“Panglimbasog Kamo Pag-ayo”

“Panglimbasog kamo pag-ayo sa pagsulod agi sa masigpit nga pultahan, kay suginlan ko kamo, nga daghan ang maninguha sa pagsulod apan dili makahimo.”—LUCAS 13:24.

1. Unsay ginapangandoy sa kadaghanan?

PANGUTAN-A ang sayis anyos nga si Robbie kon nganong gusto siyang moadto sa Kingdom Hall, ug siya motubag: “Makakat-on ako bahin kang Jehova ug sa Paraiso diin akong mabatonan ang taas, taas kaayong panahon uban sa buotang mga hayop.” Ang iyang tres anyos nga ig-agaw, si Dustin, may igo nang kabuot nga makamatikod sa regular nga ginahimo sa iyang mga ginikanan sa pagkasayod kon kanus-a moingon: “Gusto kong mouban sa Kingdom Hall!” Ang gisulti ni Robbin, ug nakat-onan ni Dustin nga isulti, madanihon sa kadaghanang tawo​—ang kinabuhi, nga walay kataposan. Gusto ang katawhan nga “maluwas.” Apan sa unsang paagi? Pinaagi ba lamang sa pagtambong sa mga serbisyo sa simbahan?

2. (a) Nganong dili mahagoan ang kaluwasan? (b) Sa unsang paagi ang mga pulong ni Jesus sa Lucas 13:24 nagpakita kon unsay gikinahanglan sa kaluwasan?

² Ang kaluwasan dili mahagoan pinaagi sa pagtambong sa mga tigom o sa bisan unsang paagi. Kini walay bayad, usa ka gasa nga gikan sa Diyos. Apan, si Jehova nga Diyos nagkinahanglan ug paningkamot sa atong bahin kon kita buot makadawat sa iyang gasa sa kinabuhing walay kataposan. (Roma 6:23) Unsa man sila? Una, pinaagi sa pagpanglimbasog sa iyang pag-alagad! Kining mga buhata kinahanglang mapalihok pinaagi sa tinuod nga apresasyon. Dihay nangutana sa Anak sa Diyos, si Jesu-Kristo: “Ginoo, diyutay ra bay maluwas?” Gilakip sa tubag ni Jesus dili lang ang nangutana kondili ang uban pang interesado sa kaluwasan, lakip kita. Siya mitubag: “Panglimbasog kamo pag-ayo sa pagsulod agi sa pultahan nga masigpit, kay suginlan ko kamo, nga daghan ang maninguha sa pagsulod apan dili makahimo.”​—Lucas 13:23, 24.

3. (a) Nganong tagsaon ang pangutana sa tawo? (b) Sa unsang paagi gilangkit kita ni Jesus sa iyang tubag?

³ Ang pangutana sa wala nganling tawo tagsaon. Siya nangutana: “Diyutay ra bay maluwas?” dili, “Lakip kaha ako sa pipila nga maluwas?” o, “Sa unsang paagi maluwas ako?” Tingali ang Hudiyohanong pilosopiya nga limitado rang gidaghanon sa mga tawo ang takos sa kaluwasan maoy nakaaghat sa iyang mabanabanaong pangutana.a Kon unsa man ang tuboran sa iyang kaikag, giliso ni Jesus ang pangutana gikan sa malisod sabton nga teoriya ngadto sa praktikal nga aplikasyon​—personal nga aplikasyon. Iyang giaghat ang tigpangutana sa paghunahuna kon unsay iyang kinahanglang buhaton aron maluwas. Apan labaw pa niana, sanglit ang pulong ni Jesus, “panglimbasog kamo pag-ayo,” sa dinaghan man nga pagkasulti, makapukaw usab kini kanato sa paghunahuna pa ug dugang sa atong paagi sa pagsimba.

