Pagpabiling Organisado Aron Maluwas Ngadto sa Milenyo

“Sila mahimong usa ka panon, usa ka magbalantay.”—JUAN 10:16.

1. Alang sa buhi-kanunay nga Diyos, ang usa ka libo ka tuig sama sa unsa?

SI Jehova mao ang Maglalalang sa panahon alang sa katawhan. Ug alang kaniya, ang Diyos nga walay kamatayon nga nagagikan sa walay kataposan hangtod sa walay kataposan, ang usa ka libo ka tuig maoy sama ra sa tuling-molabay nga adlaw o sama ra sa usa ka yugto sa pagtukaw sa usa sa atong mga gabii.​—Salmo 90:4; 2 Pedro 3:8.

2. Unsang yugto sa panahon ang gigahin ni Jehova aron panalanginan ang tanang katawhan?

² Gitakda sa Diyos ang simbolikong adlaw sa usa ka libo ka tuig nga niana panalanginan niya ang tanang banay sa yuta. (Genesis 12:3; 22:17, 18; Buhat 17:31) Kini nagaapil sa mga patay karon ug sa mga buhi pa. Unsaon kini pagbuhat sa Diyos? Aw, pinaagi sa Iyang Gingharian pinaagi ni Jesu-Kristo, ang “binhi” sa Iyang simbolikong babaye!​—Genesis 3:15.

3. (a) Sa unsang paagi samaran ang tikod sa Binhi sa babaye sa Diyos, apan sa unsang paagi ang maong samad naayo? (b) Sa pagkatapos sa Usa ka Libo ka Tuig nga Pagmando ni Jesu-Kristo, unsay iyang buhaton sa simbolikong bitin?

³ Ang simbolikong tikod sa Binhi sa babaye sa Diyos (o langitnong organisasyon) nasamaran sa dihang nakaagom si Jesu-Kristo sa kamatayon ingong sinakit ug nagpabiling patay sa bahin sa tulo ka adlaw sa tuig 33 sa atong Komung Panahon. Apan sa ikatulong adlaw, ang Diyos nga Makagagahom sa Tanan, ang Dakong Maghahatag-Kinabuhi, nag-ayo nianang samara pinaagi sa pagbanhaw sa iyang maunongong Anak ngadto sa kinabuhing dili mamatay diha sa dominyo sa espiritu. (1 Pedro 3:18) Sanglit si Jesus dili na gayod mamatay pag-usab, siya makahimo sa pagmando ingong Hari ibabaw sa katawhan sulod sa usa ka libo ka tuig ug sa “pagsamad” sa ulo sa simbolikong bitin, nga dugmokon siya sa pagkalaglag sa pagkatapos sa Usa ka Libo ka Tuig nga Pagmando. Pagkadako unya kanang panalangin alang sa matinumanong napasig-uling katawhan!

4. Unsang matang sa programa ang ginahimo sa Diyos uban sa iyang katawhan?

⁴ Ang dako kaayong pag-organisar nagapadayon taliwala sa katawhan ni Jehova sa tibuok yuta niining “konklusyon sa sistema sa mga butang” sukad sa pagkatapos sa Hentil nga mga Panahon sa 1914. (Mateo 24:3; Lucas 21:24, King James Version) Kining programa sa pag-organisar una pa sa Milenyo ginabuhat nga nahiuyon sa kabubut-on ug ubos sa pagdumala sa Dakong Organisador, si Jehova nga Diyos. Pinaagi sa iyang babaye, ang iyang samag-asawa langitnong organisasyon, ang pagkatawo sa iyang gisaad nga Gingharian pinaagi ni Jesu-Kristo nahitabo sa 1914, sumala sa gipamatud-an sa pagkatuman sa tagna sa Bibliya.

