Ang Hunahuna sa Bibliya
Tinuod Bang Adunay Yawa?
SA BATA ka pa, nahadlok ka ba sa ngitngit? Tingali gihanduraw nimo ang usa ka higante nga naghupo sa gawas sa inyong bentana, nga nagpaabot aron ikaw agawon gikan sa imong mga ginikanan. Karon nga hamtong ka na, nga makabasa sa matuod nga impormasyon ug makahunahuna sa makataronganong paagi, ang mga kahadlok sa bata ka pa maorag kataw-anan. “Busa,” nagaingon ang pila ka kritiko, “nganong dili moabanteg diyutay ug ibutang ang Yawa sa samang kategoriya—nga dili tinuod nga sama ra sa gihandurawng higante sa usa ka bata?”
Walay tinuod nga Yawa? Kana sa tukma maoy ginapasalig kanimo sa usa ka relihiyosong pulyeto: “Ang Bibliya walay nasayran nga usang hilabihan ka daotan” ug, “Sa mga pulong Yawa ug Satanas kita adunay . . . prinsipyo sa sala ug pagkadaotan nga kinaiyanhon sa tawo.” O sumala sa pagpahayag niini sa usa ka magtutudlog Sunday school sa Tinipong Bansa: “Ang mga tawo mao lamang ang mga yawa.” Mopatim-aw bang kini yano kaayo—tingali sobra ka yano?
Pagpatin-aw sa Kagawian sa Tawo
Kon kitang mga tawo mao lamang ang mga yawa, nan nganong halos kitang tanan nagapakitag kabalaka sa kaayohan sa atong pamilya? Pananglitan, ingong mga indibiduwal ang kadaghanang tawo nagataganag pagkaon sa ilang mga pamilya; sila dili tinuyong maghilo sa ilang kaugalingon, ug sila nagalikay sa mga kapeligrohan sa kinabuhi. Dili gayod kana yawan-on! Bisan pa niana, kon kining mga tawhana mismo molihok nga nagkahiusa ingong mga nasod, may mobabag sa ilang panglantaw sa ilang katibuk-ang kaayohan. Ingong mga nasod, pasagdan nilang madunot ang ilang pagkaon inay ipakaon sa gigutom nilang mga populasyon. Ginahugawan nila ang silinganan sa yuta. Sila nagasangkap sa hinagiban alang sa kalaglagan sa duha ka kiliran—ang gubat nukleyar. Katingad-an, molaglag-sa-kaugalingon nga kagawian!
Unsang impluwensiya ang hinungdan niining pagkadili-makakita diha sa tawhanong kagawian? Kaisipan sa panon? Pila ka pangulong walay salabotan? Tinong labaw pa ang nalangkit. Ang Bibliya lamang ang nagapaila sa usa nga “nagbuta sa mga hunahuna” sa dili-matinuohong tibuok-kalibotang “sistema sa mga butang.” Kinsa ba? “Ang usang gitawag Yawa ug Satanas, nga nagalimbong sa tibuok gipuy-ang yuta.” Siya nagamaneobra sa organisadong katawhan nga malamposon kaayo nga ang Bibliya nagatawag kaniya “ang Diyos” niining sistema sa kalibotan.—2 Corinto 4:4; Pinadayag 12:9.
Ang maong “diyos” dili higante nga nanuop sa gawas sa inyong bentana. Apan siya usa ka gamhanan mataktikong politiko, dili-makitang espiritung linalang, si kinsa, sa wala-molampos nga pagpuhal alang sa pag-unong ni Jesus, nakatanyag kang Jesus sa tanang gingharian sa kalibotan. (Lucas 4:6, 7) Dayag, si Satanas naghatag sa maong gahom ngadto sa uban una niya kana itanyag kang Jesus, kay ang basahong Daniel sa Bibliya nagapadayag nga ingong mga sinugo, ang rebeldeng mga anghel nagdawat ug awtoridad ibabaw sa mga imperyo sa kalibotan—uban ang opisyal nga mga titulo sama sa “prinsipe sa Persia,” ug “prinsipe sa Gresya.”—Daniel 10:20, 21.
