Tibuok-Kalibotang Kasegurohan Ilalom sa “Prinsipe sa Pakigdait”

Kapitulo 7

Paghusay Kabahin sa Paggamit sa Salapi ni Kristo

WALAY labot sa usa, walay kagamhanan nga walay mga problema sa ekonomiya. Ang kadaghanang mga kagamhanan dagko kaayog utang. Ang usa ka kagamhanan nga wala malakip niini mao karon ang kaylap nga giwaling “gingharian sa langit.” (Mateo 25:1) Ania gihapon sa yuta kadtong umaabot nga mga sakop sa langitnong Gingharian nga nagaalagad nianang maong kagamhanana. Niining labing kritikal nga panahon sa tibuok nga kasaysayan sa tawo, kining mga alagad sa “gingharian sa langit” gipaatubang sa husay. Kinahanglang makighusay sila nianang kagamhanana mahitungod sa paagi sa ilang paggamit sa bililhong mga butang nga gisalig diha kanila.

² Sa pag-ilustrar niining butanga, ang pangunang hawas nianang “gingharian sa langit” sa dugay nang katuigan kanhi miasoy ug sambingay, kun ilustrasyon. Angay nga makapaikag kini kanato karon, tungod kay gilakip kini sa “Prinsipe sa Pakigdait” diha sa iyang taas ug abot nga tagna mahitungod sa “ilhanan” nga nagatimaan sa iyang “presensiya” diha sa Gingharian uban ang bug-os nga awtoridad sa paghari. (Mateo 24:3) Kita karon nalangkit sa mga sangpotanan nga maoy mosunod sa katumanan sa matagnaong sambingay, sanglit ang atong padayong paglungtad, ang ato mismong kinabuhi, ang nalangkit. Busa ania karon ang paagi nga giasoy sa “Prinsipe sa Pakigdait” ang sambingay sa iyang mga apostoles sa hapit na ang iyang gisakripisyong kamatayon diha sa Kalbaryo.

Ang Sambingay sa mga Talanton

³ “Busa, pagtukaw kamo, tungod kay wala ninyo hibaloi ang adlaw o ang takna. Kay nahisama kini unya sa usa ka tawo nga sa dayon na niyag langyaw ngadto sa laing yuta, mitawag sa iyang mga ulipon ug kanila gipiyal niya ang iyang katigayonan. Ug ang usa gihatagan niyag lima ka talanton,a ug ang usa duha ka talanton, ug ang usa, usa ka talanton, sa matag-usa sumala sa iyang katakos, ug unya milakaw siya sa langyawng yuta. Ug ang nakadawat ug lima ka talanton milakaw dihadiha ug gipamatigayon niya kini, ug nakaganansiya siyag laing lima ka talanton. Sa samang paagi ang nakadawat ug duha ka talanton nakaganansiyag laing duha ka talanton. Apan ang nakadawat ug usa ka talanton milakaw, ug nagkalot sa yuta ug gilubong niya ang kuwarta sa iyang agalon.

⁴ “Ug unya tapos sa taas nga panahon miabot ang agalon niadtong mga ulipona ug iyang gihusay ang ilang hatagan kaniya. Ug ang nakadawat ug lima ka talanton miadto sa atubangan nga nagdala niini ug dugang lima ka talanton, ug miingon, ‘Agalon, gihatagan mo akog lima ka talanton; tan-awa, nakaganansiya akog laing lima ka talanton.’ Ug miingon kaniya ang iyang agalon, ‘Maayong pagkabuhat, maayo ug kasaligan nga ulipon! Sa diyutay kasaligan ka diay. Pagapiyalan ko ikaw sa daghan kong mga butang. Dumuyog ka sa kalipay sa imong agalon.’ Ug usab ang nakadawat ug duha ka talanton miduol sa atubangan nga nag-ingon, ‘Agalon, gihatagan mo akog duha ka talanton; tan-awa, nakaganansiya akog dugang duha ka talanton.’ Ang iyang agalon miingon kaniya, ‘Maayong pagkabuhat, maayo ug kasaligan nga ulipon! Sa diyutay kasaligan ka diay. Sa daghan pagapiyalan ko ikaw. Dumuyog ka sa kalipay sa imong agalon.’

