Mga Pangutana Gikan sa mga Magbabasa

◼ Nganong ang Lamentaciones 4:10 nagatumong sa mga inahan nga nagkaon sa ilang kaugalingong mga anak ingon nga “maluluy-ong mga babaye”?

Sa pagbatbat sa lisod kaayong kahimtang sa mga Hudiyo panahon sa pag-atake sa mga Babilonyanhon sa Jerusalem sa 607 W.K.P., si Jeremias misulat: “Ang mga kamot mismo sa maluluy-ong mga babaye nanaglata sa ilang kaugalingong mga anak. Sila nahisama sa tinapay sa kahupayan alang sa usa panahon sa pagkalaglag sa anak babaye sa akong katawhan.”​—Lamentaciones 4:10.

Kasiglohan nga nangagi, gipasidan-an ni Moises ang mga Israelinhon nga ang ilang kaugmaon pagatiman-an sa “panalangin” o “tunglo.” Makapahimulos silag mga panalangin kon bantayan nila ang mga sugo sa Diyos, apan maagoman nila ang pag-antos kon isalikway nila ang matarong niyang mga dalan. Ang usa sa mangilngig nga sangpotanan mao nga ang mga Israelinhon magakaon sa ilang kaugalingong mga anak. (Deuteronomio 28:1, 11-15, 54, 55; 30:1; Levitico 26:3-5, 29) Kini aktuwal nahitabo human nga itugyan ni Jehova ang dili-matinuohon, masukihong nasod ngadto sa kamot sa mga Babilonyanhon.

Sa Lamentaciones 4:10 gibasehan sa propetang si Jeremias ang iladong kamatuoran nga ang usa ka inahan kinaiyanhong humok ug kasingkasing, maluluy-on, ug mapanalipdanon sa iyang mga anak. (1 Hari 3:26, 27; 1 Tesalonica 2:7) Bisan pa niana, ang kagutmanan sa giatake nga Jerusalem grabe kaayo ug ang misangpot nga kagutmanan matukmoron kaayo nga ang mga inahang sagad nga maluluy-on nanaglata ug nagkaon sa ilang mga anak samag kanibal.​—Itandi ang Lamentaciones 2:20.

Ang susamang kahimtang nahitabo tapos isalikway sa mga Hudiyo ang Mesiyas, nga nagpasidaan bahin sa umaabot nga pag-atake sa Jerusalem. (Mateo 23:37, 38; 24:15-19; Lucas 21:20-24) Ang historyanong si Josephus nagbatbat sa usa sa mga butang makalilisang sa pag-atake sa 70 K.P.: “Si Maria ang anak babaye ni Eleazar . . . nagpatay sa iyang anak lalaki, dayon giasal siya ug gikaon ang katunga, nga gitagoan ug gireserba ang nahibilin.”​—The Jewish War, gihubad ni G. A. Williamson, kapitulo 19, panid 319.

Sa pagkamatuod, ang pagbiya sa mga kasugoan ug mga dalan sa Diyos dili dalan nga maalamon.