Ang Kataposan sa Krimen Karon Haduol Na!

ANG mga sekreta nagapaningkamot sa pagsulbad sa mga krimen pinaagi sa pagtuki sa mga ilhanan nga mopadayag sa indibiduwal ug sa mga motibo sa mga mamumuhat ug daotan. Ang mga paagi ug mga kahanas sa sekreta mao ang mga ulohan sa mga nobela nga popular sa tibuok-kalibotan. Bisan tuod nga siya sa kataposan molampos sa pagdiskobre sa kriminal, ang trabaho sa sekreta magsugod human sa hitabo, human nga nahimo na ang krimen.

Sumala sa atong makita sa pagdaghan sa krimen, sa matag usa ka kriminal nga madak-pan, dunay daghan pang uban ang moliso sa pagbuhat ug krimen. Busa dugang pa ang gikinahanglan kay sa pagsulbad lamang sa nahimo nang kalapasan aron sa pagwagtang sa krimen. Unsay makapugong sa mga tawo sa pagkahimong mga kriminal?

Ang krimen dunay kalabotan sa moral. Dili kita malisdan sa pagdawat nga ang pagpatay, panglugos, ug ubang mabangis nga mga buhat maoy mga krimen. Apan komosta ang panglimbong sa dihang mobayad sa mga buhis? Kana maoy kriminal usab nga buhat, tungod kay kini nahasupak sa moral nga mga sukdanan sa pagkamatinud-anon. Ang bug-os nga pagtapos sa krimen nagkahulogan sa pagpapha sa tanang buhat nga supak o sukwahi sa sukaranan sa moralidad.

Tagda ang tulo ka pananglitan sa Bibliya nga nagpasiugda dili lamang sa hinungdan sa krimen kondili sa paagi usab sa paghanaw niana.

Ang Pagkahadlok sa Diyos Batok Kasina

Palihog matikdi ang mga pulong ni salmistang Asaph: “Ako nasina sa mga mapagawalon, sa diha nakita ko ang kalinaw sa mga tawong daotan.” (Salmo 73:3) Oo, ang pagkasina sa kauswagan sa mga kriminal ug ang estilo-sa-kinabuhi nakadani sa daghan sa pagsagop sa daotang mga paagi. Ang paghimo sa krimen nga madanihon diha sa telebisyon ug sa mga basahon dugang nagapahimo niini nga madawat inay kay sa pagdasig sa pagdumot sa daotan.

Tungod niini, ang dinasig nga magsusulat sa Proverbio nagtambag: “Ayaw itugot ang kasingkasing nga masina sa mga makasasala, apan kahadloki si Jehova sa tanang adlaw.” Ang motibo ug tinguha sa usa ka tawo mao ang gamot sa problema. Ang labing maayong paagi nga epektibo sa pagsumpo niini mao ang pagtukod ug diyosnong kahadlok nga dili-mapahimut-an si Jehova nga Diyos. “Nianang paagiha adunay molungtad nga kaugmaon, ug ang imong kaugalingong paglaom dili pagaputlon.”​—Proverbio 23:17, 18.

Pagtuo Batok Kadalo

Sa tingpamulak sa 33 K.P., si Jesus mibiyahe paingon sa lungsod sa Jerico. Kadto mao ang lungsod nga gidak-an ni Zaqueo, si kinsa ang magsusulat sa ebanghelyo nga si Lucas nagbatbat nga “usa ka hepe sa maniningil ug buhis,” ug midugang nga “siya dato.” Ang tabunok nga distrito sa palibot sa Jerico maoy usa ka dakong dapit alang sa pagpangolekta ug buhis, ug sumala sa gipakita sa kaugalingong mga pulong ni Zaqueo, ang iyang kalihokan ingong hepe sa maniningil ug buhis naghatag kaniya ug higayon sa pagpanikas. Apan si Zaqueo wala magpabilin nga kriminal.​—Lucas 19:1-8.

Si Zaqueo midagan sa pag-una sa panon sa katawhan nga nag-alirong kang Jesus ug tungod sa iyang pagkamubo nangita siya ug taas nga lugar nga malantawan pinaagi sa pagkatkat sa kahoy nga sikomoro. Si Jesus nakamatikod niya ug gisultihan si Zaqueo sa pagkanaog, kay Siya moestar uban niya samtang anaa pa sa Jerico. Sa ulahi, ang mga pulong ni Zaqueo nagpakita ug kausaban sa iyang tinamdan: “Ang katunga sa akong kabtangan . . . akong ihatag sa mga kabos, ug kon ako nakapanikas man kanila sa bisan unsa pinaagi sa bakak nga mga sumbong akong iuli kini sa upat ka pilo.” Ang pag-uli sa tinikas nga mga salapi mobalor ug hilabihan ka dakong kantidad. Pinaagi sa pagsaad sa paghimo niini, gipahayag ni Zaqueo ang iyang pagtuo kang Jesus. Oo, ang iyang nabag-o nga panlantaw mihatag ug makitang resulta, pag-uli sa mga butang nga gikuha sa dili-maayong paagi ug gidugangan pa ug tulo ka pilo sa kantidad niadto, nga nahimong upat ka pilo nga kabayaran. Busa gitul-id ni Zaqueo ang iyang sayop nga nahimo ug gani mihimo ug labaw pa niana, nga nagpamatuod sa katim-os sa iyang nabag-ong paagi sa pagkinabuhi.​—2 Corinto 7:11.

