Pagkuha ug Kahibalo Bahin sa Diyos—Sa Unsang Paagi?
Ang pipila nagduhaduha nga ang diyos interesado gayod sa pagbutyag sa iyang kaugalingon ngadto sa mga tawo. Kon siya interesado, unsaon man niya pagbuhat niana?
ANG ika-16 nga siglong Protestanteng Repormador nga si John Calvin husto sa iyang pag-ingon nga ang mga tawo dili gayod mahibalo bahin sa Diyos gawas kon ibutyag sa Diyos ang iyang kaugalingon ngadto sa mga tawo. Apan, ang pipila maghunahuna tingali kon ang Diyos interesado ba gayod sa pagbutyag sa iyang kaugalingon ngadto sa mga tawo. Ug kon siya interesado, unsaon man niya pagbuhat niana?
Si Jehova, ang “Dakong Maglalalang,” adunay katarongan sa tanan niyang ginabuhat. Dugang pa, ingong “Diyos nga Labing Gamhanan,” makahimo gayod siya sa pagtuman sa iyang mga katuyoan. (Ecclesiastes 12:1; Exodo 6:3) Makatino gayod kita nga siya andam sa pagbutyag sa iyang mga katuyoan ngadto sa mga tawo, kay ang iyang manalagna nga si Amos giinspirar sa pagsulat: “Ang Soberanong Ginoong Jehova dili mobuhat sa usa ka butang gawas kon gikapadayag niya ang iyang kompidensiyal nga butang ngadto sa iyang mga alagad nga mga manalagna.” Apan, matikdi nga ang Diyos giingon nga nagbutyag sa iyang mga katuyoan ngadto lamang sa iyang mga alagad, niadtong tim-os nga nahigugma kaniya. Dili ba kana makataronganon? Kinsay imong sultihan sa imong mga sekreto? Si bisan kinsa o ngadto lamang sa imong labing suod nga mga higala?—Amos 3:7; Isaias 40:13, 25, 26.
Ang kaalam ug kahibalo bahin sa Diyos makapahingangha gayod sa mga mapaubsanon, ug kini nahiangay lamang. Apan, dili lamang kahingangha ang gikinahanglan aron kita personal nga makabenepisyo sa balaang kaalam ug kahibalo. Ang Bibliya nagpasiugda nga aron kita makakat-on sa mga hunahuna sa Diyos, kita kinahanglang may mapaubsanong kasingkasing: ‘Tipigi ang akong mga sugo diha kanimo. Tagda ang kaalam pinaagi sa imong igdulungog. Ikiling ang imong kasingkasing sa katakos sa pag-ila. Sangpita ang pagsabot ug ipatugbaw ang imong tingog alang sa katakos sa pag-ila. Padayong pangitaa kini ingon sa plata.’—Proverbio 2:1-4.
Ang mapaubsanong tawo nga maningkamot niining paagiha makakuha gayod ug kahibalo bahin sa Diyos. Kanang tekstoha sa basahon sa Proverbio nagpadayon: “Si Jehova magahatag ug kaalam; sa iyang baba nagagikan ang kahibalo ug ang katakos sa pag-ila.” Oo, silang tim-os nga nagapangita sa kamatuoran “makasabot sa pagkamatarong ug sa paghukom ug sa katul-id, ang kinatibuk-ang dalan kon unsay maayo.”—Proverbio 2:6-9.
Pagpangita sa Kamatuoran
Ang The Encyclopedia of Religion nag-ingon: “Ang kinabuhi sa tawo nailhan sa panginahanglan sa pagsabot tali sa husto ug sayop, sa kusgan ug huyang, sa matuod ug bakak, sa limpiyo ug hugaw, sa tin-aw ug lubog, maingon man sa kuwestiyonableng mga butang.” Aron tagbawon kining maong panginahanglan, ang mga tawo dugay nang nangitag kamatuoran. Tungod kay ila mang gitumong ang ilang pagpangita sa kamatuoran diha kang Jehova, nga gitawag sa salmista nga “Diyos sa kamatuoran,” sila miuswag sa pagpangita niana.—Salmo 31:5.
Ang ngalang Jehova literal nga nagkahulogang “Siya Magpahinabo.” (Genesis 2:4, potnot sa New World Translation of the Holy Scriptures—With References) Busa, ang kahulogan mismo sa ngalan sa Diyos nagtumong sa iyang Pagkamaglalalang ug sa iyang katuyoan. Sa pagkatinuod, ang pagkahibalo ug paggamit sa ngalang Jehova maoy ilhanan sa matuod nga relihiyon. Si Jesus nag-ila gayod niana. Nga nagtumong sa iyang mga sumusunod, siya nag-ampo sa Diyos: “Gipaila ko ang imong ngalan kanila ug igapaila pa kini, aron nga ang gugma nga imong gibati kanako maanaa unta kanila ug ako mahiusa kanila.”—Juan 17:26.
Nga nagsalig sa iyang pagpakighigala sa Diyos sa dihang siya gipabutyag sa kahulogan sa mga damgo, ang karaang Hebreohanon nga si Jose misulti nga masaligon: “Dili ba ang mga paghubad iya man sa Diyos?”—Genesis 40:8; 41:15, 16.
Daghang siglo sa ulahi, si Haring Nabucodonosor sa Babilonya adunay damgo nga dili mahubad sa iyang maalamong mga lalaki. Giingnan ni manalagnang Daniel ang hari: “Adunay usa ka Diyos sa kalangitan nga Tigpadayag sa mga tinago, ug iyang gipahibalo kang Haring Nabucodonosor kon unsay mahitabo sa kaulahiang bahin sa mga adlaw.”—Daniel 2:28.
