Nganong Higugmaon ang Imong Silingan?

ANG kinabuhing walay kataposan nagadepende sa atong paghigugma sa Diyos ug sa silingan. Kanang puntoha gihimo diha sa usa ka kokabildo nga nahitabo hapit 2,000 ka tuig kanhi.

Gipangutana sa usa ka lalaking Hudiyo nga batid sa Moisesnong Kasugoan si Jesu-Kristo: “Unsa may akong buhaton aron makapanunod ako sa kinabuhing walay kataposan?” Si Jesus mitubag: “Unsa may nahisulat sa Kasugoan? Unsa may imong nabasa?” Gikutlo ang Kasugoan, ang tawo miingon: “‘Higugmaa si Jehova nga imong Diyos sa tibuok mong kasingkasing ug sa tibuok mong kalag ug sa tibuok mong kusog ug sa tibuok mong hunahuna,’ ug, ‘ang imong silingan sama sa imong kaugalingon.’” “Husto ang imong tubag,” miingon si Jesus. “Padayon sa pagbuhat niini ug ikaw makabaton ug kinabuhi.”​—Lucas 10:25-28.

Niana, ang nangutana kang Jesus misukna: “Kinsa man gayod ang akong silingan?” Imbes tubagon nga direkta, miasoy si Jesus ug usa ka mahulagwayong sugilanon bahin sa usa ka tawong Hudiyo nga gikawatan, gibunalan, ug gibiyaan nga himalatyon. Miabot ang duha ka Hudiyo​—una usa ka saserdote ug unya usa ka Levihanon. Silang duha nakakita sa kahimtang sa ilang isigka Hudiyo apan walay gihimo sa pagtabang kaniya. Usa ka Samarianhon ang sunod nga miagi. Giabot ug kaluoy, iyang gibugkosan ang mga samad sa nasamdang Hudiyo, gidala siya sa usa ka balay nga abotanan, ug mitagana alang sa iyang dugang nga pag-atiman.

Gisukna ni Jesus ang nangutana kaniya: “Kinsa niining tulo ang nagpakita nga silingan sa tawo nga nahulog sa mga kamot sa mga tulisan?” Dayag, ang maluluy-ong Samarianhon. Si Jesus sa ingon nagpakita nga ang tinuod nga gugma sa silingan dili magpakitag pagpihig sa laing rasa.​—Lucas 10:29-37.

Kakulang sa Gugma sa Silingan

Karong adlawa nagtubo ang pagdumtanay taliwala sa mga tawo sa nagkalainlaing pundok sa rasa. Pananglitan, gilamba sa mga sakop nga misagop sa mga ideolohiya sa Nazi sa Alemanya karong bag-o ang usa ka tawo ug gitamaktamakan siya sa ilang bug-at nga botas, halos nangabali ang tanan niyang mga gusok. Unya ilang gibuboan siya ug isog kaayong alkoholikong ilimnon ug giduslitan. Ang tawo nga gipasagdang mamatay giatake tungod kay siya gituohan nga usa ka Hudiyo. Diha sa usa ka lahi nga hitabo, usa ka balay duol sa Hamburg gibombahan, nasunog ang tulo ka tawo nga Turko ug kaliwat​—ang usa kanila maoy diyes-anyos nga batang babaye.

Sa Balkan ug sa halayong silangan, libolibo ang nangamatay sa mga gubat sa rasa. Ang uban nangamatay sa mga panagbangi sa mga tawo nga lahi ug kagikan sa Bangladesh, India, ug Pakistan. Ug sa Aprika, ang tribonhon ug rasanhong mga panag-away nakapatay sa mga kinabuhi sa uban pa.

Ang kadaghanang tawo nakurat sa maong kapintasan ug dili gayod mobuhat ug bisan unsa sa pagdaot sa ilang silingan. Gani, gihukman sa dagkong mga demonstrasyon sa Alemanya ang kapintasan sa rasa didto. Bisan pa, ang The New Encyclopædia Britannica nag-ingon: “Ang mga sakop sa hapit tanang mga kultura nag-isip sa ilang kaugalingong paagi sa kinabuhi nga mas labaw bisan sa duol kaayong mga silingan.” Kining kaisipana nakababag sa paghigugma sa silingan. Aduna bay mahimo bahin niini, ilabina nga miingon si Jesus nga ang kinabuhi nagadepende sa paghigugma sa Diyos ug sa silingan?

[Picture Credit Line sa panid 3]

The Good Samaritan/The Doré Bible Illustrations/Dover Publications, Inc.