5. Ang pagkatawo sa unsa ang gitagna sa Pinadayag 12:5, ug kanus-a ba kini unang gipatin-aw diha sa The Watch Tower?

⁵ Sa ingon mahimayaong natuman kining mga pulonga sa Pinadayag 12:5: “Siya nanganak sa usa ka anak, nga usa ka lalaki, nga magbantay sa tanan nga nasod pinaagi sa olisi nga puthaw. Ug ang iyang anak gisakgaw ngadto sa Diyos ug sa iyang trono.” Ang pagkatawo sa Gingharian ni Jehova pinaagi ni Kristo, sumala sa gihulagway sa bag-ong-natawo nga anak sa babaye sa Diyos, unang gipatin-aw sa The Watch Tower sa Marso 1, 1925. Ang pagkatawo sa maong Mesiyanikong Gingharian sa langit sa 1914 lahi sa pagkatawo sa “nasod” sa ‘mga anak’ sa Sion sa yuta niadtong 1919.​—Isaias 66:7, 8.

6. (a) Ang pagkatawo sa Gingharian nagkinahanglan sa unsang buluhaton nga gitagna ni Jesus? (b) Ang pagbuhat niining buluhatona nagkinahanglan sa unsa sa bahin sa katawhan ni Jehova, ug unsang matang sa dagway ang ilang ginapadayag karon?

⁶ Ang pagkatawo sa Gingharian ni Jehova nga pinaagi niana iyang bayawon ang iyang may-katungod nga pagkasoberano sa tibuok uniberso​—ay, aniay butang nga takos isangyaw sa tibuok nga yuta! Ug ania ang panahon aron matuman kining mga pulong ni Jesus bahin sa mga pamatuod sa iyang dili-makitang “presensiya”: “Kining maayong balita sa gingharian igawali sa tibuok gipuy-ang yuta alang sa usa ka pamatuod sa tanang nasod; ug unya ang kataposan moabot.” (Mateo 24:3, 14) Ang nagkahiusa, may-panagkauyon nga pagwali sa gidak-ong internasyonal, nga tibuok yuta magkinahanglan gayod sa pag-organisar sa makitang bahin sa unibersohanong organisasyon ni Jehova. Ang Watch Tower Bible and Tract Society, ingong gihawasan sa presidente niini niadto, si J. F. Rutherford, uyon niini. Busa, sukad sa tapos-gubat nga tuig 1919, ang pag-organisar sa maunongong mga tigpaluyo sa Sosyedad ingong napasig-uling nasod mapinadayonong miabante, uban ang pag-ampo alang sa giya ug panalangin sa Supremong Organisador, si Jehova nga Diyos. Atubangan sa Gubat sa Kalibotan II, bisan pa sa mapait nga pagsupak sa mga Pasista, sa kalihokang Nazi ubos ni Hitler, ug sa Katolikong Aksiyon, ang mga Saksi ni Jehova sa tibuok nga yuta mipadayag sa nagkahiusang dagway ngadto sa kaaway nga kalibotan.

7. (a) Pinaagi sa pagpabilin lamang sa unsang relasyon sa usag usa nga ang katawhan ni Jehova makalaom nga makalabang-buhi sa dakong kasakitan? (b) Sa unsang paagi ang mga naluwas sa Baha nakalabang sa tibuok-yutang Lunop, ug kinsay ilang gilandongan?

