Mahimong mga Magtutuman sa Pulong, Dili Lamang mga Tigpaminaw
“Dili ang tanang magaingon kanako, ‘Ginoo, Ginoo,’ makasulod sa gingharian sa mga langit, apan ang nagatuman sa kabubut-on sa akong Amahan nga anaa sa mga langit.”—MATEO 7:21.
1. Unsay ginapadayon sa pagbuhat sa mga sumusunod ni Jesus?
IPADAYON ninyo ang pagpangayo. Ipadayon ninyo ang pagpangita. Ipadayon ninyo ang pagpanuktok. Lumahutay kamo sa pag-ampo, sa pagtuon, ug sa pagtuman sa mga pulong ni Jesus nga nahitala sa Wali sa Bukid. Giingnan ni Jesus ang iyang mga sumusunod nga sila ang asin sa yuta, nga may makapreserbar nga mensaheng tinimplahan ug asin nga kinahanglang dili nila itugot nga mahimong tab-ang, nga mawad-ag lami o sa katakos niini sa pagpreserbar. Sila ang kahayag sa kalibotan nga nagapasidlak sa kahayag gikan kang Kristo Jesus ug kang Jehova nga Diyos dili lang pinaagi sa ilang ginasulti apan pinaagi usab sa ilang ginabuhat. Nagasidlak ang ilang maayong mga binuhatan sama sa ilang makapalamdag nga mga pulong—ug mahimong kusog pang mosulti diha sa kalibotan nga naanad sa Pariseonhong kasalingkapaw sa relihiyoso ug sa politikanhong mga pangulo, nga daghag ginasulti ug diyutay rag ginabuhat.—Mateo 5:13-16.
2. Unsang tambag ang gihatag ni Santiago, apan unsang hayahay nga kahimtang ang sayop nga gisagop sa pipila?
2 Si Santiago nagatambag: “Mahimong mga magtutuman sa pulong, ug dili mga tigpaminaw lamang, nga nagalimbong sa inyong kaugalingon pinaagi sa bakak nga pangatarongan.” (Santiago 1:22) Daghan ang nagalimbong sa ilang kaugalingon pinaagi sa doktrina sa ‘kas-a nga naluwas, sa kanunay naluwas,’ nga nahisamag sila karon makaretiro na ug magpaabot sa langitnong ganti kono. Kini usa ka bakak nga doktrina ug kawang nga paglaom. “Siya nga nagaantos hangtod sa kataposan,” matud ni Jesus, “mao ang mamaluwas.” (Mateo 24:13) Aron makabaton sa kinabuhing walay kataposan, kinahanglang ikaw “magpamatuod sa imong kaugalingon nga matinumanon hangtod sa kamatayon.”—Pinadayag 2:10; Hebreohanon 6:4-6; 10:26, 27.
3. Unsang instruksiyon bahin sa paghukom ang sunod gihatag ni Jesus sa Wali sa Bukid?
3 Sa gipadayon ni Jesus ang iyang Wali sa Bukid, natigom ang dugang mga panultihon nga kinahanglang paningkamotan nga masunod sa mga Kristohanon. Aniay usa nga maorag yano, apan kini nagasaway sa usa sa labing lisod nga mga kiling nga igahiklin: “Ayaw kamo pagpanghukom aron dili kamo pagahukman; kay ang hukom nga inyong igahukom, mao ang igahukom kaninyo; ug ang takos nga inyong ginahatag, mao ang takos nga igahatag kaninyo. Nan, ngano man nga tan-awon mo ang puling nga anaa sa mata sa imong igsoon, apan wala nimo hinuon tagda ang puling sa imong kaugalingong mata? O unsaon man nimo sa pag-ingon ngadto sa imong igsoon, ‘Tugoti ako sa pagkuha sa puling gikan sa imong mata’; sa dihang tan-awa! anaa may troso sa imong kaugalingong mata? Maot! Kuhaa una ang troso gikan sa kaugalingon mong mata, ug unya makakita ka na pag-ayo kon unsaon sa pagkuha sa puling gikan sa mata sa imong igsoon.”—Mateo 7:1-5.