Busa, si Satanas nakatukod ug dako kaayong organisasyon—ingong “punoan sa [makitang] kalibotan” ug “punoan sa [dili-makitang] mga demonyo.” (Juan 14:30; 16:11; Mateo 12:24) Ang maong pagsabot, nga ang Yawa maoy pangulo sa tibuok-kalibotang organisasyon, nagapatin-aw sa daghang butang.
Kon Nganong Siya Nagapangulo sa Usa ka Organisasyon
Sama rang ang usa ka pangulo sa organisadong krimen tingali magdumalag daghang supak-balaod nga kalihokan—mga droga, prostitusyon, pangawat, sugal, pagpangyuhot, ug uban pa—nga walay pagpadayag sa personal ngadto sa tanan niyang batabata, si Satanas nagagamit usab sa usa ka organisasyon aron gamhan ang mas daghang tawo kay sa iyang magamhan sa kaugalingon. Iyang taktiko? Gawas sa paghasi sa mga tawo, siya ug ang mga demonyo nagaisip sa mga pundok sa katawhan nga samag usa ka panon sa baka. Dili kinahanglang tultolan ang matag usa sa personal. Yanong palikoa ang pipila nga anaa sa unahan sa panon, ug ang kinabag-an mosunod. Unya ihatag ang bug-os nga panahon ngadto sa mga nahisalaag.
Oo, ang Yawa tinuod gayod, apan ang iyang tinuod nga ilhanan dili kaamgid sa karitura nga makita nato sa mga karton o sa lubog nga mga teoriya sa mga teologo. Lubog? Oo, sumala sa ginaingon sa librong Satan, A Portrait: “Ang pagtuo kang Satanas nahimong dili kaayo kusog” sa ika-19ng siglo, ug ang mga teologo “naningkamot sa pagpatin-aw nga si Satanas dili usa ka personal nga espiritung linalang.”
Kinsay Nagasulti sa Tinuod Mahitungod sa Yawa?
Ang kadaling moduda sa modernong mga relihiyon sa ginaingon sa Bibliya bahin sa Yawa nagapahiuyon sa materyalistikong katilingban nga wala makapiho bahin sa Diyos mismo. “Karong adlawa,” matud ni Ruth Ansher diha sa iyang librong The Reality of the Devil, “ang Yawa nahanaw na ug . . . ang Diyos mismo nahiatras ngadto sa kadaplinan.”
Pinaagi sa pagduda sa hunahuna sa Bibliya, ang moderno relihiyosong “mga eksperto” wala manumbaling sa usa ka kamatuoran nga nagabutang sa kasaysayan sa hustong panan-aw. Sumala sa gidawat sa Romanianong magsusulat ug dula si Eugène Ionesco ngadto sa usa ka Alemang mantalaan: “Ang kasaysayan mahimong dili masabtan kon atong ipagawas ang demonyo.”—Welt am Sonntag, Septiyembre 2, 1979.
Aduna bay may kaisog sa pagtuboy sa kamatuoran mahitungod sa papel sa Yawa sa krisis sa kalibotan karong adlawa? Tin-aw, oo! Palandonga ang “Deklarasyon Batok Kang Satanas ug Dapig Kang Jehova” nga gikahiusahan sa pagsagop sa usa ka kombensiyon niadtong 1928. Gisaad niadto ang mga Saksi ni Jehova sa pagmantala, samag usa ka singgit sa gubat batok sa kaaway sa tawo, si Satanas, nga ang dakong umaabot nga gubat sa Armageddon duol nang mopukgo kang Satanas ug sa iyang daotang organisasyon.
Sa pagkamatuod, ang kasaysayan nagapamatuod nga ang Yawa maoy usa ka tinuod nga kaaway sa matag usa kanato. Apan, tin-aw, si Jehova nga Diyos wala magpasagad kanato. Nganong dili makakat-on sa dugang pa? Maayo nga ilhon ang atong kaaway, “aron kita dili hiapsan ni Satanas, kay kita dili kay walay alamag sa iyang mga laraw.”—2 Corinto 2:11.
[Blurb sa panid 13]
“Karong adlawa ang Yawa nahanaw na ug . . . ang Diyos mismo nahiatras ngadto sa kadaplinan.”
[Hulagway sa panid 12]
Ang tinuod nga Yawa dili kaamgid sa relihiyosong mga hulagway o sa lubog nga mga teoriya sa mga teologo
[Credit Line]
Gustave Doré