Sa Dihang ‘ang Hangin Nagsungsong Kanato’

Sa paghubit sa tinuod-kinabuhing kasinatian sa mga tinun-an ni Jesus samtang sila nakigbisog sa pagtabok sa Dagat sa Galilea diha sa sakayan, ang magsusulat sa Ebanghelyo nga si Marcos nag-ingon nga sila “nalisdan sa ilang pagbugsay, kay ang hangin sungsong man kanila.” Samtang didto pa sa baybayon, nakita ni Jesus ang ilang kahimtang ug milagrosong milakaw ibabaw sa dagat aron maabot sila. Sa dihang misakay siya sa sakayan uban kanila, ang hangin milurang.—Marcos 6:48-51.

Ang mao gihapong magsusulat sa Bibliya nagtaho nga diha sa mas unang panghitabo, usa ka “mabangis nga unos nahitabo.” Niana, “gibadlong [ni Jesus] ang hangin . . . , ug ang hangin milurang, ug ang dakong kalinaw miabot.”—Marcos 4:37-39.

Bisan pag kita karon wala makapribilehiyo sa pagsaksi sa maong milagrosong mga hitabo, daghan kitag makat-onan gikan kanila. Ingong dili-hingpit nga mga tawo nga nagkinabuhi sa peligrosong mga panahon, kita wala mahigawas sa mga hangin sa kalisdanan. (2 Timoteo 3:1-5) Sa pagkamatuod, usahay kita tingali mobati nga ang kasakit maylabot sa personal nga mga pagsulay moabot sa unos nga gikusgon. Apan ang kahupayan mabatonan! Si Jesus nagdapit: “Umari kanako, kamong tanan nga nagabudlay ug nabug-atan, ug ako magapalagsik kaninyo.”—Mateo 11:28.

Sa dihang mopatim-aw nga ‘ang hangin nagsungsong kanato,’ kita makasinati ug ‘dakong kalinaw’ sa kasingkasing. Sa unsang paagi? Pinaagi sa pagsalig sa dili mapakyas nga mga saad ni Jehova nga Diyos.—Itandi ang Isaias 55:9-11; Filipos 4:5-7.