ang pag-atake sa pamilya. Ngano? Tungod kay mao kini ang dapit diin ang atong una ug dili-mapala nga mga ideya bahin sa gugma ginaugmad. Si Satanas nahibalo pag-ayo sa prinsipyo sa Bibliya nga kon unsa ang nakat-onan sa pagkabata mahimong bililhon inigkahamtong. (Proverbio 22:6) Siya maliputon kaayong mosulay sa pagdaot sa atong hunahuna bahin sa gugma sa linghod nga edad. Ingong “diyos niining sistema sa mga butang,” nakita ni Satanas nga milampos ang iyang katuyoan diin ang kadaghanan nagdako diha sa mga panimalay nga dili mga dalangpanan sa gugma kondili mga panggubatan sa kayugot, kasuko, ug maabusohong sinultihan.—2 Corinto 4:4; Efeso 4:31, 32; 6:4, potnot; Colosas 3:21.
7 Ang librong Paghimo sa Imong Pamilyahanong Kinabuhi nga Malipayon nag-ingon nga ang paagi sa amahan sa pagdumala sa iyang papel ingong ginikanan “adunay dakong epekto sa tinamdan sa ulahi sa ilang mga anak diha sa awtoridad, sa tawo man o sa Diyos.”a Usa ka Kristohanong lalaki nga gipadako ilalom sa istrikto daogdaogang amahan midawat: “Alang kanako, ang pagsunod kang Jehova masayon; ang paghigugma kaniya mas malisod.” Sa pagkatinuod, ang pagsunod hinungdanon, kay sa mga mata sa Diyos “ang pagsunod labi pang maayo kay sa halad.” (1 Samuel 15:22) Apan unsay makatabang kanato sa paglihok nga labaw kay sa pagsunod lamang ug pag-ugmad sa gugma alang kang Jehova ingong nagatukmod nga puwersa sa likod sa atong pagsimba?
“Ang Gugma nga Iya ni Kristo Nagtukmod Kanamo”
8, 9. Sa unsang paagi ang halad lukat ni Jesus mopukaw sa atong gugma alang kang Jehova?
8 Ang labing dakong pagpadasig sa pag-ugmad sa bug-os kasingkasing nga gugma alang kang Jehova mao ang pag-apresyar sa halad lukat ni Jesu-Kristo. “Pinaagi niini ang gugma sa Diyos napadayag sa atong kahimtang, tungod kay gipadala sa Diyos ang iyang bugtong-gianak nga Anak nganhi sa kalibotan aron atong mabatonan ang kinabuhi pinaagi kaniya.” (1 Juan 4:9) Sa dihang kita makasabot ug moapresyar niana, kini nga buhat sa gugma mopukaw ug reaksiyon nga gugma. “Kita nahigugma, tungod kay [si Jehova] unang nahigugma kanato.”—1 Juan 4:19.
9 Kinabubut-ong gidawat ni Jesus ang iyang buluhaton sa pag-alagad ingong Manluluwas sa tawo. “Pinaagi niini atong nahibaloan ang gugma, tungod kay kanang usa mitugyan man sa iyang kalag alang kanato.” (1 Juan 3:16; Juan 15:13) Ang nagasakripisyo-sa-kaugalingong gugma ni Jesus angay mopukaw ug usa ka mapabilhong reaksiyon diha kanato. Sa pag-ilustrar: Ingnon ta nga giluwas ka gikan sa pagkalumos. Mopauli ka na lang ba, magpauga sa imong kaugalingon, ug kalimtan kini? Siyempre dili gayod! Mobati ka nga utangan sa tawo nga nagluwas kanimo. Gawas pa, utang mo nianang tawhana ang imong kinabuhi. Dili ba sama usab kita nga utangan kang Jehova nga Diyos ug kang Jesu-Kristo? Kon wala ang lukat, ang matag usa kanato malumos, sa mahulagwayong pagkasulti, sa sala ug kamatayon. Hinunoa, tungod niining dakong buhat sa gugma, kita may palaaboton nga mabuhing walay kataposan sa paraisong yuta.—Roma 5:12, 18; 1 Pedro 2:24.
