“Ang Tanang Anaa sa Handumanang mga Lubnganan”

MAKAPANEGURO ka ba nga ang kadaghanan sa mga patay mabuhi pag-usab? Oo, sanglit si Jesus miingon: “Ayaw kamo kahibulong niini, tungod kay ang takna nagasingabot nga ang tanang anaa sa handumanang mga lubnganan makabati sa iyang tingog ug manggula.” (Juan 5:28, 29) Matikdi ang pamulong “handumanang mga lubnganan,” nga iyaha ra sa New World Translation. Kini nagapahinumdom kanato sa kahinungdanon sa panumdoman sa Diyos diha sa pagkabanhaw.

Nganong ang kasagarang paghubad, “mga lubong,” wala gamita? Kay si Jesus wala mogamit sa plural sa Gregong pulong nga taʹphos, nga nagkahulogang “lubong” o “lubnganang yuta.” Sa pagkamatuod, dili ang tanan nga namatay ang gilubong sa literal nga mga lubong, o taʹphoi. Bisan pa niana, kadtong si kinsa pagabanhawon sa Diyos anaa sa iyang panumdoman. Kini gipaila sa paggamit ni Jesus sa plural nga dagway sa mne·meiʹon, nga suod nalangkit sa Gregong mga pulong nga ang kahulogan sa pasukaranan maoy “paghinumdom.” (Mateo 16:9; Marcos 8:18) Ang Greek-English Lexicon ni H. G. Liddell ug R. Scott nagahubad sa mne·meiʹon ingong “memorial, handumanan, talaan sa usa ka tawo o butang, . . . lubong, . . . sa malangkobon, monyumento.”

Busa, ang New World Translation nagapalahi sa mga pulong taʹphos ug mne·meiʹon. Mamatikdan usab nga daghang hubad sa Bibliya susamang nagagamit ug duha ka magkalaing pamulong sa Mateo 23:29 diin ang duha ka Gregong pulong makita. Ang Revised Standard Version nagahubad kanila sumala sa mosunod: “Ginabuhatan ninyog mga lubong [usa ka dagway sa taʹphos] ang mga propeta ug gidayandayanan ang mga monyumento [usa ka dagway sa mne·meiʹon] sa mga matarong.”

Ang Maglalalang sa tawo dili mahikalimot sa mga hulad sa kinabuhi sa linibo ka milyong mga tawo nga sukad nabuhi. (Salmo 139:16; 147:4; Mateo 10:30) Sa iyang nahitakdang panahon, pagahinumdoman niya kadtong anaa sa “handumanang mga lubnganan” ug unya banhawon sila diha sa usa ka nahinloang yuta. Pagkamakapadasig ug makalipay nga atong masayran nga ang hingpit nga panumdoman sa Diyos dili gayod mapakyas!—Pinadayag 20:11-13.