⁵ “Sa kataposan ang nakadawat ug usa ka talanton miduol sa atubangan nga nag-ingon, ‘Agalon, nakaila ako kanimo nga masukoton ka nga pagkatawo, nga nagaani gikan sa uma diin dili ikaw maoy nagpugas, ug nagahipos gikan sa dapit diin dili ikaw maoy nagpapalid. Busa nahadlok ako ug milakaw ako ug gilubog ko sa yuta ang imong talanton. Ania ra ang imong talanton.’ Apan kaniya mitubag ang iyang agalon nga nag-ingon, ‘Daotan ug taspukan nga ulipon, nasayod ka diay nga dili ako nagaani gikan sa uma diin dili ako ang nagapugas, ug nagahipos gikan sa dapit diin dili ako ang nagpapalid? Nan, angay unta nga gideposito nimo ang akong talanton sa mga magbabangko, aron sa akong paghiuli madawat ko ang akong talanton nga may tubo.

⁶ “‘Busa kuhaa ninyo ang talanton gikan kaniya, ug ihatag kana sa ulipon nga may napulo ka talanton. Kay ang matag-usa nga adunay iya pagahatagan ug dugang pa, ug makabaton siya sa kadagaya; apan siya nga walay iya, pagakuhaan sa bisan unsa nga anaa kaniya. Ug ilabay ninyo ang walay pulos nga ulipon ngadto sa labawng kangitngitan sa gawas. Didto siya maghilak ug magkagot sa iyang ngipon.’”—Mateo 25:13-30.

⁷ Niining sambingaya, unsay gihawasan sa mga talanton? Usa ka bililhong butang, dili sa salapi kondili sa espirituwal nga diwa. Ang mga talanton naghawas sa sugo sa paghimog mga tinun-an ni Kristo. Uban niining sugoa mao ang dako kaayong pribilehiyo ingong mga sinugo ni Kristo, nga Hari, sa paghawas sa Gingharian ngadto sa tanang kanasoran sa kalibotan.—Efeso 6:19, 20; 2 Corinto 5:20.

⁸ Sa walay duhaduha, midangat na kita karon sa kinatayoktokan sa katumanan niining matagnaong sambingay! Midangat diha niining kaliwatana ang labing mangitngit nga yugto sa tibuok nga kasaysayan sa tawo! Sa pagkatinuod, adunay sibo nga kangitngitan sa gawas sa makitang bahin sa organisasyon ni Jehova nga ngadto niini ang “taspukan” ug “walay pulos” nga ulipon nga matang igalabay sumala sa sugo sa Agalon. Ang “kangitngitan sa gawas” naglarawan sa nangitngitang kahimtang sa kalibotan sa katawhan, ilabina sa relihiyosong pagkasulti. Ang kalibotan sa katawhan wala makatagamtam sa kahayag sa pabor ug panalangin sa Diyos. Wala kini sa kahayag sa kahibalo sa Gingharian sa Diyos. Kini ilalom sa “Diyos niining sistema sa mga butang,” nga “nagabuta sa mga hunahuna sa mga dili-magtutuo, aron sila dili makakita sa kahayag sa mahimayaong maayong balita mahitungod kang Kristo, nga mao ang dagway sa Diyos.”—2 Corinto 4:4.

⁹ Karon daghan kaayo ang ebidensiya nga ang usa nga gilarawanan sa “tawo,” nga adunay walo ka salapi nga talanton, mibalik gikan sa iyang pagpanaw sa langyawng yuta. Kanang maong “tawo” mao si Kristo Jesus. Ang iyang pagpanaw sa langyawng yuta nagdala kaniya ngadto sa presensiya sa Maglalalang sa adlaw, sa bulan, ug sa mga bitoon sa atong uniberso. Ingong timaan sa iyang pagbalik, duha ka gubat sa kalibotan, nga giubanan karon sa daghang gagmayng mga gubat, nagpadugo sa atong yuta. Sumala sa gitagna, giubanan kini sa mga kagutmanan, kamatay, ug mga linog, ug sa pagdaghan sa pagkadaotan ug sa pagwali sa “kining maayong balita sa Gingharian” diha sa tanang ginapuy-ang yuta. Kini nakatuman sa mga detalye sa gipamulong ni Jesus nga mao ang “ilhanan sa [iyang] presensiya ug sa konklusyon sa sistema sa mga butang.”—Mateo 24:3-15.

