Kon Unsay Gipasabot sa Pagkahimong Neyutral

Si Jesus nagtudlo nga ang iyang mga sumusunod angayng ‘dili bahin sa kalibotan.’ (Juan 15:19) Apil ani ang pagkahimong neyutral—buot ipasabot, wala silay dapigan sa politika ug sa mga giyera sa kalibotan. Ang tinuod, dili kanunayng sayon nga mahimong neyutral. Tingali yagayagaan ta tungod ani. Unsay atong himoon aron makapabilin tang neyutral ug padayon tang magmaunongon kang Jehova nga Diyos?

1. Unsay panghunahuna sa tinuod nga mga Kristohanon bahin sa mga gobyerno sa tawo?

Gitahod sa mga Kristohanon ang gobyerno. Sundon nato ang giingon ni Jesus nga ‘ibayad sa Cesar ang iya sa Cesar’—sa ato pa, sundon nato ang mga balaod sa nasod, sama sa pagbayad ug buhis. (Marcos 12:17) Ang Bibliya nagtudlo nga ang mga gobyerno sa tawo nagmando tungod lang kay gitugotan sila ni Jehova sa pagmando. (Roma 13:1) Busa atong ilhon nga ang mga gobyerno sa tawo dunay limitadong awtoridad. May pagsalig ta sa atong Diyos ug sa iyang langitnong Gingharian sa pagsulbad sa mga problema sa tawo.

2. Unsaon nato pagpakita nga neyutral ta?

Sama kang Jesus, dili ta mag-apil-apil sa politika. Dihang nakita sa mga tawo ang usa sa mga milagro ni Jesus, gisulayan nila nga himoon siyang ilang hari sa yuta. Pero wala siya mosugot. (Juan 6:15) Ngano? Kay, sumala sa iyang giingon sa ulahi, “ang akong Gingharian dili bahin niining kalibotana.” (Juan 18:36) Ingong mga tinun-an ni Jesus, ikapakita nato sa daghang paagi nga neyutral ta. Pananglitan, dili ta mag-apil-apil sa giyera. (Basaha ang Miqueas 4:3.) Atong gitahod ang mga simbolo sa nasod—sama sa bandera—pero dili nato ni simbahon. (1 Juan 5:21) Ug dili ta modapig o mokontra sa bisan unsang partido sa politika o kandidato. Niini nga mga paagi ug sa uban pa, ikapakita nato nga maunongon gyod ta sa gobyerno sa Diyos—ang iyang Gingharian.

TUN-IG DUGANG

3. Ang tinuod nga mga Kristohanon neyutral

Si Jesus ug ang iyang mga sumusunod naghatag natog ehemplo. Basaha ang Roma 13:1, 5-7 ug 1 Pedro 2:13, 14. Dayon i-play ang VIDEO, ug hisgoti ang mosunod nga mga pangutana:

VIDEO: Ang Tinuod nga mga Kristohanon Neyutral—Bahin 1 (4:28)

• Nganong angay natong tahoron ang mga gobyerno sa tawo?

• Sa unsang mga paagi nga ikapakita nato nga nagpasakop ta nila?

Panahon sa giyera, ang ubang nasod moingon nga neyutral sila, pero ilang gisuportahan ang mga grupo nga naggiyera. Unsa man gyoy gipasabot sa pagkahimong neyutral? Basaha ang Juan 17:16. Dayon i-play ang VIDEO ug hisgoti ang mosunod nga pangutana:

VIDEO: Ang Tinuod nga mga Kristohanon Neyutral—Bahin 2 (3:11)

• Unsay gipasabot sa pagkahimong neyutral?

Komosta kon ang gobyerno magsugo nimo ug usa ka butang nga supak sa balaod sa Diyos? Basaha ang Buhat 5:28, 29. Dayon i-play ang VIDEO ug hisgoti ang mosunod nga mga pangutana:

VIDEO: Ang Tinuod nga mga Kristohanon Neyutral—Bahin 3 (1:18)

• Kon naay balaod ang tawo nga supak sa balaod sa Diyos, kang kinsang balaod ang angay natong sundon?

• Makahunahuna ba kag mga kahimtang diin ang mga Kristohanon dili mosunod sa gobyerno sa tawo?

