Mga Pag-ampo nga Tinong Dunggon

DUNAY mga pag-ampo nga tinong dunggon. Ang diwa niini maoy milangkob diha sa usa ka sumbanan nga gihatag ni Jesu-Kristo sa iyang mga tinun-an sa dihang siya miingon: “Nan, mag-ampo kamo sa ingon niini nga paagi: ‘Amahan namo nga anaa sa mga langit, pagabalaanon unta ang imong ngalan. Paanhia ang imong gingharian. Matuman ang imong kabubut-on, sa langit, ingon man usab dinhi sa yuta.’”​—Mateo 6:9-13.

Kadtong mga pulonga sa sumbanang pag-ampo ni Jesus gisumaysumay sa milyonmilyong panahon. Bisag wala dahoma ni Kristo nga litokon sa iyang tinuod nga mga sumusunod ang maong mga pag-ampo, ang ilang mga pangamuyo nga nagapahayag sa susamang mga hunahuna tinong dunggon. (Mateo 6:7, 8) Busa, unsay kahulogan sa pagbalaan sa ngalan sa Diyos? Nganong mag-ampo nga moabot ang iyang gingharian? Ug nganong mohangyo nga matuman ang kabubut-on sa Diyos?

“Pagabalaanon Unta ang Imong Ngalan”

Si Jehova, “ang Labing Hataas sa tibuok nga yuta,” mao ang Usa nga gitumong ni Jesus ingong “Amahan namo nga anaa sa mga langit.” (Salmo 83:18) Ang Diyos “mao ang amahan” sa mga Israelinhon pinaagi sa pagpagula kanila gikan sa pagkaulipon sa Ehipto ug pinaagi sa pagsulod ngadto sa usa ka relasyon sa pakigtugon uban kanila. (Deuteronomio 32:6, 18; Exodo 4:22; Isaias 63:16) Karong adlawa, ang dinihogang mga Kristohanon adunay malulotong pagtamod kang Jehova ingong ilang Amahan. (Roma 8:15) Ug ang ilang mga kauban, kinsa may yutan-ong paglaom, sa ingon usab makaampo kang Jehova nga Diyos ingong ilang Amahan.​—Juan 10:16; Pinadayag 7:1-9.

Apan nganong mag-ampo sa ngalan sa Diyos nga pagabalaanon? Buweno, sukad sa rebelyon sa unang paris sa tanaman sa Eden, napasipalahan ang balaang ngalan. Sa pagtubag sa maong pag-ampo, hinloan ni Jehova ang tanang pasipala nga nahatag sa iyang halandomong ngalan. (Salmo 135:13) Iyang buhaton kini pinaagi sa pagwagtang sa pagkadaotan gikan sa yuta. Labot niana nga panahon, ang Diyos miingon pinaagi sa manalagnang si Ezekiel: “Ug ako magapadako sa akong kaugalingon ug magabalaan sa akong kaugalingon ug magapaila sa akong kaugalingon sa mga mata sa daghang mga nasod; ug sila makaila nga ako mao si Jehova.”​—Ezekiel 38:23.

Si Jehova nga Diyos maoy balaan ug hinlo. Busa ang iyang ngalan kinahanglang balaanon, o ilain ingong balaan. Iyang ipasundayag ang iyang pagkabalaan pinaagi sa paglihok sa pagbalaan mismo sa iyang kaugalingon atubangan sa tanang linalang. (Ezekiel 36:23) Kadtong nagatinguha sa iyang pag-uyon ug sa kinabuhing dayon kinahanglan motamod kang Jehova uban ang kataha ug magabalaan sa iyang ngalan pinaagi sa paghupot niini nga bulag ug mas hataas kay sa tanang ubang ngalan. (Levitico 22:32; Isaias 8:13; 29:23) Tungod niana, giingnan ni Jesus ang iyang mga sumusunod sa pag-ampo: “Pagabalaanon unta ang imong ngalan” o, “huptan nga sagrado; tagdon nga balaan.” Kita makatino nga ang Diyos motubag niini nga bahin sa modelo nga pag-ampo ni Jesus.

“Paanhia ang Imong Gingharian”

Si Jesus miingon usab sa iyang mga sumusunod sa pag-ampo: “Paanhia ang imong gingharian.” Ang mga pag-ampo sa pag-abot sa Gingharian sa Diyos tinong pagatubagon. Ang Gingharian mao ang soberanong pagmando ni Jehova ingon sa gipahayag pinaagi sa usa ka langitnon Mesiyanikong kagamhanan diha sa mga kamot sa iyang Anak, si Jesu-Kristo, ug sa kaubanang “mga balaan.” (Daniel 7:13, 14, 18, 22, 27; Isaias 9:6, 7) Dugay na nga gipamatud-an sa mga Saksi ni Jehova gikan sa Kasulatan nga si Jesus naentrono na ingong usa ka langitnong Hari sa tuig 1914. Nan, nganong ang tanan kinahanglang moampo nga “moabot” na ang Gingharian?

