Ayaw Palabya ang Kamatuoran

TINGALI naamgohan ni Pilato nga sa pagdawat sa kamatuoran may butang mawala kaniya. Ang pagkahimong sumusunod ni Kristo magpasabot unta sa pagdawat sa iyang Pagkahari ug pihong paghimog kalit nga pagbag-o sa moral nga paagi. Bisan pa niana, miingon si Solomon, ang magsusulat sa Proverbio 23:23: “Palita ang kamatuoran ug ayaw pag-ibaligya kini​—ang kaalam ug pagpanton ug salabotan.”

‘Paliton ang kamatuoran?’ mangutana kang matingala. Oo, kay dinhi ang Bibliya motabang kanato sa pag-ila nga ang usa makabaton lamang sa kamatuoran, kaalam, ug salabotan sa usa ka bili! Bisan pa niana, ang kamatuoran mao ang labing bililhong butang nga mahanduraw. Aw, si Solomon mitambag, “Ayaw pag-ibaligya kini!” Kana maoy sama sa pag-ingong walay lain ang lagmit makatumbas niana sa bili.

‘Apan unsa ba ang kamatuoran?’ mangutana ang daghan, nga magasubli sa pangutana ni Pilato. Alang sa daghan karong adlawa ang ‘kamatuoran’ maoy ideya nga dili hisakpan. Palandonga, pananglitan, ang giingon kas-a ni Albert Einstein: “Lisod ang paghatag ug tukmang kahulogan sa pulong ‘siyentipikanhong kamatuoran.’ Busa ang kahulogan sa pulong ‘kamatuoran’ magkalainlain sumala sa kon kaha kita nagahisgot sa usa ka hitabong nasinati, usa ka matematikanhong proposisyon, o usa ka teoriya sa siyensiya sa eksperimento. Ako wala gayod ing nasabtan nga tin-aw sa ‘relihiyosong kamatuoran.’” (Ideas and Opinions, nga gisulat ni Albert Einstein) Apan ang hitabo bang wala maangkon ni Einstein ang kamatuoran nagkahulogang kini imo gayong palabyon? Dili gayod.

Si Jesus matin-awng miingon: “Ako ang dalan ug ang kamatuoran ug ang kinabuhi.” (Juan 14:6) Oo, “ang kamatuoran” nasentro kang Jesu-Kristo ug sa iyang dapit diha sa mga katuyoan ni Jehova nga Diyos ingong Magtutuman sa mga tagna, Manunubos sa makasasalang katawhan, dinihogang Hari sa Gingharian sa Diyos, Hataas nga Saserdote, ug Manlalaglag sa mga daotan. (Roma 15:8; 1 Timoteo 2:5, 6; Juan 3:16; Efeso 1:20-22; Daniel 7:13, 14; Mateo 6:9, 10; Hebreohanon 4:14; Pinadayag 19:11-21; 2 Tesalonica 1:7-9) Nan, sa unsang paagi ang usa “makapalit” niini nga kamatuoran?

“Pagkuhag Kahibalo”

Ang usa mosugod sa pagpalit sa kamatuoran pinaagi sa pagsunod sa mga pulong ni Jesus sa Juan 17:3: “Kini nagkahulogan sa kinabuhing walay kataposan, ang ilang pagkuhag kahibalo kanimo, ang bugtong matuod nga Diyos, ug sa imong gipadala, si Jesu-Kristo.” Sa pagkamatuod, kini mahimong dako kaayong buluhaton kon buhaton kining magainusara. Sa unang siglo, may usa ka Etiopianhong eunuko, o opisyal sa korte, kinsa misulay sa pagbuhat niana. Apan sa pagkakitang ang eunuko misulay sa pagtuon sa usa ka lisod nga tagna sa Bibliya, ang ebanghelistang si Filipe nangutana, “Nahibalo ka ba sa imong ginabasa?” Niana mitubag ang tawo, “Sa pagkamatuod, unsaon ko pagkahibalo, gawas may magagiya kanako?” (Buhat 8:28-31) Tingali kana ang imong pagbati.

Busa ang mga Saksi ni Jehova nagatanyag sa pagtuon sa Bibliya uban kanimo diha sa imong panimalay.a Ang maong mga sesyon walay bayad. “Inyong gidawat nga walay bayad, ihatag nga walay bayad,” matud ni Jesus. (Mateo 10:8) Apan sa pagpalit sa kamatuoran may mawala kanimo sa laing paagi​—kinahanglan niana ang imong panahon ug kahago. Apan, hinumdomi nga si Jesu-Kristo​—nga buhi ug aktibo sa kalangitan​—buot motabang kanimo sa pagkakat-on sa kamatuoran. (Itandi ang Lucas 5:13.) Misaad siya sa iyang unang mga tinun-an nga ang espiritu sa Diyos magagiya kanila “ngadto sa tanang kamatuoran.” (Juan 16:13) Pinaagi sa paglugway, kini ikapadapat usab kanimo. Busa ayaw batia nga ang pagkakat-on sa kamatuoran mahimong lisod kaayo alang kanimo.