4. Unsay atong kinahanglang buhaton aron mabatonan ang kinabuhing walay kataposan?

⁴ Busa, ang kinabuhing walay kataposan, dili sayon nga kab-oton sama sa gihunahuna sa pipila. Gipasiugda ni Jesus ang kuging pagtrabaho, padayong paningkamot, ingong paagi sa “pagsulod agi sa masigpit nga pultahan.” Kining makugihong pagpanglimbasog ginapalihok sa malig-ong pagtuo, nga gitukod sa pagkamasinundanon sa mga pagtulon-an ni Kristo. Busa aron makabaton ug kaluwasan, kinahanglang labaw pa sa ‘pagpamati sa iyang pulong’; kinahanglang magpadayon kita ‘pagbuhat kanila.’​—Lucas 6:46-49; Santiago 1:22-25.

Kinahanglang “Maningkamot” Kamo Karon

5. (a) Unsay kahulogan sa mga pulong ni Jesus “Panglimbasog kamo pag-ayo”? (b) Sa unsang paagi kadtong mga pulonga nakahatag dugang kahulogan sa imong hunahuna sa balaang pag-alagad?

⁵ Unsay kahulogan sa mga pulong “panglimbasog kamo pag-ayo”? Sa orhinal nga Grego, ang ekspresyong a·go·niʹze·sthe, gikuha gikan sa pulong (a·gonʹ) nga nagkahulogang “lumbaanan.” “Pagpaningkamot,” maoy pagbatbat niana sa The Kingdom Interlinear Translation. Makaikag, gikan niining mao gihapong Gregong berbo nga nakuha nato ang Ingles nga pulong “agonize.” Busa handurawa ang karaang istadyom ug buhia sa hunahuna ang magdudula nga karon naghingutas o agonizing o nanglimbasog pag-ayo sa tuman niyang kusog, aron madaog ang ganti. Busa, bisag ang nalangkit nga Gregong berbo dinhi maoy teknikal nga termino sa pakiglumba sa Gresyanhong mga dula, kini nagpasiugda sa tambag ni Jesus sa paghimog bug-os kalag nga lihok. Ang taphaw nga paningkamot dili magsilbi.​—Lucas 10:27; itandi sa 1 Corinto 9:26, 27.

6. Nganong kinahanglang manglimbasog kita pag-ayo karon?

⁶ Kanus-a ug sa unsa nga gidugayon nga kita “maningkamot sa pagsulod agi sa masigpit nga pultahan”? (Lucas 13:24, The New English Bible) Tan-awa pag-ayo ang mga pulong ni Jesus sa Lucas 13:24 ug matikdi ang iyang pagtandi sa presente, nga “panglimbasog kamo pag-ayo,” sa umaabot, nga “magapangita.” Busa, karon mismo mao ang panahon sa pagpaningkamot. Hayan, kadtong babagan sa pagsulod maningkamot sa pagsulod sa panahon nga kombenyente lamang kanila. Apan ulahi na unya kaayo ang tanan; ang pultahan sa kahigayonan sirado ug kandado na. Si Jesus mipadayon sa pagsulti sa Lucas 13:25 nga sa makasira na ang tagbalay sa pultahan, mosugod ang mga tawo sa pagpanuktok ug managhangyo: “‘Ginoo, ablihi kami.’ Apan siya motubag kaninyo nga mag-ingon, ‘Wala ako mahibalo kon tagadiin kamo.’” Pagkamasubong sangpotanan ang naghulat niadtong dili maghimo sa pagsimba ni Jehova nga maoy ilang pangunang tumong sa kinabuhi karon!​—Mateo 6:33.

7. Sa unsang paagi gipakita sa Filipos 3:12-14 ang padayong panglimbasog, ug nganong hinungdanon kini?

⁷ Mapinadayonon ang atong paningkamot. Walay bisan usa kanato ang bug-os nga nakasulod agi sa “masigpit nga pultahan.” Nasayod niini si Pablo. Siya misulat: “Dili nga nakab-ot ko na kini, o nga nahingpit na ako, apan nagapadayon ako aron maangkon ko ang butang nga tungod niini naangkon ako ni Kristo Jesus. Mga igsoon, wala nako isipa nga naangkon ko na kini. Apan usa ka butang akong ginabuhat mao kini: Akong gikalimtan ang nangagi ug naningkamot paingon sa kon unsay anaa sa unahan, ako nagapadayon paingon sa dag-anan aron madawat ang ganti nga tungod niana gitawag ako sa Diyos palangit diha kang Kristo Jesus.” (Italiko amoa.)​—Filipos 3:12-14, The New International Version.

