Mga Pangutana Gikan sa mga Magbabasa
◼ Unsay gipasabot ni Jesus sa pag-ingon nga “ang tubig” nga iyang igahatag mahimong “usa ka tubod sa tubig nga magabugwak nga makahatag kinabuhing walay kataposan”?
Gisultihan ni Jesus ang babaye Samarianhon: “Ang tanan nga magainom niining tubiga [sa atabay ni Jacob] pagauhawon pag-usab. Apan bisan kinsa nga magainom sa tubig nga akong igahatag kaniya dili na gayod pagauhawon, kay ang tubig nga akong igahatag mahimong tubod sa tubig nga magabugwak nga makahatag kinabuhing walay kataposan.”—Juan 4:13, 14.
Gipunting ni Jesus dinhi ang espirituwal nga mga kaayohan nga modangat sa usa ka tawo nga makadawat sa Iyang mga pulong ug nahimong disipulo ni Kristo. Kining tawhana nga nagapadayon sa pagkuhag tukmang kahibalo kang Jehova nga Diyos ug kang Jesu-Kristo ug milihok niini nga may pagtuo mahimong makabaton ug kinabuhing walay kataposan. (Juan 17:3) Gipasumbingay ni Jesus kining paagiha sa hunahuna ug kasingkasing sa tawo nga samag usa ka tubod sa tubig nga nagabugwak ug mga kaayohan, nga padayong nagapalig-on sa iyang pagtuo ug nagatultol sa iyang mga lakang diha sa dalan sa kinabuhing walay kataposan.
Samtang ang pasiugda sa Juan 4:14 mao ang mga kaayohan nga madawat sa indibiduwal, ang Kristohanong disipulo nga abunda niining espirituwal nga mga tubig sa kinaiyanhon nagatinguha sa pakigbahin niini sa pagkadili mahakogon diha sa uban. Buot niya nga madunggan sa uban ang Kristohanong balita ug makabaton sa ilang kaugalingon ug tubod nga nagapabugwak ug samang espirituwal nga mga kaayohan nga motultol sa kinabuhing walay kataposan. Kining pagpakigbahin sa balita sa uban daw mao ang hunahuna luyo sa gipamulong ni Jesus diha sa Juan 7:37-39: “‘Kon adunay giuhaw, umari siya kanako ug uminom. Siya nga motuo kanako, sumala sa giingon sa Kasulatan, “Gikan sa iyang kinasulorang bahin modagayday ang buhi nga tubig.”’ Apan, siya nagasulti niini labot sa espiritu nga pagadawaton sa mga mituo kaniya.”
Naaghat sa makapalihok nga gahom sa espiritu sa Diyos, nga nadawat gikan sa Pentekostes 33 K.P. paunahan, ang mga apostoles ug mga disipulo ni Jesus nakahimog katingalahang mga buhat sa pagdalag buhing tubig ngadto sa uban. Ang espiritu sa Diyos usab nakadulag dakong papel sa pagsangkap ug pagpalihok sa mga disipulo ni Jesus karon, lakip sa dinihogang nanghibilin ug sa “dakong panon” sa katawhan, samtang ilang ginasangyaw ang maayong balita sa Gingharian sa Diyos sa tibuok yuta. Busa ang mga giuhaw kinahanglang moduol sa usa nga gigamit sa Diyos sa pag-apod-apod sa tubig sa kamatuoran nga motultol sa kinabuhing walay kataposan.—Mateo 24:14; 28:19, 20; Juan 7:37; 10:16; Pinadayag 7:9.