Kristohanong mga Saksi Alang sa Balaang Pagkasoberano

“‘Sa kaylap inyong ipahayag ang mga kahamili’ sa usa nga nagtawag kaninyo gikan sa kangitngit ngadto sa iyang katingalahang kahayag.”​—1 PEDRO 2:9.

1. Unsang epektibong pagsaksi ang nahatag mahitungod kang Jehova sa una-Kristohanong kapanahonan?

SA UNA-KRISTOHANONG kapanahonan, ang taas nga linya sa mga saksi maisogong nagsaksi nga si Jehova ang bugtong matuod nga Diyos. (Hebreohanon 11:4–12:1) Kay malig-on sa ilang pagtuo, sa kaway-kahadlok sila nagsugot sa mga balaod ni Jehova ug wala mokompromiso sa mga butang maylabot sa pagsimba. Ilang gihatag ang kusganong pamatuod alang sa tibuok-kalibotang pagkasoberano ni Jehova.​—Salmo 18:21-23; 47:1, 2.

2. (a) Kinsa ang kinalabwang Saksi ni Jehova? (b) Kinsay mipuli sa nasod sa Israel ingong saksi ni Jehova? Giunsa nato pagkahibalo?

² Ang kataposan ug kinalabwang una-Kristohanong saksi mao si Juan Bawtista. (Mateo 11:11) Siya nakapribilehiyo nga ipahibalo ang pag-abot sa Piniling Usa, ug gipailaila niya si Jesus ingong ang sinaad nga Mesiyas. (Juan 1:29-34) Si Jesus ang kinalabwang Saksi ni Jehova, “ang matinumanon ug matuod nga Saksi.” (Pinadayag 3:14) Tungod kay ang unodnong Israel misalikway kang Jesus, si Jehova misalikway kanila ug mitudlog usa ka bag-ong nasod, ang espirituwal nga Israel sa Diyos, aron mahimong iyang saksi. (Isaias 42:8-12; Juan 1:11, 12; Galacia 6:16) Si Pedro mikutlo sa usa ka tagna bahin sa Israel ug mipakita nga kini gipadapat ngadto sa “Israel sa Diyos,” ang Kristohanong kongregasyon, sa miingon siya: “Kamo maoy ‘usa ka piniling rasa, usa ka harianong pagkasaserdote, usa ka balaan nga nasod, usa ka katawhan alang sa linaing pagpanag-iya, aron nga sa kaylap inyong ipahayag ang mga kahamili’ sa usa nga nagtawag kaninyo gikan sa kangitngit ngadto sa iyang katingalahang kahayag.”—1 Pedro 2:9; Exodo 19:5, 6; Isaias 43:21; 60:2.

3. Unsa ang pangunang responsabilidad sa Israel sa Diyos ug sa “dakong panon”?

³ Ang mga pulong ni Pedro nagpakita nga ang pangunang responsabilidad sa Israel sa Diyos mao ang paghatag ug publikong pagsaksi bahin sa himaya ni Jehova. Sa atong adlaw kining espirituwal nga nasod gikuyogan sa “usa ka dakong panon” sa mga saksi nga sa publiko naghimaya usab sa Diyos. Sila nagpatugbaw uban ang makusog nga tingog aron mabatian sa tanan: “Ang kaluwasan utang namo sa atong Diyos, nga naglingkod sa trono, ug sa Kordero.” (Pinadayag 7:9, 10; Isaias 60:8-10) Sa unsang paagi ang Israel sa Diyos ug iyang mga kauban makatuman sa ilang pagpanaksi? Pinaagi sa ilang pagtuo ug pagkamasinugtanon.

