Atong Mahimo ang Labaw nga mga Buhat
1 Ang dagkong mga buhat nagpaila sa ministeryo ni Jesu-Kristo. Milagroso niyang gipakaon ang linibo, giayo ang daghan, ug gibanhaw ang pipila gikan sa patay. (Mat. 8:1-17; 14:14-21; Juan 11:38-44) Ang iyang kalihokan nakakuha sa pagtagad sa tibuok nasod. Apan, sa kataposang gabii una pa sa iyang kamatayon, iyang giingnan ang iyang matinumanong mga sumusunod: “Siya nga nagapasundayag ug pagtuo kanako, kana siya usab mohimo sa mga buhat nga akong ginahimo; ug siya mohimog mga buhat nga labaw pa niini.” (Juan 14:12) Sa unsang paagi kita makahimo ug “labaw” nga mga buhat?
2 Pinaagig Pagkobre ug Dugang Teritoryo: Ang gidak-on sa kalihokan ni Jesus limitado sa Palestina, apan ang iyang unang mga tinun-an giingnan sa pagsangyaw “ngadto sa kinalay-ang dapit sa yuta,” saylo pa gayod diin si Jesus mismo nagsangyaw. (Buh. 1:8) Ang buluhatong pagsangyaw nga iyang gisugdan milukop na karon sa tibuok kalibotan, nga nagkobre sa 232 ka kayutaan. (Mat. 24:14) Nakig-ambit ka ba sa bug-os sa pagkobre sa teritoryo nga natudlo sa inyong kongregasyon?
3 Pinaagig Pag-abot sa Dugang mga Tawo: Si Jesus nagbilin ug pipila ra ka mga tinun-an aron ipadayon ang buluhatong pagsangyaw. Apan, ingong resulta sa ilang masibotong pagsangyaw sa Pentekostes 33 K.P., kadtong misagop sa kamatuoran ug nabawtismohan niadtong adlawa mikabat ug mga tulo ka libo ka kalag. (Buh. 2:1-11, 37-41) Ang pagpanigom niadtong “sa husto nahimutang alang sa kinabuhing walay-kataposan” nagpadayon sa atong panahon, sa dihang kita nagapamawtismo sa aberids nga kapin sa 1,000 kada adlaw. (Buh. 13:48) Ginahimo ba nimo ang imong tanang maarangan sa pag-abot sa matinud-anog kasingkasing nga mga tawo sa bisan diin nga sila makaplagan ug sa pagpaloap sa interes sa labing madaling panahong maarangan?
4 Pinaagig Pagsangyaw nga Mas Dugay: Ang yutan-ong ministeryo ni Jesus limitado sa tulo ug tunga ka tuig. Ang kadaghanan kanato nagsangyaw na nga mas dugay pa kay niana. Walay sapayan kon hangtod kanus-a nga kita tugotan sa pagpadayon niining buluhatona, kita mapasalamaton sa pagtabang sa matag bag-ong tinun-an nga makasugod pagsubay sa dalan nga motultol sa kinabuhi. (Mat. 7:14) Daghan ka ba ug ginahimo sa matag bulan diha sa buluhaton sa Ginoo?—1 Cor. 15:58.
5 Kita makapabiling masaligon nga uban sa pagpaluyo ni Jesus kanato, kita makahimo gihapon ug labaw nga mga buhat ingon nga iyang tinuod nga mga tinun-an.—Mat. 28:19, 20.