Ang Hunahuna sa Bibliya

Angay Bang Gamiton sa mga Kristohanon ang Rosaryohan?

“SI Maria ug ang Rosaryo mao ang labing maayong mga paagi sa pagduol sa Diyos nga Makagagahom sa Tanan diha sa pag-ampo.”​—Jean.

“Kon gikinahanglan mo ang tabang gikan kang Maria, kini labing epektibong maangkon pinaagi sa paggamit sa Rosaryohan. Ako dili gayod moadto sa bisan asa nga wala kini!”​—Kevin.

“Gitudloan kami nga kinahanglang ikaw moampo sa Diyos pinaagi kang Maria.”​—Jeannine, kanhing Katolikong madre.

May tinuod bang pasikaranan sa maong pagsalig sa Rosaryohan? Ang Diyos ba, si Kristo, o si Maria nagsugyot nga gamiton kini? Unsay ginasulti sa kasaysayan ug Sagradong Pulong sa Diyos bahin niini?

Ang kadaghanang tawo nga nagagamit sa Rosaryohan nagtuo nga ang batasan nagsugod sa Kristiyanidad. Ugaling, ang ebidensiya sa kasaysayan nagapadayag nga ang batasan sa paglitok sa mga pangadye ug pag-ihap niana sa tinuhog nga mga lusok nauna pa kay sa pagsugod sa Kristiyanidad. Sa pagkomento bahin sa kagikan sa Rosaryohan, ang The World Book Encyclopedia nagataho: “Ang mga rosaryohan may karaang sinugdanan, ug lagmit gigamit nga una sa mga Budhista. Ang mga Budhista ug mga Muslim nagagamit niana sa ilang mga pangadye.” Ang The Catholic Encyclopedia nagaila nga ang gituhog nga lobitos sinati sa tibuok nga kalibotan sa mga dili-Kristohanon sa kasiglohan ug dugay nang gigamit una sa paggamit sa Iglesya Katolika sa Rosaryohan.

Si Maria ug ang Rosaryo

Si Maria gitawag “Hara sa Balaang Rosaryo.” Siya gipasidunggan sa pagtambag sa mga Katoliko nga “Moampo sa Rosaryo.” Ang labing kasagarang Rosaryo, “Ang Rosaryo sa Bulahang Birhen Maria,” masubay ngadto sa ika-12ng siglo K.P. ug nakaabot sa tinong dagway niini sa ika-15ng siglo. Ang Rosaryo ug si Maria nagakuyog, sanglit siya gisabot ingong ang tigpasiugda sa Rosaryo ug ang usa nga gihatagan sa labing dakong bili sa pag-ampo.

Nganong gipasiugda sa bug-os si Maria ug ang Rosaryo? Sa pagtubag ang Katolikong mga awtoridad nagapunting sa giingon kaniya sa manulondang si Gabriel: “Paglipay, Oh inuyonan pag-ayong anak nga babaye! Ang Ginoo nagauban kanimo.” (Lucas 1:28, The New American Bible) Giila ni Maria nga ang iyang bahin sa pagsamkon ug pagkatawo ni Jesus, bisan pag importante, waybili ra kon itandi sa binayawng kahimtang nga madawat sa Anak nga iyang ipanamkon. Mahitungod kaniya, ang manulondang si Gabriel mipadayon sa pag-ingon: “Dako unya ang iyang kahalangdon ug siya pagatawgong Anak sa Labing Hataas. Ang Ginoong Diyos magahatag kaniya sa trono ni David nga iyang amahan. . . . Ang iyang pagmando maoy walay kataposan.”​—Lucas 1:32, 33, NAB.

Matikding ang pagtagad gitumong, dili kang Maria, kondili sa Anak nga iyang ipanamkon​—si Jesus. Siya mao ang usa nga mahimong dako ug magamando ingong Hari. (Filipos 2:9, 10) Walay gisulti bahin sa pagtudlo kang Maria ingong ang “Hara sa Balaang Rosaryo.” Hinuon, nadawat ni Maria ang panalangin; siya nahimong inahan ni Jesus.​—Lucas 1:42.

