Buluhaton nga Makalipay Kanimo

“GIMAHAL gayod nako ang akong trabaho isip tigprinta,” matud pa ni Antonio Genoa, sa Italya. “Dako ang akong suweldo, ug daghan pa ako ug oras sa pag-obertaym. Sa pila lamang ka tuig, bisag linghod pa ang edad, nahimo akong luyoluyo sa akong mga amo.” Daw nakab-ot ni Antonio ang mga tumong nga nagtukmod sa kadaghanan sa pagkugi ug trabaho: bahandi, pagkabutang sa kinabuhi, ug usa ka makawiwiling trabaho nga iyang gikalipayan.

Si Antonio ba ‘nakakitag kaayohan sa tanan niyang kugi nga pagtrabaho’? (Ecclesiastes 3:13) Ug ang mao bang trabaho tinuod nakahatag kaniya ug kalipay? “Tungod sa tensiyon nga gipahinabo sa among puliki nga estilo sa kinabuhi,” siya mipadayon, “nagkaproblema kami isip pamilya. Kini naghimo kanamong dili-malipayon.” Si Antonio ug ang iyang asawa dili malipayon bisan pa sa ilang makatagbawng mga trabaho. Unsay ikasulti bahin kanimo? Ikaw ba ‘nakakitag kaayohan sa tanan nimong kugi nga pagtrabaho’? Ang imo bang trabaho nakahatag nimog tinuod nga kalipay?

Makataronganon Bang mga Motibo?

Laing dakong hinungdan sa kuging pagtrabaho mao ang pagpangitag kapangabuhian. Sa pipila ka nasod, ang mga tawo kinahanglang motrabaho sa taas nga oras aron lang mabuhi. Ang uban nagtrabaho sa adlaw ug sa gabii aron ang ilang mga anak makabaton ug mas maayong kinabuhi. Ang uban pa naglugos sa pagtrabaho aron madato.

Si Leonida sa Pilipinas dunay duha ka trabaho. Siya nagtrabaho sa bangko sa adlaw ug nagtudlo sa kolehiyo nga tulo o upat ka oras sa gabii. Ang dugang kuwarta takos ba niana? “Kanunay akong nagabantay sa orasan,” miingon siya. “Ako gilaay. Gihimo ko kini nga walay katagbawan.”

Dili, ang pagtrabaho alang lamang sa salapi dili mohatag matuod nga katagbawan ug kalipay. “Ayaw pagkahago sa imong kaugalingon sa pagkadato,” nagtambag ang maalamon Haring Solomon, “kay sa pagkatinuod ang mga bahandi magahimo ug mga pako sa ilang kaugalingon sama sa usa ka agila nga nagalupad paingon ngadto sa langit.” (Proverbio 23:4, 5) Ang ubang mga agila gitaho nga nagalupad sa gikusgon hangtod sa 130 ka kilometro por ora. Kini maayo kaayong pagkailustrar sa kadali sa paglupad sa gihagoang-kuwarta. Bisan pag madato ang usa ka tawo, inigkamatay niya siya walay bisan unsang madala uban kaniya.​—Ecclesiastes 5:15; Lucas 12:13-21.

Ang pagkalinga sa pagpangitag kabuhian usahay mohatag makuyawng mga kapeligrohan. Mahimong motultol kini sa paghigugma sa salapi. Sa unang siglo, dihay grupo sa mga relihiyonista nga gitawag mga Pariseo kinsa ilado sa ilang paghigugma sa salapi. (Lucas 16:14) Ingong usa ka Pariseo niadto, ang Kristohanong apostol Pablo bug-os nakaalinggat sa ilang paagi sa kinabuhi. (Filipos 3:5) “Sila nga maikagon gayod nga mahimong dato,” mipasidaan si Pablo, “mangahulog sa panulay ug sa bitik ug sa daghang binuang ug makadaot nga mga pangibog, nga nagaunlod sa mga tawo ngadto sa kamatayon ug pagkalaglag. Kay ang paghigugma sa salapi mao ang gamot sa tanang pagkadaotan, ug tungod sa maong mga pangibog may mga tawo nga . . . nagduslak sa ilang kaugalingon sa daghang kasakitan.” (1 Timoteo 6:9, 10) Oo, ang “paghigugma sa salapi,” mobuhat ug bisan unsa ug sa tanang butang alang niana, makadaot sa kinabuhi sa usa. Ang maong dalan dili mosangpot sa kalipay.