¹⁰ Bisag wala sa linain gipadayag sa sambingay ni Jesus, ang tawong mipanaw sa langyawng yuta, nga nawala sa hataas nga panahon, sa pagkatinuod mipanaw aron mabatonan “ang gingharian sa langit,” nga unang gihisgotan diha sa Mateo 25:1. Bisan pa sa pagbuto sa Gubat sa Kalibotan I, si Jehova nga Diyos, kansang gingharian ibabaw sa Israel napukan sa 607 W.K.P., nagpalingkod sa trono sa may katungod nga Manununod sa Gingharian sa 1914 K.P., sa tukmang panahon aron matapos ang pagyatak. Dili, ang Hentil nga mga nasod dili makakita sa ilang natural nga panan-awon sa paglingkod sa trono sa Usa nga gitawag ni Haring David nga “akong Ginoo.” (Salmo 110:1) Dili sila makakita tungod kay ang tawo sa sambingay, si Jesu-Kristo, miingon ngadto sa iyang mga tinun-an, sa wala pa mipanaw sa langyawng yuta: “Sa hamubo na lang nga panahon ang kalibotan dili na makakita kanako.”—Juan 14:19.

¹¹ Sanglit dili man makita sa tawhanong mga mata ang pag-abot ni Kristo ngadto sa gahom sa langitnong Gingharian, kinahanglang iyang ipaila ang iyang presensiya diha sa langitnong gingharian pinaagi sa mga timaan nga gihangyo sa mga apostoles kaniya sa tulo ka adlaw sa wala pa siya mamatay. Bahin nianang malig-ong timaan mao ang pagbalik sa tawo gikan sa langyawng yuta ug nakighusay sa iyang mga ulipon nga iyang gipiyalan sa bililhon kaayong mga talanton. Busa, nahitabo kana nga paghusay sa mga gisaligan sa paggamit sa mga talanton tapos sa 1914.

¹² Nagkahulogan kini nga husayon kadtong mga manununod sa “gingharian sa langit.” Nagpasabot kini nga husayon ang nanghibilin nianang Kristohanong lawas, nga gianak sa espiritu sa Diyos sa adlaw sa Pentekostes sa 33 K.P. (Buhat, kapitulo 2) Adunay mga nanghibilin kanila dinhi sa yuta sa panahon sa “konklusyon sa sistema sa mga butang ” gikan sa 1914 paunahan. Diha kanila nahulog ang obligasyon sa pagpanguna sa pagtuman sa tagna ni Jesus alang nianang panahona: “Kining maayong balita sa gingharian kinahanglang iwali sa tanang ginapuy-ang yuta sa pagpamatuod sa tanang kanasoran; ug unya moabot ang kataposan.” (Mateo 24:14; Marcos 13:10) Diha kanila nasandig ang responsibilidad sa pagpabiling matinumanon hangtod sa kataposan, aron maluwas ngadto sa Gingharian sa langit. (Mateo 24:13) Ginalantaw ang ilang kataposang kaluwasan, gilig-on sila sa Labing Makagagahom nga Diyos aron makalahutay hangtod karon, bisan pa sa tibuok-kalibotang paglutos. Kining kamatuorana maoy mga pamatuod sa iyang kahimuot diha kanila!

Mini nga mga Mangangangkon sa mga Talanton

¹³ Ang Kakristiyanohan nag-angkong madungganong gisaligan sa mga talanton sa adunahang tawo sa sambingay ni Jesus. Apan kon atong tan-awon ang iyang nahimo sukad sa 1914, unsay atong ikahukom? Kini: Siya wala makatuman sa iyang mga pangangkon. Dili-masinugtanon sa tawo diha sa sambingay, siya nakig-uban sa mga gingharian niining kalibotana; ang iyang mga hinigugma mao ang mga politiko niadtong mga kagamhanan sa kalibotan. Siya nagapaluyo gihapon sa Hiniusang Kanasoran, nga manununod sa wala na maglungtad nga Liga sa Kanasoran.

¹⁴ Dili gani siya katugbang sa gipiyalan ug usa ka talanton nga ulipon, nga taspukan ug wala makapatubo sa katigayonan sa iyang agalon. Busa niining yugtoa sukad sa kinatayoktokan sa Gubat sa Kalibotan I sa 1918, ang Kakristiyanohan dayag nga giladlad nga anaa kanunay sa kangitngitan sa gawas sa mahayag nga balay sa Agalon. Sa halawom nga kagabhion didto sa kalibotan sa gawas, sa matanghagaong pagkasulti, natuman na ang iyang paghilak ug pagkagot sa iyang ngipon. Daghan pa ang matuman niana dihang ang iyang politikal nga mga hinigugma mobali kaniya ug huboan siya ingon nga mao ang labing talamayong bahin sa bug-os nga Babilonyang Bantogan, ang kalibotang imperyo sa bakak nga relihiyon.