Ang seryosong pagtuon sa Bibliya gihimo usab nga labi pang sayon pinaagi sa mga tabang sa pagtuon sa Bibliya nga gigama sa mga Saksi ni Jehova. Ang mga pananglitan lamang sa mga titulo sa pipila nianang mga basahona modasig sa gana sa sinserong mga nangitag kamatuoran: Ang Kamatuoran nga Motultol sa Kinabuhing Dayon, Ikaw Mabuhing Walay Kataposan sa Paraiso sa Yuta, Survival Into a New Earth, Nahiusa sa Pagsimba sa Bugtong Matuod nga Diyos, ug Life​—How Did It Get Here? By Evolution or by Creation? sa pagngalan sa pipila lamang.b

Kining mga basahona sa dili madapigon nagatin-aw sa Kasulatan sa pinulongang sayon hisabtan, nga makapadani dili lamang sa imong katakos sa pangatarongan kondili sa imong kasingkasing usab. Ang tagingting sa kamatuoran dayag niana tungod sa pagkamaminatud-on, panukiduki, ug praktikal nga tambag. Samtang makat-onan nimo ang mga kamatuoran sa Bibliya sa tabang niining mga basahona, imong mapabilhan ang gipasabot ni Jesus sa miingon siya: “Inyong mahibaloan ang kamatuoran, ug ang kamatuoran magapahigawas kaninyo.” (Juan 8:32) Dinhi ang pulong “kamatuoran” nagasakop sa tibuok kahugpongan sa Kristohanong mga pagtulon-an sumala sa hikaplagan karon diha sa sinulat nga Pulong sa Diyos sa kamatuoran​—ang Bibliya. (2 Timoteo 2:15; Efeso 1:13) Nan, nganong ang pagkahibalo sa kamatuoran nagapahigawas kaayo?

Ingong pananglitan, palandonga ang “kahadlok sa kamatayon” nga naghupot sa katawhang “nailalom sa kaulipnan sa tibuok nilang mga kinabuhi.” (Hebreohanon 2:15) Kini matuod bisan pag ang kinabag-ang katawhan nagaangkon may dili-tin-awng paglaom sa kinabuhing may langitnong himaya human mamatay. Apan, ang mga kamatuoran sa Bibliya magapahigawas sa usa gikan nianang daotang mga kahadlok. Hisayran sa usa nga ang mga patay wala mag-antos sa kalayonhong dapit sa pagsakit, kay “ang mga patay . . . walay nahibaloan nga bisan unsa pa.” (Ecclesiastes 9:5, 10; tan-awa usab ang Salmo 146:4 ug Ecclesiastes 3:19, 20.) Ginapakita usab sa Bibliya nga ang tawo walay kinaiyanhong tinguha nga mamatay ug moadto sa langit. Sa kaatbang, ang Diyos ‘nagbutang sa panahong walay katinoan diha sa kasingkasing sa katawhan’; ang normal nga tawo gustong mabuhi sa walay kataposan!​—Ecclesiastes 3:11; tan-awa usab ang Roma 5:12; 6:23.

Kanang tinguhaa mamatuman diha sa ginatawag sa Bibliya nga ang “bag-ong yuta.” (2 Pedro 3:13; itandi ang Mateo 6:9, 10.) Gipaila ni Jesus nga kadtong mahidangat sa kinabuhi sa “bag-ong yuta” makatagamtam sa “Paraiso.” (Lucas 23:43) Ang ubang kasulatan mobulig kanato sa pagpabili nga kini mao unyay usa ka kalibotang walay kasakit ug mga luha! (Pinadayag 21:4; Isaias 11:6-9) Hunahunaa lamang kon sa unsang paagi kini nga paglaom makapausab sa imong kinabuhi! Apan kinahanglan una nga ikaw mokuhag kahibalo.