Ang mga Tawo ang Mas Bililhon Kay sa mga Kabtangan

Ang Romanhong gobernador nga si Pilato miingon bahin sa sinumbong nga si Jesu-Kristo: “Wala akoy nakitang sala niining tawhana.” (Lucas 23:4) Inay moliso sa kriminal nga mga buhat aron makabaton ug mga kabtangan, sa iyang tibuok-yutan-ong ministeryo, si Jesus mipakitag mahigugmaong interes sa mga tawo. “Sa pagkakita niya sa panon sa katawhan siya naluoy kanila, tungod kay sila nangalibog ug nanagkatibulaag sama sa mga karnero nga walay magbalantay. Unya siya miingon sa iyang mga disipulo: ‘Oo, dako ang alanihon, apan diyutay lang ang mangangani. Busa, hangyoa ang Agalon sa anihon nga magpadala ug mangangani ngadto sa iyang alanihon.’” (Mateo 9:36-38) Sa matin-aw, gibutang ni Jesus nga una ang mga tawo kay sa mga kabtangan, bisan sa iyang kaugalingong kaharuhay ug intereses. Atong makita usab kini sa iyang pagkaandam sa paghago sa pag-atiman sa mga tinun-an ug sa panon sa mga tawo kinsa midangop kaniya alang sa instruksiyon ug tabang. (Mateo 8:20; 14:13-16) Niining paagiha si Jesus nagbilin kanato ug panig-ingnan aron pagasundon.​—1 Pedro 2:21.

Posible ba alang sa katawhan karong adlawa ang pagsunod sa maong panig-ingnan, sa paglantaw sa isigkatawo nga mas bililhon kay sa materyal nga mga butang? Kita makatubag nga oo. Palandonga ang mga Saksi ni Jehova, nga karon kapin na sa tres ug un-kuwarto sa milyon. Sila naningkamot nga makabaton sa hunahuna ni Kristo ug sa paghatag nianang praktikal nga ekspresyon. Sila nagapanlimbasog kanunay nga mahanaw diha sa ilang mga kasingkasing ang daotang mga tinguha nga mohatod sa daghan sa pagbuhat ug krimen. Sa wala pa mahimong mga Saksi, samtang sila nagtuon pa sa Bibliya ug nag-ugmad sa gugma sa Diyos, kini nakatandog sa uban kanila kinsa kaniadto mga kriminal; kini nakapukaw sa ubay-ubay kanila sa pagbag-o sa ilang kriminal nga mga buhat kanhi. Wala, wala nila buhata kini alang sa publisidad kondili aron makabaton ug malinawon nga relasyon kang Jehova nga Diyos ug busa makabenepisyo gikan sa iyang dili-takos nga kalulot sama sa gipadayag pinaagi sa halad-lukat ni Jesu-Kristo.​—1 Corinto 2:16; 6:11; 2 Corinto 5:18-20.

Uban sa gugma sa ilang mga silingan, ang maong mga Kristohanon nagagahin ug panahon sa pagduaw sa ubang mga tawo aron ipatin-aw kon sa unsang paagi kining mga pamilyaha makalantaw sa unahan sa usa ka kinabuhi diha sa Paraiso nga mga kahimtang ilalom sa Gingharian sa Diyos. Matag semana ang mga Saksi ni Jehova dunay regular nga mga tigom sa ilang mga Kingdom Hall. Ang usa ka tawo nga sa kinabubut-on miangkon nga kawatan midawat sa pagdapit sa pagtambong aron makita kon sama sa unsa ang mga tigom. Siya miasoy: “Sa paghisgot sa labing menos, ako natingala gayod. Kadto dili makapuol o makalaay nga maoy akong gidahom. Ang kainit ug gugma, dayag kaayo, tinuod nga kinasingkasing. Ug ang apresasyon nga nabatonan sa tanang mga Saksi sa espirituwal nga mga butang talagsaon gayod.” Nakadayeg kaayo siya nga tungod niana siya padayong nakig-uban, ug kini ang nakatabang kaniya sa pagbag-o. Kon ikaw nalangkit man sa krimen o wala, kon ikaw makig-uban sa mga alagad sa Diyos, ikaw usab makakaplag sa samang kinasingkasing nga interes sa mga tawo inay sa mga kabtangan.​—Mateo 22:39.

Krimen​—Nahanaw na Ba?

