Kining mga butang nga gihisgotan dinhi sa modelong pag-ampo hinungdanon gayod kaayo alang sa tanang tawo nga may pagtuo ug nagbutyag sa mga panginahanglan nga sagad gikinahanglan nilang tanan. Sa laing bahin, ang asoy sa Kasulatan nagpakita nga adunay daghan pang ubang mga butang nga makaapekto sa mga indibiduwal sa dako o kaha sa gamayng paagi o nga mahitabo tungod sa partikular nga mga sirkumstansiya o mga okasyon ug nga maoy mga butang nga angay usab nga iampo. Bisan tuod wala hisgoti nga espesipiko diha sa modelong pag-ampo ni Jesus, kini nalangkit gihapon sa mga butang nga gipahayag diha niana. Nan, ang personal nga mga pag-ampo mahimong maglakip halos sa matag bahin sa kinabuhi.​—Ju 16:​23, 24; Flp 4:6; 1Pe 5:7.

Sa pagkatinuod, ang kaundan sa mga pag-ampo sa usa ka tawo nagdepende sa iyang kahibalo bahin sa kabubut-on sa Diyos, kay ang nangamuyo kinahanglang makasabot nga, aron ang iyang gipangayo ihatag, kini kinahanglang makapahimuot sa Diyos. Ang pagkahibalo nga ang daotan ug kadtong nagsalikway sa Pulong sa Diyos dili Niya uyonan, ang nangamuyo dayag nga dili makapangayo nianang sukwahi sa pagkamatarong ug sa gipadayag nga kabubut-on sa Diyos, lakip sa mga pagtulon-an sa Anak sa Diyos ug sa iyang inspiradong mga tinun-an. (Ju 15:​7, 16) Busa, ang giingon mahitungod sa pagpangayo sa “bisan unsa” (Ju 16:23) angayng sabton sumala sa konteksto. Ang “bisan unsa” dayag nga wala maglakip sa mga butang nga nahibaloan sa indibiduwal, o may katarongang tuohan, ingong dili makapahimuot sa Diyos. Si Juan miingon: “Kini ang pagsalig nga atong nabatonan diha kaniya, nga, bisan unsay atong pangayoon sumala sa iyang kabubut-on, siya magpatalinghog kanato.” (1Ju 5:14; itandi ang San 4:15.) Si Jesus miingon sa iyang mga tinun-an: “Kon duha kaninyo sa yuta magkauyon mahitungod sa bisan unsang butang nga hinungdanon nga ilang pagahangyoon, kini matuman alang kanila tungod sa akong Amahan sa langit.” (Mat 18:19) Bisan tuod ang materyal nga mga butang, sama sa pagkaon, maoy mga butang nga angayng iampo, ang materyalistikong mga tinguha ug mga ambisyon dili angay, sumala sa gipakita sa mga teksto sama sa Mateo 6:19-34 ug 1 Juan 2:15-17. Ang usa dili usab angay nga moampo alang niadtong gihukman sa Diyos.​—Jer 7:16; 11:14.