Kinabuhi ug Ministeryo ni Jesus

Ang Isyu sa Pagkaamahan

SA PANAHON sa Piyesta sa mga Balongbalong sa 32 W.K.P., ang panaghisgot ni Jesus uban sa Hudiyohanong mga pangulo dugang nga nagkainit. “Nasayod ako nga kamo kaliwat ni Abraham,” miingon si Jesus, “apan naninguha kamo sa pagpatay kanako, tungod kay ang akong pulong walay kauswagan diha kaninyo. Ako nagsulti sa nakita ko sa akong Amahan; ug kamo nagabuhat sa nadungog ninyo sa inyong kaugalingong amahan.”

Bisag wala ipaila ang ilang amahan, gipatin-aw ni Jesus nga ang ilang amahan lahi sa iyang amahan. Wala mahibalo kon kinsang amahana ang anaa sa hunahuna ni Jesus, ang mga Hudiyohanong pangulo mitubag: “Si Abraham mao ang among amahan.” Sila nagtuo nga sila dunay samang pagtuo kang Abraham nga higala sa Diyos.

Apan, nakuratan sila sa tubag ni Jesus: “Kon mga anak kamo ni Abraham, buhata ninyo ang gibuhat ni Abraham.” Sa pagkatinuod, sundon sa tinuod nga anak ang iyang amahan. “Apan karon naninguha kamo sa pagpatay kanako,” miingon si Jesus, “ang tawo nga nagsugilon kaninyo sa kamatuoran nga akong nadungog gikan sa Diyos. Wala magbuhat niini si Abraham.” Busa si Jesus miingon na usab: “Gibuhat ninyo ang mga buhat sa inyong amahan.”

Wala gihapon sila makasabot kon kinsa ang gihisgotan ni Jesus. Sila miingon nga dili sila mga anak nga pinaangkan ni Abraham, nag nagaingon: “Kami wala mangatawo gikan sa pakighilawas.” Busa, nangangkon nga tinuod nga mga magsisimba sama kang Abraham, sila mipahayag: “Kami usa rag Amahan, ang Diyos.”

Apan ang Diyos ba gayod ang ilang tinuod nga Amahan? “Kon ang Diyos mao pa ang inyong Amahan,” mitubag si Jesus, “higugmaon unta ninyo ako, kay migula ug mianhi man ako gikan sa Diyos. Ako wala moanhi sa akong kaugalingong pagbulot-an, kondili sa pagbulot-an sa Usa nga nagpadala kanako. Nganong dili man kamo makasabot sa akong gisulti?”

Naningkamot si Jesus sa pagpakita niining mga pangulo sa relihiyon sa mga resulta sa ilang pagsalikway kaniya. Apan karon prangka siyang miingon: “Kamo gikan sa inyong amahan nga mao ang Yawa, ug ang inyong tinguha mao ang pagtagbaw sa mga pangibog sa inyong amahan.” Unsang matanga sa amahan ang Yawa? Gipaila siya ni Jesus nga mamumuno ug miingon usab: “Siya bakakon ug amahan sa bakak.” Busa si Jesus mitapos: “Siya nga gikan sa Diyos mamati sa mga pulong sa Diyos. Maoy hinungdan nga kamo dili mamati, tungod kay kamo dili gikan sa Diyos.”

Nasuko tungod sa paghukom ni Jesus, ang mga Hudiyo mitubag: “Dili ba husto kami sa among pag-ingon nga ikaw Samarianhon ug giyawaan?” Ang terminong “Samarianhon” gigamit ingong ekspresyon sa kasuko ug pagtamay, kay gikaligotgotan man sa mga Hudiyo ang mga Samarianhon.

Wala magtagad sa pasipala bahin sa pagkahimong Samarianhon, si Jesus mitubag: “Ako wala hingyawai, kondili ako nagapasidungog sa akong Amahan, ug kamo nagapakaulaw kanako.” Mipadayon, mihatag si Jesus ug makapukawng saad: “Kon adunay magatuman sa akong pulong, siya dili gayod makasinatig kamatayon.” Siyempre, si Jesus wala magpasabot nga ang tanan nga mosunod kaniya sa literal dili na gayod makasinatig kamatayon. Hinunoa, ang iyang gipasabot nga sila dili makasinatig walay kataposang kalaglagan, o “ikaduhang kamatayon,” nga gikan niini wala na gayoy pagkabanhaw.

Apan, literal nga gisabot sa mga Hudiyo si Jesus. Busa, sila miingon: “Karon napiho na gayod namo nga ikaw giyawaan. Si Abraham namatay, maingon man ang mga propeta; apan ikaw miingon, ‘Kon adunay magatuman sa akong pulong, siya dili gayod makasinatig kamatayon.’ Labaw ka pa ba sa atong amahan nga si Abraham, nga namatay? Ug ang mga propeta nangamatay. Nagpakakinsa ka man?”

Niining tanang panaghisgot, dayag nga gipasiugda ni Jesus niining mga tawhana ang kamatuoran nga siya mao ang gisaad nga Mesiyas. Apan inay gitubag sa direkta ang ilang pangutana bahin sa iyang pagkatawo, si Jesus miingon: “Kon pasidunggan ko ang akong kaugalingon, ang akong kadungganan walay hinungdan. Ang nagapasidungog kanako mao ang akong Amahan, ang inyong giingon nga mao ang iyang Diyos; apan wala man lagi kamo makaila kaniya. Apan ako nakaila kaniya. Ug kon nag-ingon pa ako nga ako wala makaila kaniya nan bakakon unta ako sama kaninyo.”

Mipadayon, si Jesus naghisgot na usab sa matinumanong Abraham, nga nag-ingon: “Ang inyong amahan nga si Abraham nalipay nga siya makakita sa adlaw sa akong pag-anhi, ug siya nakakita niini ug nagsadya.” Oo, pinaagi sa mata sa pagtuo, nagpaabot si Abraham sa pag-abot sa gisaad nga Mesiyas. Wala makatuo, ang mga Hudiyo mitubag: “Wala pa makalim-an ka tuig ang imong kagulangon, ug nakakita ka na kang Abraham?”

“Sa pagkatinuod magaingon ako kaninyo,” mitubag si Jesus, “sa wala pa mitungha si Abraham, mao na ako.” Siyempre, si Jesus nagpasabot sa iyang unang tawhanong paglungtad ingong gamhanang espiritu nga persona sa langit.

Nasuko sa pangangkon ni Jesus nga naglungtad na siya una pa kang Abraham, namunit ug mga bato ang mga Hudiyo ug gibato siya. Apan siya mitago ug migawas sa templo nga wala masamdi. Juan 8:37-59; Pinadayag 3:14; 21:8.

◆ Sa unsang paagi gipakita ni Jesus nga siya ug ang iyang mga kaaway lahi ug mga amahan?

◆ Unsay kahulogan sa pagtawag sa mga Hudiyo kang Jesus nga usa ka Samarianhon?

◆ Sa unsa nga diwa nga nagpasabot si Jesus nga ang iyang mga sumusunod dili gayod makasinatig kamatayon?