NICODEMO

[Nagsakop sa Katawhan].

Usa ka Pariseo ug magtutudlo sa Israel, usa ka magmamando sa mga Hudiyo (nga mao, usa ka membro sa Sanhedrin) kinsa gihisgotan lamang diha sa Ebanghelyo ni Juan. Si Nicodemo nakadayeg sa mga ilhanan nga gihimo ni Jesus didto sa Jerusalem sa panahon sa Paskuwa sa 30 K.P. Busa, siya miduaw kang Jesus usa ka gabii niana ug miila nga si Jesus naggikan gayod sa Diyos. (Lagmit nga tungod sa kahadlok sa mga Hudiyo nga iyang gihimo kining unang pagduaw panahon sa kagabhion.) Ngadto kang Nicodemo nga si Jesus naghisgot bahin sa pagkahimong “ipanganak pag-usab” aron makakita sa Gingharian sa Diyos, nga wala pay tawo nga nakasaka sa langit, bahin sa gugma sa Diyos nga gipakita pinaagi sa pagpadala sa Anak nganhi sa yuta, ug bahin sa panginahanglan sa pagpasundayag ug pagtuo.​—Ju 2:23; 3:1-21.

Mga duha ug tunga ka tuig sa ulahi, sa Pista sa mga Balongbalong, ang mga Pariseo nagpadalag mga polis sa pagdakop kang Jesus. Sa dihang mipauli ang mga polis nga walay dala, ang mga Pariseo nagpakamenos kanila tungod sa pagtaho nga pabor kang Jesus, nga niana si Nicodemo misulti nga nag-ingon: “Ang atong balaod dili magahukom sa usa ka tawo gawas kon kini makapaminaw una gikan kaniya ug mahibaloan ang iyang gibuhat, dili ba?” Tungod niini gibiaybiay siya sa uban. (Ju 7:45-52) Human sa kamatayon ni Jesus, si Nicodemo uban kang Jose nga taga-Arimatea, ang hadlokan nga tinun-an, nagdalag usa ka bug-at nga rolyo sa mira ug mga aloe (mga 100 ka Romanhong libra [33 kg; 72 lb]), usa ka mahal nga gasa, nga gamiton sa pag-andam sa lawas ni Jesus alang sa paglubong. (Ju 19:38-40) Walay pamatuod sa Kasulatan nga nagpaluyo o nagsupak sa mga tradisyon nga nag-ingon nga si Nicodemo sa ulahi nahimong tinun-an, nga gipalagpot sa Sanhedrin ug sa Jerusalem, namatay nga usa ka martir, ug uban pa.