Mga Pangutana Gikan sa mga Magbabasa

◼ Sa Juan 6:53, nagpunting ba si Jesus sa dinihogang mga Kristohanon sa miingon siya: “Sa pagkatinuod magaingon ako kaninyo, Gawas kon mokaon kamo sa unod sa Anak sa tawo ug moinom sa iyang dugo, kamo walay kinabuhi diha sa inyong kaugalingon”?

Sa daghang katuigan among gibatbat kining mga pulonga nga limitado lamang ngadto sa dinihogang mga Kristohanon nga pagadalhon sa langit sa pagmando uban kang Jesu-Kristo. Apan, ang dugang nga pagtuon niining butanga nagpakitag mas halapad nga aplikasyon sa Juan 6:53.

Sa nangaging katuigan atong gihunahuna kining tekstoha sumala sa kahayag sa ubang mga bersikulo nga adunay samang mga ekspresyon. Pananglitan, ang mga pulong pagbaton ug “kinabuhi diha sa inyong kaugalingon” kaamgid sa mga pulong ni Jesus sa Juan 5:26, nga ekslusibong naghisgot bahin kang Jehova ug kang Jesus. Apan, sumala sa gipatin-aw sa panid 11 ug 12, ang konteksto sa Juan 5:26 nahimong basehanan sa pagsabot sa mga pulong ‘pagbaton ug kinabuhi diha sa iyang kaugalingon’ nianang bersikuloha. Apan gipamulong ang Juan 6:53 sa milabay ang usa ka tuig ug adunay lahi nga konteksto.

Laing impluwensiya sa atong unang panghunahuna sa Juan 6:53 mao ang komento ni Jesus bahin sa ‘pagkaon sa iyang unod ug sa pag-inom sa iyang dugo.’ Kini may kaamgiran sa gipamulong ni Kristo sa iyang gisugdan ang Panihapon sa Ginoo. Sa gisugdan kana, naghisgot siya bahin sa iyang unod ug dugo, ug iyang gipasabot kanang mga emblema (walay lebadorang tinapay ug bino) nga pagaambitan sa iyang mga sumusunod nga agakon ngadto sa bag-ong pakigtugon ug ngadto sa usa ka pakigtugon sa usa ka gingharian. (Lucas 22:14-22, 28-30) Apan, sa makausa pa, kinahanglang pabilhan ang konteksto sa Juan 6:53.

Sa gipamulong ni Jesus kanang natala sa Juan 6:53, ang iyang pagsugod sa Panihapon sa Ginoo halayo pag usa ka tuig. Walay usa sa nakadungog kang Jesus ang may ideya bahin sa tinuig nga pagsaulog sa literal nga mga emblema nga nagasimbolo sa unod ug dugo ni Kristo. Hinunoa, ang tema ni Jesus, o pangatarongan, sa Juan kapitulo 6 may kalabotan sa iyang unod nga ikatandi sa mana. Hinunoa, adunay kalainan. Ang iyang unod (ug, siya mdugang, ang iyang dugo) mas dako kay sa literal nga mana sa pagkaagi nga ang iyang unod gihalad alang sa kinabuhi sa kalibotan, nga nakapaposible nga maangkon ang kinabuhing walay kataposan.​—Juan 6:48-51.

Busa, ang dugang pagtuki nakahatag karong bag-o ug katin-awan nga adunay kal-ang sa panahon nga usa ka tuig sumala sa mga pulong ni Jesus sa Juan 5:26 ug sa iyang mga komento sa Juan kapitulo 6; ug dayon miagi ang laing usa ka tuig sa wala pa niya sugdi ang Panihapon sa Ginoo. Dugang kabug-at ang gikahatag usab, sa konteksto sa Juan 6:53. Busa, ang artikulo sa mga panid 10-20 naghatag ug mas halapad nga aplikasyon sa Juan 6:53, lakip niadtong agakon ngadto sa bag-ong pakigtugon sa langitnong kinabuhi ug niadtong adunay palaabutong kinabuhing walay kataposan sa paraisong yuta.

◼ Ang mga asoy sa Ebanghelyo ug mga reperensiyang basahon daw nagkalahi kon bahin sa panahon sa pagkaon ni Jesus sa balay ni Simon nga sanlahon sa Betania ug sa gidihogan sa mahumot nga lana. Kanus-a man kini nahitabo?

Mopatim-aw nga kining mga hitaboa nahitabo sa Nisan 9 (Hudiyohanong kalendaryo) sa 33 K.P. Apan sumala sa makita sa ubos sa mga katarongan niini nga konklusyon, imong makita kon nganong ang padayong pagtuon sa Pulong sa Diyos mohatag ug kauswagan sa imong kahibalo ug pagsabot.

