NARDO

[Heb., nerd; Gr., narʹdos].

Usa ka gamayng humot nga tanom (Nardostachys jatamansi) nga makaplagan sa Kabukiran sa Himalaya. Ang mga lindog ug mga gamot niini nga tanom sagad giisip nga tinubdan sa nardo nga gihisgotan sa Kasulatan. (Aw 1:12; 4:​13, 14; Mar 14:3) Ang tanom nga nardo mailhan tungod sa itom nga nagpungpong, balhiboon nga mga lindog niini, nga mga 5 sm (2 pul.) ang gitas-on, nga mosubol sa ibabaw sa gamot. Ang mga dahon mogitib gikan sa ibabawng bahin sa tanom, nga ang mga tumoy niini adunay mga bulak nga rosason ug kolor.

Aron mapreserbar ang kahumot niini, ang nardo, nga usa ka dili-isog, humot, pulahon ug kolor nga likido, isulod nga selyado diha sa mga sudlanang alabastro, usa ka humokon, sagad pution, samag-marmol nga bato nga ang ngalan naggikan sa Alabastron, Ehipto, diin gihimo ang mga sudlanan ginamit kini nga bato. Ang mahalon nga pahumot nga gisulod nga selyado diha sa usa ka gamayng sudlanan nga alabastro kanhi maoy usa na ka maayong manggad. (Ju 12:5) Ang usa ka libra nga pinahumotan nga lana, “lunsay nga nardo,” nga gibubo ni Maria gikan sa usa ka sudlanang alabastro diha sa ulo ug tiil ni Jesu-Kristo, ‘alang sa iyang paglubong,’ gibanabana nga mikabat ug 300 ka denario, nga katumbas sa mga usa ka tuig nga suweldo. (Mar 14:3-9; Ju 12:3-8; Mat 20:2) Sanglit kini nga lana mahal kaayo, gituohan nga ang tinubdan niini lagmit mao ang halayong India. Tungod sa kamahal niini, ang nardo sagad gisagolan ug laing sambog ug gani gihimong mini. Busa, angayng matikdan nga si Marcos ug Juan parehong migamit sa ekspresyong “lunsay nga nardo.”