Kinabuhi ug Ministeryo ni Jesus

Sa Dihang si Kristo Moabot Diha sa Gingharianong Gahom

SI Jesus uban gihapon sa iyang mga apostol diha sa Bukid sa mga Olibo. Sa pagtubag sa ilang pangutana bahin sa ilhanan sa iyang presensiya ug sa konklusyon sa sistema sa mga butang, iyang gibatbat kanila karon ang kataposan sa seryal sa tulo ka ilustrasyon. “Sa dihang moabot na ang Anak sa tawo diha sa iyang himaya, ug ang tanang manulonda uban kaniya,” si Jesus nagsugod, “siya molingkod diha sa iyang mahimayaong trono.”

Ang mga tawo dili makakita sa mga manulonda diha sa ilang langitnong himaya. Busa ang pag-abot sa Anak sa tawo, si Jesu-Kristo, uban sa mga manulonda dili usab makita sa tawhanong mga mata. Ang pag-abot nahitabo sa tuig 1914. Apan alang sa unsang katuyoan? Si Jesus nagbatbat: “Ug ang tanang mga nasod pagatigomon sa iyang atubangan, ug iyang pagalainon ang usa gikan sa usa, maingon sa magbalantay sa mga hayop nga magalain sa mga karnero gikan sa mga kanding. Ug ibutang niya ang mga karnero sa iyang tuo nga kamot, apan ang mga kanding sa iyang wala.”

Nagbatbat kon unsay mahitabo niadtong gilain diha sa giuyonang kiliran, si Jesus nag-ingon: “Ug ang hari magaingon niadtong anaa sa iyang tuo, ‘Umari kamo, kamong gipanalanginan sa akong Amahan, panunda ninyo ang gingharian nga gitagana alang kaninyo sukad pa sa pagkatukod sa kalibotan.’” Ang mga karnero dili magmando uban ni Kristo sa langit apan makapanunod sa Gingharian sa diwa sa pagkahimong yutan-ong mga sakop niini. “Ang pagkatukod sa kalibotan” nahitabo sa dihang si Adan ug Eva unang nanganak ug mga anak nga mahimong makapahimulos sa tagana sa Diyos sa paglukat sa katawhan.

Apan nganong ang mga karnero gilain diha sa giuyonang tuo nga kamot sa Hari? “Kay ako gigutom,” ang hari mitubag, “ug ako inyong gipakaon; ako giuhaw ug ako inyong gipainom. Ako dumuloong ug ako inyong giabiabi; hubo, ug ako inyong gibestihan. Ako nagmasakiton ug ako inyong giatiman. Ako nabilanggo ug giadto ninyo ako.”

Sanglit ang mga karnero ania sa yuta, sila gustong mahibalo kon giunsa nila pagbuhat kanang maayong mga buhat ngadto sa ilang langitnong Hari. “Ginoo, kanus-a ba kami nakakita kanimo nga gigutom ug amo ikaw nga gipakaon,” sila nangutana, “o giuhaw, ug amo ikaw nga gipainom? Kanus-a ba kami nakakita kanimo nga nadumuloong ug amo ikaw nga giabiabi, o hubo, ug amo ikaw gibestihan? Kanus-a ba kami nakakita kanimo nga nagkasakit o nabilanggo ug giadto ka namo?”

“Sa pagkatinuod magaingon ako kaninyo,” ang Hari mitubag, “nga maingon nga gibuhat ninyo kini ngadto sa usa sa mga labing gagmay niining akong mga igsoon, gibuhat usab ninyo kini kanako.” Ang mga igsoon ni Jesus mao ang mga nahibilin sa yuta nga 144,000 nga magmando uban kaniya sa langit. Ug ang pagbuhat ug maayo ngadto kanila, matud ni Jesus, maoy pagbuhat ug maayo usab ngadto kaniya.

Sunod, gisultihan sa Hari ang mga kanding. “Pahawa gikan kanako, kamong mga tinunglo, ngadto sa kalayong walay pagkatapos nga gitagana alang sa Yawa ug sa iyang mga manulonda. Kay ako gigutom, ug wala ninyo ako pakan-a, ug ako giuhaw, ug wala ninyo ako paimna. Ako nadumuloong, ug wala ninyo ako abiabiha; ako hubo, ug wala ninyo ako bestihi; ako nagmasakiton ug nabilanggo, apan wala ninyo ako duawa.”

Ang mga kanding, hinunoa, mireklamo: “Ginoo, kanus-a ka namong nakita nga gigutom o giuhaw o nadumuloong o hubo o nagmasakiton o nabilanggo ug wala ikaw namo alagari?” Ang mga kanding gihukman sa silot sa samang paagi nga paborableng gihukman ang mga karnero. “Maingon nga wala ninyo kini buhata ngadto sa labing gagmay niining [akong mga igsoon],” si Jesus mitubag, “wala usab ninyo kini buhata kanako.”

Busa ang pag-abot ni Kristo diha sa Gingharianong gahom, sa dili pa ang kataposan niining daotang sistema sa mga butang diha sa dakong kasakitan, maoy usa ka panahon sa paghukom. Ang mga kanding “mamahawa ngadto sa silot nga dayon, apan ang mga matarong [ang mga karnero] ngadto sa kinabuhing dayon.” Mateo 25:31-46; Pinadayag 14:1-3.

◆ Nganong ang presensiya ni Kristo dili gayod makita, ug unsa nga buluhaton ang iyang pagabuhaton nianang panahona?

◆ Diha sa unsang diwa nga panundon sa mga karnero ang Gingharian?

◆ Kanus-a nahitabo “ang pagkatukod sa kalibotan,” ug nganong sa mao man nga panahon?

◆ Sa unsang paagi nga ang mga tawo pagahukman ingong mga karnero o ingong mga kanding?