Makahinumdom Ka Ba?

Nakapalandong ka bag maayo sa dili pa dugayng mga gula sa Ang Bantayanang Torre? Kon mao, hayan makahinumdom ka sa mosunod:

◻ Nganong dili magsaulog ang mga Kristohanon ug Pasko?

Ang usa sa katarongan mao nga ang piyesta sa Pasko gikan sa paganong selebrasyon sa Saturnalia, ang Romanong piyesta sa diyos sa pananom nga si Saturn. Ang Pulong sa Diyos nag-ingon: “Ayaw kamo pagpahiangay sa mga dili-magtutuo.” (2 Corinto 6:14-17) Dili mabulag ang Kristohanon gikan sa mga dili-magtutuo kon magpadayon gihapon siya sa pagsaulog sa piyesta nga pagano ug sinugdanan.​—12/15, panid 6.

◻ Unsa ang Kristohanong Tinghugyaw?

Kini maoy kagawasan nga nalangkit “ang kamatuoran” nga nakalibre sa mga tawo gikan sa “balaod sa sala ug kamatayon.” Kining kamatuorana nasentro diha sa “Anak,” si Jesu-Kristo. (Juan 8:31-36; Roma 8:1, 2, 21)​—1/1, panid 21.

◻ Kanus-a gisaulog ang Kristohanong Tinghugyaw?

Sa Pentekostes 33 K.P. ang Kristohanong Tinghugyaw gisugdan sa pagsaulog niadtong gitakdang mabuhi sa langit. Alang sa magtutuong katawhan nga magapahimulos sa kinabuhing dayon dinhi sa yuta, ang dakong Kristohanong Tinghugyaw matagamtam sa panahon sa Milenyo, dihang ang mga lama sa napanunod nga sala ug pagkadili-hingpit mawagtang na.​—1/1, panid 21, 22, 27.

◻ Nganong walay mga eskuylahan sa mga bata ang mga Saksi ni Jehova sa Asia ug sa ubang dapit?

Kay sumala sa gipamulong sa Bibliya, ang mga Saksi ni Jehova kinahanglan una sa tanan magatagad sa ilang sugo sa pagwali sa hinungdanong mensahe mahitungod sa Gingharian sa Diyos. (Mateo 24:14; 28:19, 20) Nahibalo sila sa tawhanong mga pag-antos ug mga inhustisya nga ania niining sistemaha, ug sila nagatabang kutob sa ilang maarangan. Apan ilang giila nga ang tinuod nga kasulbaran nahimutang, dili sa tawhanong mga kamot, kondili sa kaluwasan nga ipatungha sa dili madugay sa Gingharian sa Diyos. (Salmo 146:3-10)​—1/15, panid 7.

◻ Unsang mga bahin sa pagtuo ang atong nakat-onan gikan sa mga pananglitan ni Abel, Enoch, Noe, Abraham, ug Moises?

Ang pagtuo nga sama kang Abel nagapalambo sa atong pagpabili sa halad ni Jesus. Ang tinuod nga pagtuo makatabang kanato nga mahimong maisogon, sama kang Enoch. Sama sa pagtuo ni Noe, ang pagtuo mopalihok kanato sa pagtuman sa mga sugo sa Diyos. Ang pagtuo ni Abraham nakapasilsil kanato sa panginahanglan sa pagsunod sa Diyos ug sa pagsalig sa iyang mga saad. Kita kinahanglang magpabiling walay buling gikan sa kalibotan ug magbarog nga maunongon uban sa katawhan sa Diyos, sama sa pananglitan nga gihatag ni Moises.​—1/15, panid 20.

◻ Sa unsang paagi ang pagkamausisaon mahimong panalangin ug tunglo?

Ang maayong pagkamausisaon mahitungod sa atong Maglalalang, sa iyang kabubut-on, ug sa iyang mga katuyoan mohatag dakong katagbawan ug mapuslanon, mohatag kalipay ug kaharuhay sa atong kinabuhi. Sa laing bahin, ang walay pagpugong nga pagkamausisaon motultol kanato sa kalapukan sa panaghap ug sa tawhanong mga ideya, ipakawalay bili ang tinuod nga pagtuo ug diyosnong debosyon.​—2/1, panid 29.

◻ Unsay gipasabot ni Jesus dihang nag-ampo siya: “Amahan ko, kon mahimo, isaylo lang kanako kining kopa”? (Mateo 26:39)

Nabalaka si Jesus sa sumbong nga pasipala nga iyang nakitang maoy ipasaka batok kaniya. Mao kini ang labing dakong krimen nga mahimong sad-an ang Hudiyo. Busa, ang iyang kamatayon ilalom niadto nga kahimtang daw nagpakita nga usa ka panampalas ngadto sa iyang langitnong Amahan.​—2/15, panid 13.

◻ Kon mag-antos ang tawo ug kalisod o kasakit, unsa ang maalamong dalan nga iyang himoon?

Labing maayo mga magpailob siya, malaomong magpaabot ug kahupayan gikan sa Diyos, ug nga magpasuod Kaniya. Mopasayon kini sa tawo sa pag-antos sa ubang mga kasinatian sa kinabuhi nga dili mawad-an ug paglaom. (Lamentaciones 3:25-31)​—2/15, panid 24.

◻ Kinsa ang “napulog duha ka tribo sa Israel” nga gihisgotan ni Jesus diha sa Lucas 22:28-30?

Kini naghawas sa tanang mga tawo nga pagahukman ni Kristo ug sa iyang 144,000 nga ubos nga mga saserdote maylabot sa pagbag-o sa tanan nga maoy katuyoan ni Jehova alang niining yutaa. (Mateo 19:28)​—3/1, panid 28.

◻ Unsay kahulogan sa diyosnong kalinaw, ug sa unsang paagi makab-ot kini?

Ang diyosnong kalinaw maoy kalmadong kahimtang sa hunahuna ug kasingkasing, bisan unsa pay nagakahitabo. (Salmo 4:8) Motungha lamang kini pinaagi sa usa ka inuyonang relasyon uban sa Diyos, nga gihimong posible pinaagi sa halad lukat ni Kristo Jesus. (Colosas 1:19, 20)​—3/15, panid 11, 14, 15.

◻ Unsang mga saad ang atong nabatonan karon nga makatabang kanato nga suod nga makaila sa Diyos?

Atong nabatonan ang Bibliya ug ang talan-awon sa kasiglohang mga tagna sa Bibliya nga natuman. Dugang pa, atong nabatonan ang mga rekord sa Ebanghelyo mahitungod sa kinabuhi, mga buhat, ug mga pulong ni Jesu-Kristo, nga mahitungod kaniya si Pablo misulat: “Kay diha kaniya [Kristo] ang tanang kabug-osan sa balaang kinaiya nagapuyo sa lawasnon.” (Colosas 2:9)​—4/1, panid 6.