Ang Hunahuna sa Bibliya
‘Dili Bahin sa Kalibotan’—Unsay Buot Ipasabot Niini?
SA IKAUPAT nga siglo K.P., libolibong nag-angkong mga Kristohanon ang nagbiya sa ilang mga kabtangan, paryente, ug paagi sa kinabuhi aron maglain ug puyo sa mga desyerto sa Ehipto. Sila nailhan ingong mga anchorite, gikan sa Gregong a·na·kho·reʹo, nga nagkahulogang “ako magpalayo.” Usa ka historyano nagbatbat kanila ingong nagpalayo sa ilang kaugalingon gikan sa ilang mga katalirongan. Ang mga anchorite naghunahuna nga pinaagi sa pagpalayo gikan sa tawhanong katilingban, sila nagsunod sa Kristohanong kinahanglanon nga mahimong ‘dili bahin sa kalibotan.’—Juan 15:19.
Ang Bibliya nagtambag sa mga Kristohanon sa “pag-amping sa kaugalingon nga dili mabulingan sa kalibotan.” (Santiago 1:27) Ang Kasulatan tin-aw nga nagpasidaan: “Mga mananapaw, wala ba kamo mahibalo nga ang pakighigala sa kalibotan maoy pakigdumot sa Diyos? Busa, ang bisan kinsa nga buot mahimong higala sa kalibotan nagahimo sa iyang kaugalingon nga usa ka kaaway sa Diyos.” (Santiago 4:4) Apan, kini ba nagpasabot nga ang mga Kristohanon gidahom nga mahimong mga anchorite, nga magpalayo gikan sa uban sa literal nga diwa? Sila ba magpalayo gikan niadtong kinsa dili makig-ambit sa ilang relihiyosong mga pagtulon-an?
Ang mga Kristohanon Dili Batok sa Katilingban
Ang ideya sa pagkahimong dili bahin sa kalibotan gihisgotan sa daghang asoy sa Bibliya nga nagpasiugda sa panginahanglan alang sa mga Kristohanon nga magpalain sa ilang kaugalingon gikan sa masa sa tawhanong katilingban nga nahimulag sa Diyos. (Itandi ang 2 Corinto 6:14-17; Efeso 4:18; 2 Pedro 2:20.) Busa, ang matuod nga mga Kristohanon maalamong maglikay sa mga tinamdan, sinultihan, ug panggawi nga supak sa matarong nga mga dalan ni Jehova, sama sa sobrang pagpangagpas sa kalibotan sa bahandi, pagkainila, ug pagpatuyang sa kalingawan. (1 Juan 2:15-17) Sila usab magpabiling bulag sa kalibotan pinaagi sa pagpabiling neyutral sa mga butang maylabot sa gubat ug sa politika.
Si Jesu-Kristo miingon nga ang iyang mga tinun-an mahimong ‘dili bahin sa kalibotan.’ Apan siya usab nag-ampo sa Diyos: “Ako nagahangyo kanimo, dili sa pagkuha kanila gikan sa kalibotan, apan sa pagbantay kanila tungod sa tuman-kadaotang usa.” (Juan 17:14-16) Tin-aw, dili buot ni Jesus nga ang iyang mga tinun-an mahimong batok-sa-katilingban, nga maglikay sa tanang pakiglambigit sa mga dili-Kristohanon. Sa pagkatinuod, ang pagpalain magpugong sa usa ka Kristohanon sa pagtuman sa iyang sugo sa pagsangyaw ug pagtudlo “sa publiko ug sa balay ug balay.”—Buhat 20:20; Mateo 5:16; 1 Corinto 5:9, 10.
Ang tambag nga magpabiling walay buling gikan sa kalibotan wala maghatag sa mga Kristohanon sa bisan unsang pasikaranan sa pag-isip sa ilang kaugalingon nga labaw kay sa uban. Kadtong kinsa nahadlok kang Jehova nagadumot sa “pagbayaw-sa-kaugalingon.” (Proverbio 8:13) Ang Galacia 6:3 nag-ingon nga “kon ang usa nagahunahuna nga siya maoy si-kinsa dihang siya dili unsa man, siya nagalimbong sa iyang kaugalingong hunahuna.” Kadtong mobating labaw nagalimbong sa ilang kaugalingon tungod “kay ang tanan nakasala ug wala makaabot sa himaya sa Diyos.”—Roma 3:23.
