Bawtismo “Nganha sa Ngalan Sa”

ANG pagtuon sa libolibong karaang sekular nga mga dokumentong papiro nga nakaplagan diha sa mga balas sa Ehipto sa sinugdan niining sigloha sagad naghatag ug makaiikag nga kadan-agan sa Kristohanon Gregong Kasulatan. Sa unsang paagi? Pinaagi sa pagtagad sa paagi nga gigamit ang pipila ka pulong, kita matultolan ngadto sa usa ka mas tukmang pagsabot sa samang mga pulong diha sa ilang hustong dapit sa Kasulatan.

Ang usa ka pananglitan mao ang paggamit ni Jesus ug “sa ngalan sa” dihang iyang gisugo ang iyang mga tinun-an una pa siya mikayab ngadto sa langit: “Busa panglakaw kamo ug himoa ninyong mga tinun-an ang katawhan sa tanang kanasoran, magabawtismo kanila sa ngalan sa Amahan ug sa Anak ug sa balaang espiritu.” Unsay gipasabot ni Jesus?​—Mateo 28:19.

Ang mga eskolar nakadiskobre nga diha sa sekular nga mga sinulat ang ekspresyong “sa ngalan sa,” o “nganha sa ngalan sa” (Kingdom Interlinear), maoy gigamit maylabot sa mga pagbayad “sa kuwenta ni bisan kinsa.” Ang propesor sa teolohiya nga si Dr. G. Adolf Deissmann nagtuo nga tungod sa ebidensiya nga gikan sa papiro, “ang ideya nga nagpaluyo . . . sa mga pulong sa pagbawtismo nganha sa ngalan sa Ginoo, o sa pagtuo nganha sa ngalan sa Anak sa Diyos, mao nga ang bawtismo o pagtuo naglangkob sa pagkaiya sa Diyos o sa Anak sa Diyos.”​—Italiko kang Deissmann.

Makaiikag, ang susamang pulong maoy gigamit sa mga Hudiyo sa mga adlaw ni Jesus, ingon sa gibatbat diha sa Theological Dictionary of the New Testament: “Ang sirkumsisyon sa usa ka kinabig ginahimo . . . ‘sa ngalan sa kinabig,’ aron madawat siya nganha sa Hudaismo. Kini nga sirkumsisyon himoon . . . ‘sa ngalan sa pakigtugon,’ aron madawat siya nganha sa pakigtugon.” Usa ka relasyon sa ingon matukod ug ang di-Hudiyo mahimong kinabig ubos sa gimbut-an sa pakigtugon.

Busa alang sa Kristohanon, ang bawtismo nga mosunod sa pagpahinungod nagatukod ug usa ka suod nga relasyon uban kang Jehova nga Diyos, sa iyang Anak si Jesu-Kristo, ug sa balaang espiritu. Ang nakombertir nagaila sa ilang kaugalingong awtoridad diha sa iyang bag-ong paagi sa kinabuhi. Tagda kon sa unsang paagi kini tinuod diha sa matag usa sa tulo nga ginganlan.

Pinaagi sa pag-ila sa awtoridad sa Diyos, kita nagapasuod ngadto kaniya ug nagasulod ngadto sa usa ka relasyon uban kaniya. (Hebreohanon 12:9; Santiago 4:7, 8) Kita nahimong kabtangan sa Diyos ingong iyang mga ulipon, nga gipalit uban sa bili sa halad lukat ni Jesu-Kristo. (1 Corinto 3:23; 6:20) Gisultihan usab ni apostol Pablo ang unang-siglong mga Kristohanon nga sila iya ni Jesu-Kristo, dili kang bisan kinsang mga tawo nga tingali maoy nagdala sa kamatuoran ngadto kanila. (1 Corinto 1:12, 13; 7:23; itandi ang Mateo 16:24.) Ang bawtismo sa ngalan sa Anak nagpasabot sa pag-ila niining kamatuorana, nagadawat kang Jesus ingong “ang dalan ug ang kamatuoran ug ang kinabuhi.”​—Juan 14:6.

Ang balaang espiritu hinungdanon usab alang sa atong matarong nga relasyon uban kang Jehova ug kang Jesu-Kristo. Ang bawtismo sa ngalan sa balaang espiritu nagpakita nga atong giila ang papel sa espiritu sa pagpakiglabot sa Diyos kanato. Maoy atong tinguha ang pagsunod sa paggiya niini, dili kini isalikway o molihok nga supak niini, nagabalda sa paglihok niini diha kanato. (Efeso 4:30; 1 Tesalonica 5:19) Ang di-tawhanong kinaiyahan sa espiritu dili makamugnag kalisod kon bahin sa paggamit o sa kahulogan, sama sa paggamit “sa ngalan sa pakigtugon” sa Hudaismo.

Busa, sa panahon sa pagpahinungod ug bawtismo, kita kinahanglang mainampoong magpalandong kon unsay nalangkit diha sa atong bag-ong relasyon. Kini nagkinahanglag pagpasakop sa kabubut-on sa Diyos, nga gipasundayag diha sa panig-ingnan ug sa tagana sa lukat ni Jesu-Kristo, nga pagahimoon pinaagi sa balaang espiritu samtang ginatultolan niini ang tanang mga alagad sa Diyos diha sa gugma ug panaghiusa sa tibuok-yuta.