⁷ Ang mga Saksi ni Jehova lamang, kadtong sakop sa dinihogang nahibilin ug sa “dakong panon,” ingong nahiusang organisasyon ubos sa panalipod sa Supremong Organisador, ang nagbaton ug Kasulatanhong paglaom nga makalabang-buhi sa umaabot nga kalaglagan niining hinukmang-malaglag nga sistema nga gimandoan ni Satanas nga Yawa. (Pinadayag 7:9-17; 2 Corinto 4:4) Sila ang maglangkob sa “unod” nga giingon ni Jesu-Kristo mamaluwas latas sa pinakadaotang kasakitan sa tibuok kasaysayan sa tawo. Sama sa kahimtang sa mga adlaw ni Noe, matud ni Jesus, mao usab unya sa adlaw nga Siya igapadayag. Sulod sa arka nga gidangtag daghang mga tuig sa organisadong paningkamot sa paghuman, walo lamang ka tawhanong kalag ang naluwas sa tibuok-yutang Lunop. Sila naluwas ingong nahiusang banay. (Mateo 24:22, 37-39; Lucas 17:26-30) Ang asawa ni Noe motumbas sa pangasaw-onon ni Kristo, ug ang iyang mga anak lalaki ug mga umagad-nga-babaye motumbas sa “ubang mga karnero” karon ni Jesus, nga miuswag nga nagakadaghan nga dakong panon, nga ang kataposang gidaghanon wala nato hisayri. (Juan 10:16) Aron maluwas ngadto sa Milenyo ubos sa Mas Dakong Noe, si Jesu-Kristo, kinahanglang magpabilin silang organisado sa dinihogang nahibilin, “ang mga pinili” nga tungod kanila ang mga adlaw sa “dakong kasakitan” pamub-on.​—Mateo 24:21, 22.

Pagkaluwas Ngadto sa Milenyo

8. Sa pagtapos sa iyang tagna mahitungod sa iyang presensiya, unsang ilustrasyon ang gihatag ni Jesus, ug sa unsang paagi ang petsang Hunyo 1, 1935, makahuloganon kon bahin sa pagsabot niini?

⁸ Sumala sa Ebanghelyo ni Mateo, gitapos ni Jesus ang iyang tagna mahitungod sa ilhanan sa iyang presensiya pinaagi sa usa ka ilustrasyon. Kasagarang gipahayag ingong sambingay sa mga karnero ug mga kanding, kini mapadapat karon, sulod sa konklusyon niining sistema sa mga butang, nga misugod sa pagkatapos sa Hentil nga mga Panahon sa 1914. (Mateo 25:31-46) Ang petsang Sabado, Hunyo 1, 1935, makahuloganon kon bahin sa pagsabot sa ilhanan niining mga karneroha ingong mga membro sa dakong panon. Nianang adlawa, sa usa ka kombensiyon sa mga Saksi ni Jehova sa Washington, D.C., 840 ka tawo ang nabawtismohan ingong simbolo sa ilang walay-ukon-ukon nga pagpahinungod kang Jehova nga Diyos pinaagi ni Jesu-Kristo. Ang kinabag-an nila mihimo niini ingong dinalian nga pagsanong sa usa ka diskurso bahin sa Pinadayag 7:9-17 nga gihatag ni J. F. Rutherford. Maoy ilang tinguha nga mahimong bahin sa dakong panon sa ubang mga karnero sa Maayong Magbalantay, kay nagbaton sa higayon nga maluwas sa umaabot nga dakong kasakitan ug makapadayong buhi latas sa kataposan niining sistemaha ug ngadto sa Milenyong Pagmando sa Magbalantay-Hari, si Jesu-Kristo. Sa kataposan, makab-ot nila ang kinabuhing walay kataposan sa usa ka paraisong yuta.​—Mateo 25:46; Lucas 23:43.

9. Nganong ang mga karnero gidapit sa pagpanunod sa “gingharian nga giandam alang [kanila],” ug sa unsang paagi sila makahimo gayod sa pagbuhat ug maayo nganha sa mga igsoon sa Hari?