8. (a) Unsay nakababag sa “daghan” gikan sa kinabuhing walay kataposan? (b) Unsang pasidaan ang gipalanog niini alang kanato?

⁸ Kinsa ang “daghan,” ug ngano nga dili sila makasulod? Ang “daghan” napaila nga nalangkit sa Kakristiyanohan, ilabina ang iyang klero nga matang. Nagpakaaron-ingnon sila nga suod nga nakaila kang Jesus, nga bahin sa iyang pamilya, pinaagi sa pagpangangkon nga sila ‘nakakaon ug nakainom uban kaniya.’ Apan kay nagtinguha lamang silag kaluwasan sa ilang kaugalingong kagustohan, dili sa Diyos, bug-os nga gilimod sila ni Jesus nga wala makaila kanila ug gilantaw sila ingong “mga mamumuhat ug daotan.” (Lucas 13:26, 27) Lakip sa mga tawo nga gibabagan sa pagsulod sa kinabuhing walay kataposan mao kadtong nangaluya sa ilang balaang pag-alagad kang Jehova ug karon nagparelaks-relaks na lang sa ilang pagtagad sa matuod nga pagsimba. Ang ilang kadasig sa intereses sa Gingharian midagaang. (Pinadayag 3:15, 16) Tinuod, sa gihapon tingali ‘nagabaton sila ug diyosnong debosyon’​—salingkapaw nga pag-alagad sa kanataran ug sa pagtambong sa tigom​—apan kulang sa ebidensiya sa matang sa pagtuo nga maoy tinuod nga puwersa luyo sa putli nga pagsimba. (Itandi sa 2 Timoteo 3:5.) Napakyas sila sa pagkamatikod nga dili pa igo ang pagpangita lamang aron makasulod agi sa “masigpit nga pultahan.’ Kinahanglang maningkamot ang usa aron makasulod.

Kon Nganong sa “Masigpit nga Pultahan”

9. Nganong nagkinahanglag panglimbasog ang pagsulod sa masigpit nga pultahan?

⁹ Ang masigpit nga pultahan sa kaluwasan bukas alang sa tanan. Apan ang “daghan” dili gustong maningkamot sa pagsulod. Unsa ang pipila ka butang bahin sa pagsulod agi sa masigpit nga pultahan nga kinahanglang panglimbasogan pag-ayo? Ang tawo kinahanglang makakat-on una sa tukmang kahibalo sa kamatuoran sa Bibliya, ug sa pagkaila kang Jehova nga Diyos ug kang Jesu-Kristo. (Juan 17:3) Nagpasabot kini sa pagbulag sa mga tradisyon ug sa mga buhat sa kalibotanong mga relihiyon, lakip niadtong sa Kakristiyanohan. Nagkinahanglan kini sa pagbuhat sa kabubut-on sa Diyos, sama sa gihimo ni Jesus sa dinhi pa sa yuta. (1 Pedro 2:21) Ingong dedikado, bawtismadong Kristohanon, kinahanglang likayan usab sa usa ang materyalismo, imoralidad, ug ang kahugawan sa kalibotan. (1 Juan 2:15-17; Efeso 5:3-5) Kinahanglang hukason kini ug pulihan sa mga hiyas nga sama ni Kristo.​—Colosas 3:9, 10, 12.

10. Unsay kalabotan sa pagpugong sa kaugalingon sa atong pagbaton ug kinabuhing walay kataposan?

¹⁰ Ang “diyutay” nahibalo sa bili sa kadasig sa ministeryo, inubanan sa pagpakitag bunga sa espiritu, lakip sa pagpugong sa kaugalingon. (Galacia 5:23) Pinaagi sa tabang sa balaang espiritu ni Jehova, naningkamot sila sa pagkontrolar sa ilang lawas ug ginaagak kana padulong sa tumong sa kinabuhing walay kataposan.​—1 Corinto 9:24-27.

Unsay Kahulogan Alang Kanimo sa mga Pulong ni Jesus?

11. (a) Unsang mga bahin sa kinabuhi nga kinahanglang panglimbasogan pag-ayo sa pipila, ug ngano? (b) Unsang buluhaton nga kinahanglang panglimbasogan pag-ayo natong tanan?

