Mga Pangutana Gikan sa mga Magbabasa

Kinsa ang Hudiyong mga polis sa templo? Unsay ilang responsibilidad?

Usa sa daghang responsibilidad sa dili saserdoteng mga membro sa tribo ni Levi mao ang pag-alagad ingong mga polis. Ilalom sila sa pagdumala sa kapitan sa templo. Gihisgotan sa Hudiyong magsusulat nga si Philo kon unsay ilang responsibilidad. Siya miingon nga ang pipila niini nga mga Levihanon magbantay sa mismong mga ganghaan (gate) sa templo. Ang uban magbantay atubangan sa sangtuwaryo. Seguroon nila nga kadtong gidid-an sa Balaod dili makasulod sa sangtuwaryo, tinuyo man o dili. Ang uban magpatrolya libot sa templo, nga magturnohay adlaw ug gabii.

Kini nga mga polis puwedeng gamiton sa Sanhedrin. Mao lang ni ang Hudiyong grupo nga gitugotan sa gobyerno sa Roma sa pagdalag armas.

Ang magsusulat nga si Joachim Jeremias nagsaysay nga “ang giingon ni Jesus sa dihang gidakop siya, nga adlaw-adlaw siyang nanudlo sa Templo pero wala dakpa (Mat. 26.55), klarong nagpakita nga mga polis sa Templo ang nangadto aron dakpon siya.” Ang maong magsusulat nagtuo sab nga mga polis sa templo ang gipadala sa miaging higayon aron dakpon si Jesus. (Juan 7:32, 45, 46) Sa ulahi, ang mga polis ug ang ilang kapitan gisugo aron paatubangon sa Sanhedrin ang mga tinun-an ni Jesus. Posible sab nga mga polis sa templo ang nagdala kang apostol Pablo pagawas sa templo.​—Buh. 4:1-3; 5:17-27; 21:27-30.