Mga Pangutana Gikan sa mga Magbabasa
Ang Mateo 28:17 ba nagkahulogan nga ang pila ka mga apostol padayong nagduhaduha pagkatapos sa dugay nang pagpakita kanila sa nabanhawng si Jesus?
Wala, kita dili kinahanglang moabot nianang panghinapos gikan sa Mateo 28:16, 17, nga mabasa: “Ang napulog-usa ka mga tinun-an nangadto sa Galilea sa usa ka bukid nga gitudlo kanila ni Jesus, ug sa ilang pagkakita kaniya nanagyukbo sila kaniya, apan ang pila nagduhaduha.”
Sayo pa kaayo si Jesus misulay sa pagtabang sa mga tinun-an sa pagsabot “nga siya kinahanglang moadto sa Jerusalem ug mag-antos sa daghang mga butang gikan sa mga ansiano ug pangulong mga saserdote ug mga eskriba, ug pagapatyon, ug sa ikatulong adlaw pagabanhawon.” (Mateo 16:21) Bisan pa niana, ang pag-aresto kaniya ug pagpatay nakapaluya ug nakapalibog sa mga tinun-an. Ang iyang pagkabanhaw morag miabot nga usa ka sorpresa. Ug sa dihang gipadayag niya ang iyang kaugalingon sa tawhanong porma, sa sinugdanan ang pila “wala gihapon motuo tungod sa tumang kalipay.” (Lucas 24:36-41) Hinuon, ang iyang human-pagkabanhaw nga mga pagpakita sa tinuod nakatabang sa iyang suod nga mga sumusunod sa pagdawat sa kamatuoran sa iyang pagkabanhaw; bisan ngani si apostol Tomas nakombinsir nga si Jesus nabanhaw.—Juan 20:24-29.
Pagkatapos niana ang 11 ka matinumanong mga apostol “nangadto sa Galilea.” (Mateo 28:16; Juan 21:1) Samtang atua sila didto, si Jesus “nagpakita sa kapin sa lima ka gatos nga mga kaigsoonan sa usa ka higayon.” (1 Corinto 15:6) Dinhi niining higayona nga ang Mateo 28:17 naghisgot nga “ang pila nagduhaduha.” Busa kadto silang nagduhaduha pa gihapon mahimo gayod nga taliwala niadtong 500 ka mga sumusunod.
Matikdi ang makaiikag nga komento mahitungod niini nga gihimo sa unang presidente sa Watch Tower Society nga si C. T. Russell:
“Kita sa makataronganon dili makapamasin nga ang mga nagduhaduha maoy sakop sa napulog usa nga apostol, tungod kay sila sa bug-os natagbaw, bug-os nga kombinsido, ug nakapahayag sa ilang mga kaugalingon sa miagi. Kadtong mga nagduhaduha kinahanglang, atong hunahunaon, nga kauban sa ‘lima ka gatos nga kaigsoonan’ nga presente nianang tinudlong tigom, nga walay pakigsandurot sa miagi kaniya sukad sa iyang pagkabanhaw, ug ang pila niana, sa makataronganon kita makapamasin, maoy mas huyang sa pagtuo kay sa mga apostol ug espesyal nga mga higala nga nakaestorya ni Jesus human sa iyang pagkabanhaw. Ang pahayag nga ‘ang pila nagduhaduha’ maoy ebidensiya sa pagkaprangka sa rekord sa Ebanghelista. Kana nagpakita usab kanato nga ang mga sumusunod sa Ginoo wala maghingapin sa kamatuotuohon, apan inay andam sa pag-alig-ig ug pagtimbangtimbang sa mga ebidensiya nga gipresentar, ug ang misangpot nga kasibot, kusog ug espiritu sa pagsakripisyo-sa-kaugalingon niadtong nanagtuo naghatag kanato ug dagayang ebidensiya sa kasinsero sa ilang pagtuo kon bahin sa pagkabanhaw sa atong Ginoo, nga sila maingon usab kita miila nga maoy pinaka-yawing-bato sa atong pagtuo diha kaniya. Kon si Kristo wala pa banhawa ang atong pagtuo walay kapuslanan ug anaa pa gihapon kita sa atong mga kasal-anan.—1 Cor. 15:17.”—Zion’s Watch Tower and Herald of Christ’s Presence, Mayo 1, 1901, panid 152.
Mahimong makasulti kita nga ang paagi sa paghisgot ni Mateo niining puntoha naghatag kanato ug ebidensiya sa pagkakasaligan ug pagkamatinud-anon sa Bibliya. Kon ang usa ka tawo nagtumotumo lamang, siya makiling sa pagdugang ug mga detalye aron nga ang iyang tinumotumong estorya mahimong katuohan; sila tingali mobati nga ang wala masulat nga mga detalye ug morag mga kulang makahatag pagduhaduha sa iyang ginama-gama. Komosta naman si Mateo?
Siya wala mobati nga obligado sa paghatag ug detalyadong pagpatin-aw sa iyang gihisgotan nga “ang pila nagduhaduha.” Ang mga asoy nila ni Marcos, Lucas, ug Juan wala maghisgot bahin niini, busa ang gihisgotan ni Mateo kon mao lamay tagdon morag maglangkit sa 11 ka mga apostol, nga siya kauban. Bisan pa niana, si Mateo naghimo ug mubong komento nga wala maghatag ug bisan unsang pagpatin-aw. Mga 14 ka tuig sa ulahi, si apostol Pablo nagsulat sa basahon sa Unang Corinto. Sa lamdag sa mga detalye nga iyang gihatag sa 1 Corinto 15:6, kita lagmit makakab-ot sa katuohang panghinapos nga kadtong nagduhaduha dili mga apostol apan mga disipulo sa Galilea kang kinsa si Jesus wala pa magpakita. Mao nga, ang komento ni Mateo nga “ang pila nagduhaduha” tinuod gayod; sa tukma kana maoy ilhanan sa usa ka matinud-anong magsusulat nga nagpresentar sa tinuod nga asoy nga wala magsulay sa pagpatin-aw sa tanang mga detalye.