Mga Graduwado sa Gilead—“Tinuod nga mga Misyonaryo!”
“UNSAY misyonaryo?” Kanang maong pangutana gipatugbaw sa usa ka editoryal sa mantalaan halos upat na ka dekada kanhi. Ang magsusulat nangatarongan nga ang tinuod nga mga misyonaryo maoy mga instrumento sa sosyal ug ekonomikanhong mga reporma. Apan, sa Dominggo, Marso 5, 1995, sa Jersey City Assembly Hall of Jehovah’s Witnesses, usa ka tubag nga lahi kaayo ug matang ang gipasiugda pag-ayo. Ang okasyon? Ang graduwasyon sa ika-98ng klase sa Watchtower Bible School of Gilead—usa ka tunghaan nga nagpadala ug mga misyonaryo sa tanang bahin sa yuta!
Human sa pangbukas nga awit ug pag-ampo, si Albert D. Schroeder sa Nagamandong Lawas mainitong nag-abiabi sa tanang 6,430 nga nanambong. Sa iyang pasiunang mga komento, si Brader Schroeder mipatin-aw kon nganong ang mga graduwado sa Gilead lahi sa uban nga nagtawag sa ilang mga kaugalingon nga mga misyonaryo. Siya miingon: “Ang Bibliya mao ang pangunang librong tun-anan sa Gilead.” Ang mga graduwado sa Gilead gibansay nga mahimong, dili mga tig-alagad sa katilingban, kondili mga magtutudlo sa Pulong sa Diyos. Sa ingon sila talagsaong mikuwalipikar sa pag-atiman sa espirituwal nga mga panginahanglan sa katawhan sa langyawng kayutaan.
Ang misunod nga mga mamumulong naghisgot sa pipila sa ubang mga natad diin ang mga graduwado sa Gilead naghatag ug pamatuod ingong “tinuod” nga mga misyonaryo. Si Charles Molohan namulong kanila bahin sa ulohang “Padayon sa Pagpamungag Maayong mga Bunga Ingong mga Misyonaryo.” Nga nagkutlo sa mga pulong ni apostol Pablo sa Colosas 1:9, 10, si Brader Molohan nagpahinumdom sa mga graduwado nga ang ilang milabayng lima ka bulan sa Gilead nakatabang kanila sa pag-uswag “sa tukmang kahibalo sa Diyos.” Kini motabang kanila sa pagpatunghag mga bunga sa duha ka paagi: pinaagi sa pagpasundayag sa mga bunga sa espiritu sa Diyos ug pinaagi sa pagpakig-ambit sa mga kamatuoran sa Bibliya sa uban.
Si Daniel Sydlik sa Nagamandong Lawas ang misunod uban sa makapahunahuna nga temang “Ayaw Paghimog mga Kompromiso nga Magdaot sa Imong Kinabuhi.” Iyang gihisgotan ang pangutana ni Jesus: “Unsay ihatag sa usa ka tawo baylo sa iyang kalag?” (Mateo 16:26) Si Brader Sydlik miingon: “Ang mga tawo nagbaylo sa ilang mga kalag sa mas sayon, mas haruhay nga paagi sa pagkinabuhi.” Apan, kadtong adunay buhing pagtuo dili makakompromiso sa dihang nag-atubang sa mga pagsulay. Ang mga pulong ni Jesus nagpakita nga ang usa kinahanglang magmaandam sa “paghatag,” nga mao, pagsakripisyo, aron mabatonan ang kalag, o kinabuhi, sa usa. Ang bag-ong mga misyonaryo giawhag sa paghatag kang Jehova sa ilang bug-os nga kalag, sa ilang kinamaayohan, diha sa pag-alagad kaniya!
Sunod, si William Van de Wall sa Service Department Committee namulong bahin sa ulohang “Si Apostol Pablo—Usa ka Panig-ingnan nga Takos Sundogon.” Si Brader Van de Wall misaysay: “Si Pablo nanguna sa misyonaryong buluhaton sa unang siglo.” Nan, sa tukma upat ka natad ang gipasiugda diin si apostol Pablo nagpakitag maayong panig-ingnan alang sa mga misyonaryo karong adlawa: (1) tiunay nga kabalaka ug gugma ni Pablo alang sa katawhan, (2) iyang pagkaepektibo diha sa ministeryo, (3) iyang makasaranganong pagdumili nga ibayaw ang iyang kaugalingon, (4) iyang walay-pagduhaduha nga pagsalig kang Jehova.
