“Buot” Mo Bang Motabang sa Uban?
1 Si Jesus nahingawa gayod sa mga tawo. Sa dihang ang usa ka sanlahon nangaliyupo kaniya alang sa tabang, gituy-od ni Jesus ang iyang kamot, gihikap ang tawo, ug miingon: “Buot ko. Magmahinlo ka.” (Mar. 1:40-42) Sa unsang mga paagi atong masundog ang tinamdan ni Jesus bahin sa pagtabang sa uban?
2 Interesadong mga Tawo: Ang matag membro sa kongregasyon adunay bahin sa pagtabang sa interesadong mga tawo nga mahimong mga magsisimba ni Jehova. Sa dihang motambong ang mga bag-ohan sa mga tigom, abiabiha ug ilailaha sila. Pangitag mga paagi nga madasig sila. Dayega sila sa mga komento nga ilang mahimo. Dayega ang ilang mga paningkamot sa pagpadapat sa mga prinsipyo sa Bibliya diha sa ilang kinabuhi. Tabangi sila nga makasabot sa mga kahigayonan nga ilang maangkon tungod sa pagbaton ug matuod nga mga higala sulod sa kongregasyon.
3 Mga Isigkamagtutuo: Ang “atong kabanay sa pagtuo” maoy takos gayod sa atong tabang sa nagkalainlaing mga paagi. (Gal. 6:10) Daghan ang nakigbisog sa mga suliran sa panglawas. Pinaagi sa makapadasig nga pagduaw, mapahimuslan nila ang gikinahanglang panag-ubanay ug tingali makatabang ka usab kanila sa praktikal nga mga paagi. Ang pipila mahimong nag-atubang ug laing mga kalisdanan sa ilang kinabuhi. Ipakita ang imong kahingawa kanila pinaagig paggahin ug panahon sa pagpamati ug paglig-on kanila. (1 Tes. 5:14) Ang mga ansiyano usab nagkinahanglan sa atong kooperasyon samtang ilang tumanon ang ilang mga responsabilidad. (Heb. 13:17) Pinaagi sa pagpasundayag ug mainandamon ug matinabangon nga espiritu, kita mahimong “makapalig-on nga tabang” sa atong mga isigkamagtutuo.—Col. 4:11.
4 Mga Membro sa Pamilya: Kita usab angayng maningkamot sa pagsundog sa kahingawa ni Jesus alang sa atong kaugalingong mga membro sa pamilya. Ang dulot nga kahingawa maoy magtukmod sa mga ginikanan nga ‘padayong matutoon ang ilang mga anak sa disiplina ug sa pagdumala-sa-kaisipan ni Jehova.’ (Efe. 6:4) Ang mga anak makahimo sa ilang bahin pinaagi sa pagpangandam ug sayo sa dihang panahon na alang sa pagtuon sa pamilya, mga tigom sa kongregasyon, o sa pag-alagad sa kanataran. Ang dagko nang mga anak makapabanaag sa pagkamabination ni Jesus pinaagi sa malulotong pagtabang sa ilang mga ginikanan sa malamposong pagsagubang sa mga kalisdanan nga ipatungha sa pagkatigulang. Pinaagi niini ug sa uban pang mga paagi, kitang tanan makahimo sa “pagpakita sa diyosnong pagkamahinalaron diha sa [atong] kaugalingong panimalay.”—1 Tim. 5:4.
5 Samtang atong sundogon si Jesus bahin sa pagtabang sa uban, kita tingali makaarang sa pagpagaan sa mga problema ug mas masuod ang atong pamilya ug ang kongregasyon. Labaw sa tanan, kita makahatag ug kadayeganan kang Jehova, “ang Amahan sa malumong mga kaluoy.”—2 Cor. 1:3.