4. Unsang dugang instruksiyon ang gihatag sa asoy ni Lucas, ug mosangpot sa unsa ang pagpadapat niini?
4 Sa asoy ni Lucas sa Wali sa Bukid, gisultihan ni Jesus ang iyang mga tigpaminaw nga dili mangitag sayop sa uban. Hinunoa, pasagdi nga sila “magpadayon sa pagpahigawas,” nga mao, pagpasaylo sa mga kahuyangan sa ilang isigkatawo. Kini magpahinabo nga mobalos ang uban sa sama, kay si Jesus miingon: “Panghatag kamo, ug kamo pagahatagan sa mga tawo. Ang takos nga pinaugdo, tinantan, ug dinasok ug nagaawas igabubo nila sa inyong sabakan. Kay sa takos nga inyong ginahatag, mao usab ang ilang igabalos sa pagtakos kaninyo.”—Lucas 6:37, 38.
5. Nganong labi pang sayon ang pagkakita sa mga depekto sa uban kay sa atong kaugalingon?
5 Sa unang siglo K.P., tungod sa gikabilinbiling kalagdaan, ang mga Pariseo sa kasagaran may kiling sa paghukom nga mapintason sa uban. Si bisan kinsa sa mga tigpaminaw ni Jesus nga may batasan sa pagbuhat sa ingon angay mohunong niana. Labi pang sayon ang pagkakita sa mga puling diha sa mga mata sa uban kay sa mga troso diha sa atong kaugalingon—ug labi pang makapausbaw sa atong garbo! Sumala pa sa usa ka tawo, “Gusto ko nga manaway sa uban kay kini mopabati kanako nga maayo kaayo!” Ang nabatasang pagsaway sa uban tingali mohatag kanato sa mga pagbati sa maayong kinaiya nga daw mobakwi sa atong kaugalingong mga sayop nga buot natong itago. Apan kon gikinahanglan ang pagtul-id, kini angay igahatag sa espiritu sa kalumo. Ang nagahatag sa pagtul-id angay magmahunahunaon kanunay sa kaugalingon niyang mga kahuyangan.—Galacia 6:1.
Sa Dili pa Mohukom, Sulayi ang Pagsabot
6. Pinasukad sa unsa, kon kinahanglanon, nga pagahimoon ang atong mga paghukom, ug unsang tabang ang atong pangitaon aron dili mahimong sobra ka hinawayon?
6 Si Jesus wala moanhi sa kalibotan aron sa paghukom sa kalibotan kondili aron sa pagluwas niini. Ang mga paghukom nga iyang gibungat dili iyaha kondili gipasukad sa mga pulong nga gihatag sa Diyos kaniya nga igapamulong. (Juan 12:47-50) Ang mga paghukom nga atong himoon angay usab nga mahiuyon sa Pulong ni Jehova. Kinahanglang pukgoon nato ang tawhanong kiling nga mohukom dayon. Sa pagbuhat niini, angay nga kita malugoton sa pag-ampo alang sa tabang ni Jehova: “Magpadayon kamo sa pagpangayo, ug kamo pagahatagan; magpadayon kamo sa pagpangita, ug kamo makakaplag; magpadayon kamo sa pagpanuktok, ug kamo pagaablihan. Kay ang tanan nga magapangayo makadawat, ug ang tanan nga magapangita makakaplag, ug ang tanan nga magatuktok pagaablihan.” (Mateo 7:7, 8) Bisan si Jesus miingon: “Ako walay arang mahimo sa akong kaugalingong pagbulot-an; sumala sa akong nadungog, ako magahukom; ug ang paghukom nga akong ginahukom matarong, tungod kay ako nagapangita, dili sa akong kaugalingong kabubut-on, kondili sa kabubut-on sa nagpadala kanako.”—Juan 5:30.