Ang “Pasagding si Jehova Magasusi Kanimo Diha sa Imong Bag-ong Asaynment” mao ang ulohan nga gihisgotan ni Lyman A. Swingle sa Nagamandong Lawas. Nga naggamit sa teksto nianang adlawa, ang Salmo 139:16, si Brader Swingle miila nga, ingong bag-ong mga misyonaryo, sila makasagubang ug mga suliran didto sa ilang mga asaynment ug nga si Jehova nakahibalo sa mga solusyon. “Pangayog tabang gikan kaniya,” siya miawhag, “pakigsulti kaniya sa dihang ikaw may suliran. Paningkamoti sa pag-ila kon unsa ang iyang kabubut-on.”
Dayon si John E. Barr sa Nagamandong Lawas namulong bahin sa ulohang “Ang Imong Pagtuo Nagatubo sa Hilabihan.” (2 Tesalonica 1:3) Sa Lucas 17:1, atong mabasa nga si Jesus miingon: “Dili malikayan nga ang mga hinungdan sa pagkapandol moabot.” Ang uban napandol gumikan sa mga personalidad sa kaubang mga misyonaryo. Apan si Brader Barr nagdasig sa mga misyonaryo nga magbaton sa pagtuo nga gikinahanglan aron mahimong mapinasayloon. Sa pagkatinuod, maoy niining kontekstoha nga ang mga tinun-an ni Jesus mihangyo: “Hatagi kami ug dugang pa nga pagtuo.” (Lucas 17:2-5) Ang pagtuo sa mga misyonaryo mahimong sulayan usab sa nagkalainlaing organisasyonal nga mga kahikayan. “Nabatonan ba nato ang pagtuo nga modawat niini,” nangutana si Brader Barr, “o sila ba mahimong samag-bukid nga kababagan?”
Misunod ang pipila ka pahimangno gikan sa duha ka instruktor sa Gilead. Si Jack Redford nag-aghat sa mga graduwado sa paghupot ug positibong tinamdan. Nag-asoy siya bahin sa usa ka misyonarya nga mibiya sa iyang asaynment ingong sanong sa pagsulogsulog sa kaubang mga misyonaryo. Apan, ang Kasulatan nagpasidaan kanato batok nianang wala-kinahanglanang pagkasuko. (Ecclesiastes 7:9) “Batoni ang hustong tinamdan,” siya miawhag. “Magmapasayloon sa mga sayop ug pagkadili-hingpit sa uban libot nimo.”
Unya si U. V. Glass, ang tigrehistro sa Gilead, nangutana: “Andam ba kamo sa pagsagubang sa ‘panahon ug wala-damhang hitabo’”? (Ecclesiastes 9:11) “Ang atong estilo sa kinabuhi kanunayng nailalom sa mga kausaban,” miingon si Brader Glass, “ug ang pipila ka kausaban mahimong makaguol kaayo.” Ang pipila ka misyonaryo wala-damhang nag-atubang ug dili-maayong panglawas, sakit, ug mga suliran sa pamilya, nga nagkinahanglang mobiya ang pipila sa ilang mga asaynment. “Bisan unsa kanang wala-damhang panghitabo,” miingon si Brader Glass, “kita nasayod nga si Jehova nasayod niana ug may kahangawa. Kon kita mosalig kaniya, nasayod kita nga kita magmadaogon!”
Usa ka pakigpulong nga nag-ulohang “Gigahin Alang sa Misyonaryong Pag-alagad” maoy kinatayuktokan sa serye sa mga pakigpulong sa buntag. Si Theodore Jaracz sa Nagamandong Lawas naghisgot sa pangutana nga gipatungha sa sinugdanan, nga mao, “Unsay misyonaryo?” Sa pagtubag, iyang gihisgotan ang Buhat mga kapitulo 13 ug 14 bahin sa misyonaryong buluhaton ni Pablo ug Bernabe. Dayag, kanang maong buluhaton natunong, dili sa pagsulbad sa suliran sa katawhan, kondili sa ‘pagpahayag sa maayong balita.’ (Buhat 13:32) Si Brader Jaracz nangutana: “Dili ba kamo mouyon nga gipakita ni Pablo ug Bernabe kon sama sa unsa ang tinuod nga misyonaryo?” Ang eksperyensiyadong misyonaryo nga si Robert Tracy sa Mexico gihangyo dayon sa pagpaambit sa pipila sa iyang kaugalingong makapadasig nga mga kasinatian ingong magwawali.