10. (a) Sa unsang paagi himoon nato ang lukat nga usa ka personal nga butang? (b) Sa unsang paagi ang gugma ni Kristo nagtukmod kanato?
10 Palandonga ang lukat. Ipadapat kini sa kaugalingon, sama kang Pablo: “Sa pagkatinuod, ang kinabuhi nga gikinabuhi ko karon sa unod akong gikinabuhi pinaagi sa pagtuo nga maoy ngadto sa Anak sa Diyos, kinsa nahigugma kanako ug nagtugyan sa iyang kaugalingon alang kanako.” (Galacia 2:20) Ang maong pagpamalandong mopukaw ug kinasingkasing nga panukmod, kay si Pablo misulat ngadto sa mga taga-Corinto: “Ang gugma nga iya sa Kristo nagatukmod kanamo, tungod kay . . . siya namatay alang sa tanan aron sila nga nagakinabuhi magkinabuhi dili na alang sa ilang kaugalingon, kondili alang kaniya kinsa namatay alang kanila ug gibangon.” (2 Corinto 5:14, 15) Ang The Jerusalem Bible nag-ingon nga “nahupngan kami” sa gugma ni Kristo. Kon atong palandongon ang gugma ni Kristo, kita matukmod, dulot nga matandog, mahupngan pa. Motukbil kini sa atong mga kasingkasing ug motukmod kanato sa paglihok. Sumala sa paghatag niana ug kahulogan diha sa ubang mga pulong sa hubad ni J. B. Phillips, “ang mismong tuboran sa among mga lihok mao ang gugma ni Kristo.” Ang bisan unsang ubang matang sa panukmod dili mopatunghag dumalayong bunga diha kanato, sama sa gipakita sa panig-ingnan sa mga Pariseo.
“Pagbantay sa Lebadura sa mga Pariseo”
11. Isaysay ang tinamdan sa mga Pariseo sa relihiyosong mga buhat.
11 Gikuha sa mga Pariseo ang tanang kinabuhi gikan sa pagsimba sa Diyos. Imbes ipasiugda ang gugma alang sa Diyos, ilang gipasiugda ang mga buhat ingong mao ang sukdanan alang sa espirituwalidad. Ang ilang sobrang pagtagad sa detalyadong mga lagda naghimo kanila nga daw matarong nga tan-awon sa gawas, apan sa sulod sila “puno sa mga bukog sa patayng mga tawo ug sa tanang matang sa pagkadili-hinlo.”—Mateo 23:27.
12. Human nga giayo ni Jesus ang usa ka tawo, sa unsang paagi gipakita sa mga Pariseo ang ilang kaugalingon nga matig-a ug kasingkasing?
12 Sa usa ka higayon maluluy-ong giayo ni Jesus ang usa ka tawo kansang mga kamot nanguyos. Pagkadako sa kalipay niining tawhana sa dihang naayo dihadiha sa usa ka balatian nga sa walay duhaduha nakahatag ug dakong pisikal ug emosyonal nga kalisod! Apan, ang mga Pariseo wala moduyog sa pagkalipay kaniya. Hinunoa, gipadako nila ang usa ka teknikalidad—nga si Jesus naghatag ug tabang sa Igpapahulay. Bug-os nga nabalaka sa ilang istriktong paghubad sa Kasugoan, nasipyatan sa mga Pariseo ang tinuod nga diwa sa Kasugoan. Dili ikahibulong nga si Jesus “bug-os naguol tungod sa kakubol sa ilang mga kasingkasing”! (Marcos 3:1-5) Dugang pa, iyang gipasidan-an ang iyang mga disipulo: “Pagbantay sa lebadura sa mga Pariseo ug mga Saduseo.” (Mateo 16:6) Ang ilang mga lihok ug mga tinamdan giyagyag sa Bibliya alang sa atong kaayohan.