4. Kinahanglang neyutral ta sa hunahuna ug binuhatan

Basaha ang 1 Juan 5:21. Dayon i-play ang VIDEO ug hisgoti ang mosunod nga mga pangutana:

VIDEO: Kon Nganong ang Tinuod nga mga Kristohanon Nagkinahanglan ug Kaisog—Sa Pagpabiling Neyutral (2:49)

• Sa video, nganong midesisyon si Ayenge nga dili moapil sa partido sa politika o sa nasyonalistikong mga seremonya, sama sa pagsaludar sa bandera?

• Sa imong hunahuna, maalamon ba ang iyang desisyon?

Unsa pa nga mga kahimtang nga lisod tingaling mahimong neyutral? I-play ang VIDEO, ug dayon hisgoti ang mosunod nga mga pangutana:

VIDEO: Mga Leksiyon Gikan sa Ang Bantayanang Torre—Pabiling Neyutral Niining Nagkabahinbahin nga Kalibotan (5:16)

• Unsaon nato pagpabiling neyutral dihang motan-aw tag internasyonal nga kompetisyon sa sports?

• Unsaon nato pagpabiling neyutral bisan dihang maapektohan ta sa mga desisyon sa mga politiko?

• Sa unsang paagi ang mga balita o ang atong mga kauban makaapektar sa atong neyutralidad?

SUMARYO

Ang mga Kristohanon maningkamot gyod nga mahimong neyutral sa politika diha sa ilang hunahuna, sinultihan, ug binuhatan.

Review

• Unsay atong obligasyon sa mga gobyerno sa tawo?

• Nganong neyutral ta sa politika?

• Unsa nga mga situwasyon nga lisod tingaling magpabiling neyutral?

SUSIHA

Unsa nga mga sakripisyo ang kinahanglan natong himoon aron makapabiling neyutral?

Wala Gyod Mi Pasagdi ni Jehova (3:14)

Unsay puwedeng himoon sa mga pamilya aron makapangandam sila sa mga pagsulay sa ilang neyutralidad?

Pabiling Neyutral sa Publikong mga Okasyon (4:25)

Nganong ang pagdepensa sa nasod dili mao ang makahatag ug kinalabwang kadungganan sa usa ka tawo?

“Sa Diyos ang Tanang Butang Posible” (5:19)

Sayra kon unsaon nga magpabilin kang dili bahin sa kalibotan dihang maghimog mga desisyon bahin sa imong pagpanarbaho.

“Ang Matag Usa Magpas-an sa Iyang Kaugalingong Luwan” (Ang Bantayanang Torre, Marso 15, 2006)

Moabot gyod ang panahon nga ang tanang Kristohanon makasinatig pagsupak, ug paglutos pa gani. Angay ba tang mahadlok ana?

1. Nganong makadahom ta nga moabot ang paglutos?

Ang Bibliya klarong nag-ingon: “Ang tanan nga nagkinabuhi nga nahiusa kang Kristo Jesus ug may debosyon ngadto sa Diyos lutoson sab.” (2 Timoteo 3:12) Si Jesus gilutos kay dili siya bahin sa kalibotan ni Satanas. Dili pod ta bahin sa kalibotan, maong dili ikatingala kon lutoson ta sa mga gobyerno ug sa mga relihiyon sa kalibotan.—Juan 15:18, 19.

2. Unsay atong himoon aron makapangandam ta sa paglutos?

Kinahanglang palig-onon nato karon ang atong pagsalig kang Jehova. Paggahin ug panahon kada adlaw sa pag-ampo kaniya ug sa pagbasa sa iyang Pulong. Tambong nga regular sa mga tigom sa kongregasyon. Kining tanan maghatag nimog kusog nga imong gikinahanglan aron maisogon nimong maatubang ang bisan unsang paglutos, bisan pag membro sa imong pamilya ang molutos nimo. Si apostol Pablo, nga kadaghan gilutos, misulat: “Si Jehova ang akong magtatabang; dili ko mahadlok.”—Hebreohanon 13:6.

Mahimo pod tang mas maisogon kon regular tang mosangyaw. Ang pagsangyaw magtudlo nato nga mosalig kang Jehova ug pinaagi niini mawala pod ang atong kahadlok sa tawo. (Proverbio 29:25) Kon naa kay kaisog karon sa pagsangyaw, maandam ka pag-ayo nga padayong mosangyaw bisan pag idili sa gobyerno ang atong buluhaton.—1 Tesalonica 2:2.