Ang programa sa buntag miabot sa kinatayuktokan niini sa dihang si Brader Schroeder nag-apod-apod sa mga diploma ngadto sa 48 ka graduwado. Ang mamiminaw nalipay sa pagkadungog sa mga ngalan sa 21 ka nasod diin giasayn ang mga misyonaryo: Barbados, Benin, Bolivia, Costa Rica, Côte d’Ivoire, Ecuador, Equatorial Guinea, Estonia, Guinea-Bissau, Honduras, Latvia, Leeward Islands, Mauritius, Mozambique, Nicaragua, Paraguay, Peru, Republika sa Sentral Aprika, Senegal, Taiwan, ug Venezuela.
Human sa paniudto, ang mamiminaw nagtigom pag-usab ug nalingaw sa madasigong pagtuon sa Ang Bantayanang Torre, nga gidumala ni Robert P. Johnson sa Departamento sa Pag-alagad. Ang mga membro sa ika-98ng klase nagtubag sa mga pangutana. Kini gisundan sa makalingawng serye sa mga interbiyo nga gidumala sa mga kawani sa Gilead. Ang mamiminaw nadasig pag-ayo samtang ang mga graduwado nakig-ambit sa ilang mga kasinatian sa kanataran ug nagpahayag sa ilang mga pagbati mahitungod sa ilang langyawng mga asaynment.
Sulod sa unom ka tuig ug tunga, ang Gilead nahimutang sa mga pasilidad sa Watchtower Society sa Wallkill, New York. Hinunoa, sa Abril 1995, ang tunghaan gibalhin ngadto sa bag-ong Watchtower Educational Center sa Patterson, New York. Unsay gibati sa pamilyang Bethel sa Wallkill mahitungod niining maong kausaban? Niining maong graduwasyon ubay-ubay gikan sa Wallkill ang giinterbiyo. Ang ilang makapatandog nga mga pahayag nagpatin-aw nga ang mga estudyante sa Gilead nagbilin kanila ug malungtarong handumanan. Dayag, kining andam nga mga lalaki ug babaye maoy tinuod nga mga misyonaryo—mapaubsanon, nagsakripisyo sa kaugalingon, dulot nga nabalaka sa pagtabang sa uban.
Sa dihang natapos ang graduwasyon, ang tanang nanambong masaligon nga ang Tunghaang Gilead magpadayong malamposon sa pagbuhat sa ginabuhat niini sulod na sa kapin ug 50 ka tuig—pagpatunghag tinuod nga mga misyonaryo!
Estadistika sa Klase:
Gidaghanon sa mga nasod nga gihawasan: 8
Gidaghanon sa mga nasod nga giasaynan: 21
Gidaghanon sa mga estudyante: 48
Aberids nga edad: 32.72
Aberids nga katuigan sa kamatuoran: 15.48
Aberids nga katuigan sa bug-os-panahong ministeryo: 10.91
[Hulagway sa panid 18]
Ika-98ng Migraduwar nga Klase sa Watchtower Bible School of Gilead
Sa lista sa ubos, ang mga laray ginumerohan gikan sa atubang ngadto sa likod, ug ang mga ngalan gilista gikan sa wala ngadto sa tuo sa matag laray.
(1) Eszlinger, A.; Mann, T.; Rivera, G.; Baruero, M.; Vaz, M.; Durga, K.; Silweryx, H.; Alvarado, D. (2) Toth, B.; Segarra, S.; Hart, R.; Rooryck, I.; Escobar, P.; Ejstrup, J.; Sligh, L.; Rivera, E. (3) Archard, D.; Snaith, S.; Marciel, P.; Koljonen, D.; Waddell, S.; Blackburn, L.; Escobar, M.; Archard, K. (4) Hart, M.; Toth, S.; Koljonen, J.; Bergman, H.; Mann, D.; Blackburn, J.; Park, D.; Vaz, F. (5) Segarra, S.; Sligh, L.; Leslie, L.; Bergman, B.; Baruero, W.; Alvarado, J.; Leslie, D.; Park, D. (6) Silweryx, K.; Eszlinger, R.; Waddell, J.; Snaith, K.; Durga, A.; Rooryck, F.; Ejstrup, C.; Marciel, D.