DULANG, PALANGGANA

Ang Kasulatan wala maghatag ug detalyadong kahubitan sa mga dulang o palanggana nga gigamit sa karaang kapanahonan, apan kini nga mga sudlanan sagad nga gama sa yutang-kulonon, kahoy, o metal. Ang ubang matang sa mga dulang gigamit sa balay, sama niadtong lakip sa mga tagana nga gidala ngadto kang David ug sa mga tawo uban kaniya sa dihang sila mikalagiw gikan kang Absalom. (2Sa 17:27-29) Ang Hebreohanong pulong nga saph gigamit alang niini nga matang sa dulang. Kini nga pulong gigamit usab alang sa dulang nga gisudlan sa dugo sa halad sa Paskuwa sa mga Israelinhon didto sa Ehipto (Ex 12:22) ug gigamit usab alang sa mga dulang sa templo nga gidala ni Nabucodonosor ngadto sa Babilonya. (Jer 52:19) Kini nga pulong mahimong hubaron usab nga “panaksan,” ug busa si Jehova gihulagway nga matagnaong nag-ingon: “Ania, himoon ko ang Jerusalem nga usa ka panaksan [saph] nga magpasarasay sa tanang katawhan sa tibuok palibot.” (Zac 12:​1, 2) Ang Gregong pulong nga ni·pterʹ gigamit sa pagtumong sa “palanggana” nga gigamit ni Jesus sa dihang iyang gihugasan ang mga tiil sa iyang mga tinun-an.​—Ju 13:5; ikompara ang Int.

Gigamit sa Sangtuwaryo. Ang mga dulang gigamit usab alang sa sagradong mga katuyoan maylabot sa pagsimba kang Jehova didto sa tabernakulo ug sa ulahing mga templo. Maingon sa gisugo ni Jehova kang Moises, ang mga butang sa tabernakulo naglakip sa usa ka dakong dulang nga kinahanglang pun-on ug tubig. Kini maoy gama sa tumbaga, nga gipatong sa usa ka tungtonganan nga tumbaga, ug gibutang taliwala sa tolda nga tagboanan ug sa halaran aron ang hataas nga saserdote ug ang ubang mga saserdote adunay tubig nga ikahugas sa ilang mga kamot ug mga tiil sa dili pa mosulod sa tolda nga tagboanan o sa dili pa moalagad didto sa halaran. (Ex 30:17-21; 31:9; 40:​30, 31) Kini nga dulang, nga gitawag nga palanggana ug hunawanan sa ubang mga hubad (NCV; MBB), gigama “pinaagi sa paggamit sa mga salamin sa mga alagad nga babaye nga naghimog organisadong pag-alagad sa ganghaan sa tolda nga tagboanan.”​—Ex 38:8.

Sumala sa Masoretikong teksto, walay espesipikong instruksiyon nga gihatag labot sa pagdala sa dulang sa tabernakulo. Hinunoa, ang Gregong Septuagint (nga nahiuyon sa karaang Samarianhong Pentateuch) nagdugang sa Numeros 4:14 niini nga mga pulong: “Ug sila magkuha ug panapton nga purpura ug tabonan ang dulang ug ang tungtonganan niini ug ibutang kini sa usa ka asul nga tabon nga panit ug ibutang [kini] sa mga yayongan.”

Ang Hebreohanong pulong nga ki·yohrʹ (o ki·yorʹ), nga nagkahulogang “dulang” o “palanggana” gigamit alang sa dulang sa tabernakulo. (Ex 35:16) Gigamit usab kini sa pagtumong sa napulo ka dulang nga gihimo ni Solomon aron gamiton sa templo, nga diha niana hugasan ang mga butang nga nalangkit sa halad-nga-sinunog.​—2Cr 4:​6, 14.

Ang matag usa sa napulo ka dulang (palanggana, NCV) nga tumbaga nga gihimo ni Hiram aron gamiton sa templo mosulod ug “kap-atan ka bath nga sukod,” o mga 880 L (230 gal) nga tubig. Kon kini nga mga dulang porma ug kawa, nan kini tingali may diyametro nga 1.8 m (6 p). Siyempre, kon kini nag-ugdo ug nag-anam kagamay paingon sa ibabawng bahin, molahi na ang mga sukod niini, ug angayng matikdan nga ang Bibliya wala maghatag ug detalyadong impormasyon sa porma niini, bisan tuod kini nag-ingon nga “ang matag dulang upat ka maniko.” Ang matag dulang gibutang diha sa upat-ug-ligid nga kareton nga may mga dayandayan ug mga kinulit nga maayong pagkahimo, diin ang lima niini gibutang sa tuo ug ang lima sa wala nga bahin sa balay.​—1Ha 7:27-39.

Ang laing dulang nga dako kaayo mao ang dakong dinayandayanan nga inumol nga dagatdagat nga gipatong sa 12 ka kinulit nga torong baka ug “gibutang sa tuong dapit, sa sidlakan, dapit sa habagatan” sa balay. Gipondo niana ang tubig nga gamiton sa mga saserdote. Kini maoy lingin, 10 ka maniko (4.5 m; 14.6 p) gikan sa ngilit ngadto sa pikas ngilit ug 5 ka maniko (2.2 m; 7.3 p) ang gihabogon.​—2Cr 4:2-6, 10.

Mga Panaksan. Sama sa ubang mga sudlanan nga gihisgotan diha sa Kasulatan, ang mga panaksan gigama gikan sa yutang-kulonon, kahoy, o metal. Ang Hebreohanong termino nga miz·raqʹ nagtumong sa usa ka metal nga sudlanan nga dayag nga gigamit maylabot sa mga halad sa pagsimba. (Ex 27:3; Num 4:14; 7:13; 1Ha 7:50; 2Cr 4:8) Lakip sa mas dagkong mga panaksan nga gigamit sa mga pagpangaon mao ang tsal·laʹchath (“panaksang pangbangkete”; Pr 26:15) ug ang seʹphel (“dakong pangbangketeng panaksan”; Huk 5:25). Ang gul·lahʹ gigamit sa pagtumong sa usa ka “panaksan” (Zac 4:2), apan kini gihubad usab nga “pormag-panaksan” ug “lingin” sa paghubit sa mga ulo-ulo sa mga haligi nga nagbarog atubangan sa templo sa panahon ni Solomon. (1Ha 7:41) Ang duha ka Gregong termino alang sa mga panaksan mao ang tryʹbli·on ug phi·aʹle. Ang tryʹbli·on nagtumong sa usa ka dili kaayo lawom nga panaksan nga gigamit ingong kan-anan (Mat 26:23), samtang ang phi·aʹle nagtumong sa usa ka “panaksan” nga sagad gigamit alang sa paghalad ug likido nga mga halad.​—Pin 16:​2-17.