7. Unsang batasan ang angay natong ugmaron nga motabang nato sa pagpadapat sa Bulawanong Lagda?
7 Angay natong ugmaron ang batasan, dili sa paghukom sa mga tawo, kondili sa pagsulay sa pagsabot nila pinaagi sa pagbutang sa atong kaugalingon diha sa ilang dapit—dili sayong buhaton apan gikinahanglan aron makasunod kita sa Bulawanong Lagda, nga sunod gipahayag ni Jesus: “Busa, ang tanang butang nga buot ninyo nga buhaton sa mga tawo kaninyo, kinahanglang inyo usab nga buhaton kanila; kini, sa pagkamatuod, mao ang kahulogan sa Kasugoan ug sa mga Propeta.” (Mateo 7:12) Busa ang mga sumusunod ni Jesus kinahanglang masensitibo ug makaila sa mental, emosyonal, ug espirituwal nga kahimtang sa uban. Kinahanglang ilhon ug sabton nila ang mga panginahanglan sa uban ug magmaikagon sa pagtabang kanila. (Filipos 2:2-4) Katuigan sa ulahi si Pablo misulat: “Kay ang tibuok nga Kasugoan natuman sa usa ka panultihon, nga mao: ‘Higugmaa ang imong silingan sama sa imong kaugalingon.’”—Galacia 5:14.
8. Unsang duha ka dalan ang gihisgotan ni Jesus, ug nganong usa kanila ang gipili sa kinabag-ang mga tawo?
8 “Sumulod kamo sa masigpit nga pultahan,” sunod miingon si Jesus, “tungod kay sangkad ug dako ang dalan paingon sa kalaglagan, ug daghan ang nagasulod agi niini; samtang masigpit ang pultahan ug hiktin ang dalan paingon sa kinabuhi, ug diyutay ra ang nakatultol niini.” (Mateo 7:13, 14) Daghan niadtong mga adlawa ang mipili sa dalan paingon sa kalaglagan ug daghan ang nagapili gihapon niana. Ang sangkad nga dalan nagatugot sa mga tawo sa paghunahuna sumala sa gusto nila ug pagkinabuhi sumala sa gusto nila: walay lagda, walay mga panaad, basta relaks nga paagi sa kinabuhi, nga sayon lang ang tanan. Walay “panlimbasog kamo sa pagsulod sa masigpit nga pultahan” alang kanila!—Lucas 13:24.
9. Unsay gikinahanglan aron sa pagsubay sa sigpit nga dalan, ug unsang pasidaan ang ginahatag ni Jesus niadtong nagasubay niini?
9 Apan ang masigpit nga pultahan mao ang abli paingon sa dalan sa kinabuhing walay kataposan. Kini usa ka dalan nga nagakinahanglag pagpugong-sa-kaugalingon. Tingalig nagakinahanglan kinig disiplina nga magasusi sa imong mga motibo ug magatigi sa kainit sa imong pahinungod. Inig-abot sa mga paglutos, ang dalan magkalisod ug kinahanglan ang agwanta. Si Jesus nagapasidaan niadtong nagasubay niining dalana: “Pagbantay kamo kay ang mini nga mga propeta moanha kaninyo nga managsapot sa pagkakarnero, apan diay sa sulod sila mga lobo nga manunukob.” (Mateo 7:15) Ang maong kabatbatan hingpit nga haom sa mga Pariseo. (Mateo 23:27, 28) Sila “nanglingkod sa lingkoranan ni Moises,” nga nangangkon nga nagpahayag alang sa Diyos samtang nagsunod sa gikabilinbiling kalagdaan sa mga tawo.—Mateo 23:2.
Kon sa Unsang Paagi ang mga Pariseo “Nagtak-op sa Gingharian”
10. Sa unsang ispisipikong paagi ang mga eskriba ug mga Pariseo nagtinguha sa ‘pagtak-op sa gingharian atubangan sa mga tawo’?
10 Dugang pa, gitinguha sa Hudiyong klero ang pagbabag niadtong gustong mosulod sa masigpit nga pultahan. “Alaot kamo, mga eskriba ug mga Pariseo, mga salingkapaw! kay inyong gitak-opan ang gingharian sa mga langit sa atubangan sa mga tawo; kay kamo mismo dili magasulod, ni kamo nagatugot niadtong buot sa pagsulod niana.” (Mateo 23:13) Ang paagi sa mga Pariseo maoy sumala sa gipasidaan ni Jesus. Ilang “isalikway ang ngalan [sa iyang mga tinun-an] ingon nga daotan tungod sa Anak sa tawo.” (Lucas 6:22) Kay ang tawong natawong buta ug giayo ni Kristo nagtuo nga si Jesus mao ang Mesiyas, ilang gipalagpot siya gikan sa sinagoga. Ang iyang mga ginikanan wala motubag sa mga pangutana tungod kay sila nahadlok nga palagpoton gikan sa sinagoga. Tungod sa samang katarongan, ang uban nga nagtuo nga si Jesus mao ang Mesiyas nagpanuko sa pag-angkon niana sa dayag.—Juan 9:22, 34; 12:42; 16:2.
