Usa ka Pagtulon-an Gikan sa Kalanggaman ug Kabulakan

UNSA ang sagad gikabalak-an kaayo karon sa mga tawo? Alang sa kadaghanan, ang pagkabaton ug igo aron makatagana sa ilang pamilya o makapauswag sa ilang sukdanan sa pagkinabuhi.

Ang pagpangitag pangabuhian maoy usa usab nga gikabalak-an kaayo sa dihang dinhi pa si Jesu-Kristo sa yuta. Apan siya nagpasidaan nga kining makataronganong pagkabalaka posible nga mahimong pangunang kabalaka nga magpahiklin sa espirituwal nga mga butang. Sa pag-ilustrar sa iyang punto, gisultihan ni Jesus ang iyang mga disipulo sa pagpaniid ug maayo sa kalanggaman ug kabulakan.

Ang mga langgam kinahanglang mokaon adlaw-adlaw​—kon itandi mas daghan kay kanato tungod sa ilang kusog kaayo nga metabolismo. Dugang pa, sila dili makapugas ug binhi, makaani o makatipig ug pagkaon alang sa umaabot. Bisan pa, sama sa giingon ni Jesus, ang atong “langitnong Amahan nagpakaon kanila.” (Mateo 6:26) Sa susama, gibistihan ug matahom kaayo sa Diyos ang maanindot nga “mga liryo sa banika.”​—Mateo 6:28-30.

Si Jesus nagpasalig kanato nga kon ibutang nato ang materyal nga mga panginahanglan sa husto nga panglantaw ug unahon ang espirituwal nga mga butang, tinoon sa Diyos nga kita usab makabaton sa gikinahanglang pagkaon ug sapot. Kon si Jehova nagtagad sa mga langgam ug sa mga bulak, siya tinong magtagad niadtong kinsa nahigugma kaniya ug ‘nagpadayon sa pagpangitag una sa gingharian ug sa iyang pagkamatarong.’ (Mateo 6:33) Giuna ba nimo ang mga intereses sa Gingharian sa Diyos sa imong kinabuhi?