13. Unsang pagtulon-an ang atong makuha sa panig-ingnan sa mga Pariseo?
13 Ang mga panig-ingnan sa mga Pariseo nagtudlo kanato nga kinahanglang magbaton kita ug makataronganong hunahuna bahin sa mga buhat. Sa pagkatinuod, ang mga buhat hinungdanon, kay ang “pagtuo nga walay mga buhat patay.” (Santiago 2:26) Ugaling, ang mga tawong dili-hingpit kiling sa paghukom sa uban sumala sa ilang ginahimo inay sa kon unsa sila. Usahay, hukman pa gani nato ang atong kaugalingon niining paagiha. Kita tingali mahimong sobra ka mabalak-on sa mga binuhatan, ingon nga daw mao lamang kini ang bugtong sukdanan sa atong espirituwalidad. Mahimong makalimtan nato ang importansiya sa pagsusi sa atong mga motibo. (Itandi ang 2 Corinto 5:12.) Kita basin mahimong mga tawo nga istrikto kaayo sa pagsunod sa kasugoan nga “nagasala sa tagnok apan nagalamon sa kamelyo,” nga nagsunod sa letra sa kasugoan samtang naglapas sa katuyoan niini.—Mateo 23:24.
14. Sa unsang paagi ang mga Pariseo sama sa usa ka mahugaw nga kopa o pinggan?
14 Ang wala masabti sa mga Pariseo mao nga kon tinuod gayod nga gihigugma sa usa ka tawo si Jehova, ang mga buhat sa diyosnong debosyon kinaiyanhong mosunod. Ang espirituwalidad moagos gikan sa sulod pagawas. Kusganong gisaway ni Jesus ang mga Pariseo tungod sa ilang sayop nga hunahuna bahin niini, nga nag-ingon: “Alaot kamo, mga eskriba ug mga Pariseo, mga salingkapaw! tungod kay kamo nagahinlo sa gawas sa kopa ug sa pinggan, apan sa sulod kini sila puno sa inagaw ug paghingapin. Buta nga mga Pariseo, hinloi una ang sulod sa kopa ug sa pinggan, aron nga ang gawas niini mamahinlo usab.”—Mateo 23:25, 26.
15. Pagkutlog mga panig-ingnan nga nagpakita nga si Jesus dili lamang magtan-aw sa panagway sa gawas.
15 Ang panagway sa gawas sa usa ka kopa, o pinggan, o bisan sa tinukod dili magbutyag sa tanan. Ang mga disipulo ni Jesus nahingangha sa katahom sa templo sa Jerusalem, nga gitawag ni Jesus nga “usa ka langob sa mga kawatan” tungod sa ginahimo sa sulod. (Marcos 11:17; 13:1) Kon unsa ang matuod sa templo matuod diha sa minilyong nagaangkong mga Kristohanon, sama sa gipakita sa rekord sa Kakristiyanohan. Si Jesus miingon nga iyang hukman ang pipila nga naghimog “gamhanang mga buhat” pinaagi sa iyang ngalan ingong “mga mamumuhat sa kalapasan.” (Mateo 7:22, 23) Kasukwahi kaayo, siya miingon bahin sa usa ka babayeng balo nga miamot ug gamay kaayong kantidad nga salapi sa templo: “Kining kabos nga babayeng balo mihulog ug labaw pa kay kanilang tanan nga nanghulog ug salapi sa mga panudlanag bahandi . . . Siya, gikan sa iyang kawalad-on, mihulog sa tanan niyang gibatonan, ang iyang tibuok pangabuhian.” (Marcos 12:41-44) Nagkasumpaki ba nga mga paghukom? Dili gayod. Sa duha ka kahimtang, gipabanaag ni Jesus ang hunahuna ni Jehova. (Juan 8:16) Iyang nakita ang mga motibo sa likod sa mga buhat ug mipakanaog ug angay nga hukom.