Kon ang mga tawo dili na molihok ingong mga kriminal, kini ba nagpasabot nga sila mga hingpit? Halayo gikan niana! Ang mga Saksi ni Jehova, sama kang bisan kinsa, nag-antos sa napanunod nga sala gikan sa atong unang tawhanong ginikanan, si Adan. (Roma 5:12; 1 Juan 1:8) Apan sila karon nagkahiusa sa pag-alagad sa Diyos, ingon sa gipakita sa ilang tibuok-kalibotang buluhaton sa pagsangyaw ug sa pagpanudlo. Kini nagpakita ug kusganong pamatuod sa katumanan sa tagna ni Isaias: “Ug mahitabo sa ulahing mga adlaw nga ang bukid sa balay ni Jehova pagatukoron ibabaw sa tumoy sa kabukiran, . . . ug ngadto niana nagaganayan ang mga nasod.” (Isaias 2:2) Tinuod, minilyon ang nagaganayan ngadto sa tinuboy nga pagsimba ni Jehova, nangita sa instruksiyon sa iyang mga dalan. Ikaw mahimong usa niadtong kinsa makabenepisyo sa pagpakig-uban sa mga tawong nagalikay sa krimen.

Ang Pagkawala sa Krimen​—Ang mga Palaabuton

Ang nagausbaw nga kriminal nga kalihokan sa atong adlaw maoy usa ka timailhan sa haduol nga pagpangilabot sa Diyos sa pagwala sa tanang mga daotan, apil ang tanang mga mamumuhat ug krimen. “Ang mga mamumuhat ug daotan pagalaglagon . . . Kay sa dili madugay, ang mga daotan mangawala; ug susihon mo sa dakong kakugi ang iyang dapit, ug siya mawala diha.” (Salmo 37:9, 10) Ang kataposan sa krimen karon haduol na, kay kita nagakaduol na sa panahon sa dihang ang oirihinal nga kriminal, si Satanas nga Yawa, gapuson ug itambog sa bung-aw. (Pinadayag 20:1-3) Pagkakulbahinam unya nga mahibaloan nga ang kahadlok sa krimen ug ang kasakit nga giantos sa mga biktima niini sa dili madugay maoy mga butang na unya sa nangagi!

Apan, komosta ang minilyong mga tawo kinsa diha sa pagkabanhaw mahibalik sa kinabuhi dinhi sa yuta? (Buhat 24:15) Kon sila magpadayon sa mao gihapong personalidad ug mga dalan sa wala pa sila mamatay, dili ba kaha sila mobuhat ug bag-ong matang sa krimen? Dili angay kahadlokan kana. Gisaaran ni Jesus ug pagkabanhaw ang usa ka kawatan, nga nagaingon: “Sa pagkamatuod ako magaingon kanimo karong adlawa, Ikaw magauban kanako sa Paraiso.” (Lucas 23:43) Kini sa pagkamatuod nagpaila nga ang usa nga pagabanhawon mohimog kausaban; kay kondili ang bag-ong kalibotan dili mahimong usa ka paraiso.

Sama nga ang bangis kaayong mga kriminal nagkinahanglan ug rehabilitasyon sa dili pa makabalik ug puyo sa komunidad nga dili makamugnag mga suliran, sa ingon sa ilalom sa Gingharian sa Diyos, ang dakong edukasyonal nga programa motabang sa mga sakop nga mahimong masinundanon sa balaod. (Pinadayag 20:12, 13) Uban sa dayag nga kaayohan nga nagalibot sa mga pumoluyo sa Paraiso, kinsa mga masinundanon sa balaod sa Diyos, ang mga binanhaw makasinati ug maayong pagkaangay nga mga kahimtang sa ekonomiya. (Isaias 65:21-23) Aduna unyay matarong nga mga magmamando, ug si bisan kinsa nga magpadayon sa pagbuhat ug daotan mapapha gikan sa kinabuhi. (Isaias 32:1; 65:20) Busa dunay daghang katarongan sa pagsalig nga, sa kataposan, ang krimen matapos.

Bisan pa nga nagkinabuhi gihapon kita diha sa usa ka kalibotan nga gitiman-an sa krimen, ikaw masaligong makapakita sa pagsalig kang Jehova, kinsa nagsaad sa paghatag ug ganti sa iyang matinumanong mga alagad ug hingpit nga kinabuhi diha sa Paraiso. Buhata kini pinaagi sa pagpahimulos sa kalihokan sa libreng panagtuon sa Bibliya diha sa balay nga gitanyag sa mga Saksi ni Jehova. (Juan 17:3) Sa sunod higayon nga makahibalag kamo kanila, nganong dili mangayog dugang mga impormasyon? O ikaw makasulat sa direksiyon nga duol nimo sumala nianang nalista sa panid 2 niining magasina. Kini takos gayod sa paningkamot, kay ang kataposan sa krimen karon haduol na!

[Hulagway sa panid 5]

Ang pagtuo ni Zaqueo mao ang nagpukaw kaniya sa pag-uli sa iyang natikas

[Hulagway sa panid 7]

Usa ka edukasyonal nga programa magtudlo sa mga sakop sa Gingharian sa Diyos nga mahimong masinundanon sa balaod