“Kon ang Asin Mawad-an sa Puwersa Niini”

GIBUGNO ang mga gubat tungod niini. Ginagamit kini isip paagi sa pagpamalit. Sa karaang Tsina kini sunod lamang sa bulawan sa kabililhon. Oo, ang asin dugay nang giisip sa katawhan ingon nga bililhong manggad. Hangtod karon, giisip kini nga tambal ug igpapatayg kagaw, ug kini gigamit sa tibuok kalibotan isip pangpalami ug pangpreserbar.

Tungod sa daghang maayong mga kinaiya ug kagamitan sa asin, dili ikahibulong nga kini gigamit sa masambingayong paagi diha sa Bibliya. Ang Balaod Mosaiko, pananglitan, nagbaod nga ang tanang itanyag ngadto sa halaran ni Jehova kinahanglang asinan. (Levitico 2:13) Wala kini himoa aron mas molami ang mga halad, apan kalagmitan tungod kay ang asin naghawas sa kagawasan gikan sa kahugawan o kadunotan.

Sa iyang iladong Wali sa Bukid, si Jesu-Kristo miingon ngadto sa iyang mga sumusunod: “Kamo mao ang asin sa yuta.” (Mateo 5:13) Pinaagi niining mga pulonga, gipakita ni Jesus nga ang ilang pagsangyaw bahin sa Gingharian sa Diyos adunay nagatipig, o nagaluwas-kinabuhi nga impluwensiya diha sa ilang mga mamiminaw. Sa pagkatinuod, kadtong magpadapat sa mga pulong ni Jesus mapanalipdan gikan sa moral ug espirituwal nga kadunotan diha sa mga katilingban nga ilang gipuy-an ug gisilbihan.​—1 Pedro 4:1-3.

Bisan pa niana, si Jesus nagpasidaan: “Apan kon ang asin mawad-an sa puwersa niini, . . . dili na kini magamit alang sa bisan unsa kundili igasalibay sa gawas nga pagayatakan sa mga tawo.” Nagkomento bahin niini, ang iskolar sa Bibliya nga si Albert Barnes miingon nga ang asin nga nailhan ni Jesus ug sa iyang mga apostol “dili putli, sinambogan ug mga substansiya gikan sa tanom ug sa ibabaw nga bahin sa yuta.” Busa kon ang asin mawad-an sa kaparat niini, “daghang substansiya sa yuta” ang mahimong magpabilin. “Kini,” matod ni Barnes, “walay kapuslanan gawas kon . . . iabono sa kadalanan, o mga agianan, sama sa atong paggamit sa graba.”

Sa pagsunod niining pasidaana, ang mga Kristohanon kinahanglang magbantay nga dili mohunong sa ilang pagpamatuod sa publiko o sa pagtipas ngadto sa di-diyosnong mga sumbanan sa pamatasan. Kay kon dili mahimong madaot sila sa espirituwal ug mahimong walay pulos, sama sa ‘asin nga nawad-an sa puwersa niini.’