Mga Pangutana Gikan sa mga Magbabasa

Si Maria nga nahimong inahan ni Jesus nagsabak na ba sa dihang siya miduaw sa iyang paryente nga si Elisabet?

Oo, siya sa walay duhaduha nagsabak.

Sa Lucas kapitulo 1, atong unang mabasa ang bahin sa pagsabak ni Elisabet, ang asawa sa saserdote nga si Zacarias, nga nanganak kang Juan (ang Bawtista). Sa dihang si Elisabet ‘diha sa iyang ikaunom nga bulan ang manulonda nga si Gabriel’ miduaw kang Maria sa pagpahibalo kaniya nga siya magsabak ug manganak ug “Anak nga lalaki sa Labing Hataas.” (Lucas 1:26, 30-33) Apan kanus-a nagsabak si Maria?

Ang rekord ni Lucas nagpadayon sa pag-asoy nga si Maria human niana mibiyahe ngadto sa Juda sa pagduaw sa iyang nagsabak nga paryente nga si Elisabet. Sa nagkita ang duha ka babaye, ang bata sa tagoangkan ni Elisabet [si Juan] miulpot. Gihisgotan ni Elisabet ang ‘bunga sa tagoangkan ni Maria,’ ug gitawag si Maria “ang inahan sa akong Ginoo.” (Lucas 1:39-44) Busa ang makataronganong konklusyon mao nga si Maria nanamkon na, nga siya nagsabak na sa dihang siya miduaw sa pagpakigkita kang Elisabet.

Ang Lucas 1:56 mabasa: “Unya mipabilin si Maria uban kaniya ug mga tulo ka bulan, ug mibalik ngadto sa iyang kaugalingong balay.” Kining bersikuloha wala maghatag ug tino nga kalkulasyon sa eksaktong adlaw sa kalendaryo. Kini nag-ingon nga “mga tulo ka bulan,” nga nagbutang kang Elisabet sa iyang ikanuybeng bulan sa pagsabak.

Human nagtabangtabang kang Elisabet panahon sa ulahing bahin sa iyang pagmabdos, si Maria mipauli sa iyang balay sa Nasaret. Malagmit si Maria nakaamgo nga sa dihang manganak si Elisabet (kang Juan), tingalig mangabot ang daghang bisita, ang pipila kanila basin mga paryente pa. Kana mahimong bakikaw o makauulaw alang sa usa ka dili minyong batan-ong dalaga kinsa mabdos mismo. Pila na ka bulan nga mabdos si Maria sa dihang siya mipauli sa Nasaret? Sanglit siya uban ni Elisabet sa “mga tulo ka bulan,” si Maria lagmit anaa na sa hinapos sa tulo ka bulan o sayo sa ikaupat ka bulan sa iyang pagmabdos sa dihang siya mipauli sa Nasaret.