Alang sa uban, ang ilang motibo sa pagbudlay sa ilang kaugalingon mao ang pag-asenso diha sa korporasyon. Bisan pa, sa ulahi atubangon nila ang kamatuoran. “Ang baby-boomers,” matud pa sa magasing Fortune, “nga nagasakripisyo sa ilang panuigong 20 ug sayong panuigong 30 aron makab-ot ang tunga-tungang posisyon sa pagkamanedyer nakadangat sa dili maayo apan dili-malikayang kaamgohan nga, bisan pa sa tonilada sa kugi nga trabaho, dili tanan ang makaabot sa kinatas-an. Nagsusapinday tungod sa kalapoy, sila matintal sa pagpangutana kon unsa ba kini. Nganong makigbisog man pag-ayo? Kinsa man goy magtagad?”

Ang kinabuhi sa usa niining matanga sa tawo, si Mizumori, nasentro sa pag-asenso sa kalibotan. Gipangagpas ang karera sa posisyon sa pagkamanedyer sa usa sa labing dakong bangko sa Japan, siya wala nay panahon sa iyang pamilya. Human sa pagkugi ug trabaho nga kapin sa 30 ka tuig, nadaot ang iyang panglawas, ug siya dili gayod malipayon. “Akong naamgohan,” matud pa niya, “nga ang pag-indigay alang sa mga posisyon taliwala sa mga tawo kinsa nagapaningkamot nga molabaw aron mahimong prominente ‘kakawangan ug nagahakop ug hangin.’”​—Ecclesiastes 4:4.

Apan unsay ikasulti sama niadtong kang Antonio, kinsa nalipay sa ilang trabaho? Nawili sa iyang trabaho, gisakripisyo ni Antonio ang iyang panimalaynong kinabuhi diha sa altar sa trabaho. Gisakripisyo sa uban ang ilang panglawas ug bisan ang ilang mga kinabuhi, sama sa gipakita sa kalit nga kamatayon sa daghang prominente ug nasobrahan sa trabahong Hapones nga mga ehekutibo. Ang usa ka serbisyo sa pagtambag sa mga nagbangotan kanila nakadawat ug makakurat nga 135 ka tawag sa usa lang ka adlaw.

Gigugol sa uban ang ilang mga kinabuhi sa pagtabang sa uban. Gidasig ni Jesus kining espirituha. (Mateo 7:12; Juan 15:13) Ang pagkahimong puliki sa hamiling buluhaton sa pagtabang sa uban tinuod mohatag kalipay.​—Proverbio 11:25.

Apan, ang maong dungganong-hunahuna sa pagkamakugihon dunay mga kakulian. Pananglitan, ang hari sa Juda si Uzias mihimog dakong buluhaton sa katilingban sa pagkalot ug daghang atabay sa kamingawan. Hayan ang kaayohan sa iyang katawhan ang anaa sa hunahuna ni Uzias, kay siya “nagapangita kang Jehova” niadtong panahona ug dayag nagpatalinghog sa balaang sugo nga dili-magmahakugon ang mga hari. (2 Cronicas 26:5, 10; Deuteronomio 17:14-20) Kini ang nakapalambo sa iyang militaryong kadaogan, ug ang “iyang dungog nabantog ngadto sa halayong dapit.” Apan sa dihang nahimong malig-on, siya nagmapahitas-on, nga misangpot sa iyang pagkapukan. (2 Cronicas 26:15-20; Proverbio 16:18) Ang usa nga debotado sa pagtabang sa uban apan napalihok sa pagtagbaw-sa-kaugalingon ug garbo mosangpot usab sa pagkalaglag. Nan, nganong magpasulabi man ug trabaho?

Ang Tawo Gihimo Aron sa Pagtrabaho

Daghan kitag makat-onan bahin sa trabaho gikan sa usa ka tawo nga nakahimog labawng kaayohan kay kang bisan kinsang tawo nga nabuhi sukad sa yuta. Siya mao si Jesu-Kristo. (Mateo 20:28; Juan 21:25) Sa dihang namatay siya diha sa kahoy sa pagsakit, siya miingon, “Natapos na!” (Juan 19:30) Ang iyang kinabuhi nga 33¹/2 ka tuig matagbawon.