Bakak nga mga Saksi

4. Nganong ang mga Hudiyo sa adlaw ni Jesus maoy bakak nga mga saksi?

⁴ Ang pagtuo ug pagkamasinugtanon naglangkit sa pagkinabuhi sumala sa diyosnong mga prinsipyo. Ang kahinungdanon niini makita sa gisulti ni Jesus mahitungod sa Hudiyong relihiyosong mga pangulo sa iyang adlaw. Kini sila “nanglingkod sa lingkoranan ni Moises” ingong mga magtutudlo sa Balaod. Sila nagpadala pag mga misyonaryo aron mangabig sa mga dili-magtutuo. Bisan pa niana, giingnan sila ni Jesus: “Kamo nagatadlas sa dagat ug sa mamalang yuta aron maghimog usa ka kinabig, ug sa dihang siya mahimo nang ingon, ginahimo ninyo siyang sakop sa Gehenna nga doble pa ka angayan kay sa inyong kaugalingon.” Kadtong mga relihiyonista maoy bakak nga mga saksi​—hambogiro, salingkapaw, ug walay-gugma. (Mateo 23:1-12, 15) Sa usa ka higayon si Jesus miingon ngadto sa pila ka Hudiyo: “Kamo gikan sa inyong amahan nga Yawa, ug buot ninyong buhaton ang mga tinguha sa inyong amahan.” Nganong misulti siya niana ngadto sa mga sakop sa piniling nasod sa Diyos? Tungod kay wala sila mamati sa mga pulong sa kinalabwang Saksi ni Jehova.​—Juan 8:41, 44, 47.

5. Giunsa nato pagkahibalo nga ang Kakristiyanohan naghatag ug bakak nga pagsaksi mahitungod sa Diyos?

⁵ Sa susamang paagi, sulod sa kasiglohan sukad sa panahon ni Jesus, ginatos ka milyon sa Kakristiyanohan nangangkon nga iyang mga tinun-an. Bisan pa niana, wala sila magbuhat sa kabubut-on sa Diyos ug busa wala ilha ni Jesus. (Mateo 7:21-23; 1 Corinto 13:1-3) Ang Kakristiyanohan nagpadalag mga misyonaryo, nga sa walay duhaduha kadaghanan kanila sinsero. Bisan pa, nagtudlo sila sa mga tawo sa pagsimba sa usa ka Trinidadnong diyos nga magsunog sa mga makasasala diha sa impiyernong-kalayo, ug kadaghanan sa ilang mga kinabig nagpakitag diyutayng ebidensiya sa pagka-Kristohanon. Pananglitan, ang Aprikanhong nasod sa Rwanda maoy tabunok nga natad alang sa Romano Katolikong mga misyonaryo. Bisan pa niana, ang taga-Rwanda nga mga Katoliko sa bug-os-kasingkasing miduyog sa di pa dugayng etnikong panaggubat sa maong nasod. Ang mga bunga nianang misyonaryong natad nagpakita nga wala kini makadawat ug tinuod Kristohanong pagpanaksi gikan sa Kakristiyanohan.​—Mateo 7:15-20.

Pagkinabuhi Sumala sa Diyosnong mga Prinsipyo

6. Sa unsang mga paagi ang matarong nga panggawi maoy usa ka hinungdanong bahin sa pagsaksi?

⁶ Ang daotang panggawi niadtong nangangkong mga Kristohanon magpakaulaw sa “dalan sa kamatuoran.” (2 Pedro 2:2) Ang usa ka tinuod nga Kristohanon magkinabuhi sumala sa diyosnong mga prinsipyo. Siya dili mangawat, mamakak, manglimbong, o mohimog imoralidad. (Roma 2:22) Siya dili gayod mopatay sa iyang silingan. Ang Kristohanong mga bana mahigugmaong magdumala sa ilang mga pamilya. Ang mga asawa matinahorong magpaluyo sa maong pagdumala. Ang mga anak ginabansay sa ilang mga ginikanan ug sa ingon maandam nga mahimong kasaligang Kristohanong mga hamtong. (Efeso 5:21–6:4) Tinuod, kitang tanan dili hingpit ug makahimog mga sayop. Apan ang tinuod nga Kristohanon nagtahod sa mga sukdanan sa Bibliya ug naningkamot gayod sa pagpadapat niana. Himatikdan kini sa uban ug makahatag ug maayong pamatuod. Usahay, kadtong misupak sa kamatuoran sa nangagi nakapaniid sa matarong nga panggawi sa usa ka Kristohanon ug nakabig.​—1 Pedro 2:12, 15; 3:1.

7. Unsa ka hinungdanon nga ang mga Kristohanon maghigugmaay sa usag usa?

⁷ Si Jesus nagpakita sa usa ka hinungdanong bahin sa Kristohanong panggawi sa miingon siya: “Pinaagi niini ang tanan makaila nga kamo akong mga tinun-an, kon kamo adunay gugma taliwala kaninyo.” (Juan 13:35) Ang kalibotan ni Satanas natiman-an sa “pagkadili-matarong, tumang-pagkadaotan, hakog nga kaibog, kangil-ad, nga puno sa kasina, pagbuno, panag-away, limbong, mapangdaotong tinamdan, nga mga tighuluhungihong, mga tiglibak, mga tigdumot sa Diyos, mga bagis, mga mapahitas-on, mga mapasiatabon-sa-kaugalingon, mga tigmugnag makadaot nga mga butang, mga dili-masinugtanon sa mga ginikanan.” (Roma 1:29, 30) Sa maong silinganan, ang usa ka tibuok-kalibotang organisasyon nga gitiman-an sa gugma mahimong kusganong ebidensiya sa paglihok sa espiritu sa Diyos​—usa ka epektibong pagsaksi. Ang mga Saksi ni Jehova ingon niana nga organisasyon.​—1 Pedro 2:17.

