SUKA

Usa ka aslom nga likido nga gihimo sa karaang kapanahonan pinaagi sa pagpaaslom sa bino o sa ubang alkoholikong mga ilimnon. Ang mga Nazareo gidid-an sa pag-inom “sa suka sa bino o sa suka sa makahubog nga ilimnon,” nga nagpakitang ang suka (lagmit tinimbolan) usahay gigamit ingong ilimnon. (Num 6:​2, 3) Ang mga mangangani magtuslob sa ilang tinapay sa suka, tingali ingong makarepreskong pangpalami sa pagkaon panahon sa kainit sa adlaw.​—Ru 2:14.

Ang asetikong asido nga anaa sa suka makapaaslom sa panlami sa baba ug makapangilo sa ngipon. (Pr 10:26) Kini nga asido makita tungod sa kusog nga pagbula niini sa dihang ang suka isagol uban sa dili kaayo isog nga karbonadong soda, usa ka reaksiyon nga lagmit mao ang gipunting sa Proverbio 25:20.

Sa dinhi pa si Jesu-Kristo sa yuta, ang Romanong mga sundalo miinom ug dili kaayo isog, aslomon nga bino nga gitawag sa Latin ingong acetum (suka), o ingong posca, kon kini sagolan ug tubig. Kini lagmit mao ang ilimnon nga gihatag kang Jesu-Kristo samtang siya diha sa sakitanang estaka. Si Jesus midumili sa maaslom nga bino nga sinambogan ug mira (o apdo) nga gihatag kaniya aron makunhoran ang iyang pag-antos. (Mar 15:23; Mat 27:34; itandi ang Sal 69:21.) Apan, sa hapit na siyang mabugtoan sa gininhawa, siya nakainom ug lunlon aslom nga bino gikan sa espongha sa dihang gihungit kini sa iyang baba.​—Ju 19:28-30; Luc 23:​36, 37.