Mga Pangutana Gikan sa mga Magbabasa

Pagabanhawon ba ang mga tawo kon dili sila modawat sa matuod nga Kristiyanidad karon ug mamatay sa dili pa magsugod ang dakong kasakitan?

Maayong suklan natong tanan ang bisan unsang kiling sa paglihok ingong mga maghuhukom, magaila nga sa kataposan, ang paghukom ni Jehova pinaagi ni Jesu-Kristo mao ang hinungdanon. (Juan 5:22; Buhat 10:42; 2 Timoteo 4:1) Apan ang Kasulatan naghatag ug pipila ka makatabang nga impormasyon sa pagtubag sa pangutana sa itaas.

Ang tibuok-yutang pagsangyaw sa maayong balita sa Gingharian sa Diyos maoy usa ka hinungdanong bahin ‘sa ilhanan sa presensiya ni Jesus.’ Kini nga ilhanan nakita na sukad pa sa unang bahin niining sigloha. Ang pagsangyaw nga buluhaton mosangpot sa paglainlain sa mga tawo sa tanang kanasoran sa katumanan sa ilustrasyon ni Jesus mahitungod sa “mga karnero” ug sa “mga kanding.” Sa dihang matapos na kining buluhatong pagsangyaw ug paglainlain, ang “dakong kasakitan” motapos sa daotang sistema sa mga butang karon.​—Mateo 24:3, 21, 22; 25:31-46.

Si Jehova, uban sa iyang Anak, magahukom kon kaha ang bisan kinsa nga mosalikway sa mensahe sa Gingharian ug mamatay sa dili pa mobuto ang dakong kasakitan pagaisipon nga mga kanding. Si Jesus miingon nga ang mga kanding “moadto sa walay kataposang kalaglagan.” Busa, kita makahinapos nga kadtong kinsa matino sa Diyos nga mga kanding dili makadawat ug pagkabanhaw. Sila makadawat ug paghukom nga sama niadtong “magaagom ug hudisyal nga silot nga walay kataposang kalaglagan” sa panahon sa dakong kasakitan.​—2 Tesalonica 1:9.

Apan komosta ang bahin niadtong wala kaayo makadungog sa mensahe sa Gingharian aron makahimo ug maalamong pagpili dapig o batok sa kamatuoran sa wala pa sila mamatay niining panahona sa “kataposang mga adlaw”?​—2 Timoteo 3:1.

Kadaghanan sa mangamatay samtang ginahimo pa ang buluhatong pagsangyaw una pa ang dakong kasakitan dayag banhawon pa. Kini gipakita sumala sa atong mabasa sa Pinadayag 6:7, 8 bahin sa pagsakay sa simbolikong magkakabayo. Daghang tawo ang nangamatay ingong mga biktima sa mga gubat, kanihit sa pagkaon, ug sa makamatayng mga hampak. Sanglit ang “Hades” mao man ang miangkon niining mga biktima sa “Kamatayon,” sila pagabanhawon sa panahon sa Pagmando ni Kristo sa Milenyo, sa dihang itugyan sa Hades ang tanang patay diha niana. (Pinadayag 20:13) Daghan niadtong bangonon ngadto sa kinabuhi tingali may diyutayng nadunggan sa mensahe sa Gingharian sa wala pa sila namatay.

Pagkamapasalamaton nato nga wala itugyan ni Jesus sa mga tawo ang paghukom kon kinsa ang samag mga karnero ug kinsa ang samag mga kanding! Ang dili-hingpit nga mga tawo dili gayod makatimbang-timbang sa hustong paagi kon unsa ka dako ang higayon nga kinahanglang madunggan ug madawat sa usa ka tawo ang maayong balita. Natugkad ba nato ang kahimtang sa iyang kasingkasing o kon siya tinuod ba gayod nga nahigugma sa pagkamatarong? Masukod ba nato kon unsa ka dako ang epekto sa iyang pamilya, sa iyang relihiyosong kagikan, o sa ubang mga impluwensiya sa iyang reaksiyon? Dili gayod. Bisan pa, kita makatino nga si Jehova nga Diyos ug si Jesu-Kristo makatimbang-timbang sa maong mga butang ug unya makahimog mga paghukom nga hingpit, matul-id, ug matarong.​—Deuteronomio 32:4; Isaias 11:1-5.

Busa, walay katarongan nga magbanabana kita kon kinsa sa bag-o pang nangamatay ang mahimo o dili mahimong pagabanhawon. Usa kini ka butang nga kita wala sugoa sa paghimo. (Itandi ang Lucas 12:13, 14.) Mas maalamong maghulat kita sa mga desisyon sa matarong nga mga Maghuhukom, si Jehova nga Diyos ug si Jesu-Kristo. Kini mohatag kanatog dugang kalinaw sa hunahuna ingong mga alagad ni Jehova. Kini usab motabang kanato sa paghatag ug dugang pagtagad sa gitudlo kanato nga pagabuhaton​—‘lakaw ug paghimog tinun-an sa mga tawo sa tanang kanasoran, sa pagtudlo kanila sa pagtuman sa tanang butang nga gisugo ni Jesus.’​—Mateo 28:19, 20.

[Picture Credit Line sa panid 31]

Leicester nga karnero, Meyers