Usa ka Dakong Milenyo Nagsingabot

“Ug nakita ko ang mga trono, ug dihay nanaglingkod kanila, ug gihatag kanila ang gahom sa paghukom. Oo, nakita ko ang mga kalag niadtong gipamatay pinaagi sa atsa tungod sa ilang pagpamatuod kang Jesus ug tungod sa pagsulti mahitungod sa Diyos, ug ang mga wala mosimba sa mapintas nga mananap o sa larawan niini ug ang mga wala makadawat ug timaan sa ilang agtang ug sa ilang kamot. Ug sila nangabuhi ug nagmando nga mga hari uban kang Kristo sa usa ka libo ka tuig.” “Ug pagapahiran [sa Diyos] ang tanang luha gikan sa mga mata [sa katawhan], ug ang kamatayon mawala na, ni may pagbalata ni paghilak ni kasakit pa. Ang unang mga butang miagi na.”—Pinadayag 20:4; 21:4.

NIANANG paagiha ang Bibliya nagatagna sa nagsingabot nga dakong milenyo—ang Usa ka Libo ka Tuig nga Pagmando ni Jesu-Kristo ug sa kaubang pundok sa langitnong mga hari. Tingalig ikaw makiling sa dili pagtuo nianang tagnaa ingong kana yanong panghanduraw. Bisan pa niana, may igong katarongan nga imong isipon ang maong Milenyo ingong umaabot nga kamatuoran!

Sa usa ka butang, ang pagtuon sa Bibliya mopadayag kanimo nga kini naghisgot sa miaging unom ka milenyo sa kasaysayan sa tawo sa kasaligan kaayong paagi. Dugang pa, ang Bibliya maoy usa ka basahon sa tagna, ug ang daghang panagna niini, nangatuman sa matag detalye.a Kay kana ang kahimtang, nganong ang Bibliya dili kasaligan sa pagtagna sa nagsingabot nga Milenyo sa pagmando ni Kristo? Hinuon, basin ikaw mahibulong kon unsay ginasulti kanato sa Bibliya bahin nianang yugtoa sa panahon. Unsang katuyoan ang alagaran niini? Ug ilabinang makapaikag kanimo, sa unsang paagi kini moapektar sa imong kinabuhi?

Usa ka Panulondon nga Nawala

Ginapakita sa Bibliya nga ang Usa ka Libo ka Tuig nga Pagmando ni Kristo mao ang iyang paagi sa paghatag sa usa ka labing bililhong panulondon ngadto sa iyang “mga anak.” Apan unsang panulondona? Ug unsang “mga anak”? Ang usa ka panulondon ikabatbat ingong butang nga ihatag ngadto sa anak sa usa ka tawo inigkamatay niya. Sa dihang ang atong katigulangan nga si Adan nagmasukihon sa Diyos, nawad-an siya ug ang tanan niyang kaliwat—ang tibuok tawhanong banay—sa katungod sa kinabuhing walay kataposan diha sa usa ka yutan-ong paraiso. Sa ingon si Adan nagpasa sa usa ka panulondon sa sala, kamatayon, ug katimawa nganha sa iyang mga kaliwat.—Genesis 3:1-19; Roma 5:12.

Si Jesus mianhi sa yuta diha sa unod aron maangkon pag-usab alang sa katawhan ang panulondon nga giwala ni Adan. Kini iyang gibuhat pinaagi sa pagpamatuod nga matinumanon kang Jehova nga Diyos, nga kinabubut-ong naghatag sa iyang kinabuhi alang sa katawhan. (Juan 3:16) Pinaagi sa pagkinabuhi sa hingpit, walay-sala nga kinabuhi, naangkon ni Jesus ang katungod sa hingpit walay-kataposang kinabuhi sa Paraiso sa yuta—ang butang mismo nga giwala ni Adan. Bisan pa niana, wala pahimusli ni Jesus ang maong katungod; ni iyang giwala kini sa dihang siya namatay ug nabanhaw ngadto sa kinabuhi sa langit. Busa iyang magamit kini ingong bililhong panulondon nga ikapasa ngadto sa iyang “mga anak.”—Roma 5:18, 19.

Ang mga Manununod—“Mga Anak” ni Kristo

Sa Isaias 9:6 si Jesus matagnaong gitawag “Amahan nga Walay Kataposan.” Siya nahimong Amahan nga Walay Kataposan sa tinubos nga kalibotan sa katawhan, nga makahimo sa paghatag ug panulondon ngadto niining mga tinubos, o sinagop nga mga anak. (Mateo 20:28; tan-awa usab ang Salmo 37:18, 29.) Kini tin-awng gipakita sa iyang saad: “Umari kamo, kamong gipanalanginan sa akong Amahan, panunda ninyo ang gingharian nga giandam alang kaninyo sukad sa pagkatukod sa kalibotan.” Siya dugang miingon: “Malipayon ang mga malumo, sanglit panundon nila ang yuta.”—Mateo 5:5; 25:34.

Hinuon, aron ang yuta mahimong angay nga panulondon ang mga kahimtang kinahanglang usbon pag-ayo—nga ipadangat sa kahingpitan! Kini kinahanglang mahimong usa ka kalibotan diin ang hingpit nga pakigdait ug harmoniya magamando taliwala sa tanang linalang sa Diyos. (Isaias 11:6-9) Ang matag timaan sa tawhanong kadili-hingpit kinahanglang mapapas, apil ang kamatayon. (1 Corinto 15:25, 26) Kini nagkahulogan nga ang mga patay, kinsa bahin sa tinubos nga katawhan, kinahanglang mabanhaw. Sa maong paagi lamang nga sila makabaton sa higayon nga mahimong mga manununod ni Kristo!—Juan 5:28, 29.