11. Unsang nagapailang mga bunga ang gipamunga sa klero sa Kakristiyanohan?
11 “Pinaagi sa ilang mga bunga inyo silang mailhan,” matud ni Jesus. “Ang matag maayong kahoy mamunga sa maayong bunga, apan ang matag dunot nga kahoy mamunga sa walay-pulos nga bunga.” (Mateo 7:16-20) Ang samang lagda mapadapat karong adlawa. Daghan sa klero sa Kakristiyanohan nagasulti sa usa ka butang ug nagabuhat sa lain. Bisan pag nagaangkong nagatudlo sa Bibliya, sila nagapaluyo sa mga pasipala sama sa Trinidad ug impiyernong-kalayo. Ang uban dili motuo sa lukat, nagatudlo sa ebolusyon inay sa paglalang, ug nagawali sa popular nga sikolohiya aron sa paggitik sa mga igdulongog. Sama sa mga Pariseo, daghan sa klero karong adlawa mahigugmaon ug salapi, nga nagailad sa ilang mga panon sa milyonmilyong dolyar. (Lucas 16:14) Ang tanan kanila nagasinggit, “Ginoo, Ginoo,” apan ang tubag ni Jesus kanila mao: “Wala gayod ako makaila kaninyo! Pamahawa kamo kanako, kamong mga mamumuhat ug daotan.”—Mateo 7:21-23.
12. Nganong ang pipila nga sa nangagi nagsubay sa sigpit nga dalan nanghunong sa pagbuhat niana, ug unsay sangpotanan?
12 Karong adlawa, ang pipila nga sa nangagi nagsubay sa masigpit nga dalan mihunong sa pagbuhat niana. Sila nagaingon nga sila nahigugma kang Jehova, apan sila wala magsugot sa iyang sugo sa pagwali. Sila nagaingon nga sila nahigugma kang Jesus, apan sila wala magapakaon sa iyang mga karnero. (Mateo 24:14; 28:19, 20; Juan 21:15-17; 1 Juan 5:3) Dili nila buot nga mayugohan uban niadtong nagasubay sa mga lakang ni Jesus. Giisip nila ang masigpit nga dalan nga sobra ka sigpit. Sila gilaayan sa pagbuhat ug maayo, mao nga sila “mibulag kanato, apan sila dili sa atong matang; kay kon sila sa ato pang matang, sila magpabilin unta nga kauban nato.” (1 Juan 2:19) Sila namalik sa kangitngitan, ug “pagkadako sa maong kangitngit!” (Mateo 6:23) Wala sila magpakabana sa hangyo ni Juan: “Magagmay nga mga anak, mahigugma kita, dili sa pulong o sa dila, kondili sa buhat ug sa kamatuoran.”—1 Juan 3:18.
13, 14. Unsang ilustrasyon ang gihatag ni Jesus mahitungod sa pagpadapat sa iyang mga pulong diha sa atong mga kinabuhi, ug nganong haom kaayo kini alang niadtong tua sa Palestina?
13 Gitapos ni Jesus ang iyang Wali sa Bukid pinaagi sa dramatikong ilustrasyon: “Ang tagsatagsa nga makadungog niining akong mga pulong ug magatuman niini mahisama sa usa ka tawong maalamon, nga nagtukod sa iyang balay ibabaw sa bato. Ug mibundak ang ulan ug mibul-og ang mga baha ug mihuros ang mga hangin ug mihapak niadtong balaya, apan kadto wala mapukan, kay kadto natukod ibabaw sa bato.”—Mateo 7:24, 25.