3. Unsay kaayohan kon molahutay ta dihang lutoson?

Siyempre dili ta ganahang lutoson, pero kon molahutay ta mas molig-on ang atong pagtuo. Mas masuod ta kang Jehova kay maeksperyensiyahan nato ang iyang tabang dihang mobati ta nga dili na nato kaya. (Basaha ang Santiago 1:2-4.) Masakitan si Jehova nga magtan-aw natong nag-antos, pero malipay siya dihang makita niya nga milahutay ta. Ang Bibliya nag-ingon: “Kon molahutay mo sa kalisdanan tungod sa pagbuhat ug maayo, makapalipay kini sa Diyos.” (1 Pedro 2:20) Ang tanan nga molahutay gantihan ni Jehova ug kinabuhing walay kataposan sa bag-ong kalibotan diin wala nay mga magsusupak sa matuod nga pagsimba.—Mateo 24:13.

TUN-IG DUGANG

4. Makalahutay ka kon supakon ka sa imong pamilya

Si Jesus nahibalo pag-ayo nga posibleng naay mga membro sa atong pamilya nga dili gustong moalagad ta kang Jehova. Basaha ang Mateo 10:34-36, ug dayon hisgoti kini nga pangutana:

• Kon ang usa moalagad kang Jehova, unsa tingali ang isulti o himoon sa mga membro sa iyang pamilya?

VIDEO: Gisagop Mi ni Jehova (5:13)

• Unsay imong himoon kon pugngan ka sa imong paryente o higala sa pag-alagad kang Jehova?

Basaha ang Salmo 27:10 ug Marcos 10:29, 30. Human mabasa ang matag teksto, hisgoti kini nga pangutana:

• Nganong makatabang ni nga saad dihang supakon ka sa imong pamilya o higala?

5. Padayong simbaha si Jehova bisan pa sa paglutos

VIDEO: Pagpakitag Kaisog Bisan sa Paglutos (6:27)

• Sa unsang paagi ang mga ehemplo niini nga video nakapalig-on kanimo?

Basaha ang Buhat 5:27-29 ug Hebreohanon 10:24, 25. Human mabasa ang matag teksto, hisgoti kini nga pangutana:

• Nganong importante kaayo nga padayon natong simbahon si Jehova bisan pag idili ang pagsangyaw o ang mga tigom?

6. Tabangan ka ni Jehova nga makalahutay

VIDEO: Palig-onon Ko ni Jehova nga Diyos (3:40)

• Sa video, unsay nakatabang niini nga mga Saksi nga makalahutay?

Basaha ang Roma 8:35, 37-39 ug Filipos 4:13. Human mabasa ang matag teksto, hisgoti kini nga pangutana:

• Sa unsang paagi kini nga teksto nagpasalig nimo nga malahutay nimo ang bisan unsang pagsulay?

Basaha ang Mateo 5:10-12, ug dayon hisgoti kini nga pangutana:

• Nganong posible gihapon kang magmalipayon bisan pag gilutos?

SUMARYO

Pabilhan ni Jehova ang atong mga paningkamot sa pag-alagad kaniya bisag gilutos. Pinaagi sa iyang tabang, makaya nato ang paglutos!

Review

• Nganong angayng dahomon sa mga Kristohanon ang paglutos?

• Unsay imong mahimo karon aron maandam ka sa paglutos?

• Unsay makatabang nimo aron mobati ka nga kaya nimong mag-alagad kang Jehova bisan pa sa mga pagsulay?

SUSIHA

Tan-awa kon giunsa pagtabang ni Jehova ang batan-ong brader aron makalahutay siya dihang gipriso siya tungod sa neyutralidad.

Lahutay Bisan sa Paglutos (2:34)

Sayra kon unsay nakatabang sa usa ka magtiayon nga matinumanong makaalagad kang Jehova sa daghang katuigan bisag gisupak.

Nag-alagad Kang Jehova Panahon sa mga Kausaban (7:11)

Sayra kon unsay himoon aron maisogon nimong maatubang ang paglutos.

“Pangandam Karon Alang sa Paglutos” (Ang Bantayanang Torre, Hulyo 2019)

Unsay angay natong panghunahuna kon supakon ta sa atong pamilya, ug unsay atong himoon aron mamentinar ang kalinaw ug makapabilin tang matinumanon kang Jehova?

“Ang Kamatuoran Magdalag Espada, Dili Pakigdait” (Ang Bantayanang Torre, Oktubre 2017)