Ang mga detalye niini nga kombira gipakita sa tulo sa upat ka Ebanghelyo. (Mateo 26:6-13; Marcos 14:3-9; Juan 12:2-8) Gihisgotan ni Mateo ug Marcos kanang kombiraha tapos naghisgot bahin sa madaogong pagsakay ni Jesus ngadto sa Jerusalem, sa iyang pagtunglo sa wala mamungang kahoyng igira, ug sa iyang tubag sa pangutana sa apostoles bahin sa konklusyon sa sistema sa mga butang. Gisundan ni Mateo ug Marcos ang asoy sa kombira sa pakigsabot ni Judas sa mga lider sa Hudiyo sa pagbudhi kang Jesus. Ang pagkabutang sa pagkaon niining duha ka asoy nagsugyot nga nahitabo kini sa Nisan 12, duha ka adlaw sa wala pa budhii ug gipatay si Jesus sa Nisan 14. Busa gipetsahan ang piyesta sa Nisan 12 diha sa daghang tsart nga nagpakita sa mga hitabo sa kinabuhi ni Jesus, lakip sa pila sa atong nangaging mga publikasyon.

Sa Juan kapitulo 12 ang pangaon sa balay ni Simon gihatagag lahi nga sirkumstansiya. Ang Juan 12:1 nagtaho nga miabot si Jesus sa Betania duol sa Jerusalem “unom ka adlaw sa wala pa ang paskua,” nga mao ang Nisan 8. Dayon ang mga bersikulo 2-8 nag-asoy sa panihapon sa gabii sa Betania, ug ang mga bersikulo 9-11 nagsugilon kanato nga ang mga Hudiyo nga nakadungog nga nagsingabot na si Jesus migula sa pagtagbo kaniya. Ang mga bersikulo 12-15 nag-ingon nga sa “pagkasunod adlaw” madaogong misulod si Kristo sa Jerusalem. (Itandi sa Buhat 20:7-11.) Busa, ang Juan 12:1-15 nagpakita nga ang panihapon sa balay ni Simon nahitabo sa gabii sa Nisan 9, nga sumala sa kalendaryong Hudiyohanon timan-an sa pagsugod sa bag-ong adlaw, nga sundan ug bahin sa kahayag nianang adlawa (Nisan 9) sa pagsulod ni Jesus sa Jerusalem.

Niining duha ka posibilidad, mas bug-at ang ikaduha. Ngano? Buweno, atong itandi ang mga asoy ug ang ilang konteksto. Si Mateo ug si Marcos wala maghatag ug petsa sa kombira sa balay ni Simon. Apan, sila hinunoa, nagpakita nga diha nianang kombiraha mibangon ang reklamo sa paggamit ni Maria ug mahalong pahumot, ang reklamo nga gipahayag ni Juan gipangunahan sa hakog nga Judas. (Mateo 26:8, 9; Marcos 14:4, 5; Juan 12:4-6) Sumala sa atong nasayran, gisundan ni Mateo ug Marcos ang asoy sa kombira pinaagi sa pagduol ni Judas sa mga saserdote sa pagsusi kon pilay ibayad sa pagbudhi kang Kristo. Mahimong gihisgotan ni Mateo ug Marcos ang asoy sa kombira sa sumala mga katarongan sa tema, nga gilangkit ang usa ka ebidensiya sa kahakog ni Judas uban sa bug-os nga pagpasundayag niana.

Apan, si Juan, mihatag ug espisipikong petsa sa kombira, nagpakita nga naghisgot siya niini sa kronolohikal nga paagi. Nakalig-on kini sa konklusyon nga ang panihapon sa balay ni Simon gisundan sa pag-abot ni Jesus sa Betania sa Nisan 8, 33 K.P. Dugang pa, hinumdomi ang impormasyon ni Juan nga ang mga Hudiyo nga ‘nakahibalo nga si Jesus karon miabot na sa Betania’ gikan sa Jerusalem sa pakigkita kaniya ug kang Lazaro, nga nagpuyo usab sa Betania ug kansang mga igsoon diha sa kombira. Kining pagduaw sa mga Hudiyo nga bag-o pang “nakahibalo” nga miabot na si Jesus sa Betania hayan nahitabo sa wala pa siya mosulod sa Jerusalem, ug hayan tungod kini sa mainitong pagdawat kang Kristo sa iyang pagsakay sa siyudad “sa pagkasunod adlaw,” sa mahayag nga adlaw sa Nisan 9.

Ang dugang mainampingong pagtuki nga mitultol niini nga konklusyon napabanaag sa bag-ong mga pinatik nga tsart sa “Pangunang mga Hitabo sa Yutan-ong Kinabuhi ni Jesus,” sama sa 1985 nga edisyon sa Kingdom Interlinear Translation of the Greek Scriptures. Bisan pag daw gamay lang kaayo kini, nga usa ka teknikal nga punto, kini nagpakita kon sa unsang paagi kitang tanan makapadayon sa pagtubo sa kahibalo ug pagsabot sa maayong mga detalye sa Pulong sa Diyos.