“Sa Matag Usa Sumala sa Iyang Kaugalingong Katakos”
16. Nganong dili angay natong itandi-tandi kanunay ang atong nahimo nianang sa ubang Kristohanon?
16 Kon husto ang atong mga motibo, ang kanunayng pagtandi-tandi dili na kinahanglan. Pananglitan, diyutayng kaayohan lamang ang mahimo pinaagi sa maindigong pagpaningkamot sa paggugol ug samang gidaghanon sa panahon diha sa ministeryo nga magugol sa laing Kristohanon o tugbangan ang nahimo nianang usa diha sa pagsangyaw. Si Jesus miingon nga higugmaon si Jehova uban sa bug-os mong kasingkasing, hunahuna, kalag, ug kusog—dili ang sa uban. Ang katakos, kalig-on, ug mga kahimtang sa matag tawo dili-managsama. Kon itugot sa imong kahimtang, ang gugma motukmod kanimo sa paggugol ug daghang panahon sa pag-alagad—tingali bisan ingong bug-os panahong payunir nga ministro. Apan, kon ikaw nakigbugno sa usa ka sakit, ang panahong imong magugol sa pag-alagad tingali gamay ra kay sa imong ginatinguha. Ayaw pagkaluya. Ang pagkamatinumanon ngadto sa Diyos dili masukod pinaagi sa mga oras. Nakabaton ug putli nga mga motibo, ikaw may katarongan sa pagkalipay. Si Pablo misulat: “Ipapamatuod sa matag usa kon unsa ang iyang kaugalingong buhat, ug niana siya may hinungdan sa pagsadya labot sa iyang kaugalingon lamang, ug dili sa pagtandi sa laing tawo.”—Galacia 6:4.
17. Sa imong kaugalingong mga pulong, isaysay sa lakbit ang sambingay sa mga talanton.
17 Palandonga ang sambingay ni Jesus bahin sa mga talanton, sumala sa narekord sa Mateo 25:14-30. Gipatawag sa usa ka tawo nga talipanaw sa layo ang iyang mga ulipon ug iyang gipiyal ngadto kanila ang iyang mga kabtangan. “Ngadto sa usa siya naghatag ug lima ka talanton, ngadto sa lain duha, ngadto sa lain pa usa, sa matag usa sumala sa iyang kaugalingong katakos.” Sa dihang mipauli ang agalon aron makighusay sa iyang mga ulipon, unsay iyang nakaplagan? Ang ulipon nga gihatagan ug lima ka talanton nakaganansiyag lima pa ka talanton. Sa susama, ang ulipon nga gihatagan ug duha ka talanton nakaganansiyag duha pa ka talanton. Ang ulipon nga gihatagan ug usa ka talanton naglubong niini sa yuta ug walay gihimo sa pagpatubo sa bahandi sa iyang agalon. Unsa ang paghukom sa agalon niining situwasyona?
18, 19. (a) Nganong wala itandi sa agalon ang ulipon nga gihatagan ug duha ka talanton sa ulipon nga gihatagan ug lima ka talanton? (b) Unsay gitudlo kanato sa sambingay sa mga talanton bahin sa komendasyon ug mga pagtandi-tandi? (c) Nganong gihukman ug dili-maayo ang ikatulong ulipon?