Ang kinabuhi ni Jesus makatabang sa pagtubag sa pangutana, “Unsang buluhatona ang makalipay kanimo?” Kadto mao ang pagtuman sa kabubut-on sa iyang langitnong Amahan nga nakahatag kaniyag dili-hitupngang kalipay. Sa susama, ang pagbuhat sa kabubut-on sa atong Maglalalang mohatag kanatog pagbati sa katagbawan ug mohimo kanatong malipayon. Ngano? Tungod kay Siya nahibalo sa atong pagkagama ug sa atong mga panginahanglan labaw sa atong nahibaloan.

Sa dihang gilalang sa Diyos ang unang tawo, si Adan, Iyang gihatagan siya ug trabaho nga buhaton sa pisikal ug mental. (Genesis 2:15, 19) ‘Ginapasakop’ ang tanang ubang yutan-ong mga linalang, si Adan usab dunay buluhaton sa pagdumala. (Genesis 1:28) Basta mosunod lang si Adan niini nga kahikayan, ang iyang trabaho magpabiling makahuloganon ug mapuslanon. Ang matag gamayng tinudlong-buluhaton nagkahulogan ug laing higayon sa pagpahimuot sa Labing Hataas.

Kini, hinunoa, wala magpadayon sa kaso ni Adan. Siya mihukom sa pagbulag gikan sa kahikayan sa Diyos. Si Adan wala na malipay sa pagbuhat sa kabubut-on sa Diyos apan nagtinguha sa pagbuhat sa iyang gusto. Siya nakasala batok sa Maglalalang. Ingong resulta sa iyang desisyon, si Adan, ang iyang asawa, ug ang tanan niyang mga anak “nailalom sa kakawangan.” (Roma 5:12; 8:20) Inay makalipay, ang trabaho nahimong makalaay. Ang hukom sa Diyos batok kang Adan naglakip niining mga pulonga: “Tinunglo ang yuta tungod kanimo. Pinaagi sa kasakit magakaon ka gikan niini sa tanang mga adlaw sa imong kinabuhi. Kini magapaturok usab kanimo ug mga sampinit ug mga kadyapa, ug magakaon ka sa mga hilamon sa kapatagan. Sa singot sa imong nawong magakaon ikaw sa tinapay hangtod nga mopauli ikaw sa yuta.” (Genesis 3:17-19) Ang trabaho, nga angay dungganon sa pagkaadunay kataposang tumong niini sa pagpahimuot sa Maglalalang sa tawo, karon nagkahulogan lamang ug masakit nga paghago aron lamang makabaton sa iyang kaugalingong tinapay.

Unsang konklusyon ang atong makuha gikan niining mga kamatuorana? Kini: Ang kugi nga pagtrabaho mohatag dumalayong katagbawan ug kalipay diha lamang kon atong isentro ang atong mga kinabuhi sa pagbuhat sa balaang kabubut-on.

‘Pagkaplag Kaayohan’ sa Pagbuhat sa Kabubut-on sa Diyos

Ang pagbuhat sa balaang kabubut-on sama sa pagkaon alang kang Jesu-Kristo​—usa ka butang nga kalipayan ug aron makahatag kalig-on sa iyang espirituwal nga kinabuhi. (Juan 4:34) Sa unsang paagi ang maong kalipay sa pagtrabaho imong maangkon?

Kinahanglang mahibalo ka “kon unsa ang kabubut-on ni Jehova” alang kanimo. (Efeso 5:17) Ang iyang kabubut-on mao nga mapasig-uli diha sa katawhan ang “mahimayaong kagawasan sa mga anak sa Diyos.” (Roma 8:21; 2 Pedro 3:9) Karon ang tibuok-kalibotan nga buluhaton sa pagtigom aron matuman kini ginahimo. Ikaw usab mahimong makabahin niining labing makatagbaw nga buluhaton. Kanang buluhatona seguradong makalipay kanimo.

