Ang Bulawanong Lagda—Nganong Angay Gihapon?

DILI molubad ang lunsayng bulawan, busa ang alahas nga bulawan ang engaste gimahal ug gipabilhan. Inay ilabay ang gubang bulawang mga butang, retokehon sa mga platero ang bililhong metal aron magama ang usa ka bag-ong buhat sa arte kay dili man mokunhod ang bili sa bulawan.

Sa samang paagi bisan pag gipahayag ni Jesus ang Bulawanong Lagda mga duha ka libo ka tuig kanhi, wala mous-os ang bili niini. Pinaagi sa pagtuki, o pagtino, sa mga katarongan sa pagkaangay niini, labi pa natong mapabilhan kini karong adlawa.

Sa gipahayag kanato ni Jesus ang Bulawanong Lagda, “busa, ang tanang butang nga buot ninyong buhaton sa mga tawo kaninyo, buhata usab ninyo ngadto kanila,” siya midugang: “Kini, sa pagkamatuod, mao ang kahulogan sa Kasugoan ug sa mga Propeta.” (Mateo 7:12) Giunsa kini pagsabot sa mga tinun-an ni Jesus ug sa ubang namati kaniya?

“Ang Kahulogan sa Kasugoan ug sa mga Propeta”

“Ang Kasugoan” nagtumong sa unang mga kasulatan nga gilangkoban sa unang lima ka basahon sa Bibliya, ang Genesis hangtod sa Deuteronomio. Kini nagapadayag sa katuyoan ni Jehova nga ipatungha ang usa ka binhi nga magwagtang sa pagkadaotan. (Genesis 3:15) Nahiapil nianang unang mga basahon sa Bibliya mao ang Kasugoan, o hugpong sa mga sugo, nga gihatag ni Jehova niadtong 1513 W.K.P. ngadto sa nasod sa Israel pinaagi ni Moises ingong tigpataliwala didto sa Bukid Sinai.

Ang balaang kasugoan nagpalahi sa Israel gikan sa paganong mga nasod sa palibot, ug ang mga Israelinhon angay dili makiglabot sa bisan unsa nga magkompromiso sa ilang inuyonang pagbarog sa atubangan ni Jehova. Sila mao ang iyang linaing kabtangan ug kinahanglang magpabiling ingon aron makadawat sa iyang mga panalangin. (Exodo 19:5; Deuteronomio 10:12, 13) Apan gawas sa ilang mga obligasyon sa Diyos, gitalaid sa Moisesnong Kasugoan ang responsabilidad sa mga Israelinhon sa pagbuhat ug maayo ngadto sa mga dumuloong sa Israel. Pananglitan, kini mipahayag: “Ang dumuloong nga nagapuyo uban kaninyo pagahimoon ninyo ingon sa molupyo sa taliwala ninyo; ug higugmaon mo siya ingon sa imong kaugalingon, kay kamo nahimong mga dumuloong sa yuta sa Ehipto. Ako mao si Jehova nga inyong Diyos.” (Levitico 19:34) Panahon sa mga hari sa Israel, ang mga dumuloong nagpahimulos ug daghang pribilehiyo, sama sa pag-apil sa pagtukod sa templo sa Diyos sa Jerusalem.​—1 Cronicas 22:2.

Ang Kasugoan nga gihatag sa Israel nagdili sa pagpanapaw, pagpatay, pangawat ug pagkaibog. Ang maong mga sugo, uban sa “bisan unsa pa nga sugo nga anaa,” masuma sa lagda, “Higugmaon mo ang imong silingan ingon sa imong kaugalingon.” Midugang si apostol Pablo: “Ang gugma dili mobuhat ug daotan sa iyang silingan; busa ang gugma mao ang katumanan sa kasugoan.”​—Roma 13:9, 10.

Kon ang Kasugoan naglatid sa pasikaranan mismo sa Bulawanong Lagda, unsa na man “ang mga Propeta”?

Ang matagnaong mga basahon sa Hebreohanong Kasulatan susamang nagapamatuod sa pagkaangay sa Bulawanong Lagda. Kana nagapakita nga si Jehova maoy usa ka Diyos nga matinumanong nagatuman sa iyang katuyoan. Ginapanalangin niya ang iyang matinumanong mga alagad si kinsa, bisan pag dili hingpit, nagapaningkamot sa pagbuhat sa iyang kabubut-on ug nagapasundayag sa tiunay nga pagbasol tungod sa ilang masupilong mga buhat. “Panghugas kamo; panghinlo kamo; kuhaa ang daotan ninyong mga buhat gikan sa atubangan sa akong mga mata; hunong na kamo sa pagbuhat ug daotan. Pagtuon kamo sa pagbuhat ug maayo; pangitaa ninyo ang hustisya; tul-ira ninyo ang daogdaogan; hukmi sa matarong ang ilo nga batang lalaki; labani ang babayeng balo.”​—Isaias 1:16, 17.

