Ang Pagkahimong Born Again—Sa Unsang Paagi Kini Mahitabo?

SA DIHANG si Jesus nakigsulti kang Nicodemo, siya wala lamang maghisgot sa kahinungdanon sa pagkahimong born again, sa katuyoan niini, ug kon kinsay magpahinabo niini, kondili kon sa unsang paagi usab kini mahitabo. Si Jesus miingon: “Gawas kon ang usa ipanganak gikan sa tubig ug sa espiritu, siya dili makasulod sa gingharian sa Diyos.” (Juan 3:5) Busa ang usa ka tawo mahimong born again pinaagi sa tubig ug sa espiritu. Apan unsay ipasabot sa ekspresyong ‘tubig ug espiritu’?

‘Tubig ug Espiritu’—Unsay Ipasabot Niini?

Kay batid man si Nicodemo sa relihiyon sa mga Hudiyo, way duhaduha nga siya pamilyar sa paagi sa paggamit sa Hebreohanong Kasulatan sa terminong “espiritu sa Diyos”—ang aktibong puwersa sa Diyos, nga makatabang sa mga tawo sa paghimog talagsaong mga buhat. (Genesis 41:38; Exodo 31:3; 1 Samuel 10:6) Busa, sa dihang gigamit ni Jesus ang pulong nga “espiritu,” lagmit nasabtan ni Nicodemo nga kini nagtumong sa balaang espiritu, ang aktibong puwersa sa Diyos.

Unsay ipasabot ni Jesus sa dihang siya naghisgot bahin sa tubig? Tagda ang mga panghitabo nga narekord sa wala pa ug pagkatapos sa panag-estorya ni Jesus ug Nicodemo. Atong mabasa nga si Juan Bawtista ug ang mga tinun-an ni Jesus nagbawtismo sa mga tawo diha sa tubig. (Juan 1:19, 31; 3:22; 4:1-3) Kini nabaniog sa tibuok Jerusalem. Busa, sa dihang si Jesus naghisgot bahin sa tubig, nasabtan ni Nicodemo nga bawtismo sa tubig ang gitumong ni Jesus.

Bawtismo “sa Balaang Espiritu”

Kon ang ekspresyong “ipanganak gikan sa tubig” nagtumong sa bawtismo sa tubig, unsay ipasabot sa ekspresyong “ipanganak gikan . . . sa espiritu”? Sa wala pa makig-estorya si Nicodemo kang Jesus, si Juan Bawtista miingon nga ang bawtismo dili lamang himoon pinaagi sa tubig kondili pinaagi usab sa espiritu. Siya miingon: “Ako nagbawtismo kaninyo sa tubig, apan siya [si Jesus] magbawtismo kaninyo sa balaang espiritu.” (Marcos 1:7, 8) Si Marcos, nga magsusulat sa Ebanghelyo, naghisgot sa unang bawtismo nga nahitabo. Siya misulat: “Sa paglakat niadtong mga adlawa miabot si Jesus gikan sa Nasaret sa Galilea ug gibawtismohan ni Juan sa Jordan. Ug dihadiha sa paghaw-as niya gikan sa tubig nakita niya ang mga langit nga nabahin, ug, ingon sa usa ka salampati, ang espiritu mikunsad diha kaniya.” (Marcos 1:9, 10) Si Jesus gibawtismohan sa tubig sa dihang siya gituslob sa suba sa Jordan. Dayon, siya gibawtismohan sa balaang espiritu sa dihang mikunsad kaniya ang espiritu gikan sa langit.

Mga tulo ka tuig human sa bawtismo ni Jesus, iyang gisaaran ang iyang mga tinun-an: “Kamo pagabawtismohan sa balaang espiritu pipila ka adlaw human niini.” (Buhat 1:5) Kanus-a kana nahitabo?

Sa adlaw sa Pentekostes sa tuig 33 C.E., mga 120 ka tinun-an ni Jesus ang nagtapok diha sa usa ka balay sa Jerusalem. “Sa kalit may nahitabong kabanha gikan sa langit sama gayod nianang nagahuros nga makusog nga hangin, ug kini mipuno sa tibuok nga balay diin sila nanglingkod. Ug ang mga dila nga maorag kalayo mipakita kanila . . . , ug silang tanan napuno sa balaang espiritu.” (Buhat 2:1-4) Nianang adlawa, ang ubang mga tawo sa Jerusalem giawhag sa pagpabawtismo sa tubig. Gisultihan ni apostol Pedro ang mga tawo: “Paghinulsol kamo, ug magpabawtismo ang matag usa kaninyo sa ngalan ni Jesu-Kristo alang sa kapasayloan sa inyong mga sala, ug inyong madawat ang walay bayad nga gasa nga balaang espiritu.” Unsay ilang reaksiyon? “Kadtong kinasingkasing nga misagop sa iyang pulong nabawtismohan, ug nianang adlawa mga tulo ka libong kalag ang nadugang.”—Buhat 2:38, 41.

Duha ka Paagi sa Bawtismo

Unsay gipadayag niining maong mga bawtismo bahin sa pagkahimong born again? Kini nagpakita nga dunay duha ka paagi sa bawtismo aron mahimong born again. Matikdi nga si Jesus unang gibawtismohan sa tubig. Dayon siya gikunsaran sa balaang espiritu. Sa susama, ang mga tinun-an unang gibawtismohan sa tubig (si Juan Bawtista maoy nagbawtismo sa uban), ug dayon gikunsaran sila sa balaang espiritu. (Juan 1:26-36) Ang 3,000 ka bag-ong mga tinun-an unang gibawtismohan usab sa tubig, ug dayon sila gikunsaran sa balaang espiritu.

Busa sa unsang paagi ang usa karon mahimong born again? Sa samang paagi sa pagkahimong born again sa mga apostoles ug mga tinun-an ni Jesus niadtong Pentekostes 33 C.E. Una, ang usa ka tawo kinahanglang maghinulsol sa iyang mga sala, biyaan ang iyang sayop nga mga binuhatan, magpahinungod sa iyang kinabuhi ngadto kang Jehova aron sa pagsimba ug pag-alagad kaniya, ug ipahibalo sa publiko ang iyang pagpahinungod pinaagig bawtismo sa tubig. Dayon, kon pilion siya sa Diyos sa pag-alagad ingong magmamando sa Iyang Gingharian, siya pagadihogan sa balaang espiritu. Ang unang bahin niini nga paagi sa bawtismo (bawtismo sa tubig) maoy desisyon sa indibiduwal; ang ikaduhang bahin (bawtismo sa espiritu) maoy pagbuot sa Diyos. Sa dihang ang usa ka tawo mabawtismohan niining duha ka paagi, siya mahimong born again.

Apan, sa pagpakig-estorya ni Jesus kang Nicodemo, nganong migamit man siya sa ekspresyong “ipanganak gikan sa tubig ug sa espiritu”? Iyang gigamit ang maong ekspresyon aron mapasiugda ang dakong kausaban nga mahitabo niadtong nabawtismohan sa tubig ug sa espiritu. Hisgotan sa sunod nga artikulo ang maong bahin sa pagkahimong born again.

[Hulagway sa panid 9]

Ang mahinulsolong mga Israelitas gibawtismohan ni Juan sa tubig