Kinabuhi ug Ministeryo ni Jesus

Diha sa Betania, sa Balay ni Simon

SA DIHANG migikan si Jesus sa Jerico, siya mipaingon sa Betania. Ang biyahe mokabat ug hapit usa ka adlaw, sanglit tungason kini diha sa bukiron nga dapit nga mga 19 ka kilometro. Ang Jerico maoy 250 ka metros ubos sa lebel sa dagat, ug ang Betania maoy duolan sa 760 ka metros sa ibabaw sa lebel sa dagat. Diha sa Betania, tingali mahinumdoman nimo, mao ang balay ni Lazaro ug sa iyang mga igsoong babaye. Ang gamay nga balangay maoy 3 ka kilometros gikan sa Jerusalem, nga nahimutang sa sidlakang bakilid sa Bukid sa mga Olibo.

Daghan na ang miabot sa Jerusalem alang sa Paskua. Sila sayo nga miabot aron sa paghinlo sa ilang kaugalingon sa seremonyal nga paagi. Tingali sila nakahikap ug patayng lawas o nakahimog butang nga nakapahugaw kanila. Busa ilang gisunod ang mga paagi sa paghinlo sa ilang kaugalingon aron tukma nga masaulog ang Paskua. Samtang kining mga tawo nga sayong nangabot nagtigom sa templo, daghan ang nagbanabana kon moabot ba si Jesus sa Paskua.

Ang Jerusalem maoy mainit nga lugar sa panaglantugi bahin kang Jesus. Nahibaloan sa tanan nga gusto siyang dakpon sa relihiyosong mga lider aron patyon siya. Sa pagkamatuod, sila mihatag ug mga sugo kon dunay mahibalo kon hain siya, kinahanglan ilang ireport kini ngadto kanila. Tulo ka higayon sa mga bulan nga dili pa dugay​—sa Piyesta sa mga Tabernakulo, sa Piyesta sa Dedikasyon, ug human nga iyang gibanhaw si Lazaro​—kining maong mga pangulo misulay sa pagpatay kaniya. Busa, ang mga tawo nahibulong, iladlad ba ni Jesus ang iyang kaugalingon sa laing panahon? “Unsay imong hunahuna?” sila nangutana sa usa ug usa. “Nga siya dili moanhi sa piyesta?”

Kasamtangan, si Jesus miabot sa Betania nga unom ka adlaw sa wala pa ang Paskua, nga nahulog sa Nisan 14 sumala sa kalendaryo sa mga Hudiyo. Miabot si Jesus sa Betania sa mga Biyernes sa gabii, nga sa maong panahon maoy sinugdanan sa Nisan 8. Dili mahimong mobiyahe sila sa Betania sa Sabado tungod kay ang pagbiyahe sa Adlaw nga Igpapahulay​—gikan sa pagsalop sa Biyernes ngadto sa pagsalop sa Sabado​—gidili sa Hudiyohanong balaod. Tingali si Jesus miadto sa balay ni Lazaro, sama sa iyang gihimo sa miagi, ug didto nagpalabay sa Biyernes sa gabii.

Apan, gidapit sa laing molupyo sa Betania si Jesus ug ang iyang mga kauban sa panihapon sa Sabado sa gabii. Ang tawo mao si Simon, nga niadto sanlahon, kinsa sayo pa niana tingali giayo ni Jesus. Usa si Lazaro nga mitambong sa lamesa tapad kang Jesus. Sanglit kay kugihan ug kinaiya, gisilbihan ni Marta ang mga dinapit. Apan, sa kinaiyanhon, si Maria mapatalinghogon kang Jesus, niining higayona diha sa usa ka paagi nga nakapukaw ug panaglantugi.

Gibuksan ni Maria ang alabastro o botelya, nga dunay sulod nga mga 0.5 ka kilogramong pahumot, “lunsay nga nardo.” Mahal kaayo kini. Sa pagkamatuod, ang kantidad niini motumbas hapit usa ka tuig nga suweldo! Sa dihang gibubo ni Maria ang pahumot diha sa ulo ni Jesus ug sa iyang tiil ug gipahiran ang iyang tiil sa buhok niya, ang humot nga alimyon mipuno sa tibuok balay.

Ang mga disipulo nasuko ug nangutana: “Nganong giusikan kini?” Unya si Judas Iscariote miingon: “Nganong kining pahumot wala man hinoon ibaligyag tulo ka gatos ka denario ug ang halin ihatag sa mga tawong kabus?” Apan si Judas sa pagkatinuod wala gayod mabalaka sa kabus, kay siya nagapangawat man gikan sa panudlanan sa kuwarta nga gitipigan sa mga disipulo.

Gidepensahan ni Jesus si Maria. “Pasagdi ninyo siya,” si Jesus misugo. “Nganong samokon pa man ninyo siya? Usa ka maayong buhat kining iyang gihimo kanako. Kay ang kabus kanunayng anaa kaninyo, ug sa bisan unsang takna nga gusto ninyo, kamo kanunay makabuhat kanila ug maayo, apan ako dili kanunayng anaa kaninyo. Sa iyang pagbubo niining pahumot dinhi sa akong lawas; gihimo niya kini aron sa pag-andam kanako alang sa lubong. Sa pagkatinuod magaingon ako kaninyo, Nga bisan diin ang maayong balita igawali sa tibuok kalibotan, ang gibuhat niining babayehana pagahisgotan usab ingon nga handomanan alang kaniya.”

Si Jesus karon nakapalabay na ug kapin sa 24 oras sa Betania, ug ang pulong bahin sa iyang pagkaatua didto mikaylap. Busa, daghan ang miadto sa balay ni Simon sa pagtan-aw kang Jesus, ug sila miadto usab aron sa pagtan-aw kang Lazaro. Busa ang pangulo sa mga saserdote nagsugo sa pagpatay dili lamang kang Jesus kondili kang Lazaro usab. Tungod kini kay daghan na ang mituo kang Jesus tungod sa pagkakita nga buhi ang tawo nga iyang gibanhaw gikan sa patay! Matin-aw, pagkagrabe sa pagkadaotan niining relihiyosong mga pangulo! Juan 11:55–12:11; Mateo 26:6-13; Marcos 14:3-9; Buhat 1:12.

◆ Kanus-a miabot si Jesus sa Betania, ug malagmit diin siya mipalabay sa Adlawng Igpapahulay?

◆ Unsa ang gihisgotan diha sa templo, ug ngano?

◆ Unsang buhat ni Maria ang nakapukaw ug panaglantugi, ug sa unsang paagi gidepensahan siya ni Jesus?

◆ Unsay nagailustrar sa grabeng pagkadaotan sa pangulong mga saserdote?