Makahinumdom Ka Ba?

Nakita ba nimong bililhon ang dili pa dugayng mga gula sa Ang Bantayanang Torre? Nan tan-awa kon makahinumdom ka ba sa mosunod:

◻ Nganong ikaingon nga ang Bibliya maoy usa ka libro alang sa tanang katawhan?

Sukad pa sa sinugdan niini, ang Bibliya nagtanyag ug panglantaw sa kalibotan kon bahin sa umaabot sa katawhan. (Genesis 1:28) Gitadlas niini ang tanang pagpinig sa rasa, nasyonalismo, ug ubang makapabahing mga puwersa nga naghampak sa katawhan. Kini naghisgot sa mga tawo sa tanang kanasoran ug naghisgot bahin sa yuta ingong usa ka dakong puloy-anan sa tibuok tawhanong rasa. (Buhat 17:26)​—4/15, panid 5.

◻ Unsay buot ipasabot ni Jesus sa miingon siya: “Busa, kon, yano ang imong mata, ang tibuok mong lawas mohayag”? (Mateo 6:22)

Ang pulong “yano” gikuha gikan sa Gregong pulong nga nagkahulogang pagkausa sa hunahuna o debosyon ngadto sa usa ka katuyoan. Pinaagi sa paghimo sa kabubut-on sa Diyos nga maoy atong tumong sa kinabuhi, kita nagpangita sa pagbanaag sa mahimayaong maayong balita mahitungod sa Gingharian sa tanang bahin sa atong mga kinabuhi.​—5/1, panid 12, 13.

◻ Unsay kahulogan sa pagkahimo ni Jehova nga maalamon sa tanan ug nasayod sa tanan?

Gisultihan ni Jehova si Abraham: “Ako mao ang Diyos nga Gamhanan.” (Genesis 17:1) Sanglit gamhanan​—makagagahom sa tanan​—makagamit si Jehova sa iyang gahom sa pagdaog sa tanang kababagan sa katumanan sa iyang saad ug mga katuyoan. Si Jehova nahibalo usab sa tanan, maalamon sa tanan​—nasayod sa tanan. Siya makakita sa butang nga buot niyang tan-awon. Kining duha ka hiyas nagpahimo nga imposibleng mapakyas si Jehova. (Isaias 14:24)​—5/15, panid 4.

◻ Sa unsang paagi makapakita kita sa pagkamapaubsanon kon mag-ampo sa publiko alang sa uban?

Kita makapakita sa pagkamapaubsanon pinaagi sa tuno sa atong tingog​—dili bombastikong pamation kun mapasundayaganon. Dili gayod kita mohangyo nga mobuhat si Jehova ug usa ka butang. Hinunoa, mangaliyopo kita kang Jehova uyon sa iyang kabubut-on, ug ang atong mga pulong sa tanang panahon kinahanglang magpakitag pagtahod ug dungganon, nagaila sa atong pagkawalay bili. (Mateo 6:5; Isaias 66:2)​—5/15, panid 21, 22.

◻ Sa unsang paagi makahupot ang Kristohanon sa positibong tinamdan bisan ilalom sa paglutos?

Dili gayod niya tugotan ang negatibong mga butang nga maglabi sa hunahuna. Hinunoa, iyang palandongon ang gibuhat sa ubang matinumanong mga alagad ni Jehova sa mga panahon sa pagsulay. Sila may bug-os nga pagtuo ug pagsalig kang Jehova, nagasalig sa iyang katakos sa pagbanhaw ug sa pagbalos kanila. (Pinadayag 2:10) Sa susama, ang gilutos nga Kristohanon karon makahupot sa tin-aw nga hunahuna sa iyang paglaom sa matarong bag-ong sistema ni Jehova. (Itandi sa Hebreohanon 12:2.)​—6/1, panid 30.

◻ Unsang usa ka importanteng butang nga gikausahan ni Hus, Wycliffe, ug Luther?

Silang tanan nagkausa nga kinahanglan una ang Pulong sa Diyos, bisan unsa pay mga opinyon sa mga tawo. Ang unang Kristohanon adunay sama niining nadan-agang panghunahuna tungod kay sila gitudloan ni Jesus mismo. (Buhat 5:29; Juan 17:17)​—6/15, panid 31.

◻ Ang itom nga kolor sa panit mao bay resulta sa balaang tunglo nga gihatag diha kang Canaan ug sa iyang mga kaliwat?

Dili. Ang itom nga rasa nagagikan dili kang Canaan kondili kang Cush ug tingali kang Put. Walay tunglo ang gihatag diha niining duha ka anak ni Noe. (Genesis 9:24, 25; 10:1, 6)​—7/1, panid 4.

◻ Unsay gipasabot ni Jesus dihang naghisgot bahin sa pagdumot sa kaugalingong sakop sa pamilya ug gani sa kaugalingon? (Lucas 14:26)

Ang gipasabot ni Jesus mao nga sa pagtandi sa gugma sa usa alang sa Diyos ug sa debosyon kang Kristo, ang relasyon sa mga paryente daw sama sa pagdumot. (Itandi sa Mateo 12:46-50.)​—7/1, panid 27.

◻ Sa unsang paagi si Jesus mao ang “Ginoo sa adlaw nga igpapahulay,” sumala sa gipahayag sa Mateo 12:8?

Nagpunting si Jesus sa iyang malinawong pagmando sa Gingharian sa usa ka libo ka tuig. Kining dakong Adlaw nga Igpapahulay nga pagmando ni Kristo maoy panahon sa pagpahulay sa tanang pag-antos ug paglupig.​—7/15, panid 9.

◻ Nganong dili maalamon alang sa usa ka bata sa pagbutang ug iyang kaugalingong mga tumong sa kinabuhi?

Ang eksperyensiya sa mga bata limitado kaayo alang kanila sa pagbutang ug ilang kaugalingong mga tumong sa kinabuhi. Kon ang mga ginikanan dili motabang kanila sa pagbutang ug mga tumong, lain ang motabang​—tingali ang mga bata sa eskuylahan o ang magtatambag sa eskuylahan. Ang Kristohanong mga ginikanan makatabang sa ilang mga anak sa pagbutang ug mga tumong nga nahiuyon sa ilang pagpabili sa espirituwal nga mga butang.​—8/1, panid 28.