Si Maria dili ambisyosang babaye, nga nangitag pagkailado. Siya malipayon ug matagbawon nga mahimong mapaubsanong magsisimba sa Diyos nga Labing Hataas. Ang iyang maaghop, mapinasakopong kinaiya gipadayag sa iyang tubag ngadto sa manulondang si Gabriel sa miingon siya: “Ako ang sulugoon [alagad] sa Ginoo.” (Lucas 1:38, The Jerusalem Bible) Sa tibuok niyang kinabuhi, si Maria napamatud-ang usa ka sinserong babaye sa pagtuo, mahigugmaon sa pagkamatarong, usa ka maunongon ug matinumanong tinun-an ni Jesu-Kristo nga miduyog sa isigkamagsisimba sa mapaubsanong pag-ampo sa Diyos nga Makagagahom sa Tanan. Ang unang mga Kristohanon miampo kauban ni Maria, dili ngadto kaniya.​—Buhat 1:13, 14.

Pag-ampo ug ang Rosaryo

Ang mga Kristohanon nagaisip sa pag-ampo ingong labing bililhong tagana sa Maglalalang​—usa ka tinuod nga gasa nga pagamahalon pag-ayo. Ang pag-ampo maoy matinahorong pakigsulti sa Diyos nga Makagagahom sa Tanan. Kini angay magapasa sa atong kinahiladmang mga pagbati ug kinasingkasing nga mga hunahuna. “Ang pag-ampo angay nga usa ka pagpahayag sa pakighigala sa usa uban sa Diyos,” nagaingon ang New Catholic Encyclopedia. Ang paghangyo sa Diyos angay dili gayod mahimong waykahulogang rutina, ni angay nga kita mosunod nga mapig-oton sa paboritong hugpong sa sinag-ulong mga pulong.​—Mateo 6:7, 8.

Makaabag ba ang Rosaryo nianang punog-kahulogang mga pag-ampo? Si Jeannine miingon nga ang paglitok sa “Maghimaya Ka, Maria” sa Rosaryo “nahimong sa wala tuyoa sumaysumay.” Ang pagsumaysumay sa samang mga pulong sa Rosaryo wala magpasuod kaniya sa Diyos. Matud sa laing kanhing Katolikong madre, si Lydia: “Wala akoy nakitang matulon-anon sa pagpangadye sa Rosaryo. Palabihon ko pa ang pagbasag mga libro bahin sa relihiyon.” Ang gisumaysumay nga mga pag-ampo wala mag-alagad sa mapuslanong katuyoan, sanglit ang Diyos nagsaad: “Sa dili pa sila mosangpit, ako motubag na.” (Isaias 65:24, NAB; Mateo 6:7, 8, 32) Gipabilhan ug ginatubag sa Diyos nga Makagagahom sa Tanan ang mga hangyo nga gipamulong nga may matarong nga motibo ug nagagikan sa matinud-anon ug sinserong kasingkasing. Ang Rosaryo dili motabang sa usa ka tawo sa pagduol sa Diyos uban sa makahuloganon, kinasingkasing nga mga pag-ampo.​—Salmo 119:145; Hebreohanon 10:22.

Kon Unsaon Pagduol sa Diyos

Ang bugtong dalawatong paagi sa pag-abot sa “Tigdungog sa pag-ampo” maoy pinaagi kang Jesu-Kristo. (Salmo 65:2) Si Jesus yanong nagtudlo: “Ako mao ang Dalan, ang Kamatuoran ug ang Kinabuhi. Walay makaadto sa Amahan gawas nga pinaagi kanako.” (Juan 14:6, JB) Si Maria wala dapita sa pag-ambit sa maong responsabilidad ug pag-alagad nga tigpataliwala. Kon si Maria gihatagan pa niining linaing pribilehiyo, seguradong si Jehova nagpahibalo unta niana.​—Hebreohanon 4:14-16; 1 Juan 2:1, 2.

Ang Rosaryo ug ang paglitok sa sinag-ulong mga pag-ampo nagsugod sa gawas sa nag-angkong Kristohanong kayutaan. Ang pag-ampo kang Maria wala manumbaling sa gitudlo ni Jesus, nga “walay makaadto sa Amahan gawas nga pinaagi [kaniya].” Busa, ang Rosaryo ug si Maria dili mao ang paagi sa Diyos sa pagduol Kaniya diha sa pag-ampo.