“Daotang Ulipon” nga Matang Gilabay sa Gawas

¹⁵ Kadtong nahimong bahin sa dinihogang nanghibilin ug gisaligan sa mga katigayonan sa Gingharian, apan mihunong sa pagpaningkamot sa pagdako sa tubo sa mibalik nga Agalon, gilabay sa gawas sa harianong pag-alagad sa Agalon. (Mateo 24:48-51) Dili na kita makakita sa taspukan “daotang ulipon” nga matang nga nagawali sa “kining maayong balita sa gingharian.” Hinunoa, ilang gihatagag pasiugda ang ilang personal nga kaluwasan inay ang intereses sa Gingharian sa Diyos. Ilang nakita karon ang ilang kaugalingon diha sa “kangitngitan sa gawas,” nga nahimutangan sa katawhan sa kalibotan. Ang ilang simbolikong talanton gikuha gikan kanila ug gihatag ngadto sa matang nga nagpakitag pagkamainandamon sa paggamit niadtong talantona sa panahon sa nanghibiling bahin niining “konklusyon sa sistema sa mga butang.”

¹⁶ Wala pay ingon ka paborableng panahon alang sa pagwali sa “maayong balita sa gingharian” pinaagi sa paggamit sa “talanton,” sa ato pa, ang tagsaong pribilehiyo, ang higayon, sa paglihok ingong “mga sinugo nga kapuli ni Kristo,” ang nagamandong Hari, ug sa paghimog tinun-an alang kaniya. (2 Corinto 5:20) Ug samtang nagkahiduol na ang kataposan, angay lamang nga tabangan sa “dakong panon” sa “ubang mga karnero” ang nanghibilin sa inanak sa espiritu nga mga sinugo samtang madasigon nilang pahimuslan sa bug-os ang bililhong “talanton” nga gipiyal kanila.

[Mga footnote]

[Mga Pangutana nga Pagatun-an]

1. Unsang kagamhanan ang walay problema sa ekonomiya, ug kinsa karon ang husayon niining kagamhanana?

2. Nganong interesado kaayo kita sa usa ka sambingay nga giasoy sa “Prinsipe sa Pakigdait”?

3. Sa unsang paagi ang mga ulipon nga nakadawat sa talanton gikan sa agalon sa wala pa mogikan nagpalakaw niini dihang mipanaw siya?

4. Unsay gisulti sa agalon ngadto sa mga ulipon nga nakapatubo sa mga talanton?

5, 6. Unsay gihatag nga pasumangil sa ikatulong ulipon nga nagtago sa talanton, ug unsay gihimo sa agalon kaniya?

7. Unsay gihawasan sa mga talanton?

8. (a) Ngadto sa unsang kangitngitan gilabay ang “taspukan” nga matang sa ulipon sa panahon niining “konklusyon sa sistema sa mga butang”? (b) Nganong ang kalibotan sa katawhan dili makatagamtam sa kahayag sa pabor ug panalangin sa Diyos?

9. (a) Ingong katumanan sa sambingay, kinsa ang gilarawanan sa “tawo,” ug unsa ka layoa ang iyang panaw? (b) Unsay mga ebidensiya nga nagtimaan sa iyang pagbalik?

10. (a) Nganong mipanaw ang tawo sa langyawng yuta? (b) Nganong ang kalibotan sa katawhan dili na sa aktuwal makakita sa iyang pagbalik?

11. (a) Unsay bahin sa ilhanan nga nagtimaan sa iyang pagbalik ug presensiya? (b) Kanus-a kini nahitabo?

12. (a) Kang kinsa gihatag ang kaakohan sa pagpanguna sa paghatag sa pagpamatuod sa Gingharian? (b) Diin nasandig ang ilang pinakapurongpurong nga kaluwasan?

13. (a) Kinsay nangangkon nga nakadawat sa mga talanton? (b) Unsay atong ikahukom kaniya?

14. Diin nato makita ang Kakristiyanohan karon?

15. Kinsa ang nakatuman sa larawan sa taspukan nga ulipon, ug diin karon nila nakita ang ilang mga kaugalingon?

16. (a) Unsa ang labing paborableng panahon nga magamit ang mahulagwayong mga talanton? (b) Unsay kaakohan karon ang napatong diha sa “dakong panon” sa “ubang mga karnero”?