Si Antonio, nga gihisgotan sa sinugdan, sa ulahi nakakitag katagbawan ug kalipay. Sa dihang siya ug ang iyang asawa nagbutang pag-una sa ilang “walay kapuslanang” sekular nga mga trabaho sa ilang kinabuhi ug nalinga kaayo niini, ang ilang espirituwal nga kinabuhi nag-antos. Nianang panahona nga sila nagsugod sa pagkabaton ug mga suliran sa pamilya. Nakaamgo sa kahimtang, mihukom ang iyang asawa sa pag-undang sa iyang trabaho ug misugod sa ‘pagkugi’ sa pagbuhat sa buluhaton sa pagsangyaw bahin sa Gingharian sa Diyos sa bug-os panahon.​—Lucas 13:24.

“Dihadiha,” miingon si Antonio, “kami nakamatikod ug dakong kausaban. Nawala na ang kanunay nga away. Ang kalinaw mibalik sa among pamilya.” Giani sa iyang asawa ang kalipay sa pagtabang sa uban nga makabaton sa kahibalo nga nagkahulogang “kinabuhing dayon.” (Juan 17:3) Ang iyang kalipay maoy nakapalihok kang Antonio sa pagtimbangtimbang kon unsa gayod ang tinuod nga bililhon. Ang iyang tinguha sa pag-alagad sa Diyos sa bug-os kalag nakadaog. Iyang gibalibaran ang tanyag nga promosyon sa trabaho ug miretiro gikan sa iyang sekular nga trabaho. Bisan pa nga ang kausaban nagkahulogan sa iyang pagkuhag mas ubos nga trabaho, si Antonio ug ang iyang asawa malipayon sa bug-os kinabuhing pag-alagad, nga nagabuhat sa kabubut-on sa Diyos.

Siyempre, dili tanan ang makahimo sa maong dagkong kausaban. Si Mizumori, ang Hapones nga magbabangko nga gihisgotan sa sinugdan, malipayon sa iyang ministeryo ingong usa ka ansiano diha sa Kristohanong kongregasyon ug sa gihapon nagasuportar sa iyang pamilya sa iyang sekular nga trabaho, diin siya naghupot ug posisyon sa pagkamanedyer. Apan, ang iyang kinabuhi wala na masentro sa iyang sekular nga trabaho apan nasentro na sa pagbuhat sa kabubut-on sa Diyos. Ang iyang sekular nga trabaho mao ang kabuhian nga nagasustento kaniya ug nakahimo kaniya sa pagkab-ot nianang tumonga. Karon ang pagbuhat sa sekular nga trabaho makahuloganon na.

Sa dihang imong ugmaron kining panlantawa maylabot sa imong trabaho, ikaw sa walay duhaduha magkugi “dili sa pag-alagad nga linigoy, ingon sa magapahimuot sa mga tawo lamang, kondili uban sa tim-os nga kasingkasing, nga mahadlokon ni Jehova.” (Colosas 3:22) Ang maong katim-os daw dili layog abot niining maindigong katilingban, kondili, sama sa giadmitir ni Mizumori, pinaagi sa pagpadapat sa maong mga prinsipyo, ikaw mahimong kasaligan ug ginatamod. Bisan pa nga mihunong siya sa pagtrabaho aron mausbawan, kini miabot ra kaniya.​—Proverbio 22:29.

Oo, ang pagsentro sa imong kinabuhi sa pagbuhat sa kabubut-on sa Diyos mao ang yawi sa pagkaplag kalipay diha sa kugi nga pagtrabaho. Maoy hinungdan nga ang maalamong Haring Solomon mitapos: “Ako nasayod nga walay lain nga maayo alang kanila kay sa pagkalipay ug sa pagbuhat sa maayo samtang sila buhi pa; ug nga ang tagsatagsa ka tawo usab mokaon unta ug moinom ug makakitag kaayohan sa tanan niyang kugi nga pagtrabaho. Kini maoy gasa sa Diyos.”​—Ecclesiastes 3:12, 13.

[Hulagway sa panid 7]

Ang pagsentro sa imong panimalaynong kinabuhi diha sa pagtuon sa Bibliya ug sa pagbuhat sa kabubut-on sa Diyos mao ang yawi sa pagtagamtam sa bunga sa kugi nga pagtrabaho