Ang Bulawanong Lagda—Unsa ba Kini?

“TAN-AWA! Wala ako magsamok sa akong mga silingan. Alang kanako, makabuhat sila kon unsay gusto nila. Hinuon, kon sila may suliran, buhaton ko ang akong maarangan sa pagtabang.” Kana ba ang imong hunahuna? Inighapak sa mga katalagman, tingali modaghan ang mga buhat nga maluluton ug kadili-mahakogon, nga kasagaran makapahingangha sa daghan. Apan igo na ba kini?

Kon ikaw usa ka ginikanan, pihong gimaymayan nimo ang imong mga anak sa paglikay sa paghagit sa ilang mga klasmet. Daghan kanato ang may mga ulat sukad sa atong pagkabata sa pagpakita nga ang dili pagpakabana sa maong lagda may balos. Oo, nakat-onan nato ang kaalam sa panultihon nga gihan-ay sa Sidlakanhong pilosopo si Confucius: “Ang dili ninyo buot nga buhaton kaninyo, ayaw pagbuhata sa uban.” Bisan pa niana, nakaamgo ka ba nga kini menos, negatibong bersiyon sa nailhang Bulawanong Lagda?

Usa ka Positibong Lagda

Sumala sa Webster’s New Collegiate Dictionary, ang “bulawanong lagda” gibatbat ingong “usa ka lagda sa pamatasan nga nagatumong sa [Mateo] 7:12 ug [Lucas] 6:31 ug nagaingon nga ang usa angay magbuhat ngadto sa uban kon unsay buot niyang buhaton sa uban kaniya.” Tan-awa ang kahon sa ilalom sa panid ug tagda sa unsang paagi ang lainlaing bersiyon sa Bibliya sa Mateo kapitulo 7, bersikulo 12 nagapasidlak niining giya nga prinsipyo.

Palihog matikdi nga bisan pag ang mga pulong nagkalahi gikan sa usa ngadto sa laing bersiyon, ang lagda maoy positibo. Kon buot sabton, sumala sa gipangatarongan ni Jesus diha sa Wali sa Bukid: “Magpadayon kamo sa pagpangayo, ug kana igahatag kaninyo; magpadayon kamo sa pagpangita, ug kamo makakaplag; magpadayon kamo sa pagtuktok, ug kamo pagaablihan. Kay ang matag usa nga magapangayo makadawat, ug ang matag usa nga magapangita makakaplag, ug ang matag usa nga magatuktok pagaablihan.” (Mateo 7:7, 8) Ang pagpangayo, pagpangita, pagpanuktok, ngatanan maoy positibong mga lihok. “Busa, ang tanang butang,” mipadayon si Jesus, “nga buot ninyo nga pagabuhaton sa mga tawo kaninyo, buhata usab ninyo ngadto kanila.”​—Mateo 7:12.

Ginapakita sa Bibliya nga gipasiugda usab sa mga tinun-an ni Jesus ang pagsunod niining samang lagda diha sa kinabuhi. (Roma 15:2; 1 Pedro 3:11; 3 Juan 11) Hinuon, ikasubo, ang kahimtang karon sa tawhanong mga relasyon nagapamatuod nga, sa katibuk-an, ang katawhan, bisan kon sa ngalan Kristohanon o dili, wala magasunod niini. Nagkahulogan ba kini nga kining lagdaa sa pamatasan dili na angay? Kini ba kaha kinaraan na?

[Kahon sa panid 3]

“Buhati ninyo ang ubang tawo sa tanan nga buot ninyong pagabuhaton nila kaninyo.”—The Holy Bible, gihubad ni R. A. Knox.

“Tagda ninyo ang ubang tawo sama gayod sa buot ninyo nga kamo pagatagdon.”—The New Testament in Modern English, ni J. B. Phillips.

“Bisan unsay buot ninyo nga buhaton sa uban nganha ug alang kaninyo, buhata usab ninyo ngadto ug alang kanila.”—The Amplified New Testament.

“Buhati ninyo ang uban sa tanang butang buot ninyong buhaton nila alang kaninyo.”—The New Testament in the Language of Today, ni W. E. Beck.

“Nan, sa tanang bahin, tagda ninyo ang inyong isigkatawo sumala sa buot ninyo nga kamo pagatagdon.”—The Four Gospels, gihubad ni E. V. Rieu.

“Batasana ninyo ang pagtagad sa uban sumala sa buot ninyo nga kamo pagatagdon.”—The New Testament, ni C. B. Williams.