Ang mga panig-ingnan ni Jose ug Daniel nagpakita nga ang kaalam ug kahibalo sa Diyos mabatonan lamang niadtong nagaalagad kang Jehova nga Diyos. Siyempre, aron atong mabatonan ang pag-uyon sa Diyos kinahanglang biyaan nato ang atong mga gituohan kaniadto. Ang unang-siglong mga Hudiyo nga nahimong mga Kristohanon kinahanglang magbuhat gayod niana. Kay gitudloan sa pagtahod ug pagsunod sa mga balaod ilalom sa Hudiyohanong sistema sa mga butang, sila nagkinahanglag panahon sa pagdawat kang Jesus ingong Mesiyas. Siya mianhi sa pagtuman sa Moisesnong Balaod, nga nagsilbing ‘landong sa maayong mga butang nga moabot.’ (Hebreohanon 10:1; Mateo 5:17; Lucas 24:44, 45) Kini gipulihan sa “balaod ni Kristo,” nga mas labaw kay sa Moisesnong Balaod.—Galacia 6:2; Roma 13:10; Santiago 2:8.
Kitang tanan natawo sa kalibotan nga nahimulag sa Diyos. Tungod sa sala nga napanunod gikan sa unang magtiayon, kita natawo nga may panag-away sa Diyos, nga walay tukmang kahibalo bahin sa iyang mga katuyoan. Atong napanunod usab ang usa ka malimbongong kasingkasing. (Jeremias 17:9; Efeso 2:12; 4:18; Colosas 1:21) Aron mabatonan ang pakighigalaay sa Diyos, angay natong ipahiuyon ang atong panghunahuna sa panghunahuna sa Diyos. Ang pagbuhat niana dili sayon.
Basin lisod ang pagsalikway sa bakak nga relihiyosong mga ideya o mga kalihokan, ilabina kon kana ang gitudlo kanato sukad pa sa pagkabata. Apan maalamon ba ang pagpadayon sa sayop nga tinuohan? Dili gayod! Mas maalamon gayod ang pagbag-o sa atong panghunahuna aron atong mabatonan ang pag-uyon sa Diyos.
Pag-ila sa Instrumento nga Gigamit sa Diyos sa Pagpanudlo
Asa man kita makakaplag ug tabang sa pagsabot sa Pulong sa kamatuoran ug sa pagkinabuhi uyon niana? Sa karaang Israel, gitagana sa Diyos ang pagpanguna pinaagi sa kasaligan ug maunongong mga tawo nga may responsibilidad. Ang Ulo sa Kristohanong kongregasyon karon, si Kristo, sa samang paagi mogiya niadtong tim-os nga mangita sa kamatuoran. Iyang gihimo kana pinaagi sa iyang kasaligan ug maunongong mga sumusunod, nga maoy naglangkob sa instrumento nga iyang gigamit sa pagtultol ug pagpanalipod sa mga tawo nga masibotong nangita sa kamatuoran. (Mateo 24:45-47; Colosas 1:18) Apan sa unsang paagi mailhan sa usa ang instrumento nga gigamit sa Diyos sa pagpanudlo?
Ang matuod nga mga sumusunod ni Jesu-Kristo maningkamot sa pagbanaag sa samang mga hiyas nga gipadayag ni Jesus ingong usa ka tawo. Sa kalibotan nga nagkagrabe ang pagkadaotan, kini nga mga sumusunod dali rang mailhan tungod kay sila lamang ang nagpakita ug espirituwal nga mga hiyas. (Tan-awa ang kahon sa panid 6.) Kining mga hiyasa makita ba sa relihiyon nga imong gipasakopan o sa mga relihiyon sa imong mga silingan? Makabenepisyo ka gayod sa pagsusi niini sa tabang sa Bibliya.
Dapiton ka namo, among minahal nga magbabasa, sa pagbuhat niana pinaagi sa pagtuon sa Bibliya. Sa miaging tuig, sa aberids, kapin sa 6,000,000 ka tawo o mga pamilya sa 235 ka kayutaan ang nagpahimulos niining maong kahikayan sa pagtuon sa Bibliya uban sa mga Saksi ni Jehova. Ang pagbaton sa kaalam ug kahibalo bahin sa Diyos maoy usa ka mapinadayonon, makapatagbaw, ug magantihong buluhaton. Nganong dili sugdan ang pagbaton ug kaalam ug kahibalo bahin sa Diyos? Dili ka gayod magbasol sa pagbuhat niini. Oo, kita makabaton gayod ug kahibalo bahin sa Diyos!
[Kahon sa panid 6]
KADTONG NAGABUHAT NGA KAHARMONYA SA DIYOS KINAHANGLANG . . .
magpabiling neyutral sa politikal nga mga kagubot.—Isaias 2:4
magpatunghag maayong mga bunga pinaagi sa pagbuhat sa kabubut-on sa Diyos.—Mateo 7:13-23.
magpakitag tinuod nga gugma sa usag usa.—Juan 13:35; 1 Juan 4: 20.
magkahiusa sa pagsulti bisan diin.—Miqueas 2:12.
dili magsundog sa sayop nga mga tinamdan ug panggawi sa kalibotan sa ilang palibot.—Juan 17:16.
magpamatuod sa kamatuoran ug maghimog mga tinun-an.—Mateo 24:14; 28: 19, 20.
malipay nga makigtigom nga regular aron magkadinasigay sa usag usa.—Hebreohanon 10:25.
magdayeg sa Diyos ingong internasyonal nga grupo.—Pinadayag 7: 9, 10.
[Mga hulagway sa panid 7]
Ang kahibalo bahin sa Diyos mabatonan ingong indibiduwal, pamilya, ug kongregasyon