18 Una, atong tagdon ang matag usa nga ulipon nga gihatagan ug lima ug duha ka talanton. Ngadto sa matag usa niini nga mga ulipon, ang agalon miingon: “Maayong pagkabuhat, maayo ug kasaligan nga ulipon!” Iya ba kahang isulti kini ngadto sa ulipon nga gihatagan ug lima ka talanton kon kana siya nakaganansiya lamang ug duha? Dili gayod! Sa laing bahin, siya wala moingon ngadto sa ulipon nga nakaganansiyag duha ka talanton: ‘Nganong wala ka man makaganansiya ug lima? Ngani, tan-awa ang imong isigkaulipon ug kon pilay iyang nakuhang ganansiya alang kanako!’ Wala, ang maluluy-ong agalon, kinsa naghulagway kang Jesus, wala maghimog mga pagtandi-tandi. Iyang gihatag ang mga talanton “sa matag usa sumala sa iyang kaugalingong katakos,” ug siya wala magpaabot ug sobra pa nga arang ikahatag sa matag usa. Ang duha ka ulipon nakadawat ug managsamang komendasyon, kay ang duha bug-os kalag nga nagtrabaho alang sa ilang agalon. Kitang tanan makakat-on gikan niini.
19 Siyempre, ang ikatulong ulipon wala makadawat ug komendasyon. Sa pagkamatuod, siya gilabay ngadto sa kangitngit sa gawas. Sanglit nakadawat ug usa lamang ka talanton, dili gayod siya laoman nga makaganansiyag ingon ka daghan sa ulipon nga may lima ka talanton. Apan, siya wala gayod mosulay! Ang dili maayong paghukom gipahamtang kaniya sa ulahi tungod sa iyang “tuman-kadaotan ug tapolan” nga tinamdan sa kasingkasing, nga nagpakitag pagkawalay-gugma sa agalon.
20. Sa unsang paagi gilantaw ni Jehova ang atong mga limitasyon?
20 Si Jehova nagpaabot sa matag usa kanato nga higugmaon siya uban sa atong bug-os nga kusog, apan pagkamakapalipay sa kasingkasing nga “siya nahibalo kaayo sa pagkagama kanato, nga nahinumdom nga kita mga abog”! (Salmo 103:14) Ang Proverbio 21:2 nag-ingon nga si “Jehova nagatimbang sa mga kasingkasing”—dili sa mga numero. Siya nakasabot sa bisan unsang mga limitasyon diin kita walay kontrol, pinansiyal man, pisikal, emosyonal, o uban pa. (Isaias 63:9) Sa samang higayon, siya nagpaabot nga atong pahimuslan ang tanang kahinguhaan nga atong nabatonan. Si Jehova hingpit, apan kon makiglabot sa iyang dili-hingpit nga mga magsisimba, siya wala magpangayog kahingpitan. Siya dili kay di-makataronganon sa iyang mga pakiglabot ni di-matinud-anon sa iyang mga pagdahom.
21. Kon gitukmod sa gugma ang atong pag-alagad sa Diyos, unsay mosangpot nga maayo?
21 Ang paghigugma kang Jehova sa atong bug-os nga kasingkasing, kalag, hunahuna, ug kusog “labaw pa kaayog bili kay sa tanang tibuok sinunog nga mga pahinungod ug mga halad.” (Marcos 12:33) Kon kita ginatukmod sa gugma, nan buhaton nato ang atong tanang maarangan sa pag-alagad sa Diyos. Si Pedro nagsulat nga kon ang diyosnong mga hiyas, lakip ang gugma, “nagalungtad diha kaninyo ug nagaawas, kini sila mopugong kaninyo sa pagkahimong dili-aktibo o dili-mabungahon labot sa tukmang kahibalo sa atong Ginoong Jesu-Kristo.”—2 Pedro 1:8.
[Footnote]
a Gipatik sa Watchtower Bible and Tract Society of New York, Inc.
Agig Pagsubli
◻ Unsa ang nagapalihok nga puwersa sa likod sa atong pag-alagad sa Diyos?
◻ Sa unsang paagi ang gugma ni Kristo magpalihok kanato sa pag-alagad kang Jehova?
◻ Unsang pagkalinga sa mga Pariseo ang kinahanglan natong likayan?
◻ Nganong dili maalamong itandi-tandi kanunay ang atong pag-alagad nianang sa ubang Kristohanon?
[Hulagway sa panid 16]
Ang mga katakos, kalig-on, ug mga kahimtang sa mga indibiduwal dili managsama