⁹ Nganong kining samag-karnerong mga tawo gidapit nga “panundon ang gingharian nga giandam alang [kanila] sukad sa pagkatukod sa kalibotan”? Ang Hari misulti kanila nga tungod kay gibuhat nila ang maayo ngadto sa iyang “mga igsoon,” ug sa ingong paagi nagbuhat niana kaniya. Sa pamulong “mga igsoon,” gipasabot sa Hari ang nahibilin sa iyang espirituwal nga mga igsoon nga ania pa sa yuta niining konklusyon sa sistema sa mga butang. Kay nahimong usa ka panon uban niining mga igsoon sa Magbalantay-Hari, si Jesu-Kristo, sila makapabilin sa labing suod nga pakig-uban nga posible sa nahibilin niana ug sa ingon makahimo sa pagbuhat ug maayo kanila. Bisan sa materyal nga mga paagi, sila makatabang sa mga igsoon ni Jesus sa pagwali sa mensahe sa natukod nga Gingharian sa tibuok kalibotan sa dili pa moabot ang kataposan. Alang niini ang mga karnero magmahal sa ilang pribilehiyo nga magpabiling organisado uban sa nahibilin ingog usa ka panon sa usa ka Magbalantay.

10. Unsay ipasabot nga ang mga karnero “magapanunod sa gingharian nga giandam alang [kanila] sukad sa pagkatukod sa kalibotan”?

¹⁰ Ang pagpanunod sa gingharian nga giandam alang kanila wala magpasabot nga ang maong mga karnero magmando uban kang Jesu-Kristo ug sa iyang mga igsoon sa langit sa usa ka libo ka tuig. Hinunoa, sukad sa sinugdan sa Milenyo, panundon sa mga karnero ang yutan-ong dominyo sa Gingharian. Sanglit sila mao ang mga kaliwat ni Adan ug ni Eva, kining yutan-ong dominyo nga banoson sa Gingharian sa Diyos pinaagi ni Kristo naandam na alang kanila “sukad sa pagkatukod sa kalibotan” sa matubos nga katawhan. Dugang pa, sanglit ang mga karnero mahimong yutan-ong mga anak sa Hari, nga mahimong ilang “Amahan nga Walay Kataposan,” mapanunod nila ang yutan-ong dominyo, o pagkabutang, ilalom sa Gingharian sa Diyos.​—Isaias 9:6, 7.

11. Sa unsang paagi gipakita sa mga karnero nga sila dapig sa Gingharian, ug tungod niini, unsang panalangin ang ilaha?

¹¹ Kasukwahi sa simbolikong mga kanding, ang mga karnerohong tawo tinong nagapadayag nga sila nagadapig sa Gingharian. Sa unsang paagi? Pinaagi sa mga binuhatan, dili lamang mga pulong. Tungod sa pagkadili-makita sa Hari didto sa mga langit, sila dili makahimog maayo nga direkta kaniya sa pagpaluyo sa iyang Gingharian. Busa sila nagabuhat ug maayo ngadto sa iyang espirituwal nga mga igsoon nga ania pa sa yuta. Bisan pag kini makapahiagom sa pagdumot, pagsupak, ug paglutos pinaagi sa mga kanding, tungod nianang pagbuhat ug maayo, ang mga karnero sultihan sa Hari nga sila ‘gipanalanginan sa iyang Amahan.’

12. Ang makalabang-buhing mga karnero makapribilehiyo sa pag-abiabi ni kinsa, ug niining bahina, unsay gihambin nga hunahuna sa mga sakop sa nahibilin?

¹² Ang dakong panon sa samag-karnerong mga magtatabang sa espirituwal nga mga igsoon sa Hari panalanginan sa makalipayng pribilehiyo nga makalabang-buhi ngadto sa Milenyo. Sa nahaigong panahon, makaambit sila sa pag-abiabi sa mga tawong patay nga anaa sa handumanang mga lubnganan. (Juan 5:28, 29; 11:23-25) Kini mag-apil sa matinumanong mga patriarka ug mga propeta nga nakaagom sa kalisod ug nag-antos ug dako alang sa kabayawan sa pagkasoberano ni Jehova aron sila “makakab-ot sa labi pang maayong pagkabanhaw,” nga lagmit sayosayo nga pagkabanhaw. (Hebreohanon 11:35) Ang maong binanhaw nga mga lalaki ug mga babaye sa pagtuo, nga ang pipila gitala sa Hebreohanon kapitulo 11, mag-apil kang Juan Bautista. (Mateo 11:11) Ang pipila sa dinihogang nahibilin naghunahuna nga makalabang-buhi ug magpadayong buhi sa pag-abiabi sa maong binanhawng mga matinumanon nga namatay una sa Pentekostes 33 K.P. Makapribilehiyo ba sa ingon ang mga dinihogan?