14 Sa Palestina ang kusog nga ulan makapahinabo nga ang katubigan moagos sa namad-ang mga suba nga mahimong malaglagon kusog nga baha. Aron makabarog ang mga balay, kinahanglang ang mga patukoranan nila maoy gahing bato. Ang asoy ni Lucas nagapakita nga ang tawo “nagkutkot ug nagkutkot nga lalom ug nagbutang sa patukoranan ibabaw sa bato.” (Lucas 6:48) Hago kadto nga trabaho, apan kadto mapuslanon sa pag-abot sa bagyo. Busa ang pagtukod sa mga hiyas nga Kristohanon ibabaw sa mga pulong ni Jesus magantihon unya inighapak sa kusog nga baha sa kalisdanan.
15. Unsa ang sangpotanan niadtong nagasunod sa gikabilinbiling kalagdaan sa mga tawo inay nagasugot sa mga pulong ni Jesus?
15 Ang laing balay gitukod ibabaw sa balas: “Ang tagsatagsa nga makadungog niining akong mga pulong ug dili magatuman niini mahisama sa usa ka tawong buangbuang, nga nagtukod sa iyang balay ibabaw sa balas. Ug mibundak ang ulan ug mibul-og ang baha ug mihuros ang mga hangin ug mihapak nianang balaya ug kadto napukan, ug dako ang pagkalumpag niadto.” Mao man usab unya alang niadtong magaingon “Ginoo, Ginoo” apan dili magatuman sa mga pulong ni Jesus.—Mateo 7:26, 27.
“Dili Sama sa Ilang mga Eskriba”
16. Unsa ang epekto diha niadtong nakadungog sa Wali sa Bukid?
16 Unsa ang epekto sa Wali sa Bukid? “Karon sa nakatapos si Jesus sa maong mga pulong, ang epekto mao nga ang mga panon nahibulong sa iyang paagi sa pagtudlo; kay siya nagtudlo kanila samag usa ka tawo nga may pagbulot-an, ug dili sama sa ilang mga eskriba.” (Mateo 7:28, 29) Sila natandog sa ilang kahiladman pinaagi sa usa nga namulong nga mabulot-anon nga wala gayod nila sukad hibatyagi.
17. Unsay kinahanglang buhaton sa mga eskriba aron katuohan ang ilang pagtulon-an, ug unsay ilang giangkon bahin sa patay nang mga maalamon nga gikutlo?
17 Walay eskriba ang sukad namulong sa iyang kaugalingong pagbulot-an, ingon nga gipakita niining talaan sa kasaysayan: “Ang mga eskriba naghulam ug pasidungog sa ilang doktrina gikan sa gikabilinbiling kalagdaan, ug sa mga amahan niana: ug walay wali ni bisan kinsang eskriba ang may pagbulot-an o bili, nga walay [pagsitar] . . . sa Ang mga Rabbin dunay gikabilinbiling lagda, o . . . Ang mga tawong maalamon nagaingon; o sa naandang orakulo nianang kinaiyaha. Si Hillel ang Bantogan nagtudlo gayod, ug ingong gikabilinbiling lagda mahitungod sa usa ka butang; ‘Apan, bisan pag siya nagpahayag nianang butanga sa tibuok nga adlaw, . . . sila wala magdawat sa iyang doktrina, hangtod nga siya miingon sa kataposan, Kana ang akong nadungog gikan kang Shemaia ug Abtalion [mga awtoridad nga una kang Hillel].’” (A Commentary on the New Testament From the Talmud and Hebraica, ni John Lightfoot) Ang mga Pariseo nangangkon pa sa mga makinaadmanon nga dugay nang namatay: “Ang mga ngabil sa mga matarong, sa dihang may magahisgot sa usa ka pagtulon-an sa kasugoan diha sa ilang mga ngalan—ang ilang mga ngabil magabagutbot uban kanila sa lubnganan.”—Torah—From Scroll to Symbol in Formative Judaism.
18. (a) Unsay kalainan tali sa pagtulon-an sa mga eskriba ug sa iya ni Jesus? (b) Sa unsang mga paagi talagsaon kaayo ang pagtuo ni Jesus?
