Ang Ikatudlo sa mga Langgam Kanato

“PANID-I pag-ayo ang mga langgam sa langit, tungod kay sila wala magapugas ug binhi o magaani o magatigom sa mga balay-tipiganan; sa gihapon ginapakaon sila sa ilang langitnong Amahan. Dili ba kamo labaw pa ug bili kay kanila?” (Mateo 6:26) Gisulti ni Jesu-Kristo ang maong mga pulong sa usa ka bantog nga wali nga iyang gihatag didto sa kilid sa bukid duol sa Dagat sa Galilea. Dili lamang iyang mga sumusunod ang iyang mamiminaw. Usa ka dakong panon sa katawhan nga may purohan nga mahimong iyang mga tinun-an gikan sa tanang bahin sa rehiyon presente usab. Daghan kanila maoy mga kabos nga nagdalag masakiton aron ayohon ni Jesus.—Mateo 4:23–5:2; Lucas 6:17-20.

Human ayoha ang tanang masakiton, gihatagag pagtagad ni Jesus ang mas hinungdanong espirituwal nga mga panginahanglan. Lakip sa mga pagtulon-an nga iyang gitudlo mao ang usa nga gihisgotan sa ibabaw.

Dugay nang naglungtad ang mga langgam sa kalangitan. Ang uban kanila mokaon ug mga insekto, ang uban prutas ug mga liso. Kon ang Diyos naghatag sa maong dagayang pagkaon alang sa mga langgam, tino nga siya makatabang usab sa iyang tawhanong mga alagad nga makabaton sa ilang pagkaon kada adlaw. Mahimong itagana niya kini pinaagi sa pagtabang kanila nga makatrabaho aron makakitag salapi alang sa pagkaon. O iya tingaling palamposon ang ilang pagpananom. Sa mga panahon sa emerhensiya, ang Diyos makapalihok sa mga kasingkasing sa malulotong mga silingan ug mga higala aron ipaambit ang ilang pagkaon sa mga nanginahanglan.

Daghan pa kitag makat-onan pinaagi sa pag-obserbar pag-ayo sa kinabuhi sa langgam. Ang Diyos naglalang sa mga langgam uban ang katingalahang kinaiyanhong mga katakos sa paggamag mga salag nga maoy padak-an sa ilang kuyabog. Matikdi ang duha ka klase sa salag. Kanang gihulagway diha sa wala mao ang salag sa African rock martin. Kini gihimo diha sa usa ka bato o paril sa balay. Ang atop sa maong mga salag mao ang nagsiwil nga bato o ang balisbisan sa usa ka bilding, sama sa makita ning maong larawan. Ang salogsalog sa salag ginama sa gigming nga mga tipaka sa lapok nga gitapot nga pormag kopa. Ang baye ug laki maghago sa pagpanguhag gagmayng lapok ug dangtag kapin sa usa ka bulan nga mahuman ang ilang salag. Dayon ilang hanigan kana ug sagbot ug mga balhibo. Magtinabangay sila pagpakaon sa ilang kuyabog. Kanang makita sa ubos mao ang salag sa laki nga masked weaver. Kining kugihan nga langgam sa Aprika magsalag ginamit ang mga dahondahon o mga linaksi gikan sa ubang mga tanom. Makahuman siyag usa ka salag sa usa ka adlaw ug makasalirap ug kapin sa 30 ka salag sa usa ka yugto!

Ang leksiyon? Kon ang Diyos naghatag sa mga langgam sa maong mga kahanas ug dagayang materyal sa pagsalag, siya makatabang gayod sa iyang tawhanong mga alagad nga makabatog kapuy-an. Bisan pa niana, gipakita ni Jesus nga duna pay gikinahanglan kon buot natong si Jehova nga Diyos motabang kanato sa pagbaton sa atong materyal nga mga panginahanglan. “Nan, magpadayon sa pagpangita pag-una sa gingharian ug sa iyang pagkamatarong, ug kining tanang ubang mga butang igadugang ra kaninyo,” si Jesus misaad. (Mateo 6:33) Tingali maghunahuna ka, ‘Unsay nalangkit sa pagpangita pag-una sa Gingharian sa Diyos?’ Ang mga Saksi ni Jehova, nga nag-apod-apod niining magasina, malipay sa pagtubag nianang pangutanaha.