Mahimong Higala sa Diyos sa Walay Kataposan!

Nagkinahanglag paningkamot aron makabatog usa ka higala; nagkinahanglag paningkamot aron makahupot ug usa ka higala. Ang imong mga paningkamot aron mahimo ug magpabiling higala sa Diyos dagaya unya nga panalanginan. Matod ni Jesus sa mga mituo kaniya: “Ang kamatuoran magpagawas kaninyo.” (Juan 8:32) Unsay ipasabot niana?

Ikaw makatagamtam ug kagawasan karon. Ikaw mapagawas gikan sa bakak nga mga pagtulon-an ug kabakakan nga gipakaylap ni Satanas. Ikaw mapagawas gikan sa pagkawalay-paglaom nga maoy nagtugob sa kinabuhi sa milyonmilyong tawo nga wala makaila kang Jehova. (Roma 8:22) Ang mga higala sa Diyos may kagawasan pa gani gikan sa “kahadlok sa kamatayon.”​—Hebreohanon 2:14, 15.

Ikaw makatagamtam ug kagawasan sa bag-ong kalibotan sa Diyos. Pagkakahibulongang kagawasan ang imong matagamtam sa umaabot! Sa Paraisong yuta, aduna na unyay kagawasan sa gubat, sakit, ug krimen. Kagawasan sa kakabos ug gutom. Kagawasan sa pagkatigulang ug kamatayon. Kagawasan sa kahadlok, panglupig, ug inhustisya. Nag-ingon ang Bibliya bahin sa Diyos: “Imong ginabukhad ang imong kamot ug ginatagbaw ang tinguha sa tanang buhing butang.”​—Salmo 145:16.

Ang mga higala sa Diyos mabuhi sa walay kataposan. Ang walay-kataposang kinabuhi maoy bililhong gasa nga ihatag sa Diyos ngadto sa tanang magtinguha sa pagpakighigala kaniya. (Roma 6:23) Hunahunaa lamang kon unsay kahulogan sa walay-kataposang kinabuhi alang kanimo!

Ikaw makahigayon unya sa pagbuhat ug daghang butang. Tingali gusto nimong mokat-on sa pagtugtog ug usa ka instrumento sa musika. O kaha gusto nimong mokat-on sa pagdibuho o mahimong usa ka panday. Lagmit gusto nimong mokat-on bahin sa mga mananap o mga tanom. O lagmit gusto nimong mobiyahe ug motan-aw sa nagkalainlaing kayutaan ug mga tawo. Ang pagbaton ug kinabuhing walay kataposan maoy magpaposible niining tanang butang!

Ikaw makahigayon unya sa pagbaton ug daghang higala. Ang pagkinabuhi sa walay kataposan magpaposible unya aron mailaila ang daghan pang uban nga nahimong mga higala sa Diyos. Imong masayran ang ilang mga kahanas ug mga hiyas, ug mahimo usab sila nga imong mga higala. Ikaw mahigugma kanila, ug sila mahigugma kanimo. (1 Corinto 13:8) Ang pag-angkon sa walay-kataposang kinabuhi maghatag kanimog panahon sa pagpakighigala sa matag usa dinhi sa yuta! Labing maayo sa tanan, ang imong panaghigalaay uban kang Jehova molig-on pa gayod inigpanglabay sa mga siglo. Hinaot nga ikaw mahimong higala sa Diyos sa walay kataposan!