“Dili Mamulong nga Madaoton Labot Kang Bisan Kinsa”
Sa adlaw ni Jesus dihay mga tawong nagbiaybiay sa tanang dili sakop sa ilang eksklusibong mga grupo sa relihiyon. Lakip niini mao ang mga Pariseo. Sila sinati kaayo sa Kasugoan ni Moises ingon man usab sa labing gagmayng mga detalye sa Hudiyohanong tradisyon. (Mateo 15:1, 2; 23:2) Sila nanghambog sa makutikutihong pagsunod sa daghang relihiyosong mga rituwal. Migawi ang mga Pariseo ingon sa daw sila maoy labaw sa uban tungod lamang sa ilang intelektuwal nga mga kalamposan ug relihiyosong baroganan. Gipadayag nila ang ilang pagkadiyosnon ug matamayong tinamdan pinaagi sa pag-ingon: “Kining panon sa katawhan nga wala mahibalo sa Balaod maoy tinunglong katawhan.”—Juan 7:49.
Ang mga Pariseo may termino pa nga nagpaubos sa mga dili-Pariseo. Ang Hebreohanong terminong ʽam ha·ʼaʹrets gigamit sa sinugdan sa positibong paagi sa pagtawag sa regular nga mga membro sa katilingban. Apan sa ulahi ang hambogirong mga lider sa relihiyon sa Juda nag-usab sa diwa sa ʽam ha·ʼaʹrets ngadto sa usa nga tinamay. Ang laing mga grupo, lakip ang nag-angkong mga Kristohanon, migamit sa mga termino sama sa “pagano” ug “dili-Kristohanon” sa matamayong paagi sa pagpunting sa mga tawo nga lahi ang relihiyosong mga tinuohan sa ilaha.
Apan, sa unsang paagi gilantaw sa unang-siglong mga Kristohanon kadtong kinsa wala modawat sa Kristiyanidad? Ang mga tinun-an ni Jesus gitambagan sa pagtagad sa mga dili-magtutuo “uban ang kalumo” ug “halawom nga pagtahod.” (2 Timoteo 2:25; 1 Pedro 3:15) Si apostol Pablo nagpakita ug maayong panig-ingnan niining bahina. Siya daling maduol, dili hambogiro. Imbes ituboy ang iyang kaugalingon sa uban, siya mapainubsanon ug makapalig-on. (1 Corinto 9:22, 23) Sa iyang dinasig nga sulat ngadto kang Tito, si Pablo naghatag sa tambag nga “dili mamulong nga madaoton labot kang bisan kinsa, dili magpalaaway, magmakataronganon, magapasundayag ug bug-os nga kalumo ngadto sa tanang tawo.”—Tito 3:2.
Sa Bibliya ang terminong “dili-magtutuo” usahay gigamit sa pagpunting sa mga dili-Kristohanon. Bisan pa niana, walay pamatuod nga ang pulong “dili-magtutuo” gigamit sa opisyal nga titulo o ngalan. Busa, wala kini gamita aron tamayon o ipaubos ang mga dili-Kristohanon, sanglit kini supak sa mga prinsipyo sa Bibliya. (Proverbio 24:9) Ang mga Saksi ni Jehova karong adlawa naglikay nga mahimong maharason o hambogiro ngadto sa mga dili-magtutuo. Giisip nilang dili-maayong batasan ang pagtawag sa dili-Saksi nga mga paryente o mga silingan pinaagi sa matamayong mga pulong. Gisunod nila ang tambag sa Bibliya, nga nag-ingon: “Ang ulipon sa Ginoo . . . gikinahanglan nga magmalumo sa tanan.”—2 Timoteo 2:24.
“Buhaton Nato ang Maayo Ngadto sa Tanan”
Hinungdanong ilhon ang mga kapeligrohan sa pagkasuod uban sa kalibotan, ilabina uban niadtong nagpakitag tuman nga kawalay-pagtahod sa diyosnong mga sukdanan. (Itandi ang 1 Corinto 15:33.) Bisan pa, kon motambag ang Bibliya nga “buhaton nato ang maayo ngadto sa tanan,” ang pulong “tanan” naglakip niadtong kinsa wala makig-ambit sa Kristohanong mga pagtulon-an. (Galacia 6:10) Dayag, ubos sa pipila ka kahimtang ang unang-siglong mga Kristohanon nakigsalo sa pagpangaon sa mga dili-magtutuo. (1 Corinto 10:27) Busa, karong adlawa ang mga Kristohanon nagtagad sa mga dili-magtutuo sa timbang nga paagi, naglantaw kanila ingong ilang mga isigkatawo.—Mateo 22:39.
Mahimong sayop nga dahomon nga ang usa ka tawo maoy malaw-ay o imoral tungod lang kay siya wala masinati sa mga kamatuoran sa Bibliya. Magkalahi ang mga kahimtang ug mga tawo. Busa, ang matag Kristohanon kinahanglang mohukom kon sa unsang gidak-on siya maglimite sa iyang pakiglambigit uban sa mga dili-magtutuo. Apan, dili-kinahanglanon ug dili-Kasulatanhon alang sa usa ka Kristohanon nga magpalain sa iyang kaugalingon sa pisikal ingon sa mga anchorite o mobating labaw ingon sa gibati sa mga Pariseo.