Ang pag-ampo nga moabot na ang Gingharian sa aktuwal nagkahulogan sa paghangyo nga kini moabot na diha sa tanang magsusupak sa balaang pagmando sa yuta. Sa dili madugay karon “ang gingharian [sa Diyos] . . . modugmok ug motapos sa tanan niining [yutan-ong] mga gingharian, ug kini mismo molungtad sa walay kataposan.” (Daniel 2:44) Kini nga kaugmaran makadugang sa pagbalaan sa balaang ngalan ni Jehova.

“Matuman ang Imong Kabubut-on”

Si Jesus dugang misugo sa iyang mga tinun-an sa pag-ampo: “Matuman ang imong kabubut-on, sa langit, ingon man usab sa yuta.” Kini maoy usa ka hangyo nga si Jehova molihok nga kaharmoniya uban sa iyang kabubut-on alang sa yuta. Kini susama sa deklarasyon sa salmista: “Bisan unsa ang gikahimut-an ni Jehova kini iyang gibuhat didto sa mga langit ug dinhi sa yuta, diha sa kadagatan ug sa tanang mga kahiladman sa dagat. Siya nga nagapasaka sa mga panganod gikan sa mga kinatumyan sa yuta; siya nga nagabuhat sa mga kilat alang sa ulan; siya nga nagapagula sa hangin gikan sa ilang mga tipiganan, siya nga milaglag sa mga panganay sa Ehipto, sa tawo ug sa mananap. Siya nga nagpadala ug mga ilhanan ug mga katingalahan sa kinataliwad-an nimo, O Ehipto, sa ibabaw ni Paraon ug sa ibabaw sa tanan niyang mga ulipon; siya nga milaglag sa daghang mga nasod ug mipatay sa gamhanang mga hari.”​—Salmo 135:6-10.

Ang pag-ampo nga matuman ang kabubut-on ni Jehova dinhi sa yuta maoy usa ka hangyo nga iyang tumanon ang iyang mga katuyoan nganhi niining yutaa. Kini maglakip sa dumalayong pagwagtang sa iyang mga magsusupak, ingon sa iyang pagwagtang kanila sa gamay nga sukod sa karaang mga panahon. (Salmo 83:9-18; Pinadayag 19:19-21) Ang pag-ampo alang sa kabubut-on ni Jehova nga matuman sa tibuok nga yuta ug sa uniberso sa tino pagatubagon.

Sa Dihang ang Gingharian Magmando Na

Inay ang pagkadaotan nga karon mikatap sa tawhanong katilingban, unsay atong madahom sa dihang magmando na ang Gingharian sa Diyos ug ang balaang kabubut-on matuman na sa yuta ingon man sa langit? Sumala kang apostol Pedro, “dunay bag-ong mga langit ug usa ka bag-ong yuta nga karon atong ginapaabot sumala sa saad sa [Diyos], ug diha niini magapuyo ang pagkamatarong.” (2 Pedro 3:13) Ang “bag-ong mga langit” mao ang matarong espirituhanon nga magmamandong mga gahom​—si Jesu-Kristo ug ang 144,000 ka kaubang manununod sa langitnong Gingharian. (Roma 8:16, 17; Pinadayag 14:1-5; 20:4-6) Ang “usa ka bag-ong yuta” maoy dili laing yutan-ong globo. Hinunoa, kini maoy usa ka matarong nga katilingban sa katawhan nga magpuyo sa yuta.​—Itandi ang Salmo 96:1.

Ubos sa pagmando sa Gingharian, ang yuta bag-ohon unya ngadto sa usa ka globonhong paraiso. (Lucas 23:43) Ang matuod nga kalinaw ug kauswagan matagamtam unya sa tanang masinugtanong katawhan. (Salmo 72:1-15; Pinadayag 21:1-5) Ikaw mahimong maapil nianang malipayong panon kon ikaw maoy usa ka maunongong dumadapig sa Mesiyanikong pagmando ibabaw sa yutan-ong mga sakop. Ang mga dumadapig sa maong pagmando sa tim-os nagampo nga mabalaan ang ngalan ni Jehova, moanhi ang iyang Gingharian, ug matuman ang iyang kabubut-on. Ang ilang kinasingkasing nga mga pag-ampo tinong dunggon.