¹¹ Bisan kon bag-o pa kitang gibawtismohan o aktibo na sa organisasyon ni Jehova sa dugay nang katuigan, kinahanglang dili kita magmaluya sa atong paningkamot sa pagpahimuot kaniya. Sumala sa gipakita sa tin-awng mga pulong ni Jesus, kinahanglang bug-os kalag ang atong pagmahal kang Jehova, andam sa pagsulod agi sa masigpit nga pultahan bisan unsa pay mahitabo. Bisan tuod wala lamang maghisgot si Jesus ug mga kauswagan ug sa pagtubo sa atong pag-alagad sa Diyos, alang sa pipila kanato, nagkinahanglan ug dugang panglimbasog aron sa pagpauswag ang atong batasan o sa pagkuha sa daotang mga gawi aron kita ‘dili mahimong kapangdolan.’ (2 Corinto 6:1-4) Kinahanglang hatagan kanunay ug pagtagad sa uban kanato ang masangkarong programa sa personal nga pagtuon aron ang atong ‘gugma mapuno uban sa tukmang kahibalo ug bug-os nga pagsabot.’ (Filipos 1:9-11) Ang uban kinahanglan maningkamot pag dugang sa pagtambong ug sa pakigbahin sa regular sa mga tigom sa kongregasyon, lakip sa Pagtuon sa Libro sa Kongregasyon. (Hebreohanon 10:23-25) Apan kitang tanan makalantaw sa atong kaugalingong pag-alagad sa kanataran sa pagsusi kon tinuod ba kitang nanglimbasog sa pagbuhat sa “buluhaton sa ebanghelisador.”​—2 Timoteo 4:5.

12. Aron masulayan ang sukod sa atong panglimbasog, unsang mga pangutana ang atong ibangon?

¹² Alang sa nagatubong gidaghanon, ang kauswagan sa ilang panglimbasog sa pagpahimuot kang Jehova nakakuwalipikar kanila sa pagkahimong auxiliary payoner, regular payoner, o pag-alagad sa Bethel. Apan komusta ka? Kon ikaw usa na ka magmamantala sa Gingharian, makahimo ka ba sa pakigbahin sa auxiliary payoner nga pag-alagad sa pila ka higayon sa usa ka tuig o kaha sa pagkahimong regular payoner? Kon usa na ikaw ka auxiliary payoner, gipaningkamotan ba nimo ang regular payoner nga pag-alagad? Kon wala, nganong dili palandongon ang pagbuhat niini? Niining paagiha mapanalanginan ka sa pagtukod ug mas suod nga relasyon kang Jehova nga Diyos ug kang Jesu-Kristo.​—Salmo 25:14.

Nanglimbasog Ka ba Aron Makapayoner?

13. (a) Kon buot kang magpayoner, unsa ang duha ka hinungdanong butang? (b) Aron makapayoner, unsang bahin sa kinabuhi ang nagkinahanglan sa pagpasibo?

¹³ Kon makahimo ka sa pagsulod sa regular payoner apan wala nimo buhata, makahimo ka ba sa “pagpaningkamot” sa paghimog mga pagpasibo sa imong kinabuhi aron makapayoner? Duha ka butang ang gikinahanglan. Una, kinahanglang may tinguha ka. Ikaduha, kinahanglang may tukma kang mga sirkumstansiya. Kon kulang ang imong tinguha, iampo kana. Pakigsulti sa mga payoner. Palamboa ang imong nga kalihokan karon ingong magmamantala sa kongregasyon. Pakigbahin sa auxiliary payoner nga pag-alagad kon maarangan. Kon ang imong mga sirkumstansiya dili makatugot niini nga pag-alagad karon, tan-awa kon may mahimo ka bang mga pagpahiangay. Ang mga asawa nga may trabaho tingali dili na kinahanglang motrabaho pa. Ang usa nga milapas na sa panahon sa pagretiro tingali dili na kinahanglan sa pagpadayon sa pagtrabaho. Ang hataas nga sukdanan sa kinabuhi, mahal nga mga bakasyon, ang labing uso nga mga awto, ug ang susama niini, dili hinungdanon sa kinabuhi.​—Lucas 12:15; 1 Juan 2:15-17.