13. Nganong dili kinahanglan nga ang nahibilin anaa sa pag-abiabi ug pag-atiman niadtong binanhaw sa yuta?

¹³ Kana dili na kinahanglan. Ang dakong panon sa mga maluwas sa kasakitan maanaa unya nga daghan kaayo sa pag-atiman sa kahimtang ug pagpasinati sa mga binanhaw sa “bag-ong yuta” ilalom sa “bag-ong mga langit.” (2 Pedro 3:13) Bisan karon, ang dakong panon giorganisar alang niini. Karong adlawa, sa dihang ang espirituwal nga mga igsoon ni Jesus gikatahong kubos sa 9,000 sa gidaghanon, ang mga makalabang-buhi kanila mahimong diyutay ra kaayo aron sa pag-atiman sa tanang pangandam nga buluhaton nga mosangko sa malangkobon nga pagbanhaw. (Ezekiel 39:8-16) Nan, dinhi ang dakong panon, kansang gidaghanon nakaabot sa minilyon, makaalagad nga labing maayo. Ug pihong ang maong pribilehiyo gitagana alang kanila.

14. (a) Daghan sa dakong panon ang ginabansay alang sa unsa, ug nganong daghan kanila ang nagadawat karon ug responsabilidad? (b) Unsang mga hitabo ang kinahanglang mahitabo sa dili madugay, ug unsang buluhaton ang nagapaabot sa ubang mga karnero?

¹⁴ Daghan sa dakong panon ginabansay na sa mga responsabilidad sa kongregasyon ug pinaagig mga programa sa pagpanukod nga ginahimo sa organisasyon sa Diyos sa tibuok nga yuta. Ug makaikag ang pagkakitag dugang mga tawo nga hamtong sa espirituwal sa dakong panon nga ginahatagag mas dakong responsabilidad diha sa organisasyon nga gipalihok karon ni Jehova sa yuta. Ang mga nahibilin sa mga dinihogan nagkatigulang na ug dili na kaayo makaarang sa pagpas-an sa lulan. Kining mga igsoon sa Hari nahinangop sa mahigugmaong organisasyon nga tabang nga ginahatag sa may-katakos sa espirituwal nga mga ansiano ug mga ministeryal nga alagad sa ubang mga karnero. Sa dili na madugay, ang Dakong Babilonya mahanaw na gikan sa yuta. Dayon, sumala sa gipaila sa Pinadayag 19:1-8, ang kasal sa Kordero uban sa iyang pangasaw-onon sa tanang 144,000 pagataposon na sa mga langit, ug ang ubang mga karnero, nga nagaalagad ingong usa ka bag-ong yuta ilalom sa bag-ong mga langit, magahawas sa Hari sa pagtuman sa dakong buluhaton sa pagpasig-uli hangtod nga ang tibuok yuta mahimong usa ka napuy-an nga paraiso sa kadayegan ni Jehova.​—Isaias 65:17; itandi ang Isaias 61:4-6.

15. Unsang mga palaaboton alang sa Milenyo ang ginapaabot sa dakong panon?

¹⁵ Sa Milenyong Paghari ni Kristo, sa dihang mabanhaw na ang tinubos nga mga patay nga tawo, ang nakalabang-buhing dakong panon magpahimulos sa dagko kaayo ug labing madungganong mga pribilehiyo. Sila unya mahimong mga anak lalaki ug mga anak babaye sa Hari. Posible unya nga ang maong mga anak sa ilang taliwala magbaton sa ranggo nga mga prinsipe, maingon nga ang mga anak lalaki ni Haring David maoy mga prinsipe nga may lainlaing mga responsabilidad.a Kini magpahinumdom kanato sa Salmo 45, nga gikomposo nga nagatumong sa dinihogang “hari” ni Jehova.