Sa dihang ang katawhan sa Diyos nagbuhat kon unsay matarong sa uban ug sa Diyos, nan gipasalig ni Jehova ang iyang pagpaluyo. “Kini mao ang giingon ni Jehova: ‘Bantayi ang hustisya, kamong katawhan, ug buhata kon unsay matarong. . . . Malipayon ang himalatyong tawo nga nagabuhat niini, ug ang anak sa mga tawo nga nagakupot niini.”​—Isaias 56:1, 2.

Si Kristo Nagatultol sa Iyang Kongregasyon

Si Kristo mianhi aron sa pagtuman sa Kasugoan ug sa mga Propeta, ug sukad sa iyang panahon, ang dumalayong katuyoan ni Jehova nagapadayon sa pag-uswag. (Mateo 5:17; Efeso 3:10, 11, 17-19) Ang karaang Kasugoan ni Moises gipulihan sa bag-ong pakigtugon, nga nagasakop sa Hudiyonhon ug Hentil dinihogang mga Kristohanon. (Jeremias 31:31-34) Bisan pa niana, ang Kristohanong kongregasyon sa atong adlaw nagasunod gihapon sa Bulawanong Lagda. Ug aniay laing katarongan sa pagdawat sa pagkaangay sa lagda: Si Kristo mao ang aktibong Ulo sa modernong Kristohanong kongregasyon. Wala niya usba ang iyang mga instruksiyon. Ang iyang dinasig nga tambag mapadapat gihapon.

Una mopahawa gikan niining yutaa, gisugo ni Jesus ang iyang mga sumusunod sa paghimog mga tinun-an sa katawhan sa tanang nasod ug pagtudlo kanila sa “pagbantay sa tanang butang nga akong gisugo kaninyo.” Ang maong instruksiyon nag-apil sa Bulawanong Lagda. Gipasaligan ni Jesus ang iyang mga tinun-an: “Tan-awa! Ako magauban kaninyo sa tanang adlaw hangtod sa konklusyon sa sistema sa mga butang.”​—Mateo 28:19, 20.

Sumala sa nahitala sa Lucas 6:31, si Jesus misugo: “Sumala sa buot ninyong buhaton sa mga tawo kaninyo, buhata ang sama ngadto kanila.” Pagkamaayong panig-ingnan ang gihatag ni Jesus sa pagpanguna sa pagbuhat ug maayo ngadto sa uban!

Sa lakaw sa iyang yutan-ong ministeryo, napanid-an pag-ayo ni Jesus kon unsay giantos sa mga tawo, ug gibati siyag kaluoy kanila. Panahon sa usa sa iyang mga panaw sa pagwali, nakita niya ang mga panon ug giabot siyag kaluoy kanila. Apan labaw pa niana, mihimo siyag mga kahikayan sa pagtabang kanila. Sa unsang paagi? Pinaagi sa pag-organisar sa malukopong kampanya sa pagwali nga nagdala sa iyang mga tinun-an ngadto sa kabalayan sa mga tawo. Sumala sa iyang gisugo: “Sa bisan unsang siyudad o balangay nga inyong pagasudlan, pangitaa kon kinsa diha niana ang takos, ug magpabilin dinha hangtod sa inyong pagbiya.” Nga kining buluhatona nakabaton sa iyang pagpaluyo ug sa panalangin sa iyang Amahan tin-awng makita gikan sa dugang mga pulong ni Jesus: “Siya nga nagadawat kaninyo nagadawat usab kanako, ug siya nga nagadawat kanako nagadawat usab kaniya nga nagpadala kanako. . . . Ug si bisan kinsa ang magahatag ug usa ka kopa sa bugnawng tubig aron mainom sa usa niining mga gagmay tungod kay siya usa ka tinun-an, ako magaingon kaninyo, siya dili gayod mawad-an sa iyang ganti.”​—Mateo 9:36–10:42.