14. (a) Nganong ang usa ka magtiayon wala matagbaw sa pagpabiling mga magmamantala sa kongregasyon? (b) Unsang tumong ang ilang gihikay alang sa ilang mga anak?

¹⁴ Ang usa ka amahan sa tulo ka anak nga lalaki, ang duha bata pa, misugod sa pagpayoner sa miaging unom ka tuig. Ngano? “Buot kong mobuhat pag daghan,” siya misaysay. “Kon makahimo ako sa pagsulod sa regular payoner ug dili nako himoon kana, wala nako tumana ang akong pagpahinungod.” Ang iyang asawa misulod usab sa regular payoner. Ngano? “Nakaauxiliary payoner ako sa regular nga paagi sulod sa upat ka tuig ug sa kataposan nakita ko nga masayon kana,” miingon siya. “Buot kong makabaton ug mas bug-os nga pakigbahin niining dili na masobli nga buluhaton ug sa pagpakitag maayong panig-ingnan sa among mga anak nga lalaki.” Ang bana ug asawa nakakat-on sa kamatuoran sa nakatapos sa unibersidad. “Gusto sa among mga ginikanan nga makatungha kami sa kolehiyo sa upat ka tuig,” miingon ang amahan. Busa, unsang mga tumong ang ilang gihikay alang sa ilang mga anak? “Akong gipahibalo sa akong mga anak nga buot kong magpayoner sila ug sa paggugol labing menos upat ka tuig sa Bethel.”

15. (a) Unsay katarongan nga nanglimbasog ang pipila sa pag-alagad ingong regular nga mga payoner? (b) Unsay imong katarongan sa imong tinguha sa pagsulod sa bug-os panahong pag-alagad?

¹⁵ Ang mosunod maoy mga katarongan kon nganong midesider ang uban nga mahimong regular nga mga payoner:

“Wala gayod mouswag ang akong espirituwalidad, ug nabalaka ako niini.” (Robert H.)

“Wala ako matagbaw sa pagkahimong regular nga magmamantala.” (Rhea H.)

“Ang pagpayoner nakahatag tumong ug katuyoan sa akong kinabuhi.” (Hans K.)

“Buot kong moalagad kang Jehova sa bug-os, ug ang pagpayoner maoy akong paagi sa paghimo niana.” (Charanjit K.)

“Magbasol gayod ako kon dili nako gamiton ang akong kusog, kabaskog, ug pagkabatan-on sa pakigbahin niining dakong buluhaton.” (Gregory T.)

“Panalanginan lamang ni Jehova ang paningkamot. Kinahanglang hatagan ko siyag pila ka butang aron mapanalanginan.” (Graceann T.)

“Ang pagpayoner nakatabang kanako sa pagpahayag kon unsay akong pagbati bahin kang Jehova.” (Marco P.)

“Ang bug-os panahong pagtrabaho sa sekular wala makahatag kanakog kalipay nga nakita ko taliwala sa mga payoner.” (Nancy P.)

Unsay mga katarongan ang imong ikadugang niining listahana?

Ginabuhat ba Nimo ang Imong Maarangan?

16. Ang mga payoner ba lamang ang nanglimbasog pag-ayo? Ipatin-aw.

¹⁶ Daghang mga Saksi ni Jehova sa matinuoron ug sa mainampoon nakasusi sa ilang personal nga kahimtang ug nakakita nga ilang ginahimo ang tanan nilang maarangan ubos sa ilang presenteng mga kahimtang karon. Tingali usa ka kanila. Kon mao, magmadasigon. Si Jehova ug ang iyang Anak nagtagad kanimo ug tinuod nga nagpabili sa imong bug-os kasingkasing nga pag-alagad. (Itandi sa Lucas 21:1-4.) Pananglitan, tungod sa dili maayong mga kahimtang sa politika ug sa ekonomiya, sa ubang kanasoran ang atong mga igsoon kinahanglang magtrabaho sa siyam ka oras sa adlaw, lima o unom ka adlaw sa usa ka semana, aron lamang makabaton sa mga kinahanglanon sa kinabuhi. Diha sa nasod diin ang buluhaton sa mga Saksi ni Jehova istriktong gidumilian sa kagamhanan, kadtong nakapayoner​—ug kining mga nasora adunay nagatubong gidaghanon sa mga payoner​—sa kasagaran mga retirado, mga batan-on nga gabii ang mga trabaho, ug mga inahan nga adunay mga anak nga gipahigawas sa Kagamhanan sa pagtrabaho.