16. Kang kinsa gitumong ang Salmo 45, ug sa unsang paagi mapamatud-an kini?

¹⁶ Kinsang hari ang gitumong sa Salmo 45? Aw, si Jesu-Kristo! Ang Hebreohanon 1:9 nagahimo sa maong pagpadapat sa pagkutlo sa Salmo 45:7, nga mabasa: “Gihigugma mo ang pagkamatarong ug gidumtan mo ang pagkadaotan. Kana ang hinungdan ang Diyos, ang imong Diyos, nagdihog kanimo pinaagi sa lana sa kalipay nga labaw pa kay sa imong mga kauban.” Busa ang hinimayang si Jesu-Kristo maoy gitumong sa dihang ang Salmo 45:16 nagaingon: “Puli sa imong mga amahan mao unya ang imong mga anak, nga imong igatudlo nga mga prinsipe sa tibuok nga yuta.”

17. Sa unsa ug kang kinsa ang Hari, si Jesu-Kristo, ilabinang interesado?

¹⁷ Tukma, si Jesus labawng interesado sa iyang umaabot ingong nagamandong Hari kay sa iyang yutan-ong kagahapon. Hinuon, dili siya malimot sa maong kagahapon ug ilabina sa iyang mga tawhanong katigulangan nga nalangkit sa saad ni Jehova nga panalanginan ang tanang banay pinaagi sa Abrahamnong Binhi. Apan karon ang iyang pangunang interes maoy sa duol nga umaabot sumala sa gituyo sa Tighimog-Hari, si Jehova nga Diyos. Busa ang yutan-ong mga anak ni Jesus, ilabina ang mga anak lalaki nga sa ilang taliwala may katakos sa pag-alagad ilalom kaniya sa katungdanang prinsipe, mopuli sa dapit nga makaikag​—nga labaw pa kay sa iyang yutan-ong mga katigulangan.

18. Sa unsang paagi ang mga paghubad sa Salmo 45:16 nagapasiugda sa labaw nga interes ni Jesus diha sa prinsipinhong mga anak kay sa iyang yutan-ong mga katigulangan?

¹⁸ Ang labawng interes ni Jesus sa prinsipinhong mga anak kay sa mga katigulangan gipasiugda sa lainlaing hubad sa Bibliya. Ania ang paagi sa paghubad sa Salmo 45:16 sa pipila kanila: “Ang imong mga anak maoy mopuli sa dapit sa imong mga amahan, ug motindog aron mahimong mga prinsipe sa tibuok nga yuta.” (Moffatt) “Ang dapit sa imong mga amahan mabatonan sa imong mga anak; himoon mo silang mga prinsipe sa tibuok nga yuta.” (Bersikulo 17, The New American Bible) “Puli sa imong mga amahan mao ang mga anak nga matawo alang kanimo: imo silang himoong mga prinsipe sa tibuok nga yuta.”​—The Septuagint Version, nga gipatik ni Samuel Bagster and Sons.

19. Ang pila ka lalaki sa dakong panon karon nagbaton sa unsang responsabilidad sa kongregasyon, ug sa unsang katungdanan ang Hari, si Jesu-Kristo, mahimong magtudlo kanila sulod sa iyang Usa ka Libo ka Tuig nga Pagmando?