18 Ang mga eskriba nagkutlo sa mga tawong namatay ingong mga awtoridad; si Jesus namulong uban ang pagbulot-an gikan sa Diyos nga buhi. (Juan 12:49, 50; 14:10) Ang mga rabbi nagkalos ug pan-os nga tubig gikan sa siradong mga atabay; si Jesus nagpatunghag mga tubod sa lab-as nga tubig nga nagtagbaw sa sulod nga kauhaw. Siya nag-ampo ug namalandong sa tibuok gabii, ug sa dihang siya namulong, iyang gitandog ang mga kahiladman diha sa mga tawo nga wala sukad hiamgohi. Siya namulong uban ang gahom nga ilang hibatyagan, sa pagbulot-an nga bisan sa kadugayan ang mga eskriba, mga Pariseo, ug mga Saduseo nahadlok sa paglalis. (Mateo 22:46; Marcos 12:34; Lucas 20:40) Walay tawo ang sukad nakapamulong nga sama niini! Sa pagkatapos sa wali, ang mga panon nahibulong!
19. Sa unsang paagi ang pipila ka paagi sa pagtudlo nga gigamit sa mga Saksi ni Jehova karong adlawa susama sa gigamit ni Jesus sa Wali sa Bukid?
19 Komosta man karong adlawa? Ingong balay-balay nga mga ministro, ang mga Saksi ni Jehova nagagamit sa susamang mga paagi. Ang tagbalay moingon kanimo: “Ang akong simbahan nagaingon nga ang yuta pagasunogon.” Ikaw motubag: “Ang imong King James nga Bibliya mabasa sa Ecclesiastes 1:4: ‘Ang yuta mopabilin sa walay kataposan.’” Ang lain nagaingon: “Akong nadungog nga ang mga makasasala pagasunogon sa impiyernong-kalayo.” “Apan ang imong kaugalingong Bibliya nagaingon sa Roma 6:23: ‘Ang bayad sa sala mao ang kamatayon.’” O bahin sa Trinidad: “Ang akong magwawali nagaingon nga si Jesus ug ang iyang Amahan managsama ra.” “Apan sa Juan 14:28 ang imong Bibliya nagakutlo kang Jesus nga nagaingon: ‘Ang akong Amahan labaw kay kanako.’” Ang laing tawo nagaingon kanimo: “Akong nadungog nga giingon nga ang Gingharian sa Diyos anaa sa sulod nimo.” Imong tubag: “Sa Daniel 2:44 ang imong Bibliya nagaingon: ‘Sa mga adlaw niining mga haria ang Diyos sa langit magatukod sa usa ka gingharian, nga dili gayod malaglag . . . Kini magadugmok ug magaut-ot niining tanan nga gingharian, ug kini mobarog sa walay kataposan.’ Sa unsang paagi kana maanaa sa sulod nimo?”
20. (a) Unsay kalainan tali sa paagi sa pagtudlo sa mga Saksi ug sa iya sa klero sa Kakristiyanohan? (b) Karon panahon na alang sa unsa?
20 Si Jesus namulong nga may pagbulot-an gikan sa Diyos. Ang mga Saksi ni Jehova nagapamulong nga may pagbulot-an sa Pulong sa Diyos. Ang klero sa Kakristiyanohan nagapamulong sa relihiyosong gikabilinbiling kalagdaan nga nahugawan sa mga doktrinang naggikan sa Babilonya ug Ehipto. Sa dihang madungog sa mga tawong sinsero nga ang ilang mga pagtuo gilalis sa Bibliya, sila nahingangha ug nagpatugbaw: ‘Wala gayod ako mahibalo nga kana anaa sa akong Bibliya!’ Apan kini anaa. Karon na ang panahon nga ang tanang mahunahunaon sa ilang espirituwal nga panginahanglan magpatalinghog sa mga pulong ni Jesus diha sa Wali sa Bukid ug sa ingon magatukod ibabaw sa lig-ong patukoranang bato.
Mga Pangutana sa Pagsubli
◻ Inay kay mohukom, unsay angay natong paningkamotan nga buhaton, ug ngano?
◻ Sa unsang paagi ang daghan kaayo karong adlawa nagapili sa sangkad nga dalan?
◻ Nganong ang paagi ni Jesus sa pagtudlo lahi kaayo sa iya sa mga eskriba?
◻ Unsa ang epekto sa Wali sa Bukid diha sa mga tigpaminaw niini?