Ang Bibliya ug ang Imong Kaugmaon

NGANONG ang Awtor sa Bibliya, si Jehova nga Diyos, sa tukma makatag-an sa umaabot samtang ang tawo dili? Alang sa duha ka katarongan. Si Jehova makagagahom sa tanan. Siya nahibalo usab sa tanan. Ang tawo dili.

“Ako ang Diyos nga Gamhanan,” miingon si Jehova kang Abram (Abraham) hapit 4,000 ka tuig kanhi.a “Lumakaw ka sa atubangan ko ug pamatud-i ang imong kaugalingon nga matul-id. Ug magabuhat ako ug pakigsaad sa taliwala kanako ug kanimo, ug padaghanon ko ikaw sa hilabihan gayod.” Sa dihang 99 anyos na ang panuigon ni Abraham ug ang iyang apuling asawa si Sarah nga bata kaniyag 10 ka tuig, mitag-an si Jehova nga si Abraham mahimong amahan sa “panon sa mga nasod.” (Genesis 17:1-4) Sanglit gamhanan​—makagagahom sa tanan​—gigamit ni Jehova ang iyang gahom sa pagdaog sa tanang kakulian nga mibabag sa katumanan sa iyang saad kang Abraham, nga nakatugot sa patriarka nga mahimong amahan ni Isaac. Sa pagkatinuod, si Abraham, sa ulahi, nahimong kagikan sa mga Israelinhon ug sa uban.​—Genesis 21:1-3; 25:1-4.

Si Jehova nahibalo usab sa tanan, maalamon sa tanan​—nasayod sa tanan. Siya makakita sa butang nga buot niyang tan-awon. Mahitungod kaniya kini ang giingon: “Sa panan-aw sa Diyos walay binuhat nga natago, hinunoa ang tanang mga butang binuksan ug dayag sa mga mata niya kang kinsa magahatag ra unya kitag husay.”​—Hebreohanon 4:13.

Tungod sa pagkamakagagahom ug sa pagkanasayod sa tanan sa Diyos imposible gayod nga siya mapakyas. Siya kanunayng makatagna sa umaabot sa tukma. Busa, siya nakaingon: “Ingon sa akong nahunahuna, ingon niana ang mahitabo; ug ingon sa akong gitinguha, mao man ang mamatuman.” (Isaias 14:24) Atong susihon ang pila sa mga tagna sa Bibliya nga nangatuman.

Mga Tagnang Nangatuman sa Nangagi

Ang Babilonya maoy usa lamang ka gamayng sakop sa Imperyo sa Asiria. Apan, sa ikapitong siglo W.K.P., ang siyudad nahimong daw dili madaog nga kaulohan sa Imperyo sa Babilonya. Apan unsay mahitabo kaniya? “Ang Babilonya . . . mahimong ingon sa paglaglag sa Diyos sa Sodoma ug Gomorra. Siya dili na gayod pagatawoan pa, ni pagapuy-an pa gikan sa usa ka kaliwatan hangtod sa laing kaliwatan.” Mipahayag ang tagna sa Pulong sa Diyos hapit 100 ka tuig sa wala pa mahimong gahom sa kalibotan ang Babilonya ug sa mga 200 ka tuig una pa sa iyang pagkapukan sa mga Medianhon ug mga Persianhon. Walay makalimod karon sa katumanan niadtong mga pulonga. Sa daghan nang kasiglohan, ang siyudad sa Babilonya maoy usa na lamang ka bungdo sa mga bato. Wala na ang Babilonya.​—Isaias 13:19, 20.

Ang Jerusalem sa unang siglo K.P. mao ang lugar sa mahimayaong templo nga gitukod alang sa pagsimba kang Jehova. Apan, girekord sa Bibliya kining mga pulonga ni Jesu-Kristo bahin sa Jerusalem ug sa kaliwatan nga nakadungog sa iyang mga pulong: “Kay moabot kanimo ang mga adlaw nga pagalibotan kag paril sa imong mga kaaway ug pagalikosan ka nila ug pagapiiton ka sa tanang dapit, ug pagatumpagan ka nila uban ang iyang mga anak sa yuta, ug dili ka nila binlag bato ibabaw sa bato.” (Lucas 19:43, 44) Gipahayag kana ni Jesus sa 33 K.P., apan wala kana mahitabo hangtod sa 66 K.P. sa misulong ang mga sundalong Romano sa Jerusalem. Daw nakita na ang kadaogan, apan sa katingalahan miatras ang mga Romano. Apan, sa 70 K.P. gisulong na usab sa mga sundalong Romano ang siyudad, nga nagdasok niadtong higayona sa mga nanagsaulog sa Paskua, ug gilikosan kinig paril sa mga estaka. Mga lima ka bulan sa ulahi, nalumpag ang Jerusalem, nga may gibanabanang 1,100,000 ka lungsoranon nga nangamatay.

Mga Tagna nga Natuman Karon

Buot ba kamog presenteng adlawng mga pananglitan sa mga tagna sa Bibliya nga natuman? Buweno, nagtagna si Jesus ug mga hitabo nga magpaila sa yugto sa panahon nga nailhang ang “kataposang mga adlaw.” (2 Timoteo 3:1) Kining mga tagnaa nahimong bahin sa daghang bahing “ilhanan”​—ang ilhanan sa kataposang mga adlaw sa presenteng daotang sistema sa mga butang. (Mateo 24:3) Ang pamatuod sa katumanan sa tagna ni Jesus nagakadaghan sukad sa 1914. Sa pagkatinuod, kamo sa personal nakakita sa katumanan. Ang mosunod mao ang pila ka tagsaong bahin sa “ilhanan.”

Umaabot sa Yuta—Atua ba Unya Ikaw Niana?

Unsay nagapaabot sa unahan? Ang Bibliya nasudlan sa ubang mga tagna nga pagatumanon pa. Lakip kanila mao kadtong bahin sa yuta nga hugasan sa tanang kadaotan ug magapangidlap sa pagkamatarong. Madanihon ba alang kanimo kanang palaabutona? Nagtuo ka ba nga si Jehova adunay kaalam ug gahom sa pagtul-id sa mga butang dinhi ning planetaha? Kon mao, buot mong tagdon kon unsay gitagna sa Bibliya alang sa umaabot sa yuta.

Himoa Kini nga Maoy Imong Kaugmaon

Aron maangkon nimo kining maong umaabot, kinahanglang molihok ka karon. Sa dili madugay, sa dili pa bug-os matuman ang nag-unang mga tagna, si Jehova “magalaglag niadtong nagalaglag sa yuta.” (Pinadayag 11:18) Diha sa Sofonias 2:3 ang Bibliya nagtambag: “Pangitaa si Jehova, kamong mga maaghop sa yuta, nga nagabuhat sa Iyang tulomanon. Pangitaa ang pagkamatarong, pangitaa ang pagkamaaghop. Kay tingali kamo pagatagoan sa adlaw sa kasuko ni Jehova.” Busa, gamita sa maalamon ang imong panahon karon pinaagi sa pagkuhag tukmang pagsabot sa Bibliya ug sa mga tagna niini sa paglihok alang sa imong kaugalingong kaayohan ug sa imong mga minahal. Andam ang mga Saksi ni Jehova sa pagtabang kanimo sa pagbaton ug dugang kahibalo sa umaabot sumala sa gipadayag sa Pulong sa Diyos, ang Bibliya.

[Mga footnote]

[Kahon/Mga Letrato sa panid 5]

“Kay managgubat ang nasod batok sa nasod ug gingharian batok gingharian.” (Mateo 24:7) Nagsugod ang Gubat sa Kalibotan I sa 1914 ug sa ulahi nalangkit ang gibanabanang 93 porsiento sa populasyon sa kalibotan. Karon, ang puwersa militar sa kalibotan may gidaghanong 106,000,000, o usa ka sundalo matag 43 ka tawo. Ang usa ka taho miingon: “Walay butang sa kasaysayan sa nangagi ang ikatandi sa presenteng pagtumpig malaglagong gahom sa kalibotan, ug sa hulga sa katawhan nga nabatonan niini.”​—World Military and Social Expenditures 1985.

[Tinubdan]

U.S. Army photo

“Aduna unyay kakulangan sa kalan-on . . . sa nagkalainlaing dapit.” (Mateo 24:7) Mahitungod sa kagutmanan, ang 1985 nga taho alang sa Independenteng Komisyon sa Internasyonal Tawhanong mga Isyu miingon: “Sa yugto sa kataposan sa dakong kagutmanan sa Aprika sa sayong katuigan sa 1970, gituohan niadto nga ang balikbalik nga kagutmanan ug malnutrisyon mao ang regular nga kahimtang sa otso milyones ka Aprikano. Kanang numeroha karon maoy 100 ka milyon.”

[Tinubdan]

FAO photo/B. Imevbore

“Adunay makusog nga mga linog.” (Lucas 21:11) Napamatud-an kini ilabina sa 1914. Pananglitan, ang linog sa Kanto sa Japan nakapagan ug 142,800 ka kinabuhi sa 1923. Dihay duolan sa 60,000 ang nangabiktima salinog sa Quetta, Pakistan, sa 1935. Ang nangamatay sa mga linog may gidaghanong 66,700 sa Amihanang Peru sa 1970. Ug sa 1976 mga 800,000 ang nangamatay sa linog sa Tangshan, Tsina.

“Ug ang maayong balita kinahanglang igawali una ngadto sa tanang kanasoran.” (Marcos 13:10) Sa 1985, kapin sa 590,000,000 ang naabot nga oras sa mga Saksi ni Jehova sa pagsangyaw sa maayong balita sa Gingharian sa Diyos sa 205 ka yuta ug sa kaislahan. Sila nakadumalag 2,379,000 ka pagtuon sa Bibliya sa panimalay ug nakapahilunag kapin sa 350,000,000 ka Bibliya ug mga publikasyon nga nagbatbat sa Bibliya ngadto sa mga tawong interesado.

[Kahon/Mga Letrato sa panid 6]

“Ilang himoon ang ilang mga espada nga mga punta sa daro ug ang ilang mga bangkaw himoong mga galab. Usa ka nasod dili na mobakyaw ug espada batok sa usa ka nasod ug dili na gayod sila makakat-on pa sila mahitungod sa gubat.” (Isaias 2:4) Ang langitnong Gingharian sa Diyos maoy motagana sa pasukaranan sa bug-os nga pagwagtang sa mga hinagiban sa yuta. Mohari ang kalinaw!

“Si Jehova sa mga panon maghimog kombira alang sa tanang katawhan . . . usa ka kombira sa mga pagkaong matambok, usa ka kombira sa bino nga pinalugdang, mga pagkaong matambok nga puno sa uotk.” (Isaias 25:6) Ubos sa pagtultol ug sa panalangin sa Diyos, ang yuta mopatunghag dagayang bunga. Mawala na ang gutom!

“Ug iyang lamyon ang kamatayon sa walay kataposan, ug ang Soberano Ginoong Jehova magapahid sa mga luha gikan sa tanang mga nawong.” “Ug walay pomuluyo ang mag-ingon: ‘Masakiton ako.’” (Isaias 25:8; 33: 24) Walay sakit ug suliran sa panglawas ang makasukol sa tambal sa Diyos. Katuyoan pa gani niya ang paghinlo sa mga lubnganan sa mga biktima niini. Pagkamakapalipay ang pag-abiabi sa mabanhawng mga minahal!