¹⁹ Sa dako natong kalipay, ang umaabot nga mga prinsipe anaa sa atong taliwala mismo. Sila hikaplagan taliwala sa ubang mga karnero nga nagapatalinghog sa tingog sa Maayong Magbalantay, si Jesu-Kristo. Sila nagapatalinghog ilabina sukad sa 1935, sa dihang ang Pinadayag 7:9-17 gipatin-aw sa kombensiyon sa mga Saksi ni Jehova sa Washington, D.C. Karong adlawa, kaliboan niining dakong panon sa ubang mga karnero nagaalagad nga mga ansiano, o mga magtatan-aw, diha sa kapin sa 57,670 ka kongregasyon sa mga Saksi ni Jehova diha sa 212 ka nasod sa tibuok kalibotan. Pinaagi sa pagpabiling organisado uban sa nahibilin sa espirituwal nga mga igsoon ni Jesus nga ania pa sa yuta, kining mga tawhana nahalinya nga bug-os sagopon ingong yutan-ong mga anak sa Hari, si Jesu-Kristo, sulod sa iyang Usa ka Libo ka Tuig nga Pagmando ibabaw sa gisaad nga bag-ong yuta. (2 Pedro 3:13) Sa ingon, sila mahimong itudlo nga mga prinsipe sa pag-alagad sa bag-ong yuta.

20. (a) Ang hari magbaton unya sa unsang tinamdan bahin sa iyang mga tinudlo sa yuta? (b) Ang dakong panon mag-abiabi unya kang kinsa, ug unsang higayon ang ibutang sa atubangan niadtong mga mahibalik?

²⁰ Ang Hari, Jesu-Kristo, malipay sa pag-ila niining bag-ong natudlong mga prinsipe, maingon nga karon ginaila niya ang pagkamagtatan-aw sa matinumanong ubang mga karnero diha sa mga kongregasyon karon sa mga Saksi ni Jehova. Ang tanang membro sa dakong panon sa ubang mga karnero​—mga babaye ingon man mga lalaki​—makabaton sa kulbahinam nga pribilehiyo sa pag-abiabi gikan sa mga patay tanan niadtong makadungog sa tingog ni Jesus ug magpahimulos sa higayon sa pagbatog kinabuhing walay kataposan diha sa tawhanong kahingpitan sa usa ka nahinloan nga yuta nga pagabalhinong tibuok-yutang paraiso. (Juan 5:28, 29) Kadtong pinaboran kaayong mga binanhaw magaapil sa tinubos nga mga katigulangan ni Jesu-Kristo, mga tawo sa pagtuo nga andam magpamatuod sa ilang debosyon ngadto kang Jehova nga Diyos bisan hangtod sa kamatayon sa paglaom nga makabatog “labi pang maayong pagkabanhaw.” (Hebreohanon 11:35) Apan ang pagkabinayaw ngadto sa hingpit tawhanong kinabuhi panahon sa Milenyong Pagmando sa ilang Manunubos-Hari, si Jesu-Kristo, mao lamay sinugdanan. Pinaagi sa pagpabiling organisado nga dimabulag ilalom kang Jehova nga Diyos panahon sa kataposang pagsulay diha sa napasig-uling katawhan sa pagkatapos sa Milenyo, pamatud-an nilang takos nga pakamatarongon alang sa kinabuhing walay kataposan sa Paraiso ingong yutan-ong bahin sa unibersohanong organisasyon ni Jehova.​—Mateo 25:31-46; Pinadayag 20:1–​21:1.

[Mga Footnote]

Unsay Imong Tubag?

◻ Si Jehova naggahin sa unsang yugto sa panahon aron panalanginan ang tanang katawhan?

◻ Pinaagi sa pagpabilin sa unsang relasyon sa usag usa nga kita makalabang-buhi sa dakong kasakitan?

◻ Unsay kahulogan nga ang mga karnero ‘magapanunod sa gingharian nga giandam alang kanila sukad sa pagkatukod sa kalibotan’?

◻ Panahon sa Milenyo, unsang mga pribilehiyo ang maambitan sa dakong panon?