17. Sa unsang paagi ang kahimtang ni Epaproditos nagpakita nga dili sukdon ni Jehova ang kadakoon sa atong panglimbasog pinaagi lamang sa gidaghanon sa buluhaton nga atong mahimo sa pag-alagad kaniya?

¹⁷ Apan tingali moingon ka, ‘Maayo unta ug maayo akog lawas. Kon bata pa lamang unta ako!’ Apan ayaw pagkaluya sa buut. Ang atong panglimbasog wala sukda sumala sa gidaghanon sa buluhaton nga atong mahimo diha sa balaang pag-alagad sa Diyos. Nahinumdom ba kamo kang Epaprodito? Sa nagkasakit siya, ang gidaghanon sa makugihong kalihokan nga nahimo niya diha sa “buluhaton sa Ginoo” dili sama nianang iyang nahimo sa maayo pa ang iyang panglawas. Apan gidayeg siya ni Pablo sa iyang panglimbasog. Sa pagkatinuod, sumala sa gipakita ni Pablo, kinahanglang atong ‘mahalon ang mga lalaki ug mga babaye nga sama kaniya.’​—Filipos 2:25-30.

18. (a) Sa unsang paagi kadtong wala kaayoy panahon makapauswag sa bug-os panahong pag-alagad sa kongregasyon? (b) Unsay imong mahimo sa pagdasig sa espiritu sa pagpayoner sa imong kongregasyon?

¹⁸ Apan, adunay inyong mahimo sa pagpalambo sa bug-os panahong pag-alagad sa kongregasyon. Unsa kana? Panglimbasog kamo pag-ayo sa pagpakitag espiritu sa pagpayoner. Pananglitan, kon dili kamo karon makapayoner tungod sa mga obligasyon sa pamilya, tugotan ba nimo ang ubang membro sa imong pamilya​—sa imong asawa, mga anak, igsoong lalaki, o babaye​—sa pagpayoner? Kadtong walay maayong panglawas o kaha may kakulian makapakitag tinuod nga kaikag niadtong nakahimo sa pagpayoner, sa pagpakigbahin sa pag-alagad sa kanataran uban kanila sumala sa itugot sa mga sirkumstansiya. (Itandi sa 1 Corinto 12:19-26.) Niining paagiha ang tanan sa kongregasyon makapanglimbasog sa pagpasiugda sa bug-os panahong pag-alagad. Ang resulta mahimong makapadasig sa tanan!

19. Unsa ang atong determinasyon?

¹⁹ Unsay kahulogan alang kanimo sa pagpanglimbasog pag-ayo? Nagkahulogan ba kana sa pag-uswag padulong sa pagpabawtismo? Sa pagsumpo sa pila ka dili maayong batasan? Sa paglig-on sa imong relasyon kang Jehova sa pila ka paagi? Nagkahulogan ba kini sa pagsulod sa auxiliary payoner? Sa regular payoner? Sa pag-alagad sa Bethel? Bisan unsay gikinahanglan kanimo aron makahimog espirituwal nga kauswagan, takos ang panglimbasog karon. Busa, hinaot nga kitang tanan magpadayon sa pagpaningkamot sa pagsulod sa masigpit nga pultahan nga motultol sa kinabuhing walay kataposan!

[Mga footnote]

Mga Puntong Tagdon

◻ Unsay gipasabot ni Jesus sa mitambag siya, “Panglimbasog kamo pag-ayo”?

◻ Kanus-a ug sa unsang paagi ang mga pulong ni Jesus aplikado kanimo?

◻ Nganong ang “daghan” dili makasulod sa masigpit nga pultahan?

◻ Sa unsang paagi nanglimbasog kadtong may limitadong mga sirkumstansiya?

◻ Hangtod kanus-a nga maningkamot kita sa pagsulod sa masigpit nga pultahan?