Nga ang Bulawanong Lagda nagapasabot sa positibong aksiyon alang sa uban makita sa pangatarongan ni Jesus sa laing okasyon: “Kon higugmaon ninyo kadtong nahigugma kaninyo, unsay kapuslanan niana kaninyo? Kay bisan ang mga makasasala nahigugma niadtong nahigugma kanila. Ug kon buhaton ninyo ang maayo ngadto niadtong nagabuhat ug maayo kaninyo, sa pagkamatuod unsay kapuslanan niana kaninyo? Bisan ang mga makasasala nagabuhat sa ingon. Sa kasukwahi, magpadayon kamo sa paghigugma sa inyong mga kaaway ug sa pagbuhat ug maayo . . . ug dako unya ang inyong ganti.” (Lucas 6:32, 33, 35) Busa, ang pagtuman sa angay gihapong Bulawanong Lagda motukmod nato sa pagpanguna sa pagbuhat ug maayo bisan sa mga tawo nga dili nato kaila sa personal.

Angay Gihapon, Nagalihok Gihapon

Tingali ang labing mahukmanong pamatuod nga ang Bulawanong Lagda angay gihapon nagagikan sa aktuwal nga mga kasinatian niadtong nagasunod niini. Ang mga Kristohanon nga nagagawi sa matag adlaw nga nahiuyon sa mga kasugoan sa Diyos nakakaplag ug dakong kalipay ug, kasagaran, sa wala-dahomang mga panalangin. Pinaagi sa pagkamatinahoron ug pagkamaluluton ngadto sa mga trabahante sa medikal nga klinika nga iyang gisudlan, ang usa ka Kristohanong babaye nakadiskobreng siya nakabenepisyo sa paagi nga ang mga nars ug mga doktor nagbuhat sa dili naandang butang aron atimanon siya.

Ang mga Saksi ni Jehova nga nalangkit sa mga proyekto sa daling-matukod nga Kingdom Hall makapamatuod usab sa pagkaangay sa Bulawanong Lagda. Ang malulutong mga pagduaw sa mga tawo nga nagapuyo duol sa dapit nga gitukoran aron pahibaloon sila sa giplano kasagaran nga may positibong reaksiyon. Ang mga tawo nga sa nangagi misupak sa mga Saksi sa ingon nakapaniid nga sila nagabuhat ug maayo sa ilang mga silingan, ug ilang makitang direkta ang paagi sa pagtinabangay sa katawhan sa Diyos diha sa ilang buluhaton. Ingong resulta, ang pipila mitanyag nga motabang sa pagtukod, sa direkta kaha o paghimo sa mga suplay nga mabatonan.​—Itandi ang Zacarias 8:23.

Sa dihang ang usa ka Iranian nga Saksi nga nagpuyo sa London, Inglaterra, mipalit ug pagkaon gikan sa usa ka tindahan, giinsulto siya sa tindero kay siya langyaw. Nga wala mahadlok, ang Saksi maluluton ug mataktikang mipatin-aw nga siya, ingong usa sa mga Saksi ni Jehova, walay daotang mga pagbati ngadto sa mga tawo sa ubang nasyonalidad. Hinunoa, giduaw niya ang tanan diha sa silinganan uban ang mensahe sa Bibliya. Ang resulta? Ang tag-iya sa tindahan midugang ug ekstrang mga lamiang pagkaon sa giorder nga pagkaon sa Saksi.

Hinuon, ang Bulawanong Lagda dili limitado sa maong gagmayng mga buhat sa kalulot. Sa pagkamatuod, sa pagkakaron ang kinadak-ang kapahayagan niini mao ang maayong ginabuhat sa mga Saksi ni Jehova sa tibuok kalibotan pinaagi sa regular nga pagduaw sa mga balay sa ilang mga silingan uban ang mensahe sa maayong balita sa Gingharian sa Diyos.

Pagsunod sa Bulawanong Lagda sa Kinabuhi

Ang pagpadapat sa Bulawanong Lagda nagkahulogan sa pagliso sa imong pagtagad ngadto sa uban. Kini positibong latid. Kinahanglang mangita kag mga higayon sa pagbuhat ug maayo ngadto niadtong anaa alirong nimo. Mahimong dili maulawon ug mahunahunaon, nga maikag kanila! (Filipos 2:4) Pinaagi sa pagbuhat niana, maani nimo ang tugob nga mga panalangin. Magasunod ka sa tambag ni Jesus: “Pasidlaka ang inyong kahayag sa atubangan sa mga tawo, aron sila makakita sa inyong maayong mga binuhatan ug magahatag ug himaya sa inyong Amahan nga anaa sa mga langit.” (Mateo 5:16) Sa baylo, si Jehova mahimong imong Tigganti samtang sa tim-os pangitaon nimo siya ug magkinabuhi sa matag adlaw sa Bulawanong Lagda.​—Hebreohanon 11:6.