Isakripisyo ang Garbo

Sa Salmo 25:9 ang Bibliya nagaingon: “Iyang palakton ang mga maaghop sa iyang hudisyal nga hukom, ug iyang tudloan ang mga maaghop sa iyang dalan.” Dili, ang Diyos yanong dili mohatag sa kamatuoran ngadto sa mga tawo nga hambogiro ug mapahitas-on. “Ang Diyos maoy supak sa mga mapahitas-on, apan siya nagahatag sa dili-takos nga kalulot ngadto sa mga mapaubsanon.” (1 Pedro 5:5) Lagmit si Poncio Pilato labing menos natingala bahin sa kamatuoran. Apan ang karaang mga magsusulat nagahubit kang Pilato ingong usa ka tawong hambogiro. Alang sa mga Romano, ang mga Hudiyo maoy katawhang dulumtanan nga may katingad-ang relihiyon nga malipay silang moyatak! Ang garbo ug ang politikanhong ambisyon maorag nahimong mga kapandolan ni Pilato.​—Proverbio 16:18.

Daghan karong adlawa susamang natingala bahin sa mensaheng ginadala sa mga Saksi ni Jehova. Ugaling, tingali ilang namatikdang ang mga Saksi ni Jehova kadaghanan kabos lamang, nga ang ilang kasarangang mga tigomanan (mga Kingdom Hall) dili ikatandi sa maartihong mga simbahan sa Kakristiyanohan, nga diyutay ra sa mga saksi ang makapasigarbo sa hataas nga edukasyon. Apan matikdi ang ginaingon sa Bibliya sa 1 Corinto 1:26-29: “Kay inyong nakita ang iyang pagtawag kaninyo, mga igsoon, nga dili daghan kaninyo nga maalamon sa unodnong paagi ang gitawag, dili daghan nga gamhanan, dili daghan ang may hamiling pagkatawo; apan gipili sa Diyos ang binuang nga mga butang sa kalibotan, aron iyang pakaulawan ang mga tawong maalamon; ug gipili sa Diyos ang mahuyang nga mga butang sa kalibotan, aron iyang pakaulawan ang kusganong mga butang; ug gipili sa Diyos ang dili-dungganong mga butang sa kalibotan ug ang mga butang nga tinamay, ang mga butang nga wala magalungtad, aron iyang wagtangon ang mga butang nga nagalungtad, aron walay unod ang makapasigarbo sa panan-aw sa Diyos.”

Busa ang pagkakat-on gikan sa maong ‘mga timawa’ tingali makawala sa imong garbo. Apan kana ba hataas kaayong bili nga ibayad sa kamatuoran?

Pagpadapat sa Kahibalo

Ang yanong pagbutang sa hunahuna sa impormasyon​—bisan ang kamatuoran​—dili pa igo. Kana ang hinungdang kita giagda nga ‘palita ang kaalam.’ (Proverbio 23:23) Ang kaalam mao ang pagpadapat sa kahibalo! Ngani si Solomon miingong “ang kaalam mao ang pangunang butang.” (Proverbio 4:5-7) Oo, unsay kaayohan sa kahibalo kon kini dili ipadapat? Busa tapos hikat-oni ang mga dalan, mga sugo, mga kasugoan, mga pahinumdom, ug tambag sa Diyos, tun-i ang pagpadapat niini diha sa imong kinabuhi. “Ang kaalam mapamatud-ang matarong pinaagi sa binuhatan niini,” matud ni Jesus.​—Mateo 11:19.

Gisalikway ni Poncio Pilato ang kamatuoran. Apan, dili kinahanglang himoon nimo kanang sayopa. Ang pagtugot nga palabyon nimo ang kamatuoran tungod sa imong garbo, ambisyon o gugma sa dili-kasulatanhong bisyo mao gayoy binuang. Manig-ingon sa salmista nga miampo, “Pasabta ako, aron ako makapadayong buhi.” (Salmo 119:144) Oo, ang usa nga andam mobayad sa bili sa pagkabaton sa kamatuoran ug kaalam “makapadayong buhi.” Kay ang usang magapalit niana “makakaplag gayod ug kinabuhi, ug makabaton sa maayong kabubut-on ni Jehova.”​—Proverbio 8:35.

Matud sa usa ka lalaki nga misugod sa pagtuon sa Bibliya uban sa mga Saksi ni Jehova: “Usa ka panalangin ang pag-ingong ang kamatuoran nag-usab sa among mga kinabuhi.” Kini makausab usab sa imoha. Busa ayaw palabya ang kamatuoran! Pahimusli kining talagsaong higayon sa pagpalit sa kamatuoran, kaalam, ug salabotan. Dili ka gayod magbasol nga gihimo nimo kana.

[Mga footnote]

[Hulagway sa panid 4]

Mahimong tungod sa garbo gipalabay ni Poncio Pilato ang kamatuoran