Ang mga Saksi Maoy mga Estudyante sa Bibliya

8, 9. (a) Sa unsang paagi ang salmista napalig-on sa iyang pagtuon sa Balaod sa Diyos ug pagpalandong niana? (b) Sa unsang mga paagi ang pagtuon sa Bibliya ug pagpalandong maglig-on kanato sa pagpadayon sa pagpanaksi?

⁸ Aron magmalamposon sa paghatag ug maayong pagsaksi, ang usa ka Kristohanon kinahanglang mahibalo ug mahigugma sa matarong nga mga prinsipyo ni Jehova ug tinuod nga magdumot sa kahiwian sa kalibotan. (Salmo 97:10) Makapadani ang kalibotan diha sa pagpasiugda sa panghunahuna niini mismo, ug ang espiritu niini lisod suklan. (Efeso 2:1-3; 1 Juan 2:15, 16) Unsay makatabang kanato aron padayong mahuptan ang tukmang tinamdan sa kaisipan? Ang regular ug makahuloganong pagtuon sa Bibliya. Ang tagsulat sa Salmo 119 makadaghan nagsubli sa iyang gugma sa Balaod ni Jehova. Gibasa niya ug kanunayng gipalandong kana, “sa tibuok adlaw.” (Salmo 119:92, 93, 97-105) Ingong sangpotanan, siya nakasulat: “Gidumtan ko ang kabakakan, ug gipadayon ko ang pagdumot niini. Ang imong balaod akong gihigugma.” Dugang pa, ang iyang lalom nga gugma nagtukmod kaniya sa paglihok. Siya nag-ingon: “Sa makapito sa adlaw ikaw akong gidayeg tungod sa imong matarong nga mga panghukom.”​—Salmo 119:163, 164.

⁹ Sa susamang paagi, ang atong regular nga pagtuon sa Pulong sa Diyos ug pagpalandong niini motandog sa atong mga kasingkasing ug motukmod kanato sa ‘pagdayeg kaniya’​—pagsaksi bahin kang Jehova​—nga subsob, bisan sa “makapito sa adlaw.” (Roma 10:10) Nahiuyon niini, ang tagsulat sa unang salmo nag-ingon nga ang usang regular nga mamalandong sa mga pulong ni Jehova “mahisama gayod sa usa ka kahoy nga tinanom sa daplin sa mga sapa sa tubig, nga magahatag sa iyang bunga mismo sa iyang panahon ug ang mga dahon niana dili malaya, ug ang tanang butang nga iyang ginahimo molampos.” (Salmo 1:3) Si apostol Pablo nagpakita usab sa gahom sa Pulong sa Diyos sa misulat siya: “Ang tibuok Kasulatan inspirado sa Diyos ug mapuslanon sa pagpanudlo, sa pagpamadlong, sa pagtul-id sa mga butang, sa pagdisiplina diha sa pagkamatarong, aron nga ang tawo sa Diyos mahimong bug-os makasarang, kompleto nga masinangkapan alang sa tanang maayong buhat.”​—2 Timoteo 3:16, 17.

10. Unsay dayag mahitungod sa katawhan ni Jehova niining kataposang mga adlaw?

¹⁰ Ang tuling pag-uswag sa gidaghanon sa matuod nga mga magsisimba niining ika-20ng siglo nagpaila sa panalangin ni Jehova. Sa walay duhaduha, ingong usa ka grupo, kining modernong-adlawng mga saksi sa balaang pagkasoberano nakaugmad sa paghigugma sa balaod ni Jehova diha sa ilang mga kasingkasing. Sama sa salmista, sila natukmod sa pagsugot sa Iyang balaod ug matinumanong nagsaksi “adlaw ug gabii” mahitungod sa himaya ni Jehova.​—Pinadayag 7:15.

Gamhanang mga Buhat ni Jehova

11, 12. Unsay nahimo sa mga milagro nga gibuhat ni Jesus ug sa iyang mga sumusunod?

