‘Si Solomon Wala Masul-obig Ingon sa Usa Niini’
ANG ihalas nga mga bulak sama sa makita dinhi kasagarang makita diha sa mga dalan sa habagatang Aprika. Kini gitawag ug kosmos ug kini lumad sa mainit nga mga dapit sa Amerika. Ang maong matahom kaayong mga bulak lagmit makapahinumdom kanato sa usa ka leksiyon nga gitudlo ni Jesus. Daghan sa iyang mga mamiminaw maoy mga kabos, ug sila nabalaka sa ilang pisikal nga mga panginahanglan, sa ilang pagkaon ug besti.
‘Bahin sa besti,’ si Jesus nangutana, “nganong mabalaka man kamo? Kuhaig pagtulon-an ang mga lirio sa kapatagan, kon giunsa nila sa pagtubo; wala sila magbudlay, ni magkalinyas; apan ako magaingon kaninyo nga bisan si Solomon sa tanan niyang himaya wala masul-obig ingon sa usa niini.”—Mateo 6:28, 29.
Dunay lainlaing mga sugyot kon unsang espesipikong matang sa ihalas nga bulak ang gihunahuna ni Jesus. Hinunoa, si Jesus nagpadayon sa pagtandi niini ngadto sa ordinaryong katanoman, nga nag-ingon: “Karon, kon ang Diyos sa ingon nagbesti sa mga tanom sa kapatagan, nga ania karong adlawa ug ugma isalibay ngadto sa hudno, dili ba kamo labaw pa nga iyang pagabestihan, kamo nga diyutay ug pagtuo?”—Mateo 6:30.
Bisan pag ang kosmos dili lumad nga bulak sa Israel, kini nagpasiugda gayod sa leksiyon nga gitudlo ni Jesus. Kon tan-awon sa layo o tan-awon pag-ayo sa duol, kini matahom kaayo ug paborito sa mga letratista ug mga magdidibuho. Sa pagkatinuod, si Jesus wala magpasobra sa dihang siya miingon, “bisan si Solomon sa tanan niyang himaya wala masul-obig ingon sa usa niini.”
Unsay leksiyon niini alang kanato karon? Kadtong mag-alagad sa Diyos makaseguro nga siya motabang kanila sa pagbaton sa ilang mga kinahanglanon bisan sa malisod nga mga panahon. Si Jesus nagpatin-aw: “Pangitaa nga mapinadayonon ang . . . gingharian [sa Diyos], ug kining mga butanga [sama sa gikinahanglang pagkaon ug besti] igadugang kaninyo.” (Lucas 12:31) Oo, ang pagpangita sa Gingharian sa Diyos makahatag ug tinuod nga mga benepisyo. Apan nahibalo ka ba kon unsa ang Gingharian sa Diyos ug unsay pagabuhaton niini alang sa mga tawo? Ang mga Saksi ni Jehova malipay sa pagtabang kanimo nga makaplagan ang mga tubag gikan sa Bibliya.