Busa, ang Usa ka Libo ka Tuig nga Pagmando ni Kristo mahimong usa ka malipayong yugto diin ang katawhan inanay nga “mapahigawas sa pagkaulipon sa kadunotan” ug makakab-ot sa kahingpitan. (Roma 8:21) Makaiikag, bisan ang sekular nga mga tinubdan nagaila niini ingon nga mao ang katuyoan sa usa ka milenyo. Ang Webster’s Ninth New Collegiate Dictionary (1985 edisyon) nagabatbat sa “milenyo” ingong “usa ka yugto sa dakong kalipay o tawhanong kahingpitan.”

Molabaw sa Pagmando ni Solomon

Kining mahimayaong Milenyo ikatandi sa malinawon ug mauswagong 40-tuig nga pagmando ni Haring Solomon sa karaang Israel. (1 Hari 4:24, 25, 29) Sa dihang ang rayna sa Sheba miduaw kang Haring Solomon, siya miingon: “Tinuod ang pulong nga akong nadungog sa akong kaugalingong yuta mahitungod kanimo ug mahitungod sa imong kaalam. Ug ako wala motuo sa mga pulong hangtod nga ako mianhi aron makakita ang akong mga mata mismo; ug, tan-awa! wala isugilon kanako ang katunga. Ikaw milabaw sa kaalam ug kauswagan sa mga butang nga nadungog nga akong napamatian. Malipayon ang imong mga tawo; malipayon kining imong mga alagad nga nagatindog sa imong atubangan sa tanang panahon, nga nagapatalinghog sa imong kaalam!”—1 Hari 10:6-8.

Kon ang kalinaw, kauswagan, ug kaalam sa 40-tuig nga pagmando sa yutan-ong Haring Solomon, milabaw, oo, mikapin sa doble, sa dagkong mga pagdahom sa rayna sa Sheba, nan ang Usa ka Libo ka Tuig nga Pagmando sa labaw, langitnong Haring Solomon, si Jesu-Kristo, tinong molabaw sa handurawan sa tawo! Sa mga pulong ni Jesus mismo, siya maoy “labaw pa kay kang Solomon.” (Mateo 12:42) Sulayi paghanduraw ang labing himsog, mauswagon, malinawon, matarong, ug malipayong mga kahimtang sa yuta nga imong mahanduraw, ug dili nimo hisabtan bisan ang usa ka tipik sa ginatagana sa Milenyo ni Kristo.

Mahiatol sa Ikatulong Milenyo?

Ang mga hitabo sa kalibotan sukad 1914 nagapakita nga kita nagapuyo sa “konklusyon sa sistema sa mga butang.” Si Jesus dugang miingon nga ang kaliwatan nga nalangkit niining gitagnang mga hitabo “dili gayod mahanaw hangtod nga mahitabo kining tanang butang.” Nan, nagpasabot ba kini nga ang Milenyong Pagmando ni Kristo mahiatol sa ikatulong milenyo?—Mateo 24:3-21, 34.

Gipasidan-an ni Jesus ang iyang mga tinun-an nga dili magbanabana. Siya miingon: “Dili inyoha ang pagkasayod sa mga panahon nga gimbut-an sa Amahan sa iyang kaugalingon.” (Buhat 1:7) Ug mahitungod sa eksaktong “adlaw ug takna” sa dihang kanang mga butanga mahitabo, si Jesus miingon nga ang iya lamang Amahan, si Jehova nga Diyos, ang nasayod. (Mateo 24:36) Busa, ang Bibliya wala magpaluyo sa bisan hain sa karon nagkadaghang manalagna sa adlaw sa kalaglagan ug sa mga kalihokan nga nagapunting sa bagting sa tungang gabii sa Gabii sa Bag-ong Tuig, 1999, ingong kataposan sa kalibotan.

Ugaling, ang mga panghitabo sa kalibotan karong adlawa tin-awng nagapakita nga ang panahon sa kataposan niining mangiob, daotang sistema sa mga butang “halalom na” ug ang Milenyo ni Kristo “nagkahiduol na.” (Roma 13:12) Inay sa pagbanabana sa eksaktong adlaw ug takna sa pag-abot niini, panahon na karon sa pagkuhag kahibalo sa mga kinahanglanon sa Diyos alang sa kaluwasan. (Juan 17:3) Niining paagiha imong hisayran kon unsaon pagkaapil niadtong pagasultihan ni Jesus: “Umari kamo, kamo nga gipanalanginan sa akong Amahan, panunda ninyo ang gingharian nga giandam alang kaninyo sukad sa pagkatukod sa kalibotan.” (Mateo 25:34) Ang mga Saksi ni Jehova andam ug arang makatabang nimo nga mahiapil sa mga magpahimulos sa mga panalangin sa umaabot nga dakong Milenyo.b

[Mga footnote]

[Blurb sa panid 6]

“Umari kamo, kamong gipanalanginan sa akong Amahan, panunda ninyo ang gingharian nga giandam alang kaninyo sukad sa pagkatukod sa kalibotan”