¹¹ Sa unang siglo, ang balaang espiritu mihatag ug gahom sa matinumanong Kristohanong mga saksi sa paghimog mga milagro, nga mihatag ug lig-ong pamatuod nga ang ilang pagsaksi maoy tinuod. Sa dihang si Juan Bawtista didto sa prisohan, siya nagpadalag mga tinun-an sa pagsukna kang Jesus: “Ikaw ba mao ang Usa nga Moanhi, o magdahom pa kami ug lain?” Si Jesus wala motubag nga oo o dili. Hinunoa, siya miingon: “Lakaw ug itaho kang Juan kon unsay inyong nadungog ug nakita: Nagpakakita pag-usab ang mga buta, ug ang mga bakol nagpanglakaw, ang mga sanlahon gihinloan ug ang mga bungol nagpakadungog, ug ang mga patay gipamangon, ug ang mga kabos ginapahayagan sa maayong balita; ug malipayon siya nga walay nakaplagang hinungdan sa pagkapandol kanako.” (Mateo 11:3-6) Kadtong gamhanang mga buhat nagsilbing usa ka pamatuod kang Juan nga si Jesus sa pagkamatuod mao “ang Usa nga Moanhi.”​—Buhat 2:22.

¹² Sa susamang paagi, pipila sa mga sumusunod ni Jesus nag-ayo sa mga masakiton ug nagbanhaw pa sa mga patay. (Buhat 5:15, 16; 20:9-12) Ang maong mga milagro nahisamag usa ka pamatuod gikan sa Diyos mismo alang kanila. (Hebreohanon 2:4) Ug ang maong mga buhat nagpasundayag sa labing dakong gahom ni Jehova. Pananglitan, tinuod nga si Satanas, “ang magmamando sa kalibotan,” nakabaton sa paagi sa pagpahinabo sa kamatayon. (Juan 14:30; Hebreohanon 2:14) Apan sa dihang si Pedro nagbanhaw sa matinumanong babaye nga si Dorcas gikan sa mga patay, kadto iya lamang nabuhat tungod sa gahom ni Jehova, sanglit Siya lamang ang makapasig-uli sa kinabuhi.​—Salmo 16:10; 36:9; Buhat 2:25-27; 9:36-43.

13. (a) Sa unsang paagi ang mga milagro sa Bibliya nagsaksi gihapon sa gahom ni Jehova? (b) Sa unsang paagi ang pagkatuman sa tagna adunay pasukaranang bahin sa pagpamatuod sa pagka-Diyos ni Jehova?

¹³ Karong adlawa, ang maong milagrosong mga buhat dili na mahitabo. Natuman na ang katuyoan niana. (1 Corinto 13:8) Bisan pa, sa gihapon nabatonan nato ang talaan niana sa Bibliya, nga gipamatud-an sa daghang nakakita. Inigpunting sa mga Kristohanon karong adlawa sa maong makasaysayanhong mga asoy, ang maong mga buhat makahatag gihapon ug epektibong pagsaksi sa gahom ni Jehova. (1 Corinto 15:3-6) Dugang pa, balik sa adlaw ni Isaias, gipunting ni Jehova ang tukmang tagna ingong usa ka talagsaong pagsaksi nga Siya mao ang matuod nga Diyos. (Isaias 46:8-11) Daghang dinasig-sa-Diyos nga mga tagna sa Bibliya nangatuman karong adlawa​—ubay-ubay niana diha sa Kristohanong kongregasyon. (Isaias 60:8-10; Daniel 12:6-12; Malakias 3:17, 18; Mateo 24:9; Pinadayag 11:1-13) Ingong nagapunting nga nagkinabuhi kita sa “kataposang mga adlaw,” ang pagkatuman niining mga tagnaa nagbayaw kang Jehova ingong ang bugtong matuod nga Diyos.​—2 Timoteo 3:1.

14. Sa unsang mga paagi ang modernong-adlawng kasaysayan sa mga Saksi ni Jehova maoy usa ka gamhanang pagsaksi nga si Jehova mao ang Soberanong Ginoo?

¹⁴ Sa kataposan, si Jehova nagbuhat gihapon ug dagkong mga butang, katingalahang mga butang, alang sa iyang katawhan. Ang mauswagong kahayag sa kamatuoran sa Bibliya gitultolan sa espiritu ni Jehova. (Salmo 86:10; Pinadayag 4:5, 6) Ang talagsaong mga pag-uswag nga gitaho sa tibuok kalibotan maoy ebidensiya nga si Jehova ‘nagpadali niini sa iyang kaugalingong panahon.’ (Isaias 60:22) Sa dihang ang mapait nga paglutos mibutho sa sunodsunod nga nasod latas sa kataposang mga adlaw, ang maisogong pag-agwanta sa katawhan ni Jehova naposible tungod sa makapalig-ong pagpaluyo sa balaang espiritu. (Salmo 18:1, 2, 17, 18; 2 Corinto 1:8-10) Oo, ang modernong-adlawng kasaysayan sa mga Saksi ni Jehova sa kaugalingon maoy usa ka gamhanang pagsaksi nga si Jehova mao ang Soberanong Ginoo.​—Zacarias 4:6.

Igawali ang Maayong Balita

15. Unsang mas dakong pagsaksi ang igahatag sa Kristohanong kongregasyon?

¹⁵ Gitudlo ni Jehova ang Israel ingong iyang saksi ngadto sa mga nasod. (Isaias 43:10) Ugaling lang, pila ra ka Israelinhon ang balaang gisugo aron molakaw ug magwali ngadto sa mga dili-Israelinhon, ug kadto kasagaran maoy aron ipahayag ang mga paghukom ni Jehova. (Jeremias 1:5; Jonas 1:1, 2) Bisan pa niana, ang mga tagna sa Hebreohanong Kasulatan nagpaila nga sa usa ka adlaw iliso ni Jehova sa bug-os ang iyang pagtagad ngadto sa mga nasod, ug gihimo niya kini pinaagi sa espirituwal nga Israel sa Diyos. (Isaias 2:2-4; 62:2) Una mokayab ngadto sa langit, si Jesus misugo sa iyang mga sumusunod: “Busa panglakaw kamo ug paghimog mga tinun-an sa katawhan sa tanang nasod.” (Mateo 28:19) Samtang si Jesus mihatag ug bug-os nga pagtagad sa “nawalang mga karnero sa balay sa Israel,” ang iyang mga sumusunod gipadala ngadto sa “tanang nasod,” bisan “ngadto sa kinalay-ang bahin sa yuta.” (Mateo 15:24; Buhat 1:8) Ang Kristohanong pagsaksi kinahanglang madungog sa tanang tawo.

16. Unsang gisugong buluhaton ang gituman sa unang-siglong Kristohanong kongregasyon, ug sa unsang gidak-on?

¹⁶ Gipakita ni Pablo nga kini nasabtan niya pag-ayo. Sa pagkatuig 61 K.P., siya nakaingon nga ang maayong balita “namunga ug nagmauswagon sa tibuok nga kalibotan.” Ang maayong balita dili lamang iwali ngadto sa usa ka nasod o usa ka sekta, sama nianang nagbuhat sa “pagsimba sa mga manulonda.” Hinunoa, kana sa dayag “giwali sa tanang kalalangan nga anaa sa silong sa langit.” (Colosas 1:6, 23; 2:13, 14, 16-18) Busa, ang Israel sa Diyos sa unang siglo nagtuman sa tinudlong buluhaton niini nga “‘ipahayag sa halayo ang mga kahamili’ sa usa nga nagtawag [kanila] gikan sa kangitngit ngadto sa iyang katingalahang kahayag.”

17. Sa unsang paagi ang Mateo 24:14 padayong natuman sa dakong paagi?

¹⁷ Bisan pa niana, kadtong unang-siglong buluhaton sa pagwali usa lamang ka pasiuna sa kon unsay malampos sulod sa kataposang mga adlaw. Nga naglantaw sa unahan ilabina sa atong panahon, si Jesus miingon: “Kining maayong balita sa gingharian igawali sa tibuok gipuy-ang yuta ingong usa ka pagsaksi ngadto sa tanang kanasoran; ug unya moabot ang kataposan.” (Mateo 24:14; Marcos 13:10) Natuman ba kining tagnaa? Sa pagkatinuod, natuman gayod. Gikan sa gamayng sinugdanan niadtong 1919, ang pagwali sa maayong balita karon nakaabot sa kapig 230 ka nasod. Ang pagsaksi madungog sa bugnaw kaayong mga rehiyon sa Artiko ug sa naglagiting-ang-kainit ug umogong tropiko. Ang dagkong mga kontinente ginasangyawan, ug ang hilit nga kaislahan gisiksik aron ang ilang mga molupyo makadawat sa pagsaksi. Bisan taliwala sa dakong kagubot, sama sa gubat sa Bosnia ug Herzegovina, ang maayong balita padayong giwali. Sama sa unang siglo, ang pagsaksi nagapamunga “sa tibuok kalibotan.” Ang maayong balita sa dayag gipahibalo “sa tanang kalalangan nga anaa sa silong sa langit.” Ang sangpotanan? Una, ang mga nahibilin sa Israel sa Diyos natigom “gikan sa matag tribo ug dila ug katawhan ug nasod.” Ikaduha, ang minilyon sa “dakong panon” misugod pagsulod gikan sa “tanang nasod ug mga tribo ug mga katawhan ug mga dila.” (Pinadayag 5:9; 7:9) Ang Mateo 24:14 padayong natuman sa dakong paagi.

18. Unsa ang pipila ka butang nga ginapalampos sa tibuok-kalibotang pagwali sa maayong balita?

¹⁸ Ang tibuok-kalibotang pagwali sa maayong balita motabang sa pagsaksi nga ang harianong presensiya ni Jesus nagsugod na. (Mateo 24:3) Dugang pa, kini ang pangunang paagi nga “ang alanihon sa yuta” ginaani, samtang kini nagpunting sa katawhan ngadto sa bugtong matuod nga paglaom alang sa katawhan, ang Gingharian ni Jehova. (Pinadayag 14:15, 16) Sanglit ang matuod lamang nga mga Kristohanon ang makaambit sa pagwali sa maayong balita, kining hinungdanong buluhaton motabang sa pag-ila sa matuod nga mga Kristohanon gikan sa bakak. (Malakias 3:18) Niining paagiha, kini mosangpot sa kaluwasan niadtong nagwali ingon man niadtong misanong. (1 Timoteo 4:16) Labing hinungdanon, ang pagwali sa maayong balita magdalag kadayeganan ug kadungganan kang Jehova nga Diyos, ang usang nagsugo nga kini buhaton, kinsa nagpaluyo niadtong nagbuhat niini, ug kinsa naghimo niining mabungahon.​—2 Corinto 4:7.

19. Unsang hugot nga paghukom ang gidasig nga mahuptan sa tanang Kristohanon samtang mosulod sila sa bag-ong tuig sa pag-alagad?

¹⁹ Dili katingad-ang si apostol Pablo natukmod sa pag-ingon: “Alaot ako kon wala ko ipahayag ang maayong balita!” (1 Corinto 9:16) Kana ang pagbati sa mga Kristohanon karong adlawa. Usa ka dakong pribilehiyo ug dakong responsabilidad nga mahimong “kaubang mga mamumuo sa Diyos,” nga magpadan-ag sa kahayag sa kamatuoran niining gingitngitang kalibotan. (1 Corinto 3:9; Isaias 60:2, 3) Ang buluhaton nga gamayg sinugdanan niadtong 1919 karon maoy labihan na ka dako. Halos lima ka milyong Kristohanon nagsaksi alang sa balaang pagkasoberano samtang gigugol nila ang kapin sa usa ka bilyong oras sa usa ka tuig sa pagdala sa mensahe sa kaluwasan ngadto sa uban. Pagkamakalipay nga makabaton ug bahin niining buluhaton sa pagbalaan sa ngalan ni Jehova! Samtang mosulod kita sa 1996 nga tuig sa pag-alagad, ihukom nato nga dili maghinayhinay. Hinunoa, labaw pa natong pamatian ang mga pulong ni Pablo kang Timoteo: “Iwali ang pulong, magmadalion diha niini.” (2 Timoteo 4:2) Samtang ginabuhat nato kini, ginaampo nato uban sa bug-os natong mga kasingkasing nga si Jehova mopadayon pagpanalangin sa atong mga paningkamot.

Nahinumdom Ka Ba?

◻ Kinsay mipuli sa Israel ingong “saksi” ni Jehova ngadto sa mga nasod?

◻ Sa unsang paagi ang Kristohanong panggawi makaamot sa pagsaksi?

◻ Nganong ang pagtuon sa Bibliya ug pagpalandong niana hinungdanon alang sa Kristohanong Saksi?

◻ Sa unsang paagi ang modernong-adlawng kasaysayan sa mga Saksi ni Jehova nagsilbing ebidensiya nga si Jehova mao ang matuod nga Diyos?

◻ Unsay napalampos sa pagwali sa maayong balita?

[Hulagway sa panid 15]

Halayo sa pagkagipiotan, ang maayong balita ginamantala na karon “sa tanang kalalangan nga anaa sa silong sa langit”