PASUNGAN, KUWADRA

Ang masuso nga si Jesus gipahimutang sa usa ka pasungan ug nakita didto sa mga magbalantay sa karnero, diin ngadto kanila gipahibalo sa manulonda ang iyang pagkahimugso. (Luc 2:​7, 12, 16) Ang Gregong pulong alang sa “pasungan” niini nga mga teksto maoy phatʹne, nga nagkahulogang “bahoganan.” Ang phatʹne mahimong mapadapat usab sa kuwadra diin didto ikulong ang mga hayop. (Itandi ang Luc 13:15.) Ang Hebreohanong termino nga ʼe·vusʹ sagad gisabot nga nagkahulogang “pasungan” ug gihubad nga phatʹne diha sa Gregong Septuagint, maingon man usab ang tulo ka ubang Hebreohanong mga pulong nga gihubad ingong “mga kuwadra” (2Cr 32:28), “mga alad” (Hab 3:17), ug “kompay” (Job 6:5).

Sa Palestina, ang mga arkeologo nakakaplag ug dagkong mga pasong nga gikubkob diha sa tagsa ka dagko nga pirasong anapog ug misukod ug mga 0.9 m (3 p) ang gitas-on, 0.5 m (1.5 p) ang gilapdon, ug 0.6 m (2 p) ang giladmon. Gituohan nga kini gigamit ingong mga pasungan. Lagmit usab nga, sama sa mas bag-o pang mga panahon, ang mga pasungan gikubkob diha sa bato nga bungbong sa